La Pele le Yang ho Bathesalonika
2 Bana beso, le tseba hantle hore ketelo ya rona e bile le melemo.+ 2 Le a tseba hore re ile ra hlokofatswa le ho tshwarwa hampe ha re le Filipi.+ Le ha ho le jwalo, Modimo o ile a re fa sebete sa ho le bolella ditaba tse monate tse tswang ho yena+ le hoja re ne re hanyetswa haholo.* 3 Dikeletso tseo re le fang tsona ha di a fosahala. Ha re le fe tsona ka sepheo se fosahetseng kapa hobane re batla ho le thetsa. 4 Ho ena le hoo, re bua le lona hobane re kgethilwe ke Modimo ho bolela ditaba tse monate. Ha re bue le lona hore re kgahlise batho empa re batla ho kgahlisa Modimo ya hlahlobang dipelo tsa rona.+
5 Le a tseba hore ha ho mohla re ileng ra le qhekella ka ho le bolella mantswe a monate kapa ra iketsa eka re batho ba lokileng hobane feela re shebile ho fumana ho hong.+ Le Modimo a ka e paka taba ena. 6 Hape ha re a ka ra batla hore lona kapa batho ba bang ba re rorise. Ka ha re baapostola ba Kreste, re ka be re ile ra le imetsa ka hore le re hlokomele.+ 7 Ho ena le ho etsa jwalo, re ile ra ba bonolo ho lona jwalo ka ha mme a nyantsha le ho baballa bana ba hae. 8 Ka hoo, re ne re ikemiseditse ho le bolella ditaba tse monate tse tswang ho Modimo le ho tela bophelo ba rona+ e le hore re le thuse hobane re le rata haholo.+
9 Bana beso, le hopola hantle ka moo re neng re sebetsa ka thata ka teng. Re ne re sebetsa bosiu le motshehare e le hore ha re ntse re le bolella ditaba tse monate tse tswang ho Modimo, re se ke ra imetsa le ya mong wa lona.+ 10 Bana beso, le dipaki tsa hore ha re ne re ena le lona, re ne re le tshepahalla, re etsa dintho tse lokileng ebile re se na molato. Le Modimo a ka e paka taba ena. 11 Le tseba hantle hore re ne re hlola re kgothatsa, re eletsa le ho tshedisa e mong le e mong wa lona+ feela jwalo ka ha ntate+ a etsa ho bana ba hae. 12 Re entse jwalo e le hore le nne le phele ka tsela e thabisang Modimo+ ya le bitseditseng Mmusong wa hae+ le kganyeng ya hae.+
13 Ka lebaka leo, re boetse re leboha Modimo re sa kgaotse+ hobane ha le ne le utlwa lentswe la Modimo ho rona, ha le a ka la le nka e le lentswe la batho. Le ile la le nka e le lentswe la Modimo hobane ka nnete ke lona mme lentswe leo le thusa lona badumedi. 14 Bana beso, le ile la etsisa diphutheho tsa Modimo tse Judea tse ikarabellang ho Kreste Jesu hobane le ile la hloriswa ke batho ba naha ya habo lona+ feela jwalo ka ha le bona ba ntse ba hloriswa ke Bajuda. 15 Hape Bajuda bao ba ile ba bolaya Morena Jesu+ le baprofeta mme ba re hlorisa.+ Ha ba thabise Modimo, le dintho tseo ba di etsang ha di tswele mang kapa mang molemo. 16 Ba leka ho re sitisa ho bolella batho ba ditjhaba hore na ba ka etsang e le hore ba pholoswe.+ Ha ba etsa jwalo, ba dula ba eketsa dibe tsa bona. Le ha ho le jwalo, kgalefo ya Modimo e ba fihletse.+
17 Bana beso, re ile ra tlameha ho arohana le lona ka nako e kgutshwanyane. Le ha re ne re sa bonane, ha re a ka ra le lebala. Ka ha re ne re le hlolohetswe haholo, re ile ra etsa sohle se matleng a rona hore re kopane le lona.* 18 Ka lebaka leo, re ne re batla ho tla ho lona mme nna Pauluse, ke ile ka leka ho tla ho lona habedi empa Satane a re kwalla tsela. 19 Mohla Morena wa rona Jesu a bang teng, le tla ba tshepo ya rona, le tla re thabisa ebile le tla ba moputso* oo re tla ba motlotlo ka wona ha re le ka pela hae.+ 20 Ka nnete re motlotlo ka lona, le a re thabisa.