Lengeloi la Jehova le Sireletsa Ezekiase

Baasiria ba ne ba hapile mmuso wa Iseraele wa maloko a leshome. Jwale Morena Sankeribe wa Asiria, o ne a batla ho hapa le mmuso wa Juda wa maloko a mabedi. O ne a se a hapile metse e meng ya Juda mme jwale a batla ho hapa Jerusalema. Empa Sankeribe o ne a sa tsebe hore Jehova o sireleditse Jerusalema.

Morena Ezekiase wa Juda o ile a fa Sankeribe tjhelete e ngata e le hore a se ke a hlasela Jerusalema. Sankeribe o ile a nka tjhelete eo, empa a nna a romela lebotho la hae le matla ho hlasela Jerusalema. Baahi ba Jerusalema ba ile ba tshoha, kaha Baasiria ba ne ba ntse ba atamela. Yaba Ezekiase o re: ‘Le se ke la tshoha. Baasiria ba matla, empa Jehova o tla re fa matla a fetang a bona.’

Yaba Sankeribe o roma Rabshake hore a eo soma Baiseraele. Ka hoo, Rabshake a ema ka ntle ho motse mme a hweletsa a re: ‘Jehova a ke ke a le thusa. Le se ke la dumella Ezekiase hore a le qhekelle. Ha ho na modimo ya ka le sireletsang matsohong a rona.’

Ka hoo, Ezekiase o botsa Jehova hore na a etseng. Jehova a re: ‘O se ke wa tshoswa ke seo Rabshake a se buang. Sankeribe a ke ke a hapa Jerusalema.’ Ka mora moo, Ezekiase a fumana mangolo a tswang ho Sankeribe. Mangolo ao a ne a re: ‘Inehele. Jehova a ke ke a o pholosa.’ Ka hona, Ezekiase a rapela, a re: ‘Jehova re kopa o re sireletse, e le hore batho bohle ba tle ba tsebe hore ke wena feela Modimo wa nnete.’ Jehova a re ho yena: ‘Morena wa Asiria ha a na ho kena Jerusalema. Ke tla sireletsa motse oo wa ka.’

Sankeribe o ne a nahana hore o haufi le ho hapa Jerusalema. Empa bosiu bo bong, Jehova a romela lengeloi moo masole a robetseng teng ka ntle ho motse. Lengeloi leo la bolaya masole a 185 000! Morena Sankeribe a lahlehelwa ke masole a hae a matla. Ka ha o ne a hlotswe, a tlameha ho kgutlela hae. Ka tsela eo, Jehova a sireletsa Ezekiase le motse wa Jerusalema, feela jwalo ka ha a ne a tshepisitse. Haeba o ne o le Jerusalema ka nako eo, na o ne o tla tshepa Jehova?