Buka ya Bobedi ya Dikronike

29 Ezekiase+ o ne a le dilemo di 25 ha e eba morena mme a busa Jerusalema ka dilemo tse 29. Lebitso la mme wa hae e ne e le Abija moradi wa Zakaria.+ 2 Ezekiase o ne a etsa dintho tse thabisang Jehova+ jwalo ka moholoholo wa hae Davida.+ 3 Selemong seo a qadileng ho busa ka sona, ka kgwedi ya pele, a bula mamati a ntlo ya Jehova yaba o a a lokisa.+ 4 A bitsa baprista le Balevi hore ba tle sebakeng se bulehileng se ka botjhabela. 5 A re ho bona: “Balevi, taba ke ena. Itlhwekiseng+ le be le hlwekise ntlo ya Jehova Modimo wa baholoholo ba lona. Tlosang dintho tse ditshila sebakeng se halalelang.+ 6 Baholoholo ba rona ha ba a tshepahalla Jehova Modimo wa rona, ba entse dintho tse sa mo thabiseng.+ Ba hlomphollotse tabernakele ya Jehova ebile ba mo furaletse.+ 7 Ba kwetse le mamati a foranta+ ebile ba timme mabone.+ Ha ba sa tjhesa dibano+ le ho nyehela mahlabelo a setjheso+ ho Modimo wa Iseraele sebakeng se halalelang. 8 Ka lebaka leo, Jehova a halefela Juda le Jerusalema.+ A etsa hore ha batho ba ba bona ba tshohe, ba makale ba be ba letse molodi.* Le lona le a bona.+ 9 Baholoholo ba rona ba bolauwe ka sabole.+ Bara, baradi le basadi ba rona ba isitswe botlamuweng ka lebaka la sena.+ 10 Ke ikemiseditse ho etsa selekane le Jehova Modimo wa Iseraele+ hore a kgaotse ho re halefela. 11 Batho ba heso, ena ha se nako ya hore le iphapanyetse mosebetsi wa lona.* Jehova o le kgethile hore le eme ka pela hae, le mo sebeletse*+ le be le etse hore mahlabelo a hae a kubelle.”+

12 Balevi ba qalella ho sebetsa: Ho Bakohathe+ e le Mahathe mora wa Amasai le Joele mora wa Azaria. Ho Bamerari+ e le Kishe mora wa Abdi le Azaria mora wa Jehaleliele. Ho Bagershone+ e le Jowa mora wa Zima le Edene mora wa Jowa. 13 Ho bara ba Elizafane e le Shimri le Jeuele. Ho bara ba Asafe+ e le Zakaria le Matania. 14 Ho bara ba Hemane+ e le Jehiele le Shimei. Ho bara ba Jeduthune+ e le Shemaia le Uziele. 15 Ba bitsa bana ba bo bona, ba itokisa bakeng sa borapedi yaba ba a tla jwalo ka ha Jehova a ne a boleletse morena hore a fane ka taelo ya ho hlwekisa ntlo ya Jehova.+ 16 Baprista ba kena ka tlung ya Jehova ho ya hlwekisa. Ba ntsha dintho tsohle tse sa hlwekang tseo ba di fumaneng ka tempeleng ya Jehova, ba di isa lebaleng+ la ntlo ya Jehova. Balevi bona ba ne ba di nka ba di ntshetsa ka ntle Kgohlong ya Kidrone.+ 17 Ba qalella ho hlwekisa ka letsatsi la pele la kgwedi ya pele. Ka letsatsi la borobedi la kgwedi ba fihla foranteng ya ntlo ya Jehova.+ Ba hlwekisa ntlo ya Jehova ka matsatsi a robedi, ba qeta ka letsatsi la bo16 la kgwedi ya pele.

18 Ka mora moo, ba ya ho Morena Ezekiase ba re: “Re hlwekisitse ntlo yohle ya Jehova, aletare ya nyehelo ya setjheso+ le disebediswa tsohle tsa yona+ le tafole ya bohobe*+ le disebediswa tsohle tsa yona. 19 Disebediswa tsohle tseo Morena Akaze ya neng a sa tshepahalle Modimo a neng a di beheletse ka thoko ha a ne a busa,+ re di lokisitse, ra di hlwekisa,+ jwale di ka pela aletare ya Jehova.”

