Ezekiele

40 Ka letsatsi la leshome la kgwedi selemong sa bo25 re le botlamuweng,+ ha selemo se qala, ha ho fetile dilemo tse 14 motse o wele,+ letsatsing leo matla a Jehova a ile a eba hodima ka yaba a nkisa motseng.+ 2 Modimo o ile a nkisa naheng ya Iseraele a sebedisa dipono tsa hae, a mpeha thabeng e phahameng haholo+ e neng e ena le mohaho o tshwanang le motse o ka borwa.

3 Ha ke fihla moo, ke ile ka bona monna ya neng a shebahala jwalo ka koporo e benyang.+ O ne a tshwere thapo ya line le thupa e methang*+ mme a eme keiting. 4 Monna eo o ile a re ho nna: “Mora motho, shebisisa, mamedisisa o be o ele hloko ntho e nngwe le e nngwe eo ke o bontshang yona hobane o tlisitswe mona ka lona lebaka leo. O bolelle Baiseraele ntho e nngwe le e nngwe eo o e bonang.”+

5 Ke ile ka bona lebota le potolohileng tempele.* Monna eo o ne a tshwere thupa e methang e bolelele ba dimithara tse ka bang tharo* (mithareng e nngwe le e nngwe ho ile ha eketswa bophara ba seatla).* Ha a metha lebota, bophara ba lona e ne e le thupa e le nngwe e methang le bophahamo ba lona e le thupa e le nngwe e methang.

6 O ile a ya keiting e neng e shebile ka botjhabela,+ a hlwa ditepisi tsa yona. Ha a metha moo ho kenwang teng keiting, bophara bo ne bo lekana le thupa e le nngwe e methang le bophara ba lehlakore le leng bo lekana le thupa e le nngwe e methang. 7 Kamore e nngwe le e nngwe ya balebedi e ne e le bolelele ba thupa e le nngwe e methang le bophara ba thupa e le nngwe e methang. Pakeng tsa dikamore tsa balebedi e ne e ka ba dimithara tse ka hodimonyana ho tse pedi.*+ Moo ho kenwang teng keiting pela foranta ya keiti e shebileng ka tempeleng, e ne e le thupa e le nngwe e methang.

8 Ha a metha foranta ya keiti e shebileng ka tempeleng, e ne e lekana le thupa e le nngwe e methang. 9 Ha a metha foranta ya keiti e ne e le dimithara tse ka hodimonyana ho tse nne,* dipilara tsa yona tse ka mahlakoreng di ne di ka ba ka hodimonyana ho mithara.* Foranta ya keiti e ne e le lehlakoreng e shebile tempele.

10 Ho ne ho ena le dikamore tsa balebedi tse tharo lehlakoreng le leng le le leng la keiti e ka botjhabela. Dikamore tseo tse tharo di ne di lekana le dipilara tse ka mahlakoreng a tsona di lekana.

11 Ha a metha bophara ba karolo e kenang ya keiti e ne e le dimithara tse ka hodimonyana ho tse hlano,* bolelele ba yona e le dimithara tse ka bang tse supileng.*

12 Lebota le arolang le neng le le ka pela dikamore tsa balebedi, e ne e ka ba halofo ya mithara* ka mahlakoreng ohle. Dikamore tsa balebedi e ne e le dimithara tse ka bang tharo* ka lehlakoreng lena le ka lehlakoreng lane.

13 O ile a metha keiti ho tloha marulelong a ntlo e nngwe ya balebedi ho ya marulelong a e nngwe, e ne e le bophara ba dimithara tse ka bang 13.* Menyako ya dikamore* tseo e ne e shebane.+ 14 Ha a metha dipilara tse ka mahlakoreng, di ne di le bolelele ba dimithara tse ka bang 31.* O ile a boela a metha le dipilara tse mahlakoreng a keiti ho potoloha lebala. 15 Ho tloha moo ho kenwang teng keiting ho ya fihla ka pela foranta karolong e ka hare ya keiti, e ne e le dimithara tse ka bang 26.*

16 Dikamore tsa balebedi di ne di ena le difensetere tse kgolo ka hare empa ka ntle di le nyenyane+ le dipilara tsa tsona tse ka mahlakoreng tse ka hara dikeiti di ne di le jwalo mahlakoreng ohle. Ho ne ho ena le difensetere mahlakoreng ohle a karolo e ka hare ya diforanta ebile dipilara tse mahlakoreng di ne di ena le ditshwantsho tsa sefate sa palema.+

17 A ntlisa lebaleng le ka ntle, ke ile ka bona dikamore tsa ho jela+ le lebala le katilweng ka majwe. Ho ne ho ena le dikamore tsa ho jela tse 30 lebaleng leo. 18 Sebaka se katilweng ka majwe lehlakoreng la dikeiti se ne se lekana le bolelele ba dikeiti, se ne se le ka tlase ho lebala le ka hare la motse.

