Lengolo la Bobedi la Petrose

3 Baratuwa, lena ke lengolo la bobedi leo ke le ngollang lona. Ke le hopotsa dintho tse tla le thusa hore le nahane hantle jwalo ka ha ke ile ka etsa lengolong la ka la pele.+ 2 Ke etsa tjena e le hore le ka hopola dintho tseo baprofeta ba halalelang ba ileng ba di bua* le dithuto tseo Morena le Mopholosi wa rona a di fetisitseng a sebedisa baapostola. 3 Pele ho tsohle, tsebang hore mehleng ya bofelo ho tla ba le batho ba somang dintho tse ntle, ba laolwang ke ditakatso tsa bona.+ 4 Ba tla re: “O kae ya tshepisitseng hore o tla tla?+ Ha ho na letho le fetohileng esale baholoholo ba rona ba shwa. Dintho tsohle di ntse di le ka moo di neng di le ka teng ho tloha nakong eo Modimo a neng a bopa batho.”+

5 Ba iphapanyetsa taba ya hore haesale mahodimo a le teng ho tloha kgale le hore lefatshe le ne le potapotilwe ke metsi, la arohanngwa le metsi ka taelo ya Modimo+ 6 le hore lefatshe la nako eo le ile la fediswa ka morwallo.+ 7 Empa mahodimo le lefatshe tse teng hona jwale di boloketswe ho tjheswa ho ya ka yona taelo eo ya Modimo. Di ntse di bolokilwe ho fihlela letsatsing la kahlolo leo ka lona ho tla timetswa batho ba sa rateng Modimo.+

8 Baratuwa, ntho eo le sa lokelang ho e lebala ke ena: Ho Jehova* letsatsi le le leng le lekana le dilemo tse sekete mme dilemo tse sekete di lekana le letsatsi le le leng.+ 9 Jehova* ha a diehe ho phethahatsa tshepiso ya hae+ jwalo ka ha batho ba bang ba nka hore o a dieha. Ha a le felle pelo hobane ha a lakatse hore mang kapa mang a timetswe empa o lakatsa hore bohle ba bake.+ 10 Letsatsi la Jehova*+ le tla tla jwalo ka leshodu.+ Letsatsing leo mahodimo a tla feta+ ka lerata le tshabehang,* dintho tse mahodimong le tse lefatsheng di tla qhibidiha mme lefatshe le dintho tse ho lona di tla tjheswa.+

11 Ka ha dintho tsena tsohle di tla qhibidiha ka tsela eo, le ele hloko hore na le tshwanela ho ba batho ba mofuta ofe. Le lokela ho halalela le ho sebeletsa Modimo ka botshepehi. 12 Le nne le lebelle letsatsi la Jehova*+ mme le dule le le hopola.* Letsatsing leo, mahodimo a tla tjheswa,+ dintho tse mahodimong le lefatsheng di tla qhibidiha ka lebaka la motjheso o bohale. 13 Re lebelletse mahodimo a matjha le lefatshe le letjha tseo a re tshepisitseng tsona+ mme bohle ba tla dula ho tsona ba tla etsa dintho tse lokileng ka mehla.+

14 Ka hoo baratuwa, ka ha le lebelletse dintho tsena, le etse sohle se matleng a lona hore Modimo a le fumane le hlwekile, le se na molato le bile le ena le kgotso.+ 15 Ho feta moo, le nke mamello ya Morena e le monyetla wa hore le pholohe, feela jwalo ka ha ngwanabo rona eo re mo ratang Pauluse a ile a le ngolla ho ya ka bohlale boo a bo filweng ke Modimo.+ 16 Ha e le hantle, o ngotse ka dintho tsena mangolong ohle a hae. Le ha ho le jwalo, dintho tse ding tseo a di ngotseng di thata mme batho ba sa di utlwisiseng* le ba se nang tumelo e matla ba a di sotha feela jwalo ka ha ba etsa ka Mangolo a mang. Ba tla timetswa ka lebaka la ho etsa jwalo.

17 Baratuwa, ka ha le tsebile dintho tsena esale pele, le itebele e le hore batho bana ba sa mameleng molao ba se ke ba le kgelosa ka mashano a bona yaba le qetella le lahlile tsela e nepahetseng.+ 18 Empa le phele ka tsela e tla etsa hore le fumane mosa* o eketsehileng le tsebo ya Morena le Mopholosi wa rona Jesu Kreste. E se eka a ka roriswa hona jwale le ka ho sa feleng. Amen.