Exoda
15 Ka nako eo Moshe le Baiseraele ba binela Jehova pina ena:+
“Ere ke binele Jehova ka ha o phahame haholo.+
O lahletse pere le mopalami wa yona ka lewatleng.+
2 Jah* ke matla a ka le bonatla ba ka hobane ke mopholosi wa ka.+
Ke Modimo wa ka mme ke tla mo rorisa.+ Ke Modimo wa Ntate+ mme ke tla mo phahamisa.+
3 Jehova ke mohale ya matla.+ Jehova ke lebitso la hae.+
4 O lahletse dikariki tsa Faro le masole a hae ka lewatleng,+
Masole a hae a matla a tebetse tlase botebong ba Lewatle le Lefubedu.+
5 Maqhubu a lewatle a ba kwahetse. Ba tebetse tlase bodibeng jwalo ka lejwe.+
6 Jehova, letsoho la hao le letona le matla haholo.+
Jehova, letsoho la hao le letona le ka thuhakanya sera.
7 Ka matla a hao a maholo o ka diha ba o lwantshang.+
Kgalefo ya hao e a tuka, e ba tjhesa jwalo ka ditlhaka.
8 Ka phefumoloho e tswang dinkong tsa hao metsi a ile a bokellwa.
Metsi a ema jwalo ka lebota.
Maqhubu a hwama bohareng ba lewatle.
9 Sera sa re: ‘Ke tla ba lelekisa. Ke tla ba tshwara.
Ke tla arola thepa e hapuweng ho fihlela ke kgotsofetse
Ke tla hula sabole ya ka. Letsoho la ka le tla ba hlola.’+
10 O butswetse moya wa hao, lewatle la ba kwahela.+
Ba teba jwalo ka tshepe e boima* metsing a mangata.
11 Ke modimo ofe hara medimo ya jwalo ka wena, Jehova?+
Ke mang ya jwalo ka wena, ya halalelang ka ho fetisisa?+
O lokela ho tshajwa le ho roriswa ka dipina, wena ya etsang dintho tse makatsang.+
12 O otlollotse letsoho la hao le letona mme lefatshe la ba kwenya.+
13 Ka mohau* wa hao o tsamaisitse setjhaba seo o se lopolotseng.+
Ka matla a hao o tla se isa sebakeng sa hao sa bodulo se halalelang.
Baahi bohle ba Kanana ba tla nyahama.+
16 Ba tla tshoha mme ba tshabe.+
E tla ba ba sa sisinyeheng jwalo ka lejwe ka lebaka la letsoho la hao le matla
Ho fihlela setjhaba sa hao se feta, Jehova,
17 O tla se tlisa mme o se hlome thabeng* ya hao,+
Sebaka seo o se lokisitseng hore o dule ho sona, Jehova,
Sebaka se halalelang seo matsoho a hao a se tiisitseng, Jehova.
18 Jehova o tla busa e le morena ka ho sa feleng.+
19 Ha dipere tsa Faro le dikariki tsa hae tsa ntwa le banna ba hae ba palameng dipere ba kena lewatleng,+
Jehova a kgutlisetsa metsi a lewatle hodima bona+
Empa setjhaba sa Iseraele sa tsamaya moo ho ommeng bohareng ba lewatle.”+
20 Moprofeta Miriame, kgaitsedi ya Arone a letsa moropa o monyenyane o letsohong la hae mme basadi bohle ba mo sala morao ka meropa e menyenyane ba ntse ba tantsha. 21 Miriame a arabela pina e neng e binwa ke banna ba Iseraele a re:
“Binelang Jehova ka ha o phahame haholo.+
O lahletse pere le mopalami wa yona ka lewatleng.”+
22 Ha morao Moshe a tlosa Baiseraele Lewatleng le Lefubedu mme ba ya lefeelleng la Shure yaba ba tsamaya lefeelleng ka matsatsi a mararo empa ha ba a ka ba fumana metsi. 23 Ba fihla Mara*+ empa ba ne ba sa kgone ho nwa metsi a teng hobane a ne a baba. Ke ka lebaka leo Moshe a ileng a reha sebaka seo Mara. 24 Batho ba korotlela Moshe+ ba re: “Re tla nwang?” 25 Moshe a hweletsa ho Jehova+ mme Jehova a mo bontsha sefate. Ha a se lahlela ka metsing, metsi a ba monate.
Modimo o ne a etsa sena e le mohlala ho bontsha setjhaba hore na o lebeletse hore se etseng. O ne a se leka ho bona hore na se tla mo mamela kapa tjhe.+ 26 A re: “Haeba le mamela lentswe la Jehova Modimo wa lona, le etsa seo a reng se nepahetse mme le mamela ditaelo le melao yohle ya hae,+ nke ke ka le tlisetsa bolwetse le ha e le bofe boo ke ileng ka bo tlisetsa Baegepeta+ hobane nna Jehova, ke a le fodisa.”+
27 Ka mora moo, ba fihla Elime moo ho neng ho ena le didiba tsa metsi tse 12 le difate tsa palema tse 70. Ba hloma ditente moo pela metsi.