Ho Halalela ho Bolelang?

Karabo ya Bibele

Ho halalela ho bolela ho ikarola dinthong tse silafetseng. Lentswe la Seheberu le fetoletsweng e le “ho halalela” le bolela “ho ikarola.” Ka hona, ntho e halalelang ha e sebediswe ke motho e mong le e mong ka lebaka la ho kgetheha le ho hlweka ha yona.

Modimo ke yena ya halalelang ka ho fetisisa. Bibele e re: “Ha ho na motho ya halalelang jwalo ka Jehova.”a (1 Samuele 2:⁠2) Ke ka hona Modimo e leng yena ya tshwanelehang ho beha ditekanyetso tsa hore na ntho e halalelang ke e jwang.

Lentswe “ho halalela” le ka sebediswa ha ho buuwa ka dintho tse amanang le Modimo, haholoholo tse sebediswang ka ho kgetheha ha re mo rapela. Ka mohlala, Bibele e bua ka:

• Dibaka tse halalelang: Modimo o ile a bua le Moshe a le lelakabeng la mollo hara sehlahla se meutlwa, a re: “Sebaka seo o emeng ho sona se a halalela.”​—⁠Exoda 3:​2-⁠5.

• Mekete e halalelang: Baiseraele ba ne ba rapela Jehova ka ho dula ba eya meketeng ya bodumedi e bitswang “dikopano tse halalelang.”​—⁠Levitike 23:⁠37.

• Dintho tse halalelang: Dintho tse neng di sebediswa tempeleng e Jerusalema ha ho ne ho rapelwa Modimo di ne di bitswa ‘disebediswa tse halalelang.’ (1 Marena 8:⁠4) Disebediswa tsena di ne di lokela ho tshwarwa ka tsela e kgethehileng le hoja di ne di sa lokela ho rapelwa.b

Na motho ya sa phethahalang a ka halalela?

Ho jwalo hobane Modimo o re Bakreste ‘ba halalele hobane o a halalela.’ (1 Petrose 1:​16) Ke nnete hore batho ba sa phethahalang ba ke ke ba halalela jwalo ka Modimo empa haeba ba mamela melao ya hae e lokileng a ka ba nka ba halalela ebile ba amoheleha. (Baroma 12:⁠1) Motho ya lwanelang ho halalela o bontsha seo ka mantswe le diketso. Ka mohlala, o mamela keletso ya Bibele e reng ‘a halalele le hore a se ke a etsa boitshwaro bo bobe bo amanang le thobalano’ le hore ‘a halalele dinthong tsohle tseo a di etsang.’​—⁠1 Bathesalonika 4:⁠3; 1 Petrose 1:⁠15.

Na motho a ka kgaotsa ho halalela?

Ho jwalo hobane haeba a ka lahla ditekanyetso tsa Modimo tsa boitshwaro, Modimo ha a sa tla mo nka a halalela. Ka mohlala, lengolo la Bibele la Baheberu le ne le ngoletswe batho ba halalelang mme le ne le ba lemosa hore “ho se ke ha eba le ya bang le pelo e mpe e se nang tumelo ka lebaka la ho suthela hole le Modimo ya phelang.”​—⁠Baheberu 3:​1, 12.

Maikutlo a fosahetseng ka ho halalela

Maikutlo a fosahetseng: Motho a ka halalela haeba a kgetha ho se kene lenyalong.

Nnete: Le hoja Mokreste a ka kgetha ho se kene lenyalong, seo ha se bolele hore o a halalela mahlong a Modimo. Ke nnete hore batho ba sa kenang lenyalong ba ka kgona ho sebeletsa Modimo ba sa sitiswe ke letho. (1 Bakorinthe 7:​32-​34) Le ha ho le jwalo, Bibele e re batho ba keneng lenyalong le bona ba ka halalela, ebile e mong wa baapostola ba Jesu e leng Petrose o ne a nyetse.​—⁠Matheu 8:​14; 1 Bakorinthe 9:⁠5.