Lengolo la Bobedi le Yang ho Timothea
3 Tseba hore mehleng ya bofelo+ bophelo bo tla ba thata hape ho tla ba kotsi. 2 Batho ba tla itjheba bobona,* ba rate tjhelete, ba ithorise, ba ikgohomose, ba bue hampe ka Modimo le ka batho. Ba ke ke ba mamela batswadi, e tla ba batho ba sa leboheng le ba sa tshepahaleng. 3 E tla ba batho ba se nang lerato, ba sa batleng ho dumellana le batho ba bang ka ntho efe kapa efe, ba senyang ba bang mabitso, ba sa ithibeng, ba bohale bo tshosang le ba hloileng dintho tse ntle. 4 E tla ba batho ba fetohelang ba bang, ba manganga, ba ikakasang le ba ratang menate ho ena le ho rata Modimo. 5 Ba tla etsa eka ba rata Modimo empa ba sa phele ka tsela e bontshang hore ho jwalo.+ Batho ba jwalo o ba furalle. 6 Hara batho bana, ho tla hlaha banna ba tla kena malapeng a batho ka bolotsana, ba kgelose basadi ba fokolang ka lebaka la dibe tsa bona ebile ba laolwa ke ditakatso tsa mefutafuta. 7 Basadi bao ba dula ba ithuta empa ha ho mohla ba kgonang ho fumana tsebo e nepahetseng ya nnete.
8 Banna bao ba hanyetsa nnete ka tsela eo Janese le Jambrese ba ileng ba hanyetsa Moshe ka yona. Ba bodile dikelello, Modimo ha a ba amohele hobane ha ba latele dithuto tse re thusang ho ba le tumelo. 9 Ba ke ke ba ya hole ka mekgwa eo ya bona ka ha batho bohle ba tla bona bohlanya* ba bona jwalo ka ha bohlanya ba Janese le ba Jambrese bo ile ba bonahala.+ 10 Empa wena o mametse dithuto tsa ka ka hloko, wa phela ka tsela eo ke phelang ka yona+ le ho ba le morero o tshwanang le wa ka. O bone tumelo ya ka, tiisetso ya ka, lerato la ka le mamello ya ka. 11 O bone mahloriso le ditsietsi tse kang tse ileng tsa ntlhahela ha ke le Antioke,+ Ikoniamo+ le Listra.+ Ke mameletse mahloriso ana mme Morena o ile a ntopolla ho ona kaofela.+ 12 Ha e le hantle, barutuwa bohle ba Kreste Jesu ba batlang ho sebeletsa Modimo ka botshepehi ba tla hloriswa.+ 13 Ha e le batho ba kgopo le ba ikgakanyang, bobe ba bona bo tla eketseha bo be bo fetelle. Ba tla kgelosa ba bang ba be ba kgeloswe.+
14 Le ha ho le jwalo, o se ke wa kgaotsa ho dumela dintho tseo o di rutilweng le tseo o ileng wa kgodiseha hore ke nnete+ ka ha o a tseba hore na o ithutile tsona ho bomang. 15 Hape o a tseba hore o tsebile dingolwa tse halalelang+ o sa le lesea.+ Dingolwa tseo di kgona ho o hlalefisa e le hore o tle o pholoswe ka hore o dumele ho Kreste Jesu.+ 16 Mangolo ohle a halalelang a tswa ho Modimo.+ A molemo hobane a a ruta,+ a a kgalemela, a lokisa dintho ebile a laya motho ho ya ka melao ya Modimo e lokileng,+ 17 e le hore mohlanka wa Modimo a ka tshwaneleha ka ho feletseng le hore a be le dintho tsohle tseo a di hlokang bakeng sa ho etsa mosebetsi o mong le o mong o molemo.