Na ke Lokela ho Inehela ho Modimo Mme ke Kolobetswe?

1. O ikemiseditse ho etsang, jwalo ka ha o se o ithutile buka ee?

HO TLA fihlela jwale, o se o ithutile dintho tse ngata ka Bibeleng o sebedisa buka ena. Ka mohlala, o ithutile ka bophelo bo sa feleng boo Modimo a re tshepisitseng bona, wa ithuta ka tshepo ya tsoho le hore na bafu ba hokae. (Moeklesia 9:5; Luka 23:43; Johanne 5:28, 29; Tšenolo 21:3, 4) Mohlomong o se o qadile ho ya dibokeng tsa Dipaki Tsa Jehova mme o kgodisehile hore ke bodumedi ba nnete. (Johanne 13:35) O se o nka Jehova e le motswalle wa hao mme mohlomong o se o batla ho mo sebeletsa. Jwale e ka nna yaba wa ipotsa hore o lokela ho etsang.

2. Ke hobaneng ha monna wa Moethiopia a ne a batla ho kolobetswa?

² Monna e mong wa Moethiopia, ya phetseng mehleng ya Jesu le yena o ne a ikutlwa jwalo. Nakwana ka mora hore Jesu a tsohe bafung, morutuwa wa Jesu ya bitswang Filipi o ile a bua le monna eo ka molaetsa wa Bibele. Filipi o ile a mo bontsha bopaki ba hore Jesu ke Mesia. Monna wa Moethiopia o ile a thaba haholo ka lebaka la seo a ithutileng sona, hoo a ileng a re: “Bona! Metsi [ke ana]; ke eng se nthibelang ho kolobetswa?”—Liketso 8:26-36.

3. (a) Ke taelo efe eo Jesu a ileng a e fa balatedi ba hae? (b) Mokreste o lokela ho kolobetswa ka tsela efe?

³ Bibele e re motho ya batlang ho sebeletsa Jehova o lokela ho kolobetswa. Jesu o ile a re ho balatedi ba hae: “Le etse batho ba ditjhaba tsohle barutuwa, [mme] le ba kolobetse.” (Matheu 28:19) Jesu o ile a ba behela mohlala ka hore le yena a kolobetswe. Jesu ha a ka a kolobetswa ka hore a fafatswe ka metsi hloohong, empa mmele ohle wa hae o ile wa tebiswa ka hara metsi. (Matheu 3:16) Kajeno Bakreste le bona ba kolobetswa ka tsela e tshwanang le eo Jesu a ileng a kolobetswa ka yona.

4. Ha o kolobetswa o bontsha batho ba bang eng?

⁴ Ha o kolobetswa, o bontsha batho ba bang hore o batla ho ba motswalle wa Modimo le hore o batla ho mo sebeletsa. (Pesaleme ya 40:7, 8) Jwale o ka nna wa ipotsa: ‘Ke lokela ho etsang haeba ke batla ho kolobetswa?’

O HLOKA HO BA LE TSEBO LE TUMELO

5. (a) O lokela ho etsang pele o kolobetswa? (b) Ke hobaneng ha diboka tsa Bokreste e le tsa bohlokwa?

⁵ Pele o kolobetswa, o lokela ho tseba Jehova le Jesu. O se o ntse o qadile ho etsa sena, jwalo ka ha o ithuta Bibele. (Bala Johanne 17:3.) Empa hoo ha ho a lekana. Bibele e re o lokela ho ba le “tsebo e nepahetseng” ka thato ya Jehova. (Bakolose 1:9) Ho ya dibokeng tsa Bokreste tsa Dipaki Tsa Jehova ho tla o thusa hore o be le setswalle se tiileng le Jehova. Ke ka hoo o lokelang ho ya ho tsona kamehla.—Baheberu 10:24, 25.

6. O lokela ho tseba Bibele hakae pele o kolobetswa?

⁶ Jehova ha a lebella hore o tsebe ntho e nngwe le e nngwe e ka Bibeleng pele o kolobetswa. O ne a sa lebella hore monna yane wa Moethiopia a tsebe ntho e nngwe le e nngwe pele a kolobetswa. (Liketso 8:30, 31) Ha ho na mohlang re tla kgaotsa ho ithuta ka Modimo. (Moeklesia 3:11) Empa pele o kolobetswa, o lokela ho tseba le ho dumela dithuto tsa motheo tsa Bibele.—Baheberu 5:12.

