Buka ya Pele ya Samuele
27 Le ha ho le jwalo, Davida a re ka pelong: “Ka letsatsi le leng Saule o tla mpolaya. Ho molemo hore ke balehele+ naheng ya Bafilista. Saule o tla tlohela ho mpatla naheng yohle ya Iseraele+ mme ke tla phonyoha letsohong la hae.” 2 Ka hoo, Davida a tloha le banna ba 600+ ba neng ba ena le yena mme ba ya ho Akishe+ mora wa Maoke, morena wa Gathe. 3 Davida ha mmoho le banna ba hae ba dula le Akishe Gathe, monna e mong le e mong a ena le ba lelapa la hae. Davida o ne a ena le basadi ba hae ba babedi e leng Akinoame+ wa Mojezriele le Abigaile+ wa Mokarmele, eo e neng e le mosadi wa Nabale. 4 Ha Saule a bolellwa hore Davida o balehetse Gathe, a tlohela ho mo batla.+
5 Davida a re ho Akishe: “Haeba o ntumella, ke kopa o mphe sebaka ho e meng ya metse e ka thoko e le hore nka dula moo. Ha ho hlokahale hore mohlanka wa hao a dule motseng wa borena le wena.” 6 Ka hoo, Akishe a mo fa Ziklage+ letsatsing leo. Ke ka lebaka leo Ziklage e leng ya marena a Juda ho fihlela letsatsing lena.
7 Nako* eo Davida a e dutseng dibakeng tse ka thoko tsa Bafilista e bile selemo le dikgwedi tse nne.+ 8 Davida o ne a tlwaetse ho nyoloha le banna ba hae ho ya hlasela Bageshure,+ Bagireze le Baamaleke+ hobane ba ne ba dula naheng e tlohang Telame ho ya fihla Shure+ le ho ya fihla moeding wa naha ya Egepeta. 9 Ha Davida a hlasela naha, o ne a bolaya banna ha mmoho le basadi kaofela+ empa o ne a nka dinku le dipodi, dikgomo, ditonki, dikamele le diaparo ebe o kgutlela ho Akishe. 10 Akishe o ne a mo botsa a re: “Le ne le hlasetse sebaka sefe kajeno?” Ebe Davida o re: “Re hlasetse sebaka se ka borwa* ho Juda”+ kapa “Re hlasetse sebaka se ka borwa ho Bajeramiele”+ kapa “Re hlasetse sebaka se ka borwa ho Bakene.”+ 11 Davida ha a ka a tlohela monna kapa mosadi le ha e le ofe hore a phele mme a tliswe Gathe hobane o ne a re: “E le hore ba se ke ba ba bolella ka rona mme ba re, ‘Davida o entse tjena.’” (O ne a tlwaetse ho etsa jwalo ka nako yohle eo ka yona a dutseng dibakeng tse ka thoko tsa Bafilista.) 12 Ka hoo, Akishe a kgolwa Davida mme a re ka pelong: “Batho ba habo ba Iseraele ba mo hloile. Ka hoo, o tla dula e le lekgoba la ka.”