Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
MAY 6-12
UMCEBO LOSEVINI LANKULUNKULU | 2 KHORINTE 4–6
“Asipheli Emandla”
(2 Khorinte 4:16) Ngako-ke asipheli emandla, kodvwa ngisho nobe umuntfu lesinguye ngephandle ahhohloka, umuntfu lesinguye ngekhatsi uvuselelwa malanga onkhe.
w04 8/15 25 ¶16-17
Siyakhatsala Kodwa Asipheli Emandla
16 Kuliciniso kutsi kunakekela buhlobo lesinabo naNkulunkulu kubaluleke kakhulu. Ngisho nobe sinebuhlobo lobusedvute naNkulunkulu Jehova kungenteka sikhatsale emtimbeni, kodvwa angeke sikhatsale kumkhonta. Jehova “ubapha emandla labo labakhatsele, awandzise emandla alababutsakatsaka.” (Isaya 40:28, 29) Umphostoli Pawula lowatibonela yena kutsi lamavi aliciniso wabhala watsi: “Asipheli emandla, kodvwa ngisho nobe umuntfu lesinguye ngephandle ahhohloka, umuntfu lesinguye ngekhatsi uvuselelwa malanga onkhe.”—2 Korinte 4:16.
17 Naka inkhulumo letsi “malanga onkhe.” Loku kuveta kutsi kufanele siwasebentise malanga onkhe emalungiselelo aJehova. Sitfunywa selivangeli lesesikhonte ngekwetsembeka iminyaka lengu-43 besikhatsala siphindze sidvumateka ngaletinye tikhatsi. Kodvwa asizange siphelelwa ngemandla. Lodzadze utsi: “Besengikwenta umkhuba kusheshe ngivuke, kute ngibe nesikhatsi sekuthantaza kuJehova futsi ngifundze liVi lakhe ngaphambi kwekutsi ngente nobe ngabe ngumuphi umsebenti. Loluhlelo lungisitile ngakhona kucinisela kuze kube ngunyalo.” Singatsembela emandleni aJehova nangabe sithantaza kuye “malanga onkhe” futsi sicabangisisa ngebuntfu bakhe lobuhle kanye nangetetsembiso takhe.
(2 Khorinte 4:17) Ngobe nanobe kuhlupheka kukwesikhashana futsi kumelula, kitsi kuveta inkhatimulo lebendlula khashane bukhulu nalehlala phakadze;
it-1 724-725
Kucinisela
Kubalulekile kutsi njengemaKhristu singalahlekelwa litsemba letfu lekuphila phakadze sesite sono. Ngisho nobe labasitingelako bangasibulala, kodvwa ngeke basemuke litsemba letfu. (Rom. 5:4, 5; 1 Thes. 1:3; Semb. 2:10) Kuhlupheka lokukhona nyalo kulite, nakucatsaniswa nenjabulo lesitayitfola nasekufezeke tetsembiso taJehova. (Rom. 8:18-25) Konkhe kuhlupheka, ngisho noma kungaba kukhulu kangakanani ngaletinye tikhatsi, sikubona “kukwesikhashana futsi kumelula” nasicabanga ngelikusasa laphakadze lelisembikwetfu. (2 Khor. 4:16-18) Nangabe umuntfu akhumbula kutsi letinkinga lesinato tesikhashana futsi abambelele etsembeni letfu, ngeke akhatsale bese akasetsembeki kuJehova Nkulunkulu.
(2 Khorinte 4:18) futsi sihlale sibuke tintfo letingabonwa, hhayi letibonwako. Ngobe tintfo letibonwako tesikhashana, kodvwa tintfo letingabonwa tihlala phakadze.
Kufunisisa Umcebo EVini LaNkulunkulu
(2 Khorinte 4:7) Kodvwa sinalomcebo etitjeni telubumba, kuze emandla lamakhulu kakhulu abe aNkulunkulu, angabi etfu.
“Yenta Lokujabulisa Jehova”
David Splane lolilunga leSigungu Lesibusako wakhuluma ngalesihloko lesitsetfwe emBhalweni. (2 Korinte 4:7) Uyini lomcebo? Lwati yini nobe kuhlakanipha? Waphendvula watsi: “Cha,” umcebo umphostoli Pawula labekakhuluma ngawo ‘ngumsebenti’ ‘wekwenta liciniso libonakale.’ (2 Khorinte 4:1, 2, 5) Umzalwane Splane wakhumbuta bafundzi kutsi tinyanga letisihlanu labaticitse bafundza betibalungiselela kwenta sabelo lesibalulekile kulomsebenti wekushumayela. Kufanele basatise lesabelo.
Umzalwane Splane wachaza kutsi ‘titja telubumba’ timelela imitimba yetfu yenyama. Bekachatsanisa titja letentiwe ngelibumba naleto letentiwe ngeligolide. Titja teligolide atisetjentiswa ngaso sonkhe sikhatsi. Ngakulolunye luhlangotsi, titja telibumba tentelwe kutsi tisebente. Nangabe sifake umcebo esitjeni seligolide, singahle sinake kakhulu lesitja kwendlula indlela lesinaka ngayo lomcebo. Umzalwane Splane wabese utsi: “Nani bafundzi anifuni kutsi kunakwe nine njengetitfunywa telivangeli. Kodvwa nifuna kucondzisa bantfu kuJehova. Nititja telibumba letitfobekile.”