7. Ho ithuta Bibele ho o thusitse jwang?

⁷ Bibele e re: ‘Kantle ho tumelo ho ke ke ha kgoneha ho kgahlisa Modimo.’ (Baheberu 11:6) Ka hoo o lokela ho ba le tumelo pele o kolobetswa. Bibele e re bolella hore ha batho ba bang ba motseng wa boholoholo wa Korinthe ba utlwa seo balatedi ba Jesu ba neng ba ba ruta sona, ba ile “ba qala ho dumela le ho kolobetswa.” (Liketso 18:8) Ka ho tshwanang ho ithuta Bibele ho o thusitse hore o be le tumelo ditshepisong tsa Modimo. Ha boela ha o thusa hore o be le tumelo sehlabelong sa Jesu, se ka re pholosang sebeng le lefung.—Joshua 23:14; Liketso 4:12; 2 Timothea 3:16, 17.

BOLELLA BA BANG MOLAETSA WA BIBELE

8. Keng se ka o susumetsang hore o bolelle ba bang seo o ithutileng sona?

⁸ Ha o ntse o ithuta Bibele mme o bona kamoo e o thusang kateng, tumelo ya hao e tla tiya. Ebile o tla batla ho bolella ba bang dintho tseo o ithutang tsona. (Jeremia 20:9; 2 Bakorinthe 4:13) O ka bolella bo mang?

9, 10. (a) Ke bo mang bao o ka qalang ho ba bolella dintho tseo o ithutileng tsona ka Bibeleng? (b) O lokela ho etsang haeba o batla ho sebetsa le phutheho ho bolella batho molaetsa wa Bibele?

⁹ O ka bolella ba lelapa la hao, metswalle, baahelane kapa basebetsimmoho le wena ka seo o ithutang sona ka Bibeleng. Ho etsa jwalo ke ntho e ntle, empa o bue le bona ka mosa. Qetellong o tla kgona ho sebetsa le phutheho ho bolella ba bang molaetsa wa Bibele. Ha o se o batla ho etsa jwalo o ka bua le motho ya o rutang Bibele. Haeba motho eo a bona hore o a tshwaneleha, ebile o latela melao ya Bibele bophelong ba hao, o tla lokisetsa hore wena le yena le kopane le baholo ba babedi ba phutheho.

¹⁰ Ho tla etsahalang ha le se le na le baholo bao? Baholo ba tla bua le wena ho bona hore na o utlwisisa dithuto tsa Bibele tsa motheo le hore na o a di dumela. Ba ka boetse ba batla ho tseba hore na o latela melao ya Bibele bophelong ba hao le hore na ka nnete o batla ho ba e mong wa Dipaki Tsa Jehova. Baholo ba thusa batho bohle ka phuthehong, ho akarelletsa le wena, ka hoo o se ke wa tshaba ho bua le bona. (Liketso 20:28; 1 Petrose 5:2, 3) Ka mora moo, baholo ba tla o tsebisa haeba o se o loketse ho qala ho sebetsa le phutheho mosebetsing wa boboledi.

11. Ke hobaneng ha e le ha bohlokwa hore o etse diphetoho pele o sebetsa le phutheho mosebetsing wa boboledi?

¹¹ Baholo ba tla o hlalosetsa hore o hloka ho etsa diphetoho tse ding tse eketsehileng pele o ka qala ho sebetsa le phutheho mosebetsing wa boboledi. Ke hobaneng ha e le ha bohlokwa hore o etse diphetoho tseo. Ke hobane ha re bua le ba bang ka Modimo, re emela Jehova mme re lokela ho phela ka tsela e mo kgahlisang.—1 Bakorinthe 6:9, 10; Bagalata 5:19-21.

