14 Mosadi ya bohlale e le ka nnete o haha ntlo ya hae+
Empa wa lewatla o e heletsa ka matsoho a hae.
2 Motho ya ditsela di lokileng o hlompha Jehova
Empa ya ditsela di kgopo o hloile Modimo.
3 Dipuo tsa boikgohomoso tsa lewatla di tshwana le molamu
Empa dipuo tsa ba bohlale di tla ba sireletsa.
4 Moo ho se nang dikgomo sejelo se hlwekile
Empa matla a poho a etsa hore ho be le dijo tse ngata.
5 Paki e tshepahalang e ke ke ya bua leshano
Empa paki ya bohata e bua leshano feela.+
6 Motho ya ikgohomosang o batla bohlale empa ha a bo fumane
Empa tsebo e itlela ha bonolo ho motho ya nang le kutlwisiso.+
7 Suthela hole le motho ya hlokang kelello
Hobane o ke ke wa fumana tsebo ho yena.+
8 Ka lebaka la bohlale, motho ya nang le temoho o tseba moo a yang
Empa lewatla le thetswa ke ho hloka kelello ha lona.+
9 Mawatla a tsheha diphoso tsa ona+
Empa ba lokileng ba ikemiseditse ho boelana.
10 Motho o tseba bohloko ba pelo ya hae
Ebile ha ho ya ka utlwisisang thabo e ka pelong ya motho.
11 Ntlo ya batho ba kgopo e tla fediswa+
Empa ntlo ya ba lokileng e tla atleha.
12 Ho na le tsela e bonahalang eka e lokile ho motho+
Empa qetellong e lebisa lefung.+
13 Le ha motho a ntse a tsheha, e ka nna yaba pelo ya hae e bohloko.
Le thabo e ka fetoha maswabi.
14 Ya pelo e mpe o tla kotula ditholwana tsa ditsela tsa hae+
Empa motho ya lokileng o tla fumana moputso wa mesebetsi ya hae.+
15 Ya se nang tsebo o dumela lentswe le leng le le leng
Empa ya bohlale o nahana ka mohato o mong le o mong wa hae.+
16 Ya bohlale o hlokolosi mme o furalla bobe
Empa ya se nang kelello ha a tsotelle ebile o itshepa ho tlola.
17 Ya potlakelang ho halefa o etsa dintho ka bowatla+
Empa motho ya nahanang dintho hantle o hlouwe.
18 Lefa la ba se nang tsebo e tla ba bothoto
Empa ba bohlale ba rweswa korone ya tsebo.+
19 Batho ba sa lokang ba tla lokela ho inamela ba lokileng,
Ba kgopo ba iname dikeiting tsa ya lokileng.
20 Mofutsana o hlouwe le ke baahisani ba hae+
Empa metswalle ya morui e mengata.+
21 Ya nyatsang moahisani wa hae o etsa sebe
Empa mang kapa mang ya qenehelang mofutsana o a thaba.+
22 Ba rerang bobe ba tla lahleha
Empa ba ikemiseditseng ho etsa hantle ba tla ratwa le ho tsheptjwa.+
23 Motho o rua molemo ha a sebetsa ka thata
Empa ho bua feela ho baka bofutsana.+
24 Korone ya ba bohlale ke leruo la bona
Empa bothoto ba ba se nang kelello bo tswala bothoto bo fetang.+
25 Paki ya nnete e pholosa bophelo ba batho
Empa e leshano e bua leshano feela.
26 Motho ya hlomphang Jehova o mo tshepa ka hohle+
Ebile bana ba motho eo ba tla fumana setshabelo.+
27 Ho hlompha Jehova ke sediba sa bophelo,
Ho etsa jwalo ho qobisa motho maraba a lefu.
28 Morena o kgaba ka setjhaba se sengata+
Empa mmusi ya se nang bafo o wele.
29 Motho ya diehang ho halefa o na le temoho+
Empa ya felang pelo o bontsha bothoto ba hae.+
30 Pelo e nang le kgotso e phedisa mmele wa motho
Empa mona o bodisa masapo.+
31 Ya qhekellang mofutsana o rohaka Mmopi wa hae+
Empa ya hauhelang ya futsanehileng o tlotlisa Mmopi.+
32 Ya kgopo o tla dihuwa ke bokgopo ba hae
Empa ya lokileng o tla sireletswa ka lebaka la botshepehi ba hae.+
33 Motho ya nang le kutlwisiso ha a ithorise ka bohlale ba hae+
Empa ya se nang kelello o dula a ithorisa ka tsebo ya hae.
34 Setjhaba se lokileng se a phahamiswa+
Empa sebe ke ntho e swabisang ho batho.
35 Morena o kgahliswa ke mohlanka ya bontshang hore o na le temoho+
Empa o halefiswa ke ya itshwarang ka mokgwa o hlabisang dihlong.+