(2 Khorinte 6:13) Kuze nani nente lokufanako, ngikhuluma nani shengatsi ngikhuluma nebantfwabami, nani vulani tinhlitiyo tenu.
w09 11/15 21 ¶7
Chubeka Ubatsandza Bazalwane
7 Senta njani tsine? Yini lesingayenta kute sikhombise kutsi siyabatsandza bazalwane betfu? Kulula kutsi bantfu lababontsanga nobe labavela endzaweni yinye kutsi bajwayelane. Nalabo labatsandza kwekutijabulisa lokufanako bavamise kucitsa sikhatsi lesinyenti ndzawonye. Kodvwa nangabe kunetintfo lesitsandza kutenta nalamanye emaKhristu tisenta singakhoni kwakha bungani nalamanye emaKhristu, kufanele sitiyekele kute sakhe bungani nabo. Kukuhlakanipha kutibuta kutsi: ‘Nangiya emsebentini wekushumayela nobe ngitijabulisa, ngikutfola kulukhuluni yini kukwenta nebazalwane nabodzadze labangasibo bangani bami? NangiseHholweni LeMbuso, ngiyabakhweshela yini labo labasandza kungena enhlanganweni yaJehova ngobe ngikholelwa kutsi kusafanele ngibe nesikhatsi sekubabukisisa kutsi bangaba yini bangani bami nobe cha? Ngibabingelela bonkhe yini ebandleni, labadzala nalabancane?’
Kufundvwa KweliBhayibheli
(2 Khorinte 4:1-15) Njengobe sinalomsebenti ngenca yemusa lesawuboniswa, asipheli emandla; 2 kodvwa sitilahlile tintfo tebumnyama naletilihlazo, asitiphatsi ngebucili, asilisontsi nelivi laNkulunkulu, kodvwa ngekwenta liciniso libonakale siba sibonelo kubo bonkhe bonembeza bebantfu emehlweni aNkulunkulu. 3 Nangabe tindzaba letimnandzi lesitimemetelako tifihlekile, tisuke tifihleke kulababhubhako, 4 lokungulabangakholwa, labo nkulunkulu walelive lavale tingcondvo tabo, kuze kungetukhanya kukhanya kwenkhatimulo yetindzaba letimnandzi letimayelana naKhristu, longumfanekiso waNkulunkulu. 5 Ngobe asishumayeli ngatsi, kodvwa sishumayela ngaKhristu Jesu kutsi uyiNkhosi, nekutsi ngenca yakhe tsine sitinceku tenu. 6 Nkulunkulu nguye lowatsi: “Kukhanya akukhanye ebumnyameni,” futsi Yena ukhanye etinhlitiyweni tetfu kuze atente tikhanye inkhatimulo yelwati lwaKhe ngebuso baKhristu. 7 Kodvwa sinalomcebo etitjeni telubumba, kuze emandla lamakhulu kakhulu abe aNkulunkulu, angabi etfu. 8 Sicindzeteleke ngato tonkhe tindlela, kodvwa hhayi kutsi asisakwati kunyakata; sicakekile, kodvwa hhayi kutsi sesite indlela yekuphuma; 9 siphatfwa kabi, kodvwa asilahlwa; sijikwa phansi, kodvwa asicedvwa. 10 Emitimbeni yetfu sihlale sibeketelela kuphatfwa kabi lokusenta sibe sengotini yekufa njengaJesu, kuze kuphila kwakhe kutewubonakala emitimbeni yetfu. 11 Ngobe ngenca yaJesu, tsine lesiphilako sihlala sisengotini yekufa, kuze kuphila kwakhe kutewubonakala emitimbeni yetfu lefako. 12 Ngenca yaloko tsine siyafa, kodvwa loko kwenta kutsi nine niphile. 13 Njengobe sinemoya wekukholwa lofana naloyo lokwabhalwa ngawo nakutsiwa: “Ngakholwa, ngako ngakhuluma,” natsi siyakholwa ngako siyakhuluma, 14 futsi siyati kutsi loyo lowavusa Jesu utasivusa natsi njengaye, bese usetfula sikanye nani. 15 Ngobe tonkhe letintfo tentelwe nine, khona kwandza kwemusa waNkulunkulu kutewukhula kakhulu ngobe labanyenti bayabonga kuze yena akhatinyuliswe.
MAY 13-19
UMCEBO LOSEVINI LANKULUNKULU | 2 KHORINTE 7–10
Umsebenti Wetfu Wekuniketa Lusito
(2 Khorinte 8:1-3) Bazalwane, sifuna nati ngemusa waNkulunkulu loboniswe emabandla aseMasedoniya, 2 kutsi ngesikhatsi babhekene nekuvivinywa lokukhulu ngephansi kwekuhlupheka, injabulo yabo lenkhulu nekweswela kwabo lokukhulu kwandzisa umcebo wekupha kwabo. 3 Ngobe loku bakwenta ngekwaloko lebebanako, ecinisweni bekungetulu kwaloko lebebanako,
w98 11/1 25 ¶1
“Nkulunkulu Utsandza Umuntfu Lopha Ajabulile”
Ekucaleni, Pawula watjela baseKhorinte ngebantfu baseMasedoniya lebebasibonelo sekusita labanye ngekutimisela. Pawula watsi: “Ngesikhatsi babhekene nekuvivinywa lokukhulu ngephansi kwekuhlupheka, injabulo yabo lenkhulu nekweswela kwabo lokukhulu kwandzisa umcebo wekupha kwabo.” Bantfu baseMasedoniya bebangadzingi kutjelwa kute baphe labanye. Nanobe kunjalo, Pawula watsi: “Bebachubeka basincengisisa ngekutitsandzela kute batfole lilungelo lekupha.” Kupha ngekujabula lobekwentiwa bantfu baseMasedoniya bekuyintfo lebeyimangalisa nasicabanga kutsi nabo ‘bebeswele kakhulu.’—2 Khorinte 8:2-4.
