La Pele le Yang ho Bathesalonika

1 Nna Pauluse, ke na le Silvanase*+ le Timothea.+ Ke ngolla phutheho ya Bathesalonika e ikarabellang ho Modimo Ntate le Morena Jesu Kreste:

E se eka Modimo a ka ba mosa* ho lona le ho le fa kgotso.

2 Ka mehla re leboha Modimo ha re bua ka lona kaofela dithapelong tsa rona.+ 3 Ha re le ka pela Modimo Ntate wa rona, re dula re hopola mesebetsi eo le e etsang hobane le ena le tumelo le lerato. Hape re dula re hopola ka moo le mameletseng mathata ka teng hobane le ena le tshepo+ ho Morena wa rona Jesu Kreste. 4 Lona bana ba bo rona ba ratwang ke Modimo, re a tseba hore Modimo o le kgethile 5 hobane ditaba tse monate tseo re di bolelang, ha re a di bua ka mantswe feela empa le di utlwile le thuswa ke moya o halalelang. Re ne re kgodisehile hore molaetsa oo re le bolellang wona ke nnete mme o le thusitse haholo. Le tseba tsela eo re ileng ra itshwara ka yona molemong wa lona ha re ne re le hara lona. 6 Le ile la re etsisa+ la ba la etsisa Morena+ hobane le ile la amohela lentswe ka thabo e tliswang ke moya o halalelang le hoja le ne le hloriswa haholo.+ 7 Ka hoo, le bile mohlala ho badumedi bohle ba Macedonia le ba Akaia.

8 Ha se hore le ile la hasa lentswe la Jehova* Macedonia le Akaia feela empa tumelo ya lona ho Modimo e a tsebahala dibakeng tsohle+ hoo re seng re se na letho leo re ka le buang. 9 Ba re boleletse ka moo re ileng ra kopana le lona ka teng ka lekgetlo la pele le ka moo le ileng la furalla medimo ya ditshwantsho+ ka teng e le hore le sebeletse Modimo ya phelang le wa nnete. 10 Hape ba re boleletse ka moo le ntseng le lebeletse Mora wa hae ya tswang mahodimong+ eo a ileng a mo tsosa bafung e leng Jesu, ya tla re lopolla bohaleng ba Modimo bo tlang.+