Ke Hobaneng ha e le Habohlokwa Hore re Tsebe Hore na ho na le Mmopi?

Ke hobaneng ha e le habohlokwa ho tseba hore ho na le Mmopi? Haeba ho na le bopaki bo o kgodisang hore Modimo ya matla ohle o teng, o lokela ho hlahloba bopaki bo bong bo bontshang hore Bibele e ngotswe ka tshusumetso ya moya wa Modimo. Ka hoo, haeba o tshepa seo Bibele e se buang, e tla o tswela molemo ka ditsela tsena tse latelang.

O tla thabela bophelo haholwanyane

BIBELE E RE: “[Modimo] o ile a etsa se molemo, a le fa dipula tse tswang lehodimong le dinako tse behang, a tlatsa dipelo tsa lona ka ho phethahetseng ka dijo le ho hlasimoloha ho molemo.”—Liketso 14:17.

TEMANA EE E BOLELANG?: Popo ke mpho e tswang ho Mmopi. O tla ananela mpho ena haholo le ho feta ha o hlokomela hore Mofani wa yona o a o tsotella.

Fumana keletso e molemo e ka o thusang hona jwale

BIBELE E RE: “O tla utlwisisa ho loka le kahlolo le bokgabane, tsela yohle ya se molemo.”—Liproverbia 2:9.

TEMANA EE E BOLELANG?: Ka ha ke Mmopi wa hao, Modimo o tseba seo o se hlokang e le hore o thabe. Ha o bala Bibele o ka ithuta dintho tse ngata tse tla o thusa bophelong ba hao.

Fumana dikarabo tsa dipotso tsa hao

BIBELE E RE: “O tla fumana tsebo ya Modimo.”—Liproverbia 2:5.

TEMANA EE E BOLELANG?: Ho tseba hore Mmopi o teng ho ka o thusa hore o fumane dikarabo tsa dipotso tsa bohlokwa tse kang: Morero wa bophelo ke ofe? Ke hobaneng ha mathata a le mangata hakaale? Ho etsahalang ka rona ha re shwa? O ka fumana dikarabo tse kgotsofatsang ka Bibeleng.

Eba le tshepo ka bokamoso

BIBELE E RE: “‘Etswe ke tseba hantle menahano eo ke e nahanang ka lona,’ ho bolela Jehova, ‘menahano ya kgotso e seng ya tlokotsi, ho le fa bokamoso le tshepo.’”—Jeremia 29:11.

TEMANA EE E BOLELANG?: Modimo o tshepisa hore nakong e tlang o tlo fedisa bokgopo, mathata le lefu. Ha o na le tshepo ditshepisong tsa Modimo, seo se tla o thusa hore o sebetsane le mathata a hao a letsatsi ka leng ka sebete.

Ka moo ba bang ba ruileng melomo ka teng ka ho dumela hore mmopi o teng

Cyndi ya dulang Amerika o re: “Ke dula ke hlollwa ha ke bona tsela eo Modimo a re thusang ka yona bophelong. O re thusa hore re tsebe hore na ke dintho dife tsa bohlokwa bophelong, re phedisane hantle le batho ba bang le hore re be metswalle ya hae.”

Elise ya dulang France o re: “Ke phela bophelo bo kgotsofatsang le bo monate hobane ke dumela ho Mmopi. Ho dumela ho Modimo ho etsa hore bophelo bo nnatefele hobane ho na le dintho tse ngata tseo nka ithutang tsona ka yena, ka popo ya hae le ka lentswe la hae.”

Peter ya dulang Netherlands o re: “Ha ke sebedisa seo Mmopi wa rona a re rutang sona ka Bibeleng bophelong ba ka, ke a thaba. Ke ba motho ya sa tshwaeng diphoso, ya mamelang batho ba bang ha ba bua le ya kgotsofetseng. Ebile ke motswadi ya molemo.”

Liz ya dulang Estonia o re: “Pele ke ithuta ka Modimo, bophelo ba ka bo ne bo se na morero. Ke ne ke dula ke ja, ke robala ebile ke dula ke fihla morao mosebetsing. Ke ne ke sa thabele bophelo. Hona jwale ke nka bophelo e le mpho, ebile ke a bo thabela le ho bo ananela.”

Adrien ya dulang France o re: “Ke motho ya tshwenyehang habonolo. Empa ke kgona ho sebetsana le maikutlo ao hobane ke a tseba hore haufinyane bokgopo, ho hloka toka le mathata di tla fediswa.”