“Umsebenti Wekuniketa Lusito”
NGEMNYAKA wabo-46 C.E., iJudiya beyihlaselwe yindlala. Bafundzi baKhristu labangemaJuda lebebahlala lapho bebete ngisho nemali yekutsenga kudla lokuncane lebekubita kakhulu ngaleso sikhatsi. Bekubonakala ebusweni babo kutsi bafile yindlala. Nanobe kunjalo, bebatawubona indlela Jehova lebekatabasekela ngayo, lokuyindlela lebeyingazange ibonwe ngisho nangumunye webafundzi baKhristu. Besekutawenteka?
(2 Khorinte 8:4) futsi bebachubeka basincengisisa ngekutitsandzela kute batfole lilungelo lekupha baphindze bahlanganyele nasemsebentini lowentelwa labangcwele.
Umsebenti Wekuniketa Lusito
4 Encwadzini yakhe yesibili layibhalela libandla laseKhorinte, Pawula wachaza kutsi emaKhristu anemisebenti lemibili. Nanobe lencwadzi Pawula abeyibhalele emaKhristu lagcotjiwe, lamuhla, lamavi akhe asebenta ‘nakuletinye timvu’ taKhristu. (Joh. 10:16) Incenye yekucala yemsebenti wetfu ‘ngumsebenti wekubuyisana,’ lokungumsebenti wekushumayela newekufundzisa. (2 Khor. 5:18-20; 1 Thim. 2:3-6) Lena lenye incenye ifaka ekhatsi umsebenti lesiwentela emakholwa lesikanye nawo. Kuloku, Pawula abekhuluma ‘ngemsebenti wekusita.’ (2 Khor. 8:4) Lamavi latsi ‘umsebenti wekubuyisana’ nalatsi ‘umsebenti wekusita’ ahumusha ligama lesiGriki lelitsi di·a·ko·niʹa. Kungani loko kubalulekile?
5 Ngekutsi asebentise leligama linye lesiGriki kulemisebenti lemibili, Pawula bekahlobanisa umsebenti wekuniketa lusito naleminye imisebenti lebeyentiwa ebandleni lebuKhristu. Ngaphambilini bekatsite: “Kunetinkonzo letehlukahlukene letentiwako, kodvwa iNkhosi yinye; futsi kunetinhlobo letehlukahlukene temisebenti, . . . Kepha yonkhe lemisebenti yentiwa ngumoya munye.” (1 Khor. 12:4-6, 11) Ecinisweni, Pawula abefananisa imisebenti leyehlukahlukene leyentiwa ebandleni ‘nemsebenti longcwele.’ (Rom. 12:1, 6-8) Kungaleso sizatfu abona kufanele kutsi asebentise lesinye sikhatsi sakhe kuze ‘asite labangcwele.’—Rom. 15:25, 26.
6 Pawula wasita baseKhorinte babona kutsi kungani kuniketa lusito bewuyincenye yemsebenti labawentela Jehova kanye nekumkhonta. Ase unake lamavi akhe: EmaKhristu lasita labanye, enta njalo ngobe ‘alalela tindzaba letimnandzi latimemetelako, letimayelana naKhristu.’ (2 Khor. 9:13) Ngenca yesifiso sawo sekusebentisa timfundziso taKhristu, emaKhristu asita emakholwa lakanye nawo. Pawula watsi imisebenti yemusa emaKhristu layentela labanye bazalwane, ikubonakaliswa ‘kwemusa waNkulunkulu lomkhulu.’ (2 Khor. 9:14; 1 Phet. 4:10) Ngesikhatsi sikhuluma ngekusita bazalwane betfu labeswele, lokufaka ekhatsi nemsebenti wekuniketa lusito, Sicongosekulindza saDecember 1, 1975, satsi: “Akukafaneli singabate kutsi Jehova Nkulunkulu neNdvodzana yakhe, Jesu Khristu, bawutsatsa njengalobaluleke kakhulu lomsebenti.” Kuyacaca kutsi umsebenti wekuniketa lusito ungumsebenti longcwele.—Rom. 12:1, 7; 2 Khor. 8:7; Heb. 13:16.
(2 Khorinte 9:7) Nguloyo naloyo akente njengobe ancumile enhlitiyweni yakhe, hhayi ngekutitila nobe ngekucindzetelwa, ngobe Nkulunkulu utsandza umuntfu lopha ajabulile.