BAKA MME O FETOHE

12. Ke hobaneng ha batho bohle ba lokela ho baka?

¹² Ho na le ntho e nngwe hape eo o lokelang ho e etsa pele o kolobetswa. Bibele e re: “Bakang, mme le sokolohe e le hore dibe tsa lona di hlakolwe.” (Liketso 3:19) Ho baka ho bolelang? Ho bolela ho itshola kapa ho swabela dintho tsohle tse mpe tseo re di entseng. Ka mohlala, haeba o ne o sa hlomphe melao ya Modimo mabapi le thobalano, o lokela ho baka. Le haeba bophelo bohle ba hao o ne o leka ho etsa dintho tse nepahetseng, o ntse o hloka ho baka, hobane kaofela re etsa sebe mme re hloka tshwarelo ya Modimo.—Baroma 3:23; 5:12.

13. Ho bolelang “ho fetoha”?

¹³ Na ho lekane hore feela o itshole ka dintho tse mpe tseo o di entseng? Tjhe. Bibele e re o boetse o lokela “ho fetoha.” Sena se bolela hore o lokela ho kgaotsa ho etsa dintho tse mpe tseo o neng o di etsa pele mme o qale ho etsa tse nepahetseng. Ka mohlala, a re re o etela sebaka se itseng ka lekgetlo la pele. Ebe ka mora nako e itseng o a hlokomela hore o tseleng e fosahetseng. O ne o tla etsang? Ha ho pelaelo hore o ne o tla tswa ka tseleng eo, ebe o nka e nepahetseng. Ka ho tshwanang, ha o ntse o ithuta Bibele o ka nna wa hlokomela hore ho na le mekgwa kapa dintho tseo o hlokang ho di tlohela. Ka hoo ikemisetse “ho fetoha,” mme o qale ho etsa se nepahetseng.

INEHELE HO JEHOVA

14. O ka inehela ho Modimo jwang?

¹⁴ Mohato o mong wa bohlokwa oo o lokelang ho o nka pele o kolobetswa, ke ho inehela ho Jehova. Ha o inehela ho Jehova o mo tshepisa ka thapelo hore o tla rapela yena feela le hore ho etsa thato ya hae ho tla tla pele bophelong ba hao.—Deuteronoma 6:15.

15, 16. Keng e susumelletsang motho hore a inehele ho Modimo?

¹⁵ Ho tshepisa Jehova hore o tla rapela yena feela ho tshwana le ho tshepisa motho eo o mo ratang hore o tla phela le yena bophelo bohle ba hao. Ka mohlala, a re re monna le mosadi ba a ratana. Ha monna eo a ntse a tsebana le mosadi eo haholwanyane, o qetella a se a mo rata a bile a batla ho mo nyala. Le hoja ho nyala motho e le qeto e tebileng, monna eo o ikemiseditse ho amohela boikarabelo ba lenyalo hobane o rata mosadi eo.

¹⁶ Ha o ntse o ithuta ka Jehova, o tla mo rata ebile o tla batla ho etsa sohle se matleng a hao ho mo sebeletsa. Sena se tla o susumelletsa ho mo tshepisa ka thapelo hore o tla mo sebeletsa. Bibele e re e mong le e mong ya batlang ho ba molatedi wa Jesu o lokela ho ‘itatola.’ (Mareka 8:34) Seo se bolelang? Ho itatola ho bolela ho etsa hore Jehova a tle pele bophelong ba hao. Ka mantswe a mang, o nka seo Jehova a se batlang e le sa bohlokwa ho feta ntho le ha e le efe eo wena o e batlang.—Bala 1 Petrose 4:2.

O SE KE WA TSHABA HORE O TLA ETSA DIPHOSO

17. Ke hobaneng ha batho ba bang ba sa inehele ho Jehova?

¹⁷ Batho ba bang ha ba inehele ho Jehova hobane ba tshaba hore ba ke ke ba phetha tshepiso ya bona ya ho mo sebeletsa. Ha ba batle ho swabisa Jehova kapa ba nahana hore haeba ba sa inehela ho yena, Jehova a ke ke a ba ahlola ka diketso tsa bona.

18. Keng se ka o thusang hore o se ke wa tshaba ho inehela ho Jehova?

¹⁸ Ho rata Jehova ho tla o thusa hore o se ke wa tshaba ho inehela ho yena. Ka ha o a mo rata, o tla etsa sohle seo o ka se kgonang ho phetha tshepiso ya hao. (Moeklesia 5:4; Bakolose 1:10) O ke ke wa bona ho le thata ho etsa thato ya Jehova. Bibele e re: “Se bolelwang ke lerato la Modimo ke sena, hore re boloke ditaelo tsa hae; leha ho le jwalo ditaelo tsa hae ha di boima.”—1 Johanne 5:3.

