Satane o Shebahala Jwang?

Karabo e tswang ka Bibeleng

Satane ke motho ya sa bonahaleng, ho bolelang hore ha a na mmele wa nama oo re ka o bonang.—Baefese 6:11, 12.

Setshwantsho se tlwaelehileng sa Satane a tshwere fereko. O na le ponahalo e jwalo ka ya podi e nang le dinaka le mohatla.

Batho ba bangata ba toroya Satane a shebahala jwalo ka podi e nang le dinaka, mohatla ebile e tshwere fereko. Batho ba bangata ba dumela hore ditshwantsho tse hlahisitseng Satane di toroilwe ke batho ba phetseng dilemo tse ka bang 1 000 tse fetileng mme batho ba neng ba di toroya ba ne ba susumetswa ke ditshomo le mashano a mehleng ya pele.

Bibele e re Satane o jwang?

Bibele e hlalosa Satane ka ditsela tse ngata. Sena se re thusa ho utlwisisa seo a leng sona eseng ponahalo ya hae. Tse ding tsa tsona di akarelletsa:

Lengeloi la lesedi. O etsa e ka o fana ka dintho tse molemo e le ho etsa hore batho ba latele dithuto tsa hae ho ena le ho latela tsa Modimo.—2 Bakorinthe 11:14.
Tau e purumang. Ka bohale o hlasela bahlanka ba Modimo.—1 Petrose 5:8.
Drakone e kgolo. O a tshosa, o matla ebile o kotsi.—Tšenolo 12:9.

Ditemana tsa Bibele tse buang ka Satane

2 Bakorinthe 11:14: “Satane o ntse a iphetola lengeloi la lesedi.”

Seo e se bolelang: Satane o sebedisa dintho tse hohelang ho etsa hore batho ba latele dithuto tsa hae ho ena le ho latela tsa Modimo.
Baefese 6:11: “Aparang dihlomo tse feletseng tsa ntwa tse tswang ho Modimo e le hore le ka kgona ho ema le tiile kgahlanong le maqiti a Diabolose.”

Seo e se bolelang: Satane o sebedisa maqheka a mangata ho etsa hore batho ba se ke ba mamela Modimo.
Jakobo 4:7: “Ipeheng tlasa Modimo; empa le hanyetse Diabolose, mme o tla le balehela.”

Seo e se bolelang: Motho a ka hanyetsa Satane ka hore a mamele Modimo.
1 Petrose 5:8: “Mohanyetsi wa lona, Diabolose, o tsamaya jwalo ka tau e purumang, e batlang ho harola e mong.”

Seo e se bolelang: Satane o hloile bohle ba mamelang Modimo mme o batla ho senya setswalle sa bona le Yena.