Indlela Imisebenti YeMbuso Lesekelwa Ngayo Ngekwetimali
10 Kwekucala, senta iminikelo yekutitsandzela ngobe sitsandza Jehova futsi sifisa kwenta ‘tintfo letijabulisako emehlweni akhe.’ (1 Joh. 3:22) Jehova uyajabula ngesikhonti lesipha ngekukhululeka ngalokusuka enhlityweni yaso. Ase sihlole loko umphostoli Pawula lakusho mayelana nekupha lokwentiwa ngemaKhristu. (Fundza 2 Khorinte 9:7.) UmKhristu weliciniso akaphi ngekungatsandzi nobe aphocelelwa. Kunaloko, upha ngobe “ancumile enhlitiyweni yakhe” kwenta njalo. Lokusho kutsi upha ngemuva kwekuhlolisisa sidzingo nendlela langasigcwalisa ngayo. Umuphi lonjalo uyatsandzeka kuJehova ngobe “Nkulunkulu utsandza umuntfu lopha ajabulile.” Lelinye lihumusho litsi: “Nkulunkulu uyabatsandza bantfu labatsandza kupha.”
Kufunisisa Umcebo EVini Lankulunkulu
(2 Khorinte 9:15) Akabongwe Nkulunkulu ngalesipho sakhe lesingachazeki.
‘Sipho Lesingachazeki’ SaNkulunkulu Asikukhutsate Kutsi Ulingise Lutsandvo Lwakhe
2 Pawula bekati kutsi umhlatjelo waJesu usicinisekiso sekutsi tonkhe tintfo letinhle letetsenjiswa nguNkulunkulu titawugcwaliseka. (Fundza 2 Khorinte 1:20.) Loku kusho kutsi ‘sipho lesingachazeki’ saNkulunkulu sifaka ekhatsi umhlatjelo waJesu nabo bonkhe buhle nelutsandvo Jehova lasikhombisa lona. Kumatima kusichaza ngendlela lecondzakalako lesipho. Kufanele sitive njani ngalesipho lesikhetsekile? Kufanele sisikhutsate kutsi senteni njengobe silungiselela Sikhumbuto sekufa kwaKhristu lesitawuba ngaLesitsatfu March 23, 2016?
(2 Khorinte 10:17) “Kodvwa lotigabatisako, akatigabatise ngaJehova.”
g99 7/8 20-21
Kukabi Yini Kutigabatisa?
EmiBhalweni YemaKhristu YesiGriki, sento lesitsi kau·khaʹo·mai, nasihunyushwa sisho kutigcabha, kutikhukhumeta, kutigabatisa futsi singasetjentiswa ngemcondvo lokabi nobe lokahle. Sibonelo saloko kutsi Pawula utsi ‘singatikhukhumeta ngenca yelitsemba lenkhatimulo yaNkulunkulu.’ Uphindze atsi: “Lotigabatisako, akatigabatise ngaJehova.” (Roma 5:2; 2 Khorinte 10:17) Loku kusho kutigcabha ngaJehova longuNkulunkulu wetfu, lokuyindlela lesitiva ngayo futsi lesenta siphakamise libito lakhe lelihle.
Kufundvwa KweliBhayibheli
(2 Khorinte 7:1-12) Bazalwane labatsandzekako, njengobe sinaletetsembiso, asitihlante kuko konkhe kungcola kwenyama nekwemoya, siphelelise bungcwele betfu ngekwesaba Nkulunkulu. 2 Semukeleni etinhlitiyweni tenu. Kute lesimphetse kabi, kute lesimonile, futsi kute nalesisitakele ngaye. 3 Loku angikusho ngenhloso yekuninyembenya. Ngobe ngishito ekucaleni kutsi nine nisetinhlitiyweni tetfu kute sitewukufa kanye kanye futsi siphile kanye kanye. 4 Nangikhuluma nani ngikhuluma ngekukhululeka lokukhulu. Ngitigabatisa kakhulu ngani. Ngigcwele indvudvuto, futsi ngiphuphuma injabulo kuko konkhe kuhlupheka kwetfu. 5 Ecinisweni ngesikhatsi sifika eMasedoniya, imitimba yetfu ayizange ikutfole kuphumula, kodvwa besisolo sihlupheka ngato tonkhe tindlela—bekulwiwa ngephandle, futsi kunekwesaba ngekhatsi. 6 Nanobe kunjalo, Nkulunkulu lodvudvuta labo labephukile etinhlitiyweni, wasidvudvuta natsi ngekuba khona kwaThithusi; 7 kodvwa hhayi ngekuba khona kwakhe kuphela, kepha nangendvudvuto labeyitfole ngenca yenu, njengobe efike wasibikela ngesifiso senu sekungibona, ngebuhlungu lobukhulu lebenibuva, nangekukhatsateka kwenu ngami, kangangekutsi ngajabula kakhulu. 8 Nanobe kungenteka kutsi nganivisa buhlungu ngencwadzi yami, angitisoli ngaloko. Ngisho nobe kungenteka kutsi ngatisola ekucaleni, (ngiyabona kutsi lencwadzi yanivisa buhlungu, kodvwa kwaba kwesikhashana,) 9 nyalo sengiyajabula, hhayi ngenca yekutsi nganivisa buhlungu, kodvwa ngenca yekutsi kuva kwenu buhlungu kwanenta naphendvuka. Ngobe neva buhlungu ngekuvumelana nentsandvo yaNkulunkulu, kuze singanilimati. 10 Kuva buhlungu ngekuvumelana nentsandvo yaNkulunkulu kuholela ekuphendvukeni kube kusindziswa, lokuyintfo longeke utisole ngayo; kodvwa kuva buhlungu ngendlela yelive kuholela ekufeni. 11 Bukani-ke kutsi kudzabuka kwenu ngekuvumelana nentsandvo yaNkulunkulu kuvete kutimisela lokungakanani kini, kutihlenga, intfukutselo, kwesaba, sifiso lesihle, kukhutsala, kanye nekulungisa lokubi. Kuto tonkhe tintfo nitivete nimsulwa kulendzaba. 12 Nanobe nganibhalela, loko angizange ngikwentele loyo lobekonile, nobe loyo lobekoniwe, kodvwa ngabhala kuze embikwaNkulunkulu kutimisela kwenu kubonakale emkhatsini wenu.