19. Ke hobaneng ha o sa lokela ho tshaba ho inehela ho Jehova?

¹⁹ Ha ho hlokahale hore o be motho ya sa etseng diphoso hore o inehele ho Jehova. Ha a lebelle hore re etse se ka hodimo ho seo re ka se kgonang. (Pesaleme ya 103:14) O tla o thusa ho etsa dintho tse nepahetseng. (Esaia 41:10) Ka hoo tshepa Jehova ka pelo ya hao yohle mme “o tla otlolla ditsela tsa hao.”—Liproverbia 3:5, 6.

HO KOLOBETSWA BAKENG SA POLOKO

20. O lokela ho etsang ka mora ho inehela ho Jehova ka thapelo?

²⁰ Na o nahana hore o se o loketse ho inehela ho Jehova? Ka mora ho inehela ho Jehova ka thapelo, o se o loketse ho nka mohato o latelang e leng wa ho kolobetswa.

21, 22. O ka “bolela phatlalatsa” jwang hore o inehetse ho Jehova?

²¹ Tsebisa mohokahanyi wa sehlopha sa baholo wa phutheho ya heno hore o se o inehetse ho Jehova ka thapelo le hore o batla ho kolobetswa. O tla lokisetsa hore baholo ba buisane le wena ka dithuto tsa Bibele tsa motheo. Haeba ba bona hore o a tshwaneleha ho kolobetswa, ba tla o tsebisa hore o ka etsa jwalo kopanong e latelang ya Dipaki Tsa Jehova. Kopanong eo ho tla ba le puo e tla hlalosa hore na ho kolobetswa ho bolelang. Sebui se tla botsa ba tlo kolobetswa dipotso tse pedi tse bonolo. Ha o araba dipotso tseo, o tla be o “bolela phatlalatsa” hore o se o inehetse ho Jehova.—Baroma 10:10.

²² Ka mora moo o tla kolobetswa. Mmele ohle wa hao o tla tebiswa kapa o kenngwe ka hara metsi ka ho feletseng. Ha o kolobetswa o bontsha batho bohle hore o inehetse ho Jehova le hore o se o le e mong wa Dipaki Tsa Jehova.

SEO KOLOBETSO E SE BOLELANG

23. Ho bolelang ho kolobetswa “ka lebitso la Ntate le la Mora le la moya o halalelang”?

²³ Jesu o ile a re barutuuwa ba hae ba tla kolobetswa “ka lebitso la Ntate le la Mora le la moya o halalelang.” (Bala Matheu 28:19.) Seo se bolelang? Se bolela hore o amohela bolaodi ba Jehova le hore o utlwisisa karolo eo Jesu a e phethang morerong wa Modimo le kamoo Modimo a sebedisang moya wa hae o halalelang kateng ho etsa thato ya hae.—Pesaleme ya 83:18; Matheu 28:18; Bagalata 5:22, 23; 2 Petrose 1:21.

24, 25. (a) Kolobetso e bolelang? (b) Re tla bua kang kgaolong e latelang?

²⁴ Kolobetso e bolela ntho e nngwe ya bohlokwa. Ha mmele ohle wa hao o kenywa ka metsing, seo se bolela hore o lahlile kapa o tlohetse tsela eo o neng o phela ka yona pele. Athe ha o tswa ka metsing, o bontsha hore o qala bophelo bo botjha ba ho sebeletsa Jehova le ho phela ka melao ya hae. Hopola hore ha o a inehela ho motho, ho mokgatlo kapa mosebetsing o itseng. Empa o inehetse ho Jehova.

²⁵ Boinehelo ba hao bo tla o thusa hore o be le kamano e haufi le Modimo. (Pesaleme ya 25:14) Seo ha se bolele hore o tla pholoha hobane feela o kolobeditswe. Bibele e re: “Le nne le sebeletse poloko ya lona ka tshabo le thothomelo.” (Bafilipi 2:12) Kolobetso empa feela e le mohato wa pele. Empa o ka etsa jwang hore o dule o le haufi le Jehova? Kgaolo ya ho qetela ya buka ena e tla araba potso eo.