19 Ha a metha sebaka* ho tloha ka pela keiti e tlase ho ya fihla lebaleng le ka hare, e ne e le dimithara tse ka bang 52* ka botjhabela le ka leboya.

20 Lebala le ka ntle le ne le ena le keiti e shebileng ka leboya. O ile a metha bolelele le bophara ba yona. 21 Ho ne ho ena le dikamore tse tharo tsa balebedi mahlakoreng ohle. Dipilara tsa yona tse ka mahlakoreng le foranta di ne di lekana le tsa keiti ya pele. Di ne di le bolelele ba dimithara tse ka bang 26* le bophara ba dimithara tse ka bang 13.* 22 Difensetere tsa yona, foranta le ditshwantsho tsa yona tsa sefate sa palema+ di ne di lekana le tsa keiti e ka botjhabela. Batho ba ne ba ka kgona ho kena ka ho yona ka ho hlwa ditepisi tse supileng le foranta ya yona e ne e le ka pela tsona.

23 Ho ne ho ena le keiti lebaleng le ka hare e neng e shebane le keiti e ka leboya ebile e shebane le keiti e ka botjhabela. O ile a metha sebaka se dipakeng tsa dikeiti tseo mme se ne se etsa dimithara tse ka bang 52.*

24 Ka mora moo, o ile a nkisa lehlakoreng le ka borwa yaba ke bona keiti e ka borwa.+ O ile a metha dipilara tsa yona tse ka mahlakoreng le foranta ya yona mme kaofela di ne di lekana le tse ding. 25 Ho ne ho ena le difensetere mahlakoreng ohle a yona le foranteng ya yona, di le jwalo ka difensetere tsa dikeiti tse ding. Di ne di le bolelele ba dimithara tse ka bang 26* le bophara ba dimithara tse ka bang 13.* 26 Ho ne ho ena le ditepisi tse supileng tse nyolohelang ho yona,+ foranta ya yona e ne e le ka pela tsona. E ne e ena le ditshwantsho tsa sefate sa palema mahlakoreng ohle a dipilara tsa yona tse ka mahlakoreng.

27 Lebala le ka hare le ne le ena le keiti e shebileng ka borwa. O ile a metha ho tloha keiting e nngwe ho ya ho e nngwe ka lehlakoreng le ka borwa, sebaka seo e ne e le dimithara tse ka bang 52.* 28 Ka mora moo, o ile a nkisa lebaleng le ka hare mme ra kena ka keiti e ka borwa. Ha a metha keiti e ka borwa, e ne e lekana le dikeiti tse ding. 29 Dikamore tsa yona tsa balebedi, dipilara tsa yona tse ka mahlakoreng le foranta ya yona di ne di lekana le tse ding. Ho ne ho ena le difensetere mahlakoreng ohle a yona le foranteng ya yona mme di ne di le bolelele ba dimithara tse ka bang 26* le bophara ba dimithara tse ka bang 13.*+ 30 Ho ne ho ena le diforanta hohle mme di le bolelele ba dimithara tse ka bang 11* le bophara ba dimithara tse ka bang tharo.* 31 Foranta ya yona e ne e shebile lebaleng le ka ntle mme dipilara tsa yona tse ka mahlakoreng di ena le ditshwantsho tsa sefate sa palema+ ebile ho ne ho ena le ditepisi tse robedi tse nyolohelang ho yona.+

32 Ha a ntlisa ka hara lebala le ka hare re tswa ka botjhabela, o ile a metha keiti mme e ne e lekana le dikeiti tse ding. 33 Dikamore tsa yona tsa balebedi, dipilara tsa yona tse ka mahlakoreng le foranta ya yona di ne di lekana le tse ding. Ho ne ho ena le difensetere mahlakoreng ohle a yona le foranteng ya yona, di ne di le bolelele ba dimithara tse ka bang 26* le bophara ba dimithara tse ka bang 13.* 34 Foranta ya yona e ne e shebile lebaleng le ka ntle mme dipilara tsa yona tse ka mahlakoreng di ena le ditshwantsho tsa sefate sa palema ebile ho ena le ditepisi tse robedi tse nyolohelang ho yona.