MAY 20-26
UMCEBO LOSEVINI LANKULUNKULU | 2 KHORINTE 11-13
“‘Linyeva Enyameni’ YaPawula”
(2 Khorinte 12:7) ngenca nje yekwemukela letembulo. Ngako-ke kuze ngingativa ngiphakeme kakhulu, ngafakwa linyeva enyameni, ingilosi yaSathane, khona litewuchubeka lingilimata kute ngingaphakanyiswa kakhulu.
w08 6/15 3-4
Kuba Nemandla Ngetulu Kwebutsakatsaka
Lesinye sisebenti lesitsembekile sacela Jehova kutsi asuse “linyeva enyameni” lebeliyinkinga lemhluphako. Umphostoli Pawula wancenga Nkulunkulu katsatfu kutsi asuse linyeva enyameni yakhe. Nobe ngabe bekuyini, njengelinyeva leliphukele enyameni, bekwenta Pawula angasajabuli ekukhonteni Jehova. Pawula walifananisa nekushaywa kanyenti. Jehova wamphendvula watsi: “Umusa wami ukwenele; ngobe emandla ami entiwe aphelela ebutsakatsakeni.” Jehova akazange alisuse lelinyeva. Pawula kwadzingeka kutsi ahlale nalo, kodvwa watsi: “Nangibutsakatsaka, kulapho ngiba nemandla khona.” (2 Khor. 12:7-10) Bekasho kutsini?
(2 Khorinte 12:8, 9) Ngase ngincenga iNkhosi katsatfu ngaloku, kuze lisuke kimi; 9 Kodvwa yona yatsi: “Umusa wami ukwenele; ngobe emandla ami entiwe aphelela ebutsakatsakeni.” Ngako ngitawutigabatisa ngenjabulo ngebutsakatsaka bami, kuze emandla aKhristu atewuchubeka ahleti kimi njengelithende.
w06 12/15 24 ¶17-18
Jehova “Ubapha Umoya Longcwele Labo Labamcelako.”
17 Ngesikhatsi Jehova aphendvula umthantazo waPawula watsi: “Umusa wami ukwenele; ngobe emandla ami entiwe aphelela ebutsakatsakeni.” Pawula watsi: “Ngako ngitawutigabatisa ngenjabulo ngebutsakatsaka bami, kuze emandla aKhristu atewuchubeka ahleti kimi njengelithende.” (2 Khorinte 12:9; Tihlabelelo 147:5) Ngako, Pawula weva kutsi wemukele emandla kuNkulunkulu lebekasivikelo ngaKhristu lebekambonye njengelithende. Nalamuhla, Jehova uyiphendvula ngendlela lefanako imithantazo yetfu. Wendlala sivikelo sakhe njengelithende etincekwini takhe.
18 Kuliciniso kutsi lithende aliyivimbi imvula kutsi ingani nobe umoya kutsi ungahhushi, kodvwa liniketa sivikelo kuleto timo. Ngendlela lefanako sivikelo ‘lesingemandla aKhristu’ asitivimbi tinkinga nebumatima kutsi kusehlele. Kodvwa siyasivikela kubantfu labangaba yingoti ebuhlotjeni betfu naJehova kanye nasekuhlaseleni kwembusi wabo, Sathane. (Sembulo 7:9, 15, 16) Ngako-ke, ngisho nobe unenkinga lengapheli, ungaciniseka kutsi Jehova uyayati lenkinga lokuyo futsi uyakuphendvula ‘kukhala kwakho’. (Isaya 30:19; 2 Khorinte 1:3, 4) Pawula wabhala: “Kodvwa Nkulunkulu wetsembekile futsi ngeke avume kutsi nilingwe ngalokungetulu kwaloko leningakhona kukwetfwala, kepha nanilingwa utawukwenta nendlela yekuphuma kuze nikwati kubeketela.”—1 Khorinte 10:13; Filiphi 4:6, 7.
(2 Khorinte 12:10) Ngiyajabula nangabe ngenca yaKhristu kukhona butsakatsaka, kwetfukwa, tikhatsi tekweswela, kuphatfwa kabi kanye nebumatima. Ngobe nangibutsakatsaka, kulapho ngiba nemandla khona.
“Ubapha Emandla Labo Labakhatsele”
8 Fundza Isaya 40:30. Ngisho noma singaba nemakhono, kuncane kakhulu lesingakhona kukwenta ngemandla etfu. Leli liciniso sonkhe lokufanele silati. Ngisho noma umphostoli Pawula bekakhona kwenta tintfo letinyenti, bekangakhoni kwenta konkhe labefise kukwenta ngenca yekulinganiselwa kwakhe. Ngesikhatsi Pawula atfululela sifuba sakhe kuNkulunkulu watjelwa kutsi: “Emandla ami entiwe aphelela ebutsakatsakeni.” Pawula walitfola liphuzu futsi waphetsa ngekutsi atsi: “Nangibutsakatsaka, kulapho ngiba nemandla khona.” (2 Khor. 12:7-10) Bekasho kutsini Pawula ngalamavi?
