Ezekiele
11 Moya* wa nkuka wa nkisa keiting e ka botjhabela ya tempele ya Jehova.+ Keiting moo, ho ne ho ena le banna ba 25. Hara bona e ne e le Jazania mora wa Azure le Pelatia mora wa Benaia e leng dikgosana tsa setjhaba.+ 2 Modimo a re ho nna: “Mora motho, banna bana ke bona ba batlang ho etsa dintho tse mpe ebile ba kgelosa batho motseng ona. 3 Ba re, ‘Na ee ha se nako ya ho haha matlo?+ Motse* ona ke pitsa,*+ rona re nama.’
4 Mora motho, profeta, o ba bolelle molaetsa wa kahlolo.”+
5 Moya wa Jehova wa tla ho nna+ wa re: “Ba bolelle hore Jehova o re: ‘Lona Baiseraele ntho eo le e buileng e nepahetse, ke tseba seo le se nahanneng. 6 Le bolaile batho ba bangata motseng ona ebile le tlatsitse diterata tsa wona ka ditopo.’”+ 7 “Jehova Mmusi wa Dintho Tsohle o re: ‘Ditopo tseo le di tlatsitseng motseng ona ke nama, motse wona ke pitsa.+ Empa lona le tla lelekwa ho wona.’”
8 Jehova Mmusi wa Dintho Tsohle o re: “‘Le tshaba sabole+ empa ke tla etsa hore le bolawe ka yona. 9 Ke tla le ntsha Jerusalema ke be ke nehelane ka lona ho ditjhaba tse ding. Hape ke tla le ahlola.+ 10 Le tla bolawa ka sabole.+ Ke tla le ahlola moeding wa Iseraele+ mme le tla tseba hore ke nna Jehova.+ 11 Ho lona motse ona e ke ke ya eba pitsa ebile le ke ke la ba nama e ka hara yona. Ke tla le ahlola moeding wa Iseraele. 12 Le tla tseba hore ke nna Jehova. Ha le a mamela melao ya ka le ditaelo tsa ka+ empa le mametse melao ya ditjhaba tse le potolohileng.’”+
13 Ha ke qeta ho profeta, Belatia mora wa Benaia o ile a shwa. Yaba ke kgumama fatshe ke a hweletsa ke re: “Jehova Mmusi wa Dintho Tsohle, na o tlo fedisa Baiseraele ba setseng?”+
14 Jehova a boela a re ho nna: 15 “Mora motho, baahi ba Jerusalema ba itse ho bana beno ba nang le tokelo ya ho lopolla le ho batho bohle ba Iseraele, ‘Suthelang hole le Jehova. Naha ena ke ya rona, re e filwe e le lefa.’ 16 O ba bolelle hore Jehova Mmusi wa Dintho Tsohle o re: ‘Le hoja ke ba isitse hole le ditjhaba tse ding ebile ke ba hasantse hara naha ka nakwana,+ ke tla ba sehalalelo sa bona dinaheng tseo ba leng ho tsona.’+
17 O ba bolelle hore Jehova Mmusi wa Dintho Tsohle o re: ‘Ke tla boela ke le phuthe hara ditjhaba le ho le bokella dinaheng tseo le hasantsweng ho tsona, ke be ke le fe naha ya Iseraele.+ 18 Ba tla kgutlela moo mme ba tlose dintho tsohle tse nyonyehang le tse mpe tseo ba di etsang.+ 19 Ke tla ba momahanya,* ke fetole dipelo tsa bona+ le tsela eo ba nahanang ka yona.+ Ke tla tlosa pelo e jwalo ka lejwe mmeleng ya bona+ mme ke ba fe pelo ya nama,*+ 20 e le hore ba mamele melao ya ka ba be ba latele ditaelo tsa ka. E tla ba setjhaba sa ka, nna ke tla ba Modimo wa bona.’”
21 Jehova Mmusi wa Dintho Tsohle o re: “Empa ha e le ba tswelang pele ho etsa dintho tse mpe le tse nyonyehang, ke tla etsa hore ba utlwe bohloko ka lebaka la ditlamorao tsa diketso tsa bona.”
22 Dikerubime tsa phahamisa mapheo a tsona mabidi a le pela tsona+ mme kganya ya Modimo wa Iseraele e ne e le hodima tsona.+ 23 Ka mora moo, kganya ya Jehova+ ya nyoloha ho tswa motseng yaba e ema hodima thaba e ka botjhabela ho motse.+ 24 Ponong, moya wa nkuka wa nkisa ho batho ba botlamuweng Kalde. Ka mora moo, pono eo ya nyamela. 25 Ka bolella batho ba botlamuweng dintho tsohle tseo Jehova a mpontshitseng tsona.