Tshenolo e yang ho Johanne
13 Drakone e ile ya ema lehlabatheng la lewatle.
Ka bona sebata+ se nyoloha ka lewatleng+ se ena le manaka a leshome, dihlooho tse supileng le dikorone tse leshome manakeng a sona. Dihloohong tsa sona ho ne ho ena le mabitso a nyefolang Modimo. 2 Sebata seo se ne se tshwana le lengau, maoto a sona eka a bere le molomo wa sona eka wa tau. Drakone+ ya fa sebata matla, terone le borena bo boholo.+
3 E nngwe ya dihlooho tsa sona e ne e ena le leqeba le ka e bolayang empa leqeba leo le ile la fola.+ Batho ba lefatshe kaofela ba ne ba hloletswe ke sebata seo yaba ba se sala morao. 4 Ba ile ba rapela drakone hobane e file sebata matla. Ba rapela sebata ba re: “Ke mang ya tshwanang le sebata, hona ke mang ya ka lwanang le sona?” 5 Se ile sa fuwa matla a ho ithorisa le ho nyefola Modimo, sa fuwa le matla a ho etsa borata ka dikgwedi tse 42.+ 6 Sa qala ho bua+ yaba se nyefola Modimo, lebitso la hae, sebaka sa hae sa bodulo esita le ba dulang lehodimong.+ 7 Sa dumellwa ho lwantsha bahalaledi le ho ba hlola.+ Hape sa fuwa matla a ho busa batho ba maloko ohle, merabe yohle, dipuo tsohle le ditjhaba tsohle. 8 Batho bohle ba dulang lefatsheng bao ho tloha ha lefatshe le thehwa mabitso a bona a sa kang a ngolwa moqolong wa bophelo+ wa Konyana e ileng ya hlajwa,+ ba tla se rapela.
9 Ya nang le tsebe a utlwe.+ 10 Ya lokelang ho ya teronkong o tla ya teronkong. Ya bolayang ka sabole* le yena o tla bolawa ka sabole.+ Ka hoo, bahalaledi+ ba lokela ho ba le mamello+ le tumelo.+
11 Ka bona sebata se seng se nyoloha lefatsheng. Se ne se ena le manaka a mabedi a kang a konyana empa se bua jwalo ka drakone.+ 12 Se sebedisa matla a lekanang le a sebata sa pele,+ sebata seo sa pele se ntse se shebile. Se etsa hore batho ba dulang lefatsheng ba rapele sebata sa pele, seo leqeba la sona le bolayang le ileng la fola.+ 13 Se etsa mehlolo e makatsang ebile se tseba ho etsa hore mollo o theohe lehodimong o tle lefatsheng batho ba ntse ba shebeletse.
14 Se kgelosa batho ba dulang lefatsheng ka mehlolo eo se ileng sa dumellwa ho e etsa ka pela sebata sa pele. Hape se bolella batho hore ba etse setshwantsho+ sa sebata sa pele se neng se ena le leqeba la sabole empa sa hlaphohelwa.+ 15 Sebata se manaka a mabedi se ile sa dumellwa ho phedisa setshwantsho sa sebata sa pele* e le hore setshwantsho seo se ka bua le ho laela hore bohle ba hanang ho rapela setshwantsho sa sebata ba bolawe.
16 Se qobella batho bohle hore ba tshwauwe matsohong a matona kapa diphatleng, ba banyenyane le ba baholo, barui le bafutsana, makgoba le bao e seng makgoba.+ 17 Se etsa hore ho se ke ha eba le ya ka kgonang ho reka kapa ho rekisa haese motho ya nang le letshwao, ebang ke lebitso+ la sebata kapa palo e emelang lebitso la sona.+ 18 Motho ya bohlale a ke a bale palo ya sebata hobane ke palo ya motho, palo ya sona ke 666. Ke motho ya bohlale feela ya ka kgonang ho utlwisisa taba ena.+