9 Pawula wabona kutsi kuncane kakhulu labengakwenta ngaphandle kwekusitwa nguNkulunkulu. Umoya longcwele waNkulunkulu bewutamniketa emandla labewadzinga. Ngetulu kwaloko umoya waNkulunkulu bewutawunika Pawula emandla ekwenta imisebenti labekangeke akhone kuyenta ngemandla akhe. Kwenteka lokufanako nakitsi. Ecinisweni, emandla lavela kuJehova atawusenta sicine!
Kufunisisa Umcebo EVini laNkulunkulu
(2 Khorinte 12:2-4) Kunendvodza lengiyatiko leyayimunye naKhristu, lokwatsi eminyakeni lelishumi nakune leyengcile yatsatfwa yayiswa ezulwini lesitsatfu—kodvwa kutsi beyikulomtimba yini nobe cha angati, nguNkulunkulu lowatiko. 3 Ngiyayati leyo ndvodza—kodvwa kutsi beyikulomtimba yini nobe beyingekho kuwo, angati, nguNkulunkulu lowatiko. 4 Lendvodza yatsatfwa yayiswa epharadisi, futsi yeva emavi langeke akhulunywe nalokute umuntfu lovumeleke kuwakhuluma.
Imibuto Levela Kubafundzi
‘Lizulu lesitsatfu’ lokukhulunywa ngalo ku-2 Khorinte 12:2 singasho kutsi limelela uMbuso waMesiya lobuswa nguJesu Khristu kanye nalabangu-144 000, ‘lokumazulu lamasha.’—2 Phet. 3:13.
Leli ‘lizulu lesitsatfu’ ngoba loMbuso uphakeme kakhulu futsi unemandla ekubusa.
Lipharadisi Pawula laliboniswa embonweni lingasho (1) lipharadisi lelitawuba khona emhlabeni esikhatsini lesitako, (2) lingaphindze lisho lipharadisi lelingokomoya lelitawuba khona esikhatsini lesitako futsi litawuba ngulelibanti kunalelo lesinalo esikhatsini salamuhla, futsi (3) “lipharadisi laNkulunkulu” ezulwini litawuba khona kanye naleli lasemhlabeni lomusha.
(2 Khorinte 13:12) Nibovuselana ngekwanga kwebuzalwane.
it-2 177
Kwanga
“Kwanga Kwebuzalwane.” ‘Bekunekwanga kwebuzalwane’ emkhatsini wemaKhristu ekucala (Rom. 16:16; 1 Khor. 16:20; 2 Khor. 13:12; 1 Thes. 5:26) nobe “kwanga kwelutsandvo” (1 Phet. 5:14), lobekwentiwa bantfu bebulili lobufanako. Lendlela yemaKhristu ekucala yekuvuselana beyifana naleyo lebeyisetjentiswa ngemaHebheru akadzeni. Ngisho nobe imiBhalo inganiketi imininingwane leminyenti, “kwanga kwebuzalwane” nobe “kwanga kwelutsandvo” bekubufakazi belutsandvo kanye nebunye lobebukhona ebandleni lebuKhristu.—Joh. 13:34, 35.
Kufundvwa KweliBhayibheli
(2 Khorinte 11:1-15) Ngifisa shengatsi ningangibeketelela kulokuba bete kwami ingcondvo lokuncane. Ecinisweni vele niyangibeketelela! 2 Ngobe nginesikhwele ngani, sikhwele lesifana nesaNkulunkulu, njengobe ngetsembisa kunendzisa endvodzeni yinye, kuze nginetfule njengentfombi ntfo kuKhristu. 3 Kodvwa ngiyesaba kutsi njengobe inyoka yayenga Eva ngebucili bayo, ngandlela tsite tingcondvo tenu titawudukiswa ebucotfweni nasebumsulweni lobufanele Khristu. 4 Ngobe nyalo nakufika umuntfu ashumayela ngalomunye Jesu ngaphandle kwaloyo lesashumayela ngaye, nobe nanemukela lomunye umoya ngaphandle kwaloyo lenawemukela, nobe nemukela letinye tindzaba letimnandzi ngaphandle kwaleto lenatemukela, nivele nitibeketelele leto tintfo. 5 Ngicabanga kutsi kute ngisho nayinye intfo lengenta ngibe phansi kunalabaphostoli benu lababonakala babahle. 6 Ngisho nobe ngite likhono lekukhuluma, nginalo lwati; kodvwa loku sikwente kwacaca kini ngato tonkhe tindlela nakuto tonkhe tintfo. 7 Ngona yini ngekutitfoba kuze kuphakanyiswe nine, ngenca yekutsi ngatishumayela ngekutitsandzela tindzaba letimnandzi taNkulunkulu ngaphandle kwekunibhadalisa? 8 Lamanye emabandla ngawachwaga ngekwemukela tintfo tawo khona ngitewusita nine; 9 kodvwa ngesikhatsi senginani futsi ngeswele, angizange ngibe ngumtfwalo kunobe ngumuphi umuntfu, ngobe bazalwane lebebesuka eMasedoniya batinakekela kahle tidzingo tami. Bengetama ngato tonkhe tindlela kutsi ngingabi ngumtfwalo kini, futsi ngitawuchubeka ngenta njalo. 10 Njengobe ngineliciniso laKhristu, ngeke ngiyekele kutigabatisa ngetifundza tase-Akhaya. 11 Ngasiphi sizatfu? Ngobe nginganitsandzi yini? Nkulunkulu uyati kutsi ngiyanitsandza. 12 Loku lengikwentako ngitawuchubeka ngikwenta, khona ngitewucedza taba talabo labafuna kubonakala balingana natsi kulomsebenti labatigabatisa ngawo. 13 Ngobe bantfu labanjalo babaphostoli bemanga, netisebenti letinebucili, futsi benta shengatsi babaphostoli baKhristu. 14 Loku akumangalisi ngobe naSathane uchubeka atenta ingilosi yekukhanya. 15 Akumangalisi-ke nangabe netinceku takhe tichubeka titenta tinceku tekulunga. Kodvwa siphetfo sato sitawuhambisana nemisebenti yato.
