Na Tjhelete ke Motso wa Mefuta Yohle ya Dintho Tse Mpe?
Karabo ya Bibele
Tjhe. Bibele ha e re ho ba le tjhelete ho fosahetse kapa hona hore tjhelete ke yona e bakang dintho tsohle tse mpe. Qotsulo ya Bibele e reng “tjhelete ke motso wa mefuta yohle ya dintho tse mpe” ha ya fella ebile e etsa hore batho ba be le maikutlo a fosahetseng. Ha e le hantle Bibele e re “lerato la tjhelete ke motso wa mefuta yohle ya dintho tse mpe.”a—1 Timothea 6:10.
Bibele e reng ka tjhelete?
Bibele e re tjhelete e ka ba molemo ha e sebediswa ka bohlale hape e ka ba “tshireletso.” (Moeklesia 7:12) Ho ekelletsa moo, Bibele e babatsa batho ba fanang ho akarelletsa le ba fanang ka tjhelete.—Liproverbia 11:25.
Le ha ho le jwalo, Bibele e re re be hlokolosi hore tjhelete e se ke ya ba yona ntho e tlang pele bophelong ba rona. E re: “Mokgwa wa lona wa bophelo e ke e be o se nang lerato la tjhelete, ha le ntse le kgotsofaletse dintho tse teng.” (Baheberu 13:5) Ntho eo re ithutang yona ke hore tjhelete le maruo ha di ya lokela ho tla pele bophelong ba rona. Ho e na le hoo, re lokela ho ikemisetsa ho kgotsofalla dintho tseo re nang le tsona e leng dijo, diaparo le bodulo.—1 Timothea 6:8.
Bibele e re hlokomedisa eng ka ho rata tjhelete?
Batho ba meharo ba ke ke ba fumana bophelo bo sa feleng. (Baefese 5:5) Lebaka ke hobane meharo ke mofuta o mong wa borapedi ba ditshwantsho kapa borapedi bo fosahetseng. (Bakolose 3:5) Lebaka le leng ke hobane batho ba meharo ba tsitlella ho fumana dintho tseo ba di batlang mme ba hlokomoloha melaomotheo. Liproverbia 28:20 e re: “Ya potlakelang ho fumana maruo a ke ke a dula a hloka molato.” Ba ka ba ba iphumana ba entse ditlolo tsa molao tse kang ho qhekella, ho khothotsa, bolotsana, ho kwetela le ho bolaya.
Le haeba tjhelete e sa susumelletse motho hore a etse dintho tse mpe, e ka ba le ditlamorao tse seng monate. Bibele e re “ba ikemiseditseng ho rua ba wela molekong le lerabeng le ditakatsong tse ngata tse se nang kelello le tse kotsi.”—1 Timothea 6:9.
Keletso ya Bibele e buang ka tjhelete e ka re tswela molemo jwang?
Haeba re sa etse dintho tse kgahlanong le thato ya Modimo hore feela re be le tjhelete, re tla ba le boitlhompho le kamohelo mahlong a Jehova a be a re tshehetse. Jehova o re ho batho ba batlang ho mo kgahlisa e le kannete: “Ho hang nke ke ka o tlohela kapa ka o furalla.” (Baheberu 13:5, 6) O boetse o re tiisetsa hore “motho wa diketso tse tshepahalang o tla fumana ditlhohonolofatso tse ngata.”—Liproverbia 28:20.
a Temana ena e ka hlaloswa e le: “Lerato la tjhelete ke motso wa mefuta yohle ya dintho tse kotsi.”