THUTO YA 14

Hatisa Dintlha Tsa Bohlokwa

Baheberu 8:1

KAKARETSO: Thusa bamamedi ba hao hore ba tsamaisane le wena ha o ntse o fana ka puo, ba hlakisetse hore na ntlha ka nngwe e amana jwang le sehlooho sa hao.

SEO O KA SE ETSANG:

Morero wa puo. Sheba hore na puo ya hao e reretswe ho bolella batho taba e itseng, ho ba kgodisa kapa ho ba kgothalletsa ho etsa ntho e itseng, ebe o e lokisetsa o nahanne ka seo. Etsa bonnete ba hore o hlalosa dintlha tsa bohlokwa kaofela.

Ipotse: ‘Ke dipotso dife tseo bamamedi ba ka nnang ba di botsa ka sehlooho sena kapa ke eng eo ba ka se dumellaneng le yona? Ebe ba ka botsa potso efe pele kapa ba se dumellane le ntlha efe?’ Hlophisa dintlha tsa hao ka tatellano e le hore bamamedi ba tsamaisane le wena, ba utlwisise ba be ba nke dintlha tsa bohlokwa.
Hatisa sehlooho sa puo. Ha o ntse o fana ka puo, nako le nako pheta mantswe a sehlooho sa hao.
Etsa hore dintlha tsa bohlokwa di utlwahale. Kgetha feela dintlha tse dumellanang le sehlooho le tseo o ka kgonang ho fana ka tsona ka nako eo o e fuweng. O se ke wa buella dintlha tse ngata tsa sehlooho, hlakisa ntlha e le nngwe ka nako mme o kgefutse hanyane pele o ka fetela ho e nngwe.

Ha o qala puo ya hao o ka hlakisa dintlha tsa bohlokwa e le hore bamamedi ba hao ba tsamaisane le wena kapa o ka hlakisa dintlha tsa bohlokwa qetellong ya puo ya hao e le hore bamamedi ba ka di hopola.