MAY 27–JUNE 2
UMCEBO LOSEVINI LANKULUNKULU | GALATHIYA 1-3
“Ngakhuluma Naye Ngalokucondzile”
(Galathiya 2:11-13) Kodvwa ngesikhatsi Khefase efika e-Antiyokhi, ngakhuluma naye ngalokucondzile njengobe bekucaca kutsi wente liphutsa. 12 Ngobe ngesikhatsi basengakefiki bantfu lebebavela kuJakobe, abevame kudla nebantfu betive; kodvwa nabefika wayekela, wase uyatehlukanisa ngenca yekwesaba labo labasokile. 13 Onkhe lamanye emaJuda ahlanganyela naye kulokutentisa, kangangekutsi naBhanabasi wahambisana nabo kuko.
Unembono Lofana NewaJehova Yini Ngalokulungile?
16 Fundza Galathiya 2:11-14. Phetro wabanjwa lugibe lwekwesaba bantfu. (Taga 29:25) Nanobe bekati kutsi Jehova utiva njani ngalendzaba, Phetro wesaba imibono yalamanye emaJuda lebekasokile ebandleni laseJerusalema. Umphostoli Pawula lebekakhona kulomhlangano lobewuseJerusalema nga-49 C.E., waya kuPhetro e-Antiyokhi wafike wamekhuta ngalokutentisa kwakhe. (Imis. 15:12; Gal. 2:13.) LamaKhristu aletinye Tive besekatokwenta njani ngaleliphutsa lebelentiwe nguPhetro? Bebatawukhubeka yini ngaleliphutsa? Phetro besekatawulahlekelwa ngemalungelo enkonzo yini ngenca yaleliphutsa lakhe?
(Galathiya 2:14) Ngesikhatsi ngibona kutsi bebangasahambi ngeliciniso letindzaba letimnandzi, ngakhuluma naKhefase embikwabo bonkhe ngatsi: “Nangabe wena nanobe ungumJuda uphila njengebantfu betive, hhayi njengemaJuda, ungabacindzetela njani bantfu betive kutsi baphile ngekuvumelana nendlela yemaJuda?”
Labo Labatsandza Jehova “Kute Lokuyawubakhuba Endleleni”
12 Phetro abesaba bantfu, futsi loko ngaletinye tikhatsi bekumenta akhutjwe kabuhlungu; nobe kunjalo, wachubeka etsembekile kuJesu nakuJehova. Nasi sibonelo: Waphika iNkhosi yakhe embikwebantfu tikhatsi letintsatfu. (Lukha 22:54-62) Ngekuhamba kwesikhatsi, Phetro wehluleka kwenta tintfo ngendlela yemaKhristu, waphatsa emakholwa ebeTive njengalawo laphansi kunemaKhristu lasokile langemaJuda. Umphostoli Pawula wakubona loko—libandla lalingasiyo indzawo yekubandlulula labanye. Loko lokwakwentiwa nguPhetro kwakungakalungi. Ngembikwekutsi lesento saPhetro sidvunge libandla, Pawula waniketa Phetro seluleko lesicondzile. (Gal. 2:11-14) Leseluleko samphatsa kabi yini Phetro waze wafuna nekuphuma emncintiswaneni wekuphila? Cha, asizange. Wasilalela seluleko saPawula, wasisebentisa futsi wachubeka nalomncintiswano.
Kufunisisa Umcebo EVini laNkulunkulu
(Galathiya 2:20) Manje sengibetselwe naKhristu. Akusesimi lophilako, kodvwa nguKhristu lophila ebunyeni nami. Ecinisweni kuphila lengikuphila enyameni ngikuphila ngekukholwa eNdvodzaneni yaNkulunkulu, leyangitsandza futsi yatinikela ngenca yami.
Khonta Nkulunkulu Ngekwetsembeka Nangetulu ‘Kwekuhlupheka Lokunyenti’
20 Kutsiwani ngekuhlaselwa lokubhacile? Singalwisana njani nemiva yekudvumateka? Indlela lenemandla kakhulu yekwenta loko kuzindla ngenhlawulo. Nguloko lokwentiwa ngumphostoli Pawula. Bekati kutsi ngaletinye tikhatsi abetiva acindzetelekile. Kodvwa bekati nekutsi Khristu wafa, wafela toni, hhayi bantfu labete sono. Pawula naye abengulomunye waletoni. Ecinisweni, wabhala watsi: ‘Ngiphila ngekukholwa eNdvodzaneni yaNkulunkulu, leyangitsandza futsi yatinikela ngenca yami.’ (Gal. 2:20) Pawula wayemukela inhlawulo, futsi wabona kutsi isebenta kuye.
