Lengolo la Pele la Petrose
3 Lona basadi, le ikokobeletse banna ba lona+ e le hore le haeba ba sa mamele lentswe la Modimo, le ka ba thusa hore ba be le tumelo ka diketso tsa lona le sa re letho.+ 2 Ba ka ba le tumelo hobane ba bone hore le itshwere hantle+ ebile le ba hlompha haholo. 3 Botle ba lona e se ke ya eba ba dintho tseo batho ba di bonang tse kang ho loha moriri, mekgabiso ya kgauta+ le diaparo tse turang. 4 Empa le bontshe botle ba lona ka seo le leng sona pelong. Le ikgabise ka hore le be bonolo le ka hore le be mosa+ hobane ke tsona dintho tseo Modimo a di nkang di le bohlokwa mme ke mokgabiso o ke keng wa senyeha le ka mohla. 5 Le basadi ba halalelang ba mehleng ya pele ba neng ba tshepile Modimo ba ile ba ikgabisa ka tsela ena, ka ho ikokobeletsa banna ba bona. 6 Mohlala ke Sara ya ileng a mamela Abrahama a ba a mo bitsa morena.+ Lona le fetohile baradi ba hae ka ho etsa dintho tse ntle le sa tshabe letho.+
7 Ka tsela e tshwanang, lona banna, le phedisane le basadi ba lona ka tsela e bontshang hore le a ba tseba.* Ka ha basadi ha ba matla jwalo ka lona, le ba tshware ka tlhompho le ka tsela eo le neng le tla tshwara sejana se pshatlehang ha bonolo+ hobane le bona Modimo o ba file bophelo boo a le fileng bona+ ka lebaka la mosa wa hae. Ha le sa etse jwalo, Modimo a ke ke a mamela dithapelo tsa lona.
8 Qetellong kaofela ha lona le utlwane,*+ le utlwelane bohloko, le ratane jwalo ka bana ba motho, le qenehelane+ le be le ikokobetse.+ 9 Le se ke la etsa ba bang hampe hobane ba le entse hampe+ kapa la ba rohaka hobane ba le rohakile.+ Ho ena le ho etsa jwalo, le ba etsetse dintho tse molemo*+ hobane ke yona ntho eo Modimo a le kgethetseng yona mme o tla le etsetsa dintho tse molemo.
10 Mangolo a re: “Mang kapa mang ya ratang bophelo le ya batlang ho phela nako e telele a thabile, a thibe leleme la hae hore le se ke la bua se sebe+ le molomo wa hae hore o se ke wa bua leshano. 11 A tlohele ho etsa dintho tse mpe+ empa a etse tse ntle.+ A batle kgotso a be a lwanele hore e dule e le teng.+ 12 Mahlo a Jehova* a shebile batho ba lokileng, ditsebe tsa hae di mamela sello sa bona ha ba kopa thuso+ empa Jehova* o hloile ba etsang dintho tse mpe.”+
13 Ke mang ya tla le utlwisa bohloko ha le etsa dintho tse ntle ka pelo yohle?+ 14 Le tla thaba haeba le utlwiswa bohloko hobane le etsa dintho tse lokileng.+ Le ha ho le jwalo, le se ke la tshaba dintho tseo ba di tshabang* kapa tsa le ferekanya.+ 15 Le dumele ka dipelong tsa lona hore Kreste ke Morena le hore o a halalela. Le dule le itokiseditse ho ikarabella ho motho le ha e le ofe ya le botsang ka tshepo eo le nang le yona. Empa ha le mo araba, le mo arabe ka bonolo+ le ka tlhompho.+
16 Le dule le ena le letswalo le kgutsitseng+ e le hore haeba batho ba le bua hampe ka tsela efe kapa efe, ba ka swaba+ hobane ba bona hore le itshwere hantle jwalo ka balatedi ba Kreste.+ 17 Haeba Modimo a le tlohela hore le utlwe bohloko hobane le etsa dintho tse ntle,+ ho molemo ho feta hore le utlwe bohloko hobane le etsa dintho tse mpe.+ 18 Kreste motho ya lokileng, o ile a shwela dibe tsa batho ba sa lokang+ hanngwe ebile e le la ho qetela.+ O ile a etsa jwalo e le hore a le thuse ho fumana Modimo.+ O ile a bolawa e le motho+ empa a tsoswa ka mmele wa moya.+ 19 Ka mmele wona oo, o ile a phatlalatsa molaetsa wa kahlolo ho mangeloi a neng a tshwerwe.+ 20 Mangeloi ao, ha a ka a mamela Modimo ha Modimo a ne a mameletse mehleng ya Noe.+ Nakong eo, areka e ne e ntse e hahwa.+ Areka eo e ile ya pholosa batho ba robedi feela metsing.+
21 Ka tsela e tshwanang, kolobetso e a le pholosa hobane le a dumela hore Jesu Kreste o ile a tsoswa bafung. Ha motho a kolobetswa, ha a hlatsuwe ditshila tse mmeleng empa o kopa Modimo hore a mo thuse ho ba le letswalo le kgutsitseng.+ 22 Jesu o ka letsohong le letona la Modimo+ hobane o ile a ya lehodimong. Mangeloi le balaodi bohle ba ile ba behwa tlasa taolo ya hae.+