Jobo

41 “Na u ka hula Leviathane+ ka selope,

Kapa u ka tšoara leleme la eona ka ropo?

 2 Na u ka kenya loli ka linkong tsa eona,+

Kapa u ka phunya mehlahare ea eona ka moutloa?

 3 Na e tla etsa likōpo tse ngata tse tiileng ho uena,

Kapa e tla u bolella mantsoe a bonolo?

 4 Na e tla hlaba selekane le uena,

E le hore u ka e nka joaloka lekhoba ho isa nakong e sa lekanyetsoang?

 5 Na u ka bapala le eona joalokaha u bapala le nonyana,

Kapa u ka e tlamela bananyana ba hao?

 6 Na balekane ba tla fapanyetsana bakeng sa eona?

Na ba tla e arolela bo-rakhoebo?

 7 Na u tla tlatsa letlalo la eona ka likoebe,+

Kapa u tlatse hlooho ea eona ka marumo a litlhapi?

 8 Beha letsoho la hao holim ’a eona.

Hopola ntoa. U se ke ua etsa joalo hape.

 9 Bona! Ka sebele seo motho a se lebeletseng ka eona se tla soetseha.

Motho o tla boela a tabane fatše ha a e bona feela.

10 Ha ho le ea mong ea sebete hore a ka e sisinya.

Ke mang ea ka emang a tiile ka pel’a ka?+

11 Ke mang ea mphileng ho hong pele, e le hore ke tšoanele ho mo putsa?

Sohle se tlas’a maholimo ’ohle ke sa ka.+

12 Nke ke ka khutsa ka likarolo tsa eona

Kapa ka matla a eona le ho boheha ha boholo ba eona.

13 Ke mang ea koaholotseng liaparo tsa eona?

Ke mang ea tla kena ka mehlahareng ea eona e ’meli?

14 Ke mang ea butseng mamati a sefahleho sa eona?

Meno a eona ka hohle aa tšosa.

15 E ikhohomosa ka makhakhapha a entseng mela,

A koetsoeng joalokaha eka ke ka tiiso e tiileng.

16 A tlameletsoe ka thata le leng ho le leng,

Le moea o ke ke oa kena pakeng tsa ’ona.

17 A khomarelane;

Aa tšoarana ’me a ke ke a aroloa.

18 Ho thimola ha eona ho khantša leseli,

Mahlo a eona a joaloka mahlaseli a mafube.

19 Molomong oa eona ho tsoa ho tšoelima ha lehalima,

Esita le litlhase tsa mollo lia baleha.

20 Linkong tsa eona ho tsoa mosi,

Joaloka sebōpi se hotelitsoeng ka loli.

21 Moea oa eona o chesa mashala,

Lelakabe le tsoa molomong oa eona.

22 Matla a lutse molaleng oa eona,

Ho felloa ke tšepo ho tlōla ka pel’a eona.

23 Maphethe a nama ea eona aa khomarelana;

A joaloka ntho e etselitsoeng holim ’a eona, e sa sisinyeheng.

24 Pelo ea eona e entsoe joaloka lejoe,

E, e entsoe joaloka leloala.

25 Ka lebaka la ho tsoha ha eona ba matla baa tšoha;+

Ka lebaka la ho makala baa ferekana.

26 Sabole ha ea lekana hore e ka e fihlela,

Leha e le lerumo, motsu kapa hloohoana ea motsu.+

27 E nka tšepe+ e le joang,

Koporo e le patsi e bolileng.

28 Ha e balehisoe ke motsu;

Majoe a letjeketjane+ a fetotsoe hore e be litlhaka bakeng sa eona.

29 E talima molangoana joalokaha eka ke litlhaka,+

E tšeha ho kotomana ha lerumo le betsoang.

30 Likarolo tsa eona tse ka tlaase li joaloka mangeta a nchocho;

E ala sepolo+ holim ’a seretse.

31 E etsa hore maliba a bele joaloka pitsa;

E etsa hore leoatle le be joaloka pitsa ea mafura.

32 E khantša tsela ka mor’a eona;

Motho o ne a ka nka boliba e le bohlooho-putsoa.

33 Ha ho se tšoanang le eona holim ’a lefatše,

Se entsoeng hore se se ke sa e-ba le tšabo.

34 E bona ntho e ’ngoe le e ’ngoe e phahameng.

Ke morena oa libata tsohle tse khōlō.”