Na o ne o Tseba?
Baprista ba ne ba etsang ka madi a diphoofolo tse neng di nyehelwa tempeleng e Jerusalema?
SELEMO le selemo baprista ba Iseraeleng ya boholoholo ba ne ba nyehela mahlabelo a dikete a diphoofolo aletareng e neng e le tempeleng. Ho latela rahistori wa Mojuda wa lekgolong la pele la dilemo e leng Josephus, ka Paseka ho ne ho nyehelwa dikonyana tse ka hodimo ho 250 000 mme sena se ne se etsa hore ho tshollwe madi a mangata. (Lev. 1:10, 11; Num. 28:16, 19) Ho ne ho etswang ka madi a mangata hakaalo?
Baepolli ba ile ba tjheka ho potoloha tempele eo Heroda a ileng a e haha e ileng ya senngwa ka 70 C.E, mme ba ile ba fumana metjha e neng e tsamaisa madi a mahlabelo a tswang tempeleng.
Nahana ka dintho tse pedi tse neng di thusa hore aletare e dule e hlwekile:
Dikoti tse karolong e ka tlasa aletare: Tlhaloso ya tsela eo madi a neng a tsamaiswa ka yona ho tloha aletareng, e fumanwa bukeng ya melao le ditso tsa Sejuda e ngotsweng dilemong tsa bo200 e bitswang Mishnah. E bontsha hore ho ne ho ena le dikoti tse pedi khoneng e nngwe ya aletare. Madi a mahlabelo le metsi a neng a sebedisetswa ho hlwekisa aletare, a ne a phallela ka dikoting tseo ebe a fetela Kgohlong ya Kidrone.
Baepolli ba mehleng ena ba dumellana le seo buka ena e se buang ha e bua ka dikoti tse neng di le pela aletare. Buka ya The Cambridge History of Judaism e a paka hore ke nnete hore ho ne ho ena le metjha e neng e le pela tempele. E re: “E ka nna yaba e ne e sebedisetswa ho ntsha metsi a kopane le madi a mahlabelo a neng a tswa aletareng.”
Metsi a mangata: Baprista ba ne ba lokela ho ba le metsi a mangata e le hore dikarolo tse ka tlase tsa aletare le diforo tse neng di tsamaisa metsi di dule di hlwekile. E le hore ba phethe mosebetsi ona wa bohlokwa, ba ne ba fumana metsi ao ba neng ba a hloka motseng wa Jerusalema. Metsi ao a ne a fumanwa dikotopong, didibeng le matamong. Moepolli ya bitswang Joseph Patrich o ile a re: “Ho bonahala eka tempele ena ke yona feela mehleng eo e neng e ena le mehlodi ya metsi e kang ena ha mmoho le diforo tse neng di tsamaisa metsi a sa hlwekang.”