Tshepiso ya Jafeta

Baiseraele ba ile ba boela ba lahla Jehova mme ba rapela medimo ya bohata. Medimo eo ha ya ka ya ba thusa ha Baamone ba ba lwantsha. Baiseraele ba ile ba sotleha ka dilemo tse ngata. Qetellong ba re ho Jehova: ‘Re entse sebe. Re kopa o re sireletse ho dira tsa rona.’ Yaba ba senya ditshwantsho tseo ba neng ba di rapela mme ba rapela Jehova hape. Jehova o ne a sa rate ha ba sotleha.

Jehova o ile a kgetha monna ya matla ya bitswang Jafeta hore a etelle masole a Baiseraele pele ha a yo lwantsha Baamone. Jafeta o ile a re ho Jehova: ‘Ha o ka re thusa ho hlola ntweng ena, ke tla o fa motho wa pele ya tla tswa ka tlung ya ka ho nkgahlanyetsa.’ Jehova o ile a mamela thapelo ya Jafeta yaba o mo thusa hore a hlole ntweng eo.

Ha Jafeta a kgutla ntweng, motho wa pele ya ileng a tswa ho tla mo kgahlanyetsa ke moradi wa hae, ngwana ya mong feela. O ile a tla a ntse a tantsha, a letsa moropa. Jafeta o ile a etsang? O ile a hopola tshepiso ya hae yaba o re: ‘Jo! moradi wa ka! O nkutlwisitse bohloko. Ke tshepisitse Jehova hore motho ya tla tswa pele ho tla nkgahlanyetsa, ke tla fana ka yena tabernakeleng Shilo. Ka hoo, ke lokela ho fana ka wena tabernakeleng.’ Moradi wa hae a re ho yena: ‘Ntate, haeba o tshepisitse Jehova, phetha tshepiso ya hao. Empa pele ke ya, ke kopa ho qeta dikgwedi tse pedi thabeng le metswalle ya ka. Ka mora moo ke tla ya Shilo.’ Moradi wa Jafeta o ile a sebeletsa Jehova ka botshepehi tabernakeleng bophelo bohle ba hae. Metswalle ya hae e ne e mo tjhakela Shilo selemo le selemo.