Buka ya Bobedi ya Bakorinthe
10 Nna Pauluse, eo ba bang ba lona ba reng o a fokola ha a le hara lona+ empa ha a le siyo o sebete,+ ke le kopa ka bonolo le ka mosa oo Kreste a ileng a o bontsha.+ 2 Ke kopa hore ha ke fihla, batho ba nahanang hore re itshwara jwalo ka batho ba lefatshe lena ba be ba se ba fetohile e le hore ke se ke ka tlameha ho ba kgalemela ka matla. 3 Le hoja re phela lefatsheng, ha re lwane jwalo ka batho ba lefatshe lena. 4 Dibetsa tseo re lwanang ka tsona ha se tse sebediswang ke batho ba lefatshe lena+ empa ke tseo re di fuwang ke Modimo.+ Di matla hoo di ka fotholang dintho tse metseng ka matla. 5 Re fedisa monahano o mong le o mong le ntho e nngwe le e nngwe e sitisang batho ho tseba Modimo+ mme re laola dikelello tsa rona hore di mamele Kreste. 6 Hang ha le se le bontshitse hore le batho ba mamelang,+ re tla fana ka kotlo ho motho e mong le e mong ya sa mameleng.
7 Le ahlola dintho ho ya ka tsela eo le di bonang ka yona. Haeba mang kapa mang a kgodisehile hore ke morutuwa wa Kreste, a hopole hore le rona re barutuwa ba Kreste jwalo ka yena. 8 Le haeba nka ithorisa haholo ka matla ao Morena a re fileng ona a ho le kgothatsa eseng ho le nyahamisa,+ nke ke ka swabela hore ebe ke a ithorisa. 9 Ha ke batle hore ho bonahale eka ke ne ke batla ho le tshosa ka mangolo a ka. 10 Ba bang ba re: “Mangolo a hae a bua ditaba tsa bohlokwa le tse matla empa boteng ba hae ha bo re kgahle ebile o bua dintho tse se nang thuso.” 11 Batho ba jwalo ba tsebe hore dintho tseo re di buang mangolong ha re le siyo, re tla di etsa le ha re le teng.+ 12 Ha re batle ho itshwantsha kapa ho ipapisa le batho ba iphahamisang.+ Ba a bontsha hore ha ba na kutlwisiso hobane ba ikahlola ho ya ka seo ba nahanang hore se nepahetse.+
13 Re ke ke ra ithorisa ka dintho tse ka thoko ho mosebetsi oo re o fuweng empa re tla ithorisa feela ka mosebetsi oo Modimo a re fileng wona, oo le leng karolo ya wona.+ 14 Ha re ne re tla ho lona, re ne re sa etse mosebetsi oo Modimo a sa re fang wona ka ha re bile ba pele ba ho fihla ho lona ka ditaba tse monate tse mabapi le Kreste.+ 15 Ha re ithorise ka mosebetsi oo re sa o fuwang o entsweng ke motho e mong empa re tshepa hore ha tumelo ya lona e ntse e eketseha le mosebetsi oo re o entseng ho lona o tla hola ebe re kgona ho sebetsa haholwanyane. 16 Etswe re batla ho ya dinaheng tse ding re yo bolela ditaba tse monate e le hore re se ke ra ithorisa ka mosebetsi o entsweng ke batho ba bang dibakeng tsa bona. 17 “Empa ya ithorisang, a ke a ithorise ka Jehova.”*+ 18 Jehova* o rorisa motho eo a mo amohelang+ empa ha a amohele motho ya ithorisang.+