20 Morena Ezekiase a tsoha hoseng, a bitsa dikgosana tsa motse yaba di ya ntlong ya Jehova. 21 Tsa tlisa dipoho tse supileng, diramo tse supileng, dikonyana tse tona tse supileng le diphooko* tse supileng e le nyehelo ya sebe bakeng sa mmuso, bakeng sa sehalalelo le bakeng sa Juda.+ A bolella baprista, ditloholo tsa Arone hore ba di nyehele hodima aletare ya Jehova. 22 Dipoho+ tsa hlajwa yaba baprista ba nka madi a tsona ba a fafatsa aletareng.+ Ka mora moo ba hlaba diramo, ba fafatsa madi a tsona aletareng. Ba hlaba le dikonyana tse tona yaba ba fafatsa madi a tsona aletareng. 23 Ba tlisa diphooko* tsa nyehelo ya sebe ka pela morena le phutheho yaba ba di beha matsoho. 24 Baprista ba di hlaba, ba etsa nyehelo ya sebe ka madi a tsona aletareng hore ba etsetse Baiseraele bohle sehlabelo sa tshwarelo ya dibe hobane morena o ne a itse nyehelo ya setjheso le nyehelo ya sebe di etsetswe Baiseraele bohle.

25 Ezekiase a beha Balevi ntlong ya Jehova ba tshwere disimbala, diletsa tse dikgwele le diharepa,+ ho ya ka taelo ya Davida,+ ya Gade+ ya neng a bona dipono bakeng sa morena le ya moprofeta Nathane+ hobane Jehova o ne a file baprofeta ba hae taelo eo. 26 Balevi ba ne ba eme ba tshwere diletsa tsa Davida, baprista bona ba tshwere diterompeta.+

27 Ezekiase a laela hore ho nyehelwe sehlabelo sa setjheso aletareng.+ Ha ho etswa nyehelo ya setjheso, ba ne ba qala ho binela Jehova ebile ba letsa diterompeta. Ka ho etsa jwalo, ba ne ba latela tlhophiso ya diletsa ya Morena Davida wa Iseraele. 28 Ha ho binwa pina ho letswa le diterompeta, phutheho yohle ya inama. Ha etswa jwalo ho fihlela nyehelo ya setjheso e qetilwe. 29 Ha ba qeta ho etsa nyehelo eo, morena le bohle ba neng ba ena le yena ba kgumama.* 30 Morena Ezekiase le dikgosana tsa bolella Balevi hore ba rorise Jehova ka ho bina mantswe a qapilweng ke Davida+ le Asafe+ ya bonang dipono. Ba bina dithoriso ba thabile yaba ba a kgumama.

31 Ka mora moo, Ezekiase a re: “Ha e le mona le kgethetswe ho sebeletsa Jehova, tlisang mahlabelo le dinyehelo tsa teboho ntlong ya Jehova.” Phutheho ya tlisa mahlabelo le dinyehelo tsa teboho mme batho bohle ba neng ba lakatsa ho fana ka nyehelo ya setjheso ba etsa jwalo.+ 32 Dinyehelo tsa setjheso tseo phutheho e ileng ya di tlisetsa Jehova e ne e le dikgomo tse 70, diramo tse 100 le dikonyana tse tona tse 200.+ 33 Hape dinyehelo tse halalelang e ne e le dikgomo tse 600 le dinku tse 3 000. 34 Ho ne ho se na baprista ba lekaneng ho tlosa makoko a diphoofolo tsa setjheso. Ka hoo, bana ba bo bona ba Balevi ba ba thusa+ ho fihlela ba qetile mosebetsi oo le ho fihlela baprista ba itlhwekisitse+ hobane Balevi ba ne ba tjheseha ho feta baprista tabeng ya ho itlhwekisa. 35 Ho ne ho boetse ho ena le dinyehelo tse ngata tsa setjheso+ le dikarolo tse mafura tsa mahlabelo a kopanetsweng le dinyehelo tsa dino.+ Ditshebeletso tse neng di etswa ntlong ya Jehova tsa qalella* hape. 36 Ezekiase le batho bohle ba ne ba thabetse seo Modimo wa nnete a ba etseditseng sona+ hobane ntho eo e ne e etsahetse kapele.