Dintho Tseo Johanne a di Boneng

Ha moapostola Johanne a le teronkong Patmose, Jesu o ile a mo bontsha dintho tse 16 tseo e leng hona di tlo etsahala. Dintho tsena di ne di bontsha ka moo lebitso la Jehova le tla halaletswa ka teng, hore Mmuso wa hae o tla tla le hore thato ya hae e tla etswa lefatsheng jwalo ka ha e etsahala lehodimong.

Johanne a bona Jehova a dutse teroneng ya hae lehodimong a ena le baholo ba 24 ba apere diaparo tse tshweu, ba rwetse dikorone tse mmala wa kgauta. Teroneng ha tswa mahadima le diaduma. Baholo ba 24 ba kgumamela Jehova ba a mo rapela. Hape Johanne a bona batho ba bangata ba tswang dinaheng tsohle le dipuong tsohle ba rapela Jehova. Konyana e leng Jesu, ya ba tataisa mme ya ba isa metsing a bophelo. Johanne o ile a boela a bona Jesu a qala ho busa e le Morena lehodimong ha mmoho le baholo ba 24. Hape Johanne a bona Jesu a lwantsha drakone e bitswang Satane le bademona ba hae. Jesu a ba ntsha lehodimong a ba lahlela lefatsheng.

Yaba Johanne o bona Konyana le ba 144 000 ba eme Thabeng ya Sione. A bona lengeloi le fofa sebakeng le jwetsa batho hore ba tshabe Modimo mme ba mo rapele.

A boela a bona ntwa ya Armagedone. Ntweng eo, Jesu le lebotho la hae ba fedisa puso e kgopo ya Satane. Qetellong Johanne o bona kgotso lehodimong le lefatsheng. Satane le bademona ba hae ba a fediswa. Bohle lehodimong le lefatsheng ba rapela Jehova feela mme ba halaletsa lebitso la hae.