Letsholo le Kgethehileng la ho Qadisa Dithuto Tsa Bibele ka September

Ka September, re tla ikitlaetsa ka matla ho qadisa dithuto tsa Bibele re sebedisa bukana ya O ka Thaba ka ho sa Feleng! Bahweletsi ba ka kgetha ho nka bopulamadiboho bo thusang ba dihora tse 30. Letsholo lee le tla etswa jwang?

• Leetong la Pele: Sebedisa leqephe le qetellang la bukana ho tsosa thahasello ya motho le ho mo bontsha hore na thuto ya Bibele e kgannwa jwang. Hopola ba ileng ba bontsha thahasello pele le bao o ileng wa kgutlela ho bona nakong e fetileng. Le haeba ba ile ba hana ho ithuta qalong, ba ka thabela bukana e ntjha le mokgwa o motjha wa ho ithuta. Ha re a tlameha ho siya dibukana matlong ao ho se nang batho ho ona kapa ra di kenya ka hare ho mangolo ao re a ngolletseng batho ba sa kang ba bontsha thahasello. Komiti ya Tshebeletso ya Phutheho e ka nna ya hlophisa hore ho be le diboka tsa tshimo tse eketsehileng kgweding eo.

• Menyetla e Meng: Le ka beha bukana ya O ka Thaba ka ho sa Feleng! diteroling haeba le ena le tsona phuthehong ya lona. Bolella ba bontshang thahasello hore re ithuta Bibele le batho mahala re sebedisa bukana ena. Hang feela ha o kopana le motho, mo bontshe ka bokgutshwanyane hore na thuto ya Bibele e kgannwa jwang kapa o mo bontshe hamorao. Molebedi wa tshebeletso a ka lokisetsa hore ho be le bahweletsi ba tla ya moo ho nang le dikgwebo e le hore ba qadise dithuto tsa Bibele. O ka boela wa qadisa thuto ya Bibele le basebetsimmoho kapa le batho bao o kopanang le bona ha o ntse o etsa bopaki bo sa rerwang.

Jesu o re laetse hore re “etse barutuwa” re be re “ba rute.” (Mat 28:19, 20) E se eka letsholo lena le kgethehileng le ka re thusa ho finyella morero ona, re sebedisa bukana ya O ka Thaba ka ho sa Feleng!