Bontsha Hore o Ananela Seo Jehova le Jesu ba o Etseditseng Sona

O ikutlwa jwang ha motswalle wa hao a o fa mpho e ntle? O a thaba ebile o batla ho mo bontsha hore o ananela mpho eo. Jehova le Jesu ba re file mpho e kgolo ho feta tsohle tseo re kileng ra di fuwa. Mpho eo ke eng, hona re ka bontsha jwang hore re a e ananela?

1. Re ka bontsha jwang hore re ananela ntho eo Modimo le Kreste ba re etseditseng yona?

Bibele e tshepisa hore “e mong le e mong ya bontshang tumelo ho [Jesu]” o tla phela ka ho sa feleng. (Johanne 3:​16) Ho bontsha tumelo ho bolelang? Ha ho bolele feela ho dumela ho Jesu. Diqeto le diketso tsa rona di lokela ho bontsha hore re na le tumelo. (Jakobo 2:17) Ha re bontsha tumelo ka diketso le ka dintho tseo re di buang, setswalle sa rona le Jesu le Ntate wa hae Jehova, se tla ba matla.​—Bala Johanne 14:21.

2. Ke ketsahalo efe ya bohlokwa e re thusang ho ananela ntho eo Jehova le Jesu ba re etseditseng yona?

Mantsiboyeng a pele Jesu a shwa, o ile a bolella balatedi ba hae ntho e nngwe eo ba neng ba lokela ho e etsa ho bontsha hore ba ananela sehlabelo sa hae. O ile a tshwara mokete wa bohlokwa le bona oo Bibele e o bitsang “Dijo Tsa Shwalane Tsa Morena,” hape o bitswa Sehopotso sa lefu la Kreste. (1 Bakorinthe 11:20) Jesu o ile a qala mokete oo hobane o ne a batla hore baapostola ba hae le Bakreste bohle ba nnete ba tla tla ka mora bona ba hopole hore o ba shwetse. Ha Jesu a bua ka mokete oo, o ile a fana ka taelo ena: “Le nne le etse sena ho nkgopola.” (Luka 22:19) Ha o ba teng Sehopotsong, o bontsha hore o ananela lerato le leholo leo Jehova le Jesu ba re ratang ka lona.

ITHUTE DINTLHA TSE DING

3. Re ka etsang ho bontsha kananelo?

A re nke hore motho e mong o ile a o pholosa ha o ne o kgangwa ke metsi. Na o ne o ka lebala seo motho eo a o etseditseng sona? Kapa na o ne o tla batla ditsela tsa ho mo bontsha hore o ananela ntho eo a o etseditseng yona?

Re na le monyetla wa ho phela ka ho sa feleng ka lebaka la seo Jehova a re etseditseng sona. Bala 1 Johanne 4:8-10 ebe le buisana ka dipotso tsena:

• Ke hobaneng ha sehlabelo sa Jesu e le mpho e kgethehileng?

• O ikutlwa jwang ka ntho eo Jehova le Jesu ba o etseditseng yona?

Re ka bontsha jwang hore re ananela ntho eo Jehova le Jesu ba re etseditseng yona? Bala 2 Bakorinthe 5:15 le 1 Johanne 4:11; 5:3. Ka mora ho bala lengolo ka leng, buisanang ka potso ena:

• Ho ya ka lengolo lee, re ka etsang ho bontsha kananelo?

4. Etsisa Jesu

Tsela e nngwe eo re ka bontshang kananelo ka yona ke ka ho etsisa Jesu. Bala 1 Petrose 2:21 ebe le buisana ka potso ena:

• O ka latela mehato ya Jesu haufiufi ka ditsela dife?

5. Eba teng Sehopotsong sa lefu la Kreste

E le hore o bone hore na ho ile ha etsahalang ka lekgetlo la pele ha ho ne ho tshwarwa Dijo Tsa Shwalane Tsa Morena, bala Luka 22:14, 19, 20. Ka mora moo, le buisane ka dipotso tsena:

• Ho ile ha etsahalang Dijong Tsa Shwalane Tsa Morena?

• Bohobe le veine di tshwantshetsa eng? (Sheba temana ya 19 le 20.)

Jesu o ne a batla hore barutuwa ba hae ba tshware Sehopotso hanngwe ka selemo ka letsatsi leo a ileng a shwa ka lona. Ka lebaka leo, selemo le selemo Dipaki Tsa Jehova di kopana ha mmoho ho ikgopotsa lefu la Kreste ho ya ka moo a laetseng ka teng. E le hore o ithute ka seboka sena sa bohlokwa, bapala VIDEO ena. Ka mora moo, le buisane ka potso e latelang.

Ikgopotse Lefu la Jesu (1:41)

• Ho etsahalang Sehopotsong?

Jesu o ne a rata Lentswe la Modimo, a ruta batho ka lona a bile a ba thusa

KAKARETSO

Haeba re bontsha tumelo ho Jesu mme re ba teng Sehopotsong sa lefu la hae, re bontsha hore re ananela ntho eo a re etseditseng yona.

Re Ithutileng?

• Ho bontsha tumelo ho Jesu ho bolelang?

• O tla etsang ho bontsha hore o ananela ntho eo Jehova le Jesu ba o etseditseng yona?

• Ke hobaneng ha ho le bohlokwa hakaale ho ba teng Sehopotsong sa lefu la Kreste?

BATLA

Lefu la Kreste le re susumelletsa hore re etseng?

O ile a Sebedisa Mmele wa Hae ho Tlotlisa Jehova (9:28)

Ithute haholwanyane ka ho ba le tumelo le hore na o ka e bontsha jwang.

“Eba le Tumelo Ditshepisong Tsa Jehova” (Molula-Qhooa, October 2016)

Bala pale e nang le sehlooho se reng: “Ke Ikutlwa ke Hlwekile, ke Ena le Bophelo ke Bile ke Kgotsofetse,” mme o bone ka moo mme e mong a ileng a fetola bophelo ba hae ka teng ka mora hore a utlwisise hore na sehlabelo sa Kreste ke sa bohlokwa hakae ho yena.

“Bibele e Fetola Batho” (Molula-Qhooa, August 1, 2011)

Ithute hore na ke hobaneng ha e le batho ba mmalwa feela ba jang bohobe le ho nwa veine Sehopotsong.

“Ke Hobaneng ha Dipaki Tsa Jehova di Tshwara Seboka sa Dijo Tsa Mantsiboya Tsa Morena ka Tsela e Fapaneng le Madumedi a Mang?” (Sehlooho se websaeteng)