Baahlodi

16 Ka nako e nngwe, Samsone a ya Gaza yaba o bona mosadi wa letekatse moo mme a ya ntlong ya hae. 2 Bagaza ba fumana tlaleho ya hore Samsone o teng. Ba potapota motse oo a neng a le ho wona mme ba mo lalla bosiu kaofela keiting ya motse. Ba thola bosiu kaofela mme ba ipolella ba re: “Hang ha e eba hoseng, re tla mo bolaya.”

3 Samsone a robala ho fihlela hara mpa ya bosiu yaba o a tsoha mme o ntsha mamati a keiti ya motse le dipalo tse pedi tse e tsheheditseng. A di jara mme a nyolohela hodima thaba e shebaneng le Hebrone.

4 Ka mora moo, a kgahlwa ke mosadi e mong Kgohlong* ya Soreke mme lebitso la mosadi eo e ne e le Delila.+ 5 Marena a Bafilista a tla ho yena mme a re: “Mo qhekelle*+ e le hore a o bolelle hore na o fumana matla a hae a maholo hokae le hore na re ka mo tlama jwang mme ra mo hlola. Ha o ka re etsetsa sena, e mong le e mong wa rona o tla o fa dikotwana tsa silevera* tse 1 100.”

6 Ha morao Delila a re ho Samsone: “Ke kopa o mpolelle hore na matla a hao a maholo a tswa hokae le hore na o ka tlangwa ka eng e le hore o hlolwe.” 7 Samsone a re ho yena: “Haeba ba ka ntlama ka dithapo tse supileng tse ntjha tse eso omiswe, ke tla fokollwa ke matla mme ke be jwalo ka banna ba bang.” 8 Ka hoo, marena a Bafilista a tlisetsa mosadi eo dithapo* tseo tse supileng mme a tlama Samsone ka tsona. 9 Yaba ba lalla Samsone ka kamoreng e ka hare. Mosadi eo a mo hweletsa a re: “Samsone, Bafilista ke bao!” Yaba o kgaola dithapo tseo ha bonolo feela jwalo ka kgwele ya folakse* ha e utlwa mollo.+ Ha ho motho ya ileng a tseba hore na matla a hae a tswa hokae.

10 Ka mora moo, Delila a re ho Samsone: “O bapetse ka nna mme o mpolelletse leshano. Jwale ke kopa o mpolelle hore na o ka tlangwa ka eng.” 11 Yaba o re ho yena: “Haeba ba ntlama ka dithapo tse ntjha tse eso sebetse, ke tla fellwa ke matla ke be jwalo ka monna e mong le e mong.” 12 Delila a nka dithapo tse ntjha a mo tlama ka tsona yaba o a mo hweletsa o re: “Samsone, Bafilista ke bao!” (Ka nako eo ba ne ba ntse ba mo lalletse ka kamoreng e ka hare.) Yaba o kgaola dithapo tseo jwalo ka dikgwele matsohong a hae.+

13 Ka mora moo, Delila a re ho Samsone: “Le hona jwale o ntse o bapala ka nna mme o mpolella leshano.+ Mpolelle hore na o ka tlangwa ka eng.” Jwale Samsone a re ho yena: “Ke ha o ka loha moriri wa ka dithapo tse supileng ka kgwele e lohang.” 14 Ka hoo, a di tiisa ka phini mme a hweletsa Samsone a re: “Samsone, Bafilista ke bao!” Ka hoo, a tsoha mme a ntsha phini eo le kgwele e rokang.

15 Delila a re ho yena: “Ke hobaneng ha o re o a nthata+ empa o sa ntshepe?* O bapetse ka nna ka makgetlo ana a mararo mme ha o eso mpolelle hore na matla ana a hao a maholo a tswa hokae.”+ 16 Ka ha o ne a mo phehella le ho mo tshwenya letsatsi le letsatsi, o ile a fela pelo.+ 17 Qetellong Samsone a bolella Delila se ka pelong ya hae a re: “Ho hang ha ke eso kute moriri wa ka* hobane ke hlahile* ke le Monazari wa Modimo.+ Ha nka kuta, matla a ka a tla fela mme ke tla fokola ke be jwalo ka banna ba bang kaofela.”