21 Umbono lofanako wekutsatsa inhlawulo njengesipho losinikwe nguJehova ungakusita kakhulu. Loko akusho kutsi kudvumateka kutawuvele nje kutiphelele. Ngelizinga lelitsite, labanye betfu kungase kudzingeke kutsi balwisane nekuhlaselwa lokubhacile kudzimate kufike umhlaba lomusha. Kodvwa khumbula: Umvuzo utawutfolwa ngulabo labangaphelelwa ngemandla. Sekusedvute kakhulu kutsi kufike lilanga lelibalulekile lapho uMbuso waNkulunkulu utawuletsa kuthula futsi ubangele kutsi bonkhe bantfu labetsembekile babe bete sono. Timisele kungena kuloyo Mbuso ngisho nome ungabhekana nekuhlupheka lokunyenti.
(Galathiya 3:1) Maye nine baseGalathiya leningenangcondvo, ngubani loloniyenge kangaka, ngisho nobe Jesu Khristu avetwa ngalokucacile kini njengalobetselwe?
it-1 880
Incwadzi Leya KubaseGalathiya
Emavi aPawula latsi, “Maye nine baseGalathiya leningenangcondvo,”akasho kutsi bekakhuluma ngebantfu baletinye tive kuphela lebebasuka enyakatfo yaseGalathiya. (Gal 3:1) Kunaloko, Pawula bekakhuta labanye emabandleni lebebavuma konakaliswa licembu lemaJuda lebelisemkhatsini wabo. EmaJuda labekulelicembu bekafuna kutenta labalungile basebentisa umtsetfo waMosi lobewuwebantfu ‘labalungile ngenca yekukholwa’ kulelilungiselelo lesivumelwano lesisha. (2:15–3:14; 4:9, 10) “Emabandla aseGalathiya” (1:2) Pawula lebekakhuluma ngawo bekafaka ekhatsi bantfu labebangemaJuda nalabebangasiwo, labasokile labagucukele enkholweni yebuJuda nalabangakasoki bakuletinye tive, futsi akungabateki kutsi labanye bebachamuka eNshonalanga yeYurophu. (Imis. 13:14, 43; 16:1; Gal. 5:2) Bonkhe bebabitwa ngekutsi ngemaKhristu aseGalathiya, ngobe bebahlala endzaweni lebitwa ngekutsi yiGalathiya. Pawula wabhala lencwadzi kulabo lebekabati lebebasencenyeni yeNingizimu esifundzeni saseRoma, hhayi kubantfu lakangabati lebebaseNyakatfo, indzawo langazange sekayivakashele.
Kufundvwa KweliBhayibheli
(Galathiya 2:11-21) Kodvwa ngesikhatsi Khefase efika e-Antiyokhi, ngakhuluma naye ngalokucondzile njengobe bekucaca kutsi wente liphutsa. 12 Ngobe ngesikhatsi basengakefiki bantfu lebebavela kuJakobe, abevame kudla nebantfu betive; kodvwa nabefika wayekela, wase uyatehlukanisa ngenca yekwesaba labo labasokile. 13 Onkhe lamanye emaJuda ahlanganyela naye kulokutentisa, kangangekutsi naBhanabasi wahambisana nabo kuko. 14 Ngesikhatsi ngibona kutsi bebangasahambi ngeliciniso letindzaba letimnandzi, ngakhuluma naKhefase embikwabo bonkhe ngatsi: “Nangabe wena nanobe ungumJuda uphila njengebantfu betive, hhayi njengemaJuda, ungabacindzetela njani bantfu betive kutsi baphile ngekuvumelana nendlela yemaJuda?” 15 Tsine lesingemaJuda ekutalwa, lesingasito toni letivela etiveni, 16 siyati kutsi umuntfu kutsiwa ulungile, hhayi ngekwenta imisebenti lefunwa nguMtsetfo, kodvwa ngekuba nekukholwa kuKhristu Jesu. Ngako-ke sibe nekukholwa kuKhristu Jesu kuze kutsiwe silungile ngekukholwa kwetfu kuye, hhayi ngekwenta imisebenti lefunwa nguMtsetfo, ngobe kute umuntfu lokutawutsiwa ulungile ngekwenta imisebenti lefunwa nguMtsetfo. 17 Ngako nangabe natsi sitfolakale sitoni nanobe besifuna kutsi kutsiwe silungile ngaKhristu, kusho kutsi Khristu usikhonti sesono yini? Cha! 18 Nangabe tona letintfo lengake ngatibhidlita ngiphindze ngitivusa, ngikhombisa kutsi ngisephulamtsetfo. 19 Ngobe ngeMtsetfo ngafa eMtsetfweni, kuze ngiphile kuNkulunkulu. 20 Manje sengibetselwe naKhristu. Akusesimi lophilako, kodvwa nguKhristu lophila ebunyeni nami. Ecinisweni kuphila lengikuphila enyameni ngikuphila ngekukholwa eNdvodzaneni yaNkulunkulu, leyangitsandza futsi yatinikela ngenca yami. 21 Angiwali umusa waNkulunkulu; ngobe nangabe kulunga kutfolakala ngeMtsetfo, kusho kutsi Khristu wafela lite.