Eba le Kgodiseho ya Hore o Tla Pholoha ha Lefatshe Lena le Fediswa

Haufinyane mamello ya Jehova e tla fela. Bodumedi ba bohata bo tla fediswa, ditjhaba tse ikopantseng di tla hlasela batho ba Modimo mme Jehova o tla fedisa batho ba kgopo ntweng ya Armagedone. Bakreste ba lebelletse ka tjantjello dinako tsena tse thabisang.

Ke nnete hore ha re tsebe dintlha tsohle mabapi le mahlomola a maholo. Mohlala, ha re tsebe hore na a tla qala neng. Ha re tsebe hore na baetapele ba dipolotiki ba tla hlasela bodumedi ka mabaka afe. Ha re tsebe hore na tlhaselo ya batho ba Modimo e tla nka nako e kae le hore na e tla akareletsang. Hape ha re tsebe hore na Jehova o tla sebedisang ho fedisa batho ba kgopo ntweng ya Armagedone.

Le ha ho le jwalo, Mangolo a re fa dintlha tsohle tseo re di hlokang e le hore re ka lebella bokamoso ka sebete le kgodiseho. Mohlala, re a tseba hore re phela qetellong ya ‘matsatsi a ho qetela.’ (2Ti 3:1) Re a tseba hore tlhaselo ya bodumedi ba bohata e tla “fokotswa” e le hore bodumedi ba nnete bo se ke ba fediswa. (Mat 24:22) Re a tseba hore Jehova o tla pholosa batho ba hae. (2Pe 2:9) Re a tseba hore Eo Jehova a mo kgethileng ho fedisa ba kgopo le ho boloka ba bongata bo boholo nakong ya Armagedone, o lokile mme o matla.​—Tshe 19:11, 15, 16.

Ka sebele, diketsahalo tse tlang di tla etsa hore ‘batho ba idibane ke tshabo.’ Le ha ho le jwalo, ha re bala le ho nahanisisa ka moo Jehova a ileng a pholosa batho ba hae nakong e fetileng le ka seo a se senotseng ka bokamoso, re ka ‘ema tswee! ra ba ra phahamisa dihlooho’ re kgodisehile hore topollo ya rona e haufi.​—Lu 21:26, 28.