Buka ya Bobedi ya Marena

17 Ha Morena Akaze wa Juda a ena le dilemo tse 12 a busa, Hoshea+ mora wa Ela ya eba morena wa Baiseraele Samaria mme a busa ka dilemo tse robong. 2 O ne a etsa dintho tse sa thabiseng Jehova empa eseng jwalo ka marena a Iseraele a busitseng pele ho yena. 3 Morena Shalmanesere wa Asiria a hlasela Hoshea.+ A mo etsa mohlanka wa hae yaba Hoshea o qala ho mo patala lekgetho.+ 4 Morena wa Asiria a utlwa hore Hoshea o rera bolotsana hobane o ne a romme baromuwa ho Morena So wa Egepeta+ hape a sa tlisa lekgetho ho yena morena wa Asiria jwalo ka ha a ne a etsa dilemong tse fetileng. Ka lebaka leo, morena wa Asiria a mo kwalla teronkong a mo fasitse.

5 Morena wa Asiria a ya Samaria, a hlasela naha yohle mme a e thibella ka dilemo tse tharo. 6 Ha Hoshea a ena le dilemo tse robong a busa, morena wa Asiria a hapa Samaria.+ A isa Baiseraele botlamuweng+ Asiria mme a re ba dule Hala, Habore nokeng ya Gozane+ le metseng ya Bamede.+

7 Sena se ile sa etsahala hobane Baiseraele ba ne ba foseditse Jehova Modimo wa bona, ya ba ntshitseng naheng ya Egepeta tlasa puso ya Faro morena wa Egepeta.+ Ba ne ba rapela* medimo e meng,+ 8 ba etsa dintho tse neng di etswa ke ditjhaba tseo Jehova a neng a di lelekile le tse neng di etswa ke marena a Iseraele.

9 Baiseraele ba ne ba etsa dintho tse sa thabiseng Jehova Modimo wa bona. Ba ne ba ntse ba haha dibaka tse phahameng metseng yohle ya bona,+ ho tloha toreng ya ho lebela ho ya fihla motseng o sireletsehileng.* 10 Ba nna ba iketsetsa dipilara le dipalo tse halalelang*+ leralleng le leng le le leng le phahameng le tlasa difate tsohle tse ntle tse tala.+ 11 Ba ne ba etsa mahlabelo a kubellang mosi dibakeng tsohle tse phahameng jwalo ka ditjhaba tseo Jehova a neng a di lelekile ka pela bona a di isa botlamuweng.+ Ba ne ba etsa dintho tse mpe tse utlwisang Jehova bohloko.

12 Ba ne ba rapela ditshwantsho tse nyonyehang*+ tseo Jehova a neng a itse ho bona ka tsona: “Le se ke la di rapela!”+ 13 Jehova a nna a lemosa Baiseraele le Bajuda a sebedisa baprofeta bohle ba hae le batho bohle ba bonang dipono+ a re: “Tlohelang ho etsa dintho tse mpe!+ Le mamele ditaelo tsa ka ho ya ka melao yohle eo ke e fileng baholoholo ba lona le eo ke ileng ka le romella yona ke sebedisa bahlanka ba ka e leng baprofeta.” 14 Empa ha ba a ka ba mamela, ba ne ba le manganga* jwalo ka baholoholo ba bona ba neng ba sa bontshe tumelo ho Jehova Modimo wa bona.+ 15 Ba ile ba tlohela ho latela melao, selekane+ seo a neng a se entse le baholoholo ba bona le dikgopotso tseo a neng a ba lemositse ka tsona.+ Ba ne ba rapela ditshwantsho tse se nang thuso+ mme le bona ba qetella ba se na thuso jwalo ka tsona,+ ba etsisa ditjhaba tse ba potolohileng tseo Jehova a neng a itse ba se ke ba di etsisa.+

16 Ha ba a ka ba mamela melao yohle ya Jehova Modimo wa bona yaba ba iketsetsa manamane a mabedi+ a tshepe* le palo e halalelang.*+ Ba kgumamela makgotla ohle a lehodimo+ mme ba sebeletsa le Baale.+ 17 Ba boela ba tjhesa* bara le baradi ba bona,+ ba sebedisa bonohe+ mme ba batla dipontsho tsa se tlang. Ba tswela pele ho etsa* dintho tse sa thabiseng Jehova mme ba mo utlwisa bohloko.

