Seo re Ithutang Sona ka Bibeleng

Na haesale dinaledi le dipolanete di le teng?

Genese 1:1 e re: “Tshimolohong Modimo o ile a bopa mahodimo le lefatshe.”

Pejana ho dilemo tsa bo 1950, borasaense ba tsebahalang ba ne ba dumela hore haesale dinaledi le dipolanete di le teng. Le ha ho le jwalo, ha borasaense ba mehleng ena ba hlahloba bopaki ba a dumela hore ehlile ho na le moo dinaledi le dipolanete di qadileng teng.

Qalong lefatshe le ne le shebahala jwang?

Genese 1:2, 9 e re “lefatshe le ne le se na sebopeho ebile le se na letho,” hape le kwahetswe ke metsi.

Borasaense ba dumellana le tlhaloso eo. Setsebi se seng sa biology se bitswang Patrick Shih se re: “Qalong lefatshe le ne le se na moya oo re ka o hemang e leng oxygen ebile le shebahala ka tsela e makatsang.” Makasine wa Astronomy o re: “Lefatshe le ne le kwahetswe ke metsi mme ho se na moo ho omileng.”

Tikoloho le sepakapaka di ile tsa fetoha jwang ha nako e ntse e ya?

Genese 1:3-5 e a bontsha hore qalong kganya e ne e sa kgone ho fihla lefatsheng. E bile hamorao moo letsatsi le kgwedi di neng di ka bonahala ka ho hlaka ho tloha lefatsheng.​—Genese 1:14-18.

Smithsonian Environmental Research Center e re qalong ho ne ho na le mohodi o etsang hore ho be lerootho mona lefatsheng, o bakwang ke kgase e bitswang Methane. Hamorao mohodi oo o ile wa apoha mme lehodimo le ile la eba leputswa.”

Dintho di ile tsa boptjwa ka tatellano efe lefatsheng?

Genese 1:20-27 e bontsha hore qalong Modimo o ile a bopa ditlhapi, dinonyana, diphoofolo mme a qetella ka ho bopa batho. Borasaense ba dumela hore tlhapi ya pele e bile teng pele ho diphoofolo tse anyesang mme batho ba bile teng ha morao.

Maikutlo a Fosahetseng ka Seo Bibele e se Buang

Batho ba bang ba re Bibele ha e dumellane le diphuputso tsa moraorao tsa saense. Le ha ho le jwalo, maikutlo a bona a fosahetse hobane ha ba utlwisise seo Bibele e se buang.

Bibele ha e re mahodimo le lefatshe di na le dilemo tse 6 000 di le teng. Ho e na le hoo Bibele e re “tshimolohong Modimo o ile a bopa mahodimo le lefatshe.” (Genese 1:1) Bibele ha e bue kapa hona ho hlakisa hore na sena se etsahetse neng.

Bibele ha e re dintho tsohle tse phelang di bopilwe ka matsatsi a tsheletseng a dihora tse 24. Ho e na le hoo, e sebedisa lentswe “letsatsi” ha e bua ka nako e telele. Ka mohlala, ha Bibele e bua ka nako eo Jehovaa a e nkileng a bopa lehodimo le lefatshe e leng matsatsi a tsheletseng ao ho buuang ka ona ho Genese kgaolo ya 1 e hlalosa nako eo kaofela e le “letsatsing leo ka lona Jehova Modimo a entseng lefatshe le lehodimo.” (Genese 2:4) Ka hoo, matsatsi a tsheletseng ao Modimo a a qetileng a bopa lefatshe le dintho tsohle tse ho lona, ha se matsatsi a tlwaelehileng a dihora tse 24 empa ke nako e telele.

Bibele ha e hane hore ha nako e ntse e ya dintho tse phelang di ka fetoha hanyane empa di sa fetohe sebopeho ka ho felletseng. Buka ya Genese e re Modimo o ile a bopa diphoofolo ‘ho ya ka mefuta ya tsona.’ (Genese 1:24, 25) Ha Bibele e sebedisa lentswe “mefuta” ho bonahala eka e bua ka dintho tse ngata tse phelang. Ka hoo, lentswe lena “mofuta” le ka bolela dihlopha tsa diphoofolo tse ngata tse batlang di tshwana tse ka kgonang ho ikatisa hara tsona. E leng se ka etsang hore sebopeho sa tsona se fetohe hanyane ha nako e ntse e ya.

O nahanang ka see?

Jwalo ka ha ho bontshitswe, Bibele e hlalosa ka tsela e bonolo hore lefatshe le lehodimo di bile teng jwang, lefatshe le ne le shebahala jwang pele le hore na dintho tse phelang di bile teng jwang. Haeba Bibele e kgona ho hlalosa dintho tsee ka tsela e nepahetseng, na e ka boetse ya nepa hore ke mang ya di bopileng? Buka ya Encyclopædia Britannica, e re taba ya hore bophelo bo qadilwe ke ntho e nngwe e itseng, e dumellana le diphuputso tsa moraorao tsa saense.b