35 Ka mora moo, a ntlisa keiting e ka leboya+ yaba o a e metha, e ne e lekana le dikeiti tse ding. 36 Dikamore tsa yona tsa balebedi, dipilara tsa yona tse ka mahlakoreng le foranta ya yona di ne di lekana le tse ding. Ho ne ho ena le difensetere mahlakoreng ohle a yona. Di le bolelele ba dimithara tse ka bang 26* le bophara ba dimithara tse ka bang 13.* 37 Dipilara tsa yona tse ka mahlakoreng di ne di shebile lebaleng le ka ntle mme di ena le ditshwantsho tsa sefate sa palema ebile ho ena le ditepisi tse robedi tse nyolohelang ho yona.

38 Kamore ya ho jela le monyako wa yona di ne di le pela dipilara tse ka mahlakoreng a dikeiti moo ho neng ho hlatswetswa dinyehelo tsa setjheso tse feletseng.+

39 Ho ne ho ena le ditafole tse pedi mahlakoreng ohle a foranta ya keiti moo ho hlabelwang diphoofolo tsa dinyehelo tsa setjheso tse feletseng,+ tsa dinyehelo tsa sebe+ le tsa dinyehelo tsa molato.+ 40 Ho ne ho ena le ditafole tse pedi pela moo ho kenwang teng keiting e ka leboya. Ho ne ho boetse ho ena le ditafole tse pedi lehlakoreng le leng la foranta ya keiti. 41 Ho ena le ditafole tse nne mahlakoreng ka bobedi a keiti mme kaofela ha tsona di le robedi. Diphoofolo tsa mahlabelo di ne di hlabelwa ho tsona. 42 Ditafole tse nne tseo ho neng ho etsetswa dinyehelo tsa setjheso tse feletseng ho tsona di ne di entswe ka majwe a betlilweng. Di ne di ka ba bolelele ba mithara,* bophara bo ka etsang mithara* le bophahamo bo ka etsang halofo ya mithara.* Hodima tsona ho ne ho behwa dintho tse sebedisetswang ho hlaba diphoofolo tsa dinyehelo tsa setjheso le tsa mahlabelo. 43 Maboteng a ka hare ho ne ho ena le dishelefo tse bophara ba seatla. Nama ya diphoofolo tsa dinyehelo tse fanwang e le mpho e ne e behwa hodima ditafole.

44 Ka ntle ho keiti e ka hare, ho ne ho ena le dikamore tsa ho jela tsa dibini.+ Di le ka hara lebala le ka hare pela keiti e ka leboya e shebileng ka borwa. Kamore e nngwe ya ho jela e ne e le pela keiti e ka botjhabela e shebileng ka leboya.

45 O ile a re ho nna: “Kamore ena ya ho jela e shebileng ka borwa ke ya baprista ba hlokomelang mosebetsi o etswang tempeleng.+ 46 Kamore ya ho jela e shebileng ka leboya ke ya baprista ba hlokomelang mosebetsi o etswang aletareng.+ Ke bara ba Tsadoke+ ba tswang lelokong la Balevi ba neng ba fuwe mosebetsi wa ho tla ka pela Jehova ho tla mo sebeletsa.”+

47 O ile a metha lebala le ka hare mme le ne le le bolelele ba dimithara tse ka bang 52* le bophara ba dimithara tse ka bang 52* mahlakoreng ohle a lona a mane. Aletare e ne e le ka pela tempele.

48 Ka mora moo, o ile a nkisa foranteng ya tempele,+ a metha dipilara tse ka mahlakoreng a yona. E ne e le dimithara tse ka bang tharo* lehlakoreng le ka nqena le dimithara tse ka bang tharo* lehlakoreng le ka nqane. Bophara ba keiti bo ne bo ka etsa dimithara tse pedi* lehlakoreng le ka nqena hape bo ka etsa dimithara tse pedi* lehlakoreng le ka nqane.

49 Foranta e ne e le bolelele ba dimithara tse ka bang leshome* le bophara ba dimithara tse ka bang tshelela.* Batho ba ne ba hlwa ditepisi ha ba kena ka ho yona. Mahlakoreng a dipalo ho ne ho ena le dipilara lehlakoreng le ka nqena le lehlakoreng le ka nqane.+