18 Jehova a halefela Baiseraele mme a ba leleka.+ O ile a siya leloko la Juda feela.

19 Bajuda le bona ha ba a ka ba mamela melao ya Jehova Modimo wa bona.+ Ba ile ba etsa dintho tseo Baiseraele ba neng ba di etsa.+ 20 Jehova a lahla Baiseraele* mme a ba tlotlolla le ho etsa hore ba hlolwe ke dira ho fihlela a ba lelekile kaofela. 21 O ile a tlosa Baiseraele mmusong wa Davida mme ba etsa Jeroboame mora wa Nebate morena.+ Empa Jeroboame a etsa hore Baiseraele ba se ke ba mamela Jehova le hore ba etse sebe se seholo. 22 Baiseraele ba nna ba etsa dibe tsohle tseo Jeroboame a neng a di etsa.+ Ha ba a ka ba di tlohela 23 ho fihlela Jehova a ba lelekile jwalo ka ha a ne a boletse a sebedisa bahlanka bohle ba hae e leng baprofeta.+ Baiseraele ba iswa botlamuweng naheng ya Asiria+ mme ba ntse ba le moo ho fihlela letsatsing lena.

24 Morena wa Asiria a lata batho ho tswa Babilona, Kutha, Ava, Hamathe le Sefarvaime+ mme a re ba dule metseng ya Samaria moo Baiseraele ba neng ba dula teng. Ba ile ba hapa Samaria mme ba dula metseng ya yona. 25 Ha ba se ba dula moo, ha ba a ka ba sebeletsa* Jehova. Yaba Jehova o romela ditau+ hore di bolaye ba bang ba bona. 26 Morena wa Asiria a fumana tlaleho ena e reng: “Ditjhaba tseo o di isitseng botlamuweng mme wa re di dule metseng ya Samaria, ha di tsebe hore na Modimo wa naha eo o rapelwa jwang. Ka hoo, o dula a romela ditau hore di ba bolaye.”

27 Morena wa Asiria a re: “Nkang e mong wa baprista ba tswang Samaria mme le mo kgutlisetse teng e le hore a rute setjhaba hore na Modimo wa naha eo o rapelwa jwang.” 28 E mong wa baprista ba neng ba isitswe botlamuweng a kgutlela Bethele+ mme a ruta setjhaba hore na se rapele* Jehova jwang.+

29 Empa ditjhaba tse fapaneng tsa iketsetsa medimo ya tsona mme tsa e beha dibakeng tse phahameng tsa matlo a borapedi tseo Basamaria ba neng ba di entse. Di ile tsa etsa sena metseng eo di neng di dula ho yona. 30 Batho ba Babilona ba iketsetsa modimo ya bitswang Sukothe-benothe, batho ba Kuthe ba etsa Nergale, batho ba Hamathe+ ba etsa Ashima. 31 Baava bona ba ile ba etsa modimo ya bitswang Nibkaze le Tartake. Basefarvaime le bona ba ne ba tjhesa bara ba bona bakeng sa medimo ya Sefarvaime e leng Adrameleke le Anameleke.+ 32 Le hoja ba ne ba sebeletsa* Jehova, ba ile ba kgetha baprista hara batho hore ba sebetse matlong a borapedi dibakeng tse phahameng.+ 33 Ba ne ba sebeletsa* Jehova empa ba ntse ba rapela medimo ya bona ho ya ka bodumedi ba ditjhaba tseo ba neng ba tswa ho tsona.+

34 Ho fihlela letsatsing lena ba ntse ba latela madumedi a bona a pele. Ha ho na ya sebeletsang* Jehova mme ha ho na ya mamelang Molao le ditaelo tsa Jehova tseo a neng a di file bara ba Jakobo, eo Modimo a ileng a fetola lebitso la hae hore e be Iseraele.+ 35 Ha Jehova a etsa selekane le bona+ o ile a re: “Le se ke la rapela medimo e meng, la e kgumamela, la e sebeletsa kapa la e etsetsa sehlabelo.+ 36 Empa Jehova ya le ntshitseng naheng ya Egepeta ka matla a maholo+ ke yena eo le lokelang ho mo sebeletsa,+ ho mo kgumamela le ho mo etsetsa sehlabelo. 37 Le mamele ditaelo tsa hae le Melao ya hae eo a le ngoletseng yona+ mme le se ke la sebeletsa medimo e meng. 38 Le se ke la lebala selekane seo ke se entseng le lona+ mme le se ke la sebeletsa medimo e meng. 39 Empa le sebeletse Jehova Modimo wa lona ka ha ke yena ya tla le pholosa ho dira tsohle tsa lona.”

40 Empa ha ba a ka ba mamela mme ba ile ba latela bodumedi ba bona ba pele.+ 41 Ditjhaba tsena di ne di rapela Jehova+ empa di ne di boetse di rapela ditshwantsho tse rapelwang. Bana le ditloholo ba entse dintho tseo baholoholo ba bona ba neng ba di etsa ho fihlela letsatsing lena.