BATJHA BA A BOTSA
Nka Hlola Diteko Jwang?
Moapostola Pauluse o ile a re: “Ha ke batla ho etsa dintho tse nepahetseng, tse mpe di teng ho nna.” (Baroma 7:21) Na o kile wa ikutlwa ka tsela ee? Haeba ho jwalo, sehlooho sena se tlo o thusa hore na ke jwang o ka hlolang teko ya ho etsa dintho tse fosahetseng.
Seo o lokelang ho se tseba
Hangata ha batho ba bang ba o hatella o qetella o batla ho etsa dintho tse mpe. Ha e le hantle Bibele e re “ho tlwaelana le batho ba fosahetseng ho senya mekgwa e metle.” (1 Bakorinthe 15:33) Kgatello e tswang ho batho ba bang kapa dinthong tseo o di shebellang le ho di bala e ka etsa hore o ipehe tekong wa ba “wa latela bongata hore o etse bobe.”—Exoda 23:2.
Jeremy o re: “Kgatello ya ho batla ho ratwa le ho amohelwa ho ka etsa hore o batle ho etsa dintho tseo batho ba bang ba di etsang e le hore feela ba o amohele.”
Nahana ka sena: Ke hobaneng ha teko e ka ba matla haholo haeba o dula o nahana ka seo batho ba se buang kapa ba se nahanang ka wena?—Diproverbia 29:25.
Tabataba ke ena: O se ke wa dumella kgatello ya dithaka hore e etse hore o sekisetse dinthong tseo o di nkang e le tsa bohlokwa.
Seo o ka se etsang
Tseba seo o se dumelang. Haeba o sa tsebe seo o se dumelang, batho ba ka o etsa popae eo ba bapalang ka yona. Ho molemo hore o latele seo Bibele e se buang ha e re: “Etsang bonnete ba hore dintho tsohle di nepahetse, le kgomarele tse nepahetseng.” (1 Bathesalonika 5:21) Ha o ntse o utlwisisa seo o se dumelang, ho tla ba bonolo hore o phele tumellanong le sona mme o hlole teko ya ho etsa se fapaneng.
Nahana ka sena: Ke hobaneng ha o dumela hore melao ya Modimo ya boitshwaro e etseditswe ho o tswela molemo?
Kimberly o re: “Ke ithutile hore haeba ke emela seo ke se dumelang ebile ke sa inehele ditekong, batho ba bang ba a ntlhompha.”
Mohlala wa motho eo re ka mo etsisang ya hlahang ka Bibeleng: Daniele. Ha Daniele e sa le motjha, “o ile a etsa qeto ka pelong ya hae” hore o tla mamela melao ya Modimo.—Daniele 1:8.
Haeba o sa tsebe seo o se dumelang, batho ba ka o etsa popae eo ba bapalang ka yona
Tseba mefokolo ya hao. Ha Bibele e bua ka “ditakatso tsa botjha” e bua ka boikutlo bo matla boo o bang le bona ha o sa le motjha. (2 Timothea 2:22) Sena se akarelletsa boikutlo ba ho batla ho amohelwa ke batho ba bang le ba ho iketsetsa diqeto le hoja o eso fihle dilemong tse loketseng eseng feela boikutlo ba ho batla ho etsa thobalano.
Nahana ka sena: Bibele e re “e mong le e mong o lekwa ke ho hohelwa ke ditakatso tsa hae.” (Jakobo 1:14) Ke takatso efeng eo o lwantshanang le yona haholo?
Sylvia o re: “Tseba hore na ke diteko dife tseo o iphumanang o tshwasehile ho tsona ha bonolo mme o se ke wa ithetsa. Etsa dipatlisiso ka hore na o ka hlola diteko tseo jwang mme o ngole dintlha tseo o ka di sebedisang fatshe. Ha o etsa jwalo, o tla tseba hore na ke jwang o ka hlolang diteko tse jwalo nakong e tlang ha o tobana le tsona.”
Mohlala wa motho eo re ka mo etsisang ya hlahang ka Bibeleng: Davida. Ka dinako tse ding Davida o ne a itlohella hore a hatellwe ke ditakatso tsa hae le ke batho ba bang. Empa o ile a ithuta diphosong tsa hae mme a leka ho ntlafatsa. O ile a rapela Jehova a re “hlwekisa pelo ya ka, o fetole tsela eo ke nahanang ka yona e le hore nka tshepahala.”—Pesaleme ya 51:10.
Tseba seo o lokelang ho se etsa. Bibele e re: “O se ke wa itlohela hore o hlolwe ke bobe.” (Baroma 12:21) Sena se bolela hore ha o a lokela ho inehella diteko. Empa o ka kgetha ho etsa se nepahetseng.
Nahana ka sena: O ka etsang hore o se ke wa iphumana o entse ntho e fosahetseng ha o lekwa?
Sophia o re: “Ke nahana ka hore na ke tlo ikutlwa jwang ka mora ho itumella ho lekwa. Na ke tlo utlwa ke kgotsofetse? Mohlomong ka nakwana. Ho thweng ka mora nako e telele? Ke tla be ke ikwahlaya. Na ho molemo ho etsa jwalo? Tjhe!”
Mohlala wa motho eo re ka mo etsisang ya hlahang ka Bibeleng: Pauluse. Le hoja Pauluse a ile a dumela hore o na le takatso ya ho etsa se fosahetseng, o ile a ema a tiile. O ile a re: “Ke tshwara mmele wa ka ka thata ebile ke o tshwara jwalo ka lekgoba.”—1 Bakorinthe 9:27.
Tabataba ke ena: Ho matleng a hao hore na o tla etsang ha o hlahelwa ke diteko.
Hopola hore diteko ke dintho tsa nakwana. Melissa ya dilemo di 20 o re: “Ha ke nahana ka hore dintho tse ngata tseo e neng e le diteko ho nna kgale, hona jwale ha di sa re letho, ke kgodisehile hore diteko tse ntlhahelang di tla feta mme ka le leng ke tla hetla ke hlokomele hore bophelo ba ka bo se bo le molemo hobane ke ile ka di hlola.”