BATJHA BA A BOTSA
Ke Hobaneng ha Eka Batswadi ba ka ha ba Batle ha ke Ithabisa?
Metswalle ya hao e o memme phathing mafelobeke mme o kopa batswadi ba hao hore o ye empa karabo ya bona ke “tjhe.” Ha o makale hobane le nakong e fetileng ba arabile ka tsela e tshwanang.
Sehloohong sena
Ke hobaneng ha batswadi ba ka ba dula ba hana?
Haeba ho bonahala eka batswadi ba hao ba dula ba hana, o ka nna wa nahana hore ha ba batle o thabe.
Motjha e mong ya bitswang Marie o ile a ikutlwa jwalo ha a ba le founo. O re: “Ntate wa ka o ile a beha melao e mengata, hore na ke daonlouda di app dife, ke bua le batho bafe le hore na ke bua le bona ka dinako dife. Ka nako eo, metswalle ya ka yona e ne e etsa ntho le ha e le efe eo e e batlang.”
Nahana ka sena: Na ntate wa Marie o ne a sa batle a thabe? Keng seo a neng a kgathatsehile ka sona?
Lebelo leo o sa lokelang ho le feta ha o kganna le o thibela hore o se ke wa hlahelwa ke kotsi, ka tsela e tshwanang ho jwalo le ka melao eo batswadi ba o behelang yona.
Leka sena: Iketse eka o motswadi wa motjha ya qetang ho ba le founo. O ne o ka kgathatseha ka eng? Ke meedi efe eo o ka e behelang ngwana wa hao? O ne o ka reng haeba ngwana wa hao a ne a ka re ha o batle hore a thabe?
“Ntate wa ka o ne a rata hore, ‘Ikenye dieteng tsaka.’ Ho etsa jwalo ho ne ho nthusa hore ke bone melemo ya melao ya hae le mabaka ao a entseng melao eo ka ona. Haeba ke ne ke ena le bana, ke ne ke tla lebella hore ba etse dintho ka tsela eo ntate wa ka a lebellang hore ke etse dintho ka yona.”—Tanya.
Keng seo nka se etsang hore batswadi ba ka ba dumele?
“Ho omana ho ke ke ha le thusa ka letho ebile ho ka le kgathatsa. Ha o etsa kgang, batswadi ba hao ba ke ke ba o bona o hodile mme o ke ke wa kgona ho iketsetsa diqeto.”—Richard.
“Ho dula ho ena le mabaka a utlwahalang a ho beha melao. Batswadi ba ka ha ba nthibele hore ke thabe empa ba batla ke thabe ka tsela e ke keng ya ntlisetsa mathata.”—Ivy.
Molaomotheo wa Bibele: “Motho ya se nang kelello o ntsha kgalefo ya hae empa motho ya bohlale o a e laola.”—Diproverbia 29:11.
“Ha ke le mong ke ne ke etsa dintho tseo ntate wa ka a itseng ke se ke ka di etsa ka founo. Ke ile ka etsetsa metswalle ya ka melaetsa bosiu haholo ka ba ka daonlouda di app tseo ntate wa ka a neng a sa ntumella ho ba le tsona. Ho eso ye kae o ne a ye a hlokomele seo ke neng ke se etsa ebe dithibelo tsa hae di ba boima le ho feta hobane o ne a se a sa ntshepe. Ha se bohlale ho etsa dintho tseo o sa dumellwang ho di etsa.”—Marie.
“Mamella. Ho ka nka nako hore batswadi ba hao ba fetole dithibelo empa haeba o ba mamela ba ka o dumella ho etsa dintho tse eketsehileng.”—Melinda.
Molaomotheo wa Bibele: “Le mamele batswadi ba lona dinthong tsohle.”—Bakolose 3:20.
“Ho tsitlella seo o se batlang ho tla etsa hore dintho di be thata le ho feta.”—Natalie.
“Motswadi o batla ho kgodiseha hore o kgona ho etsa diqeto tse nepahetseng. Ka hoo, ha ke bua le batswadi ba ka ke leka ho beha mabaka a utlwahalang eseng ke kgannwe ke maikutlo. Ha ke etsa jwalo, ka dinako tse ding batswadi ba ka ba ntumella ho etsa ntho eo ke e kopang.”—Joseph.
Molaomotheo wa Bibele: “Hlompha ntate wa hao le mme wa hao.”—Baefese 6:2.