18 Ha Delila a bona hore o mo boleletse sohle se ka pelong ya hae, ka potlako a bitsa marena a Bafilista+ a re: “Tloong hobane lekgetlong lena o mpoleletse se ka pelong ya hae.” Ka hoo, marena a Bafilista a tla ho Delila a tshwere tjhelete. 19 Delila a robatsa Samsone mangoleng a hae. Yaba o bitsa monna e mong hore a tlo mo kuta dithapo tse supileng tse hloohong. Ka mora moo, a kgona ho mo laola hobane matla a hae a ne a fedile. 20 Delila a mo hweletsa a re: “Samsone, Bafilista ke bao!” A tsoha mme a re: “Ke tla tswa mme ke phonyohe jwalo ka makgetlo a mang.”+ Empa o ne a sa tsebe hore Jehova o mo tlohetse. 21 Ka hoo, Bafilista ba mo tshwara mme ba mo ntsha mahlo. Yaba ba mo theolela Gaza ba mo tlama ka diketane tse pedi tsa koporo. Ya eba yena motho ya silang koro* teronkong. 22 Empa moriri wa hae o ile wa qala ho hola hape ka mora hore a kutwe.+

23 Marena a Bafilista a bokana ha mmoho ho keteka le ho etsetsa modimo wa ona Dagone+ sehlabelo se seholo ka ha a ne a re: “Modimo wa rona o re thusitse ho hlola sera sa rona e leng Samsone.” 24 Ha batho ba mo bona, ba rorisa modimo wa bona mme ba re: “Modimo wa rona o re thusitse ho hlola sera sa rona, se hlorisitseng naha ya rona+ le ho bolaya ba bangata ba rona.”+

25 Ba ne ba thabile hoo ba ileng ba re: “Tlisang Samsone hore a tlo re qabola.” Ka hoo, ba ntsha Samsone teronkong e le hore a tlo ba thabisa yaba ba mo emisa pakeng tsa dipilara. 26 Jwale Samsone a re ho moshanyana ya neng a mo tshwere ka letsoho: “Ere ke tshware dipilara tse tsheheditseng ntlo e le hore nka itshetleha ka tsona.” 27 (Ntlo eo e ne e tletse banna le basadi. Marena ohle a Bafilista a ne a le moo mme marulelong ho ne ho ena le banna le basadi ba 3 000 ba shebeletseng ha Samsone a ntse a qabola batho.)

28 Jwale Samsone+ a hweletsa ho Jehova a re: “Jehova Mmusi wa Dintho Tsohle, ke kopa o nkgopole mme o mmatlafatse.+ Modimo wa ka, ke kopa o nthuse lekgetlong lena feela hore ke iphetetse ho Bafilista bonyane bakeng sa leihlo le le leng ho a mabedi ao ba a ntshitseng.”+

29 Yaba Samsone o itshwarella ka dipilara tse pedi tse mahareng tse neng di tsheheditse ntlo, jwale a itshetleha ka tsona a tshwere e nngwe ka letsoho le letona mme e nngwe ka letsoho le letshehadi. 30 Samsone a hweletsa a re: “Ere ke shwe le Bafilista!” Yaba o sutumetsa dipilara tseo ka matla a hae kaofela mme ntlo ya wela hodima marena le batho bohle ba neng ba le ka hara yona.+ Ka hoo, o ile a bolaya batho ba bangata ho feta bao a ba bolaileng ha a ntse a phela.+

31 Ha morao lelapa lohle la ntate wa hae le bana babo, ba lata setopo sa hae. Ba mo tlisa mme ba mo patela pakeng tsa Zora+ le Eshtaole, ka lebitleng la ntate wa hae Manowa.+ Samsone e bile moahlodi wa Iseraele ka dilemo tse 20.+