Buka ya Bobedi ya Bakorinthe
9 Ha ho hlokahale hore ke le ngolle letho mabapi le taba ya hore le thuse bana ba bo rona.+ 2 Ke a tseba hore le ikemiseditse ho ba thusa ebile ke ithorisa ka lona ho Bakreste ba Macedonia. Ke ba boleletse hore lona moo Akaia, le se le ena le selemo jwale le ikemiseditse ho thusetsa. Ka hobane le ikemiseditse ho thusetsa, ba bangata ba bona ba batla ho le etsisa. 3 Ke romela bana ba bo rona ho lona e le hore ho se ke ha bonahala eka re ithorisa ka ntho e siyo le hore le hle le itokise feela jwalo ka ha ke ba boleletse hore ba tla le fumana le itokisitse. 4 Ho seng jwalo, haeba bana ba bo rona ba Macedonia ba ka tla le nna yaba ba fumana le sa itokisa, re tla swaba haholo hore ebe re ile ra le tshepa, ha re sa re letho ka hore na lona le tla be le swabile hakae. 5 Ka hoo, ke bone ho hlokahala hore ke kgothaletse bana ba bo rona hore ba tle ho lona esale ka nako mme ba late mpho ya lona e le hore ho bonahale hore le fane ka mpho eo hobane le rata eseng hobane re le qobeletse.
6 Le hopole hore ya jalang hanyenyane o tla kotula hanyenyane, athe ya jalang haholo o tla kotula haholo.+ 7 Motho ka mong a ke a fane ho ya ka moo a rerileng ka teng ka pelong ya hae eseng ka ho tsilatsila* kapa ka ho qobellwa+ hobane Modimo o rata motho ya fanang a thabile.+
8 Ho feta moo, Modimo a ka kgona ho le bontsha hore o mosa* e le hore le se ke la hloka letho mme le be le dintho tse ngata tseo le di hlokang bakeng sa mosebetsi o mong le o mong o molemo+ 9 hobane Mangolo a re: “O fane ka dintho tseo a nang le tsona ka pelo yohle. O di file bafutsana. Diketso tsa hae tse lokileng di ke ke tsa lebalwa.”+ 10 Modimo ya fang mojadi peo e ngata le bohobe hore a je o tla le fa peo e ngata e le hore le jale mme o tla le thusa hore le kotule haholo ka lebaka la mesebetsi ya lona e metle. 11 Modimo o le hlohonolofatsa haholo e le hore le ka fana ka ditsela tsohle. Ha re fana, re etsa hore batho ba lebohe Modimo. 12 Mosebetsi ona oo re o etsetsang batho ba bang, ha re o etse feela hore re thuse badumedimmoho le rona* ba hlokang+ empa re boetse re o etsetsa le hore batho ba bangata ba lebohe Modimo. 13 Mosebetsi ona o tla bontsha batho hore na le batho ba jwang. Ba tla rorisa Modimo hobane le etsa dintho tumellanong le ditaba tse monate tseo le di bolelang ka Kreste ebile le fana ka pelo yohle ho badumedimmoho le rona le ho batho ba bang kaofela.+ 14 Ba tla le rata le ho le rapella ka lebaka la mosa o moholo oo Modimo a le bontshitseng wona.
15 A re leboheng Modimo hobane o re file mpho e kgolo hoo re ke keng ra kgona ho e hlalosa.