Tshenolo e yang ho Johanne
11 Ke ile ka fuwa lehlaka le kang molamu*+ yaba ho thwe: “Tsamaya o methe sehalalelo sa tempele ya Modimo le aletare o be o bale le batho ba rapellang teng. 2 Ha e le lebala le ka ntle ho sehalalelo sa tempele, o le tlohele, o se ke wa le metha hobane le fuwe ditjhaba. Di tla hatakela motse o halalelang+ ka dikgwedi tse 42.+ 3 Ke tla etsa hore dipaki tsa ka tse pedi di profete ka matsatsi a 1 260 di tenne lesela le hwashang.” 4 Dipaki tsena di tshwantshetswa ke difate tse pedi tsa mohlwaare+ le didulwana tse pedi tsa mabone+ mme di eme ka pela Morena wa lefatshe.+
5 Haeba ho ena le ya batlang ho ntsha dipaki tsena kotsi, mollo o tswa melomong ya tsona e le hore o bolaye dira tsa tsona. Haeba motho le ha e le ofe a batla ho di ntsha kotsi, o tla bolawa ka tsela ena. 6 Di na le matla a ho etsa hore pula e se ke ya na+ nakong eo di profetang ka yona. Di na le matla a ho fetola metsi hore e be madi+ le ho etsa hore dintho tse mpe tsa mofuta o mong le o mong di etsahale lefatsheng ho ya ka moo di lakatsang ka teng.
7 Ha di qetile ho profeta, sebata se nyolohang sekoting se tebileng se tla di lwantsha ebe se a di hlola le ho di bolaya.+ 8 Ditopo tsa tsona di tla rapalla seterateng se seholo sa motse o moholo moo batho ba bolaetseng Morena wa tsona palong. Sodoma le Egepeta di tshwantshetsa motse oo. 9 Batho ba maloko, dipuo le ditjhaba ba tla sheba ditopo tsa dipaki tseo ka matsatsi a mararo le halofo+ mme ba ke ke ba dumella ditopo tsa tsona hore di bolokwe lebitleng. 10 Ba dulang lefatsheng ba tla thaba, ba keteke mme ba romellane dimpho ka lebaka la lefu la baprofeta bana ba babedi etswe baprofeta bao ba ne ba ba hlokofatsa.
11 Ka mora matsatsi a mararo le halofo, Modimo o ile a tsosa baprofeta bana,+ ba ema yaba batho ba ba bonang ba tshoha haholo. 12 Ba utlwa lentswe le phahameng le tswang lehodimong le re ho bona: “Nyolohelang kwano.” Ba nyolohela lehodimong ka leru dira tsa bona di ba shebile. 13 Ka yona nako* eo, ha eba le tshisinyeho e kgolo ya lefatshe mme karolo e nyenyane* ya motse ya wa. Batho ba 7 000 ba bolawa ke tshisinyeho ya lefatshe, ba bang kaofela ba tshoha yaba ba tlotlisa Modimo wa lehodimo.
14 Bomadimabe ba bobedi+ bo fetile. Bomadimabe ba boraro bo tla ka potlako.
15 Lengeloi la bosupa la letsa terompeta ya lona.+ Ha utlwahala mantswe a phahameng lehodimong a reng: “Mmuso wa lefatshe e se e le Mmuso wa Morena wa rona+ le wa Kreste wa hae.+ O tla busa* e le morena ka ho sa feleng.”+
16 Baholo ba 24+ ba neng ba dutse ka pela Modimo diteroneng tsa bona, ba kgumama yaba ba rapela Modimo 17 ba re: “Re a o leboha Jehova* Modimo ya Matla Ohle, ya teng+ le ya neng a le teng hobane o sebedisitse matla a hao a maholo mme o qadile ho busa o le morena.+ 18 Le ha ho le jwalo, ditjhaba di ile tsa halefa mme le wena wa di halefela. Nako e behilweng ya fihla ya hore bafu ba ahlolwe le hore o putse+ ba banyenyane le ba baholo e leng bahlanka ba hao ba baprofeta,+ bahalaledi le ba tshabang lebitso la hao le hore o fedise ba senyang lefatshe.”+
19 Sehalalelo sa tempele ya Modimo se lehodimong sa bulwa yaba ke bona areka ya selekane sa hae.+ Ha eba le mahadima, diaduma, tshisinyeho ya lefatshe le sefako se dinaka, hape ka utlwa le mantswe.