IRussia Ihlasela I-Ukraine

Nakudzabuka kusa nga-24 February 2022, emasotja aseRussia acala kuhlasela i-Ukraine ngisho nobe babusi bakulamanye emave betamile kukuvimba loku. Lokuhlasela kutawutsintsa njani umhlaba wonkhe? Emalangeni lambalwa lendlulile, António Guterres, lowengamele inhlangano yaMhlabuhlangene, utsite: “Umonakalo lotawubangelwa ngulokuhlasela mkhulu kakhulu ngendlela lesingeke siyicabange futsi utawutsintsa kulondzeka kwemave ase-Europe nalasemhlabeni wonkhe.”

Ngekuya kweliBhayibheli, tentakalo letinjengalesi tibaluleke ngani?

• Jesu Khristu waphrofetha kutsi bekutawubakhona sikhatsi lapho ‘sive besitawuvukela lesinye sive, nembuso uvukele lomunye umbuso.’ (Matewu 24:7) Fundza sihloko lesitsi “Siyini Isibonakaliso ‘Sezinsuku Zokugcina’ Noma ‘Ukuphela’?”, lesitfolakala ngesiZulu, kuze ubone kutsi timphi letikhona lamuhla tisigcwalisa njani siphrofetho saJesu.

• Incwadzi yeliBhayibheli yeSembulo ifananisa timphi nemgibeli welihhashi “lelinembala lobovu njengemlilo” ‘losusa kuthula emhlabeni.’ (Sembulo 6:4) Fundza sihloko lesitsi “Bobani Labagibeli Bemahhashi Labane?” kuze utfole kutsi lesiphrofetho sigcwaliseka njani etimphini letikhona lamuhla.

• Incwadzi yaDanyela yaphrofetha ngekungevani lebekutawubakhona emkhatsini ‘wenkhosi yasenyakatfo’ ‘nenkhosi yaseningizimu.’ (Danyela 11:25-45) Bukela i-video letsi Siphrofetho Lesesigcwalisekile—Danyela Sehluko 11, kuze ubone kutsi yini lesenta sitsi iRussia kanye nemave layisekelako bakha inkhosi yasenyakatfo.a

• Sembulo siphindze sisichazele ‘ngemphi yelilanga lelikhulu laNkulunkulu Somandla.’ (Sembulo 16:14, 16) Nobe kunjalo, lena akusiyo imphi lesemkhatsini wetive njengaleyo lesemkhatsini weRussia ne-Ukraine. Kuze utfole kwatiswa lokunyenti ngalemphi letawubakhona esikhatsini lesitako, fundza sihloko lesitsi “Iyini Impi Ye-Armagedoni?” lesitfolakala ngesiZulu.

Yini lengakwenta ube nelitsemba ngelikusasa?

• LiBhayibheli litsi Nkulunkulu ‘utawucedza timphi emhlabeni wonkhe.’ (Tihlabelelo 46:9) Fundza sihloko lesitsi “Litsemba Sibili Ngelikusasa Lelihle” kuze utfole lokunyenti ngelikusasa Nkulunkulu lasetsembisa lona.

• Jesu wafundzisa balandzeli bakhe kuthantazela kutsi uMbuso waNkulunkulu ute. (Matewu 6:9, 10) UMbuso waNkulunkulu unguhulumende losezulwini lotawufeza intsandvo yaNkulunkulu emhlabeni, futsi lentsandvo yaNkulunkulu ifaka ekhatsi kuletsa kuthula. Kuze utfole kutsi loMbuso waNkulunkulu ungakuzuzisa njani, bukela i-video letsi Uyini UMbuso WaNkulunkulu?

KunaBoFakazi BaJehova labangetulu kwa-129 000 labahlala e-Ukraine. Njengalabanye boFakazi labasemhlabeni wonkhe, boFakazi labahlala e-Ukraine balingisa Jesu ngekungalutsatsi luhlangotsi kutepolitiki nekungatingeneli timphi. (Johane 18:36) BoFakazi BaJehova emhlabeni wonkhe bayachubeka bashumayela kutsi tindzaba “letimnandzi teMbuso” ngito kuphela sisombululo setinkinga tebantfu, letifaka ekhatsi timphi. (Matewu 24:14) Sikumema kutsi uchumane natsi kuze ufundze ngemlayeto weliBhayibheli loniketa litsemba.