Buka ya Pele ya Samuele

4 Samuele a bua le Baiseraele bohle.

Yaba Baiseraele ba a tswa ho ya lwantsha Bafilista. Ba hloma ditente tsa bona haufi le Ebenezere mme Bafilista ba hloma ditente tsa bona Afeke. 2 Bafilista ba tsamaya ba itokiseditse ho ya lwantsha Baiseraele empa ntwa e ne e le boima mme Bafilista ba hlola Baiseraele, ba bolaya banna ba ka bang 4 000 ntweng eo. 3 Ha batho ba kgutla ntweng, baholo ba Iseraele ba re: “Ke hobaneng ha Jehova a dumeletse hore Bafilista ba re hlole kajeno?*+ A re tsamayeng ka areka ya selekane sa Jehova e Shilo+ e le hore e be le rona mme e re pholose ho dira tsa rona.” 4 Ka hoo, batho ba romela banna Shilo, ba fihla ba nka areka ya selekane ya Jehova wa mabotho ya dutseng teroneng hodima* dikerubime.+ Bara ba babedi ba Eli e leng Hofni le Finease+ le bona ba ne ba le moo le areka ya selekane ya Modimo wa nnete.

5 Hang ha areka ya selekane sa Jehova e fihla ditenteng tsa Baiseraele, kaofela ha bona ba hweletsa haholo ba etsa lerata hoo lefatshe le ileng la thothomela. 6 Ha Bafilista ba utlwa lerata leo ba re: “Ke hobaneng ha ho ena le lerata le lekaale ditenteng tsa Baheberu?” Qetellong ba utlwela hore Areka ya Jehova e tlile ditenteng tsa Baiseraele. 7 Bafilista ba tshoha mme ba re: “Modimo o tlile ditenteng tsa bona.”+ Ka hoo, ba re: “Re madimabe hobane ntho e tjena ha e eso ka e etsahala. 8 Re madimabe. Ke mang ya tla re pholosa letsohong la Modimo eo ya phahameng? Enwa ke Modimo yane ya ileng a bolaya Baegepeta ba bangata lefeelleng.+ 9 Ebang sebete jwalo ka banna lona Bafilista e le hore le se ke la sebeletsa Baheberu jwalo ka ha ba le sebeleditse.+ Le be banna mme le lwane.” 10 Ka hoo, Bafilista ba lwana mme ba hlola Baiseraele+ yaba kaofela ba balehela ditenteng tsa bona. Ho ile ha bolawa batho ba bangata. Ka lehlakoreng la Baiseraele ho ile ha shwa masole a 30 000. 11 Ho ekelletsa moo, Areka ya Modimo e ile ya haptjwa mme bara ba babedi ba Eli e leng Hofni le Finease ba shwa.+

12 Monna wa leloko la Benjamine a tloha moleng wa ntwa mme a mathela Shilo, diaparo tsa hae di tabohile a bile a le mobu hloohong.+ 13 Ha monna eo a fihla, Eli o ne a dutse setulong ka thoko ho tsela a letile hobane o ne a tshwenyehile haholo ka Areka ya Modimo wa nnete.+ Monna eo a kena motseng ho ya bolella batho se etsahetseng mme batho bohle ba motseng ba qala ho lla. 14 Ha Eli a utlwa sello seo a re: “Moferefere oo ke o utlwang ke wa eng?” Monna eo a potlakela ho Eli mme a mo bolella se etsahetseng. 15 (Eli o ne a le dilemo di 98, a se a sa bone.)+ 16 Monna eo a re ho Eli: “Ke balehile moleng wa ntwa. Kajeno ke balehile ntweng.” Ha a utlwa seo a re: “Ho etsahetseng mora wa ka?” 17 Monna eo ya tlisitseng ditaba a re: “Baiseraele ba balehile Bafilista hobane ba hlotswe mme ba bangata ba bona ba bolauwe.+ Hape bara ba hao ba babedi e leng Hofni le Finease ba shwele+ mme Areka ya Modimo wa nnete e hapuwe.”+

18 Hang ha a bua ka Areka ya Modimo wa nnete, Eli a wa ka mokokotlo a le setulong sa hae se pela keiti. Molala wa hae wa robeha yaba o a shwa hobane o ne a se a tsofetse ebile a nonne. O ne a qetile dilemo tse 40 e le moahlodi wa Iseraele. 19 Ngwetsi ya hae, mosadi wa Finease, e ne e le moimana mme a le haufi le ho beleha. Ha a utlwa hore Areka ya Modimo wa nnete e hapuwe le hore ntatematsale wa hae le monna wa hae ba shwele, a inama yaba o beleha ka tshohanyetso. 20 Ha a le makgatheng a lefu, basadi ba emeng pela hae ba re: “O se ke wa tshoha hobane o tswetse mora.” Ha a ka a araba kapa a re letho ho bona.* 21 Empa a reha moshanyana eo Ikabode*+ a re: “Kganya e tlohile Iseraele e ile botlamuweng.”+ O ne a bua ka Areka ya Modimo wa nnete e hapuweng le ka se etsahetseng ka ntatematsale wa hae le monna wa hae.+ 22 Mosadi eo o ile a re: “Kganya e tlohile Iseraele e ile botlamuweng hobane Areka ya Modimo wa nnete e hapuwe.”+