Buka ya Bobedi ya Bakorinthe
5 Re a tseba hore haeba ntlo ya rona e mona lefatsheng e leng mmele ona o kang tente e ka senngwa,+ Modimo o tla re fa ntlo lehodimong e sa hahwang ka matsoho,+ e ke keng ya senyeha. 2 Ntlong ena e lefatsheng re utlwa bohloko haholo, re labalabela ho fumana ntlo ya rona e lehodimong+ 3 e le hore ha re kena* re se ke ra fumana ho se na moo re dulang.* 4 Ha e le hantle, rona ba ka ntlong ena re utlwa bohloko haholo, re imetswe hobane ha re batle ho tswa ka ntlong ena empa re batla ho kena ka ntlong yane e nngwe+ e le hore bophelo bo sa feleng bo ka nkela mmele o shwang sebaka.+ 5 Modimo ke yena ya re lokiseditseng bophelo bona,+ o ile a re fa moya wa hae e le pontsho ya se tlang.+
6 Re kgodisehile hore ha feela re ntse re le ntlong ena, re hole le Morena.+ 7 Re tseba sena hobane re tataiswa ke tumelo eseng ke dintho tseo re di bonang. 8 Re kgodisehile hore ha re batle ho phela ka hara mmele ona empa re batla ho phela le Morena.+ 9 Ka hoo, ebang re dula le yena kapa re hole le yena, re leka ka thata hore re dule re amoheleha ho yena. 10 Kaofela ha rona re tla ema ka pela setulo sa Kreste sa kahlolo e le hore e mong le e mong a fuwe moputso ho ya ka dintho tseo a ileng a di etsa ha a sa ntse a ena le mmele ebang di ne di le ntle kapa di le mpe.+
11 Ka ha re a tseba hore re lokela ho hlompha Morena, re ntse re susumetsa batho hore ba dumele seo re se buang. Modimo o re tseba hantle, re tshepa hore le lona le hlokometse hore na re batho ba mofuta ofe. 12 Ha re ithorise empa re bua dintho tsena ho le kgothatsa e le hore le ka ithorisa ka rona le hore le ka araba ba ithorisang ka seo ba se bonang+ eseng se ka pelong. 13 Haeba re ne re ka etsa dintho jwalo ka motho ya se nang kelello,+ e ne e tla be e le bakeng sa Modimo. Haeba re ne re ka di etsa ka tsela e hlaphohetsweng, ho ne ho tla tswela lona molemo. 14 Lerato leo Kreste a nang le lona le a re susumetsa hobane re ile ra utlwisisa hore motho a le mong o ile a shwela batho bohle+ hobane kaofela ba ne ba shwele. 15 O ile a shwela batho bohle e le hore ba se ke ba hlola ba iphelela+ empa ba phelele ya ileng a ba shwela mme a tsoswa.
16 Ho tloha hona jwale ha re sa ahlola batho ho ya ka seo re se bonang.+ Haeba re ne re sheba Kreste jwalo pele, ha re sa etsa jwalo.+ 17 Ha motho a eba bonngweng le Kreste, o boptjwa botjha.+ Dintho tsa kgale di fetile mme ho se ho ena le dintho tse ntjha. 18 Empa dintho tsohle di tswa ho Modimo ya ileng a re boelanya le yena a sebedisa Kreste+ mme a re fa mosebetsi wa hore re thuse batho ba bang hore ba boelane le yena.+ 19 Ho bolelang hore Modimo o sebedisa Kreste hore a boelane le batho+ mme o ba tshwaretse dibe tsa bona.+ Modimo o re file mosebetsi wa ho bolella batho hore ba ka boelana le yena.+
20 Ka ha re baemedi+ ba Kreste+ mme Modimo o re romme hore re etse kopo e tiileng ho batho, re a le kopa: “Boelanang le Modimo.” 21 Kreste ha a ka a etsa sebe.+ Le ha ho le jwalo, Modimo o ile a fana ka yena e le sehlabelo bakeng sa dibe tsa rona e le hore Modimo a ka re nka re lokile ka lebaka la hae.+