Ditshupiso Tsa Bukana ya Seboka sa Bophelo le Tshebeletso
© 2023 Watch Tower Bible and Tract Society of Pennsylvania
LA 1-7 JANUARY
MATLOTLO A TSWANG BIBELENG | JOBO 32-33
Kgothatsa Batho ba Sebetsanang le ho Tshwenyeha
it-1-E 710
Elihu
Elihu o ne a se leeme a bile a sa bue ka tsela e phoqang ho batho ba bang. O ne a dumela hore yena le Jobo ba ne ba bopilwe ka letsopa ke Ya Matla Ohle. Elihu o ne a sa ikemisetsa ho utlwisa Jobo bohloko, ho ena le hoo o ile a bua le yena jwalo ka motswalle wa hae wa hlooho ya kgomo. O ile a bitsa Jobo ka lebitso e leng ntho eo Elifaze, Bildade le Tsofare ba sa kang ba e etsa.—Job 32:21, 22; 33:1, 6.
w14 6/15 25 ¶8-10
Na o Tadima ba Fokolang ka Tsela eo Jehova a ba Tadimang ka Yona?
8 Re tla utlwela bara le baradi ba bo rona ba ratehang bohloko haeba re hopola hore ba fokodisitswe ke mathata a kang a ho kula, ho phela lelapeng le arohaneng bodumeding kapa ho ba le kgatello ya maikutlo. Le rona ka le leng re ka nna ra iphumana re le boemong bo tshwanang. Pele Baiseraele ba kena Naheng e Tshepisitsweng, ba ile ba hopotswa hore ba se ke ba “thatafatsa dipelo” ho bara ba bo bona ba sotlehileng, ka ha le bona ba ne ba futsanehile ba bile ba fokola ha ba le Egepeta. Jehova o ne a lebelletse hore ba thuse mafutsana.—Deut. 15:7, 11; Lev. 25:35-38.
9 Ho ena le ho ahlola kapa ho belaella batho ba mathateng, re lokela ho ba tshedisa ka Mangolo. (Jobo 33:6, 7; Mat. 7:1) Ka mohlala: Ha mokganni wa sethuthuthu a fihla sepetlele a lemetse, na dingaka di tla leka ho fumana pele hore na sesosa sa kotsi e bile sefe? Tjhe, di mo thusa ka potlako. Ka ho tshwanang, haeba modumedimmoho le rona a sithabeditswe ke mathata, re lokela ho potlakela ho mo thusa moyeng.—Bala 1 Bathesalonika 5:14.
10 Haeba re ipha nako ya ho nahana ka mathata ao barababo rona ba tobanang le wona, re ka nna ra tadima mefokolo ya bona ka tsela e nngwe. Nahana ka baradi ba bo rona ba qetileng dilemo ba hanyetswa ke ba lelapa. Ba bang ba ka nna ba shebahala eka ke batho feela ba fokolang, le ha ho le jwalo ba bonahatsa hore ba na le tumelo ba bile ba matla. Ha o bona mme ya dulang a tla dibokeng le ngwana kapa le bana ba hae, na ha o kgahlwe ke tumelo le boikemisetso ba hae? Hona o ikutlwa jwang ka batjha ba tshepahalang ho sa tsotellehe tshusumetso e mpe eo ba tobanang le yona sekolong? Ruri re a hlokomela hore batho bana bao ho bonahalang eka ba a fokola, e ka nna yaba le bona ‘ba ruile tumelong’ jwalo ka ba bang bohle bao dintho di ba tsamaelang hantle.—Jak. 2:5.
Nako e Nepahetseng ya ho Bua ke Efe?
17 Monna wa bone ya ileng a etela Jobo, ke Elihu e leng e mong wa leloko la Abrahama. O ile a mamela ha Jobo le banna ba bararo ba bua. Ho hlakile hore o ne a ba mametse ka hloko hobane ha morao o ile a fa Jobo keletso e ileng ya mo thusa hore a fetole maikutlo a hae. (Jobo 33:1, 6, 17) Ho ne ho le bohlokwa ho Elihu hore a rorise Jehova eseng batho kapa yena. (Jobo 32:21, 22; 37:23, 24) Ka hoo, mohlaleng ona wa Elihu re ithuta hore ho na le nako ya ho thola le ho mamela. (Jak. 1:19) Re boetse re ithuta hore ha re batla ho fa motho keletso, e be hobane re batla ho rorisa Jehova eseng re ithorise.
18 Re ka bontsha jwang hore re ananela mpho ya ho bua ha re mamela keletso ya Bibele mabapi le hore re lokela ho bua neng hona jwang? Morena Solomone ya bohlale o ile a susumelletswa ho ngola sena: “Lentswe le builweng ka nako e nepahetseng le jwalo ka diapole tsa kgauta ka dijaneng tse betlilweng tsa silevera.” (Diprov. 25:11) Ka hoo ha re mamela ka hloko seo batho ba bang ba se buang ebile re nahana pele re bua, mantswe a rona a tla tshwana le diapole tsa kgauta tseo e leng tsa bohlokwa ebile di le ntle. Ho sa tsotellehe hore re bua haholo kapa tjhe, seo re se buang se ka thusa batho ba bang mme re ka thabisa Jehova. (Diprov. 23:15; Baef. 4:29) Ka nnete ena ke tsela e molemo ya ho bontsha hore re ananela mpho eo Modimo a re fileng yona
Matlotlo a Patilweng
w13 1/15 19 ¶10
Lwanela ho Dula o Ena le Kamano e Haufi le Jehova
10 Ke hantle hore re amehe ka tsela eo re shebahalang ka yona. Empa ha re a lokela ho leka ka matla ho tlosa matshwao ohle a bontshang hore re a tsofala. Matshwao ao a ka bontsha hore re hodile kelellong, re na le seriti ha mmoho le botho bo botle. Ka mohlala, Bibele e re: “Hlooho e putswa ke moqhaka wa botle ha e fumanwa tseleng ya ho loka.” (Diprov. 16:31) Ke tsela eo Jehova a re tadimang ka yona mme le rona re lokela ho leka ho itadima ka tsela e tshwanang. (Bala 1 Petrose 3:3, 4.) Ka hoo, na e ka ba bohlale hore re behe bophelo ba rona kotsing ka hore re etse diopereishene kapa re amohele mekgwa e kotsi ya phekolo e le hore feela re shebahale re le batle? “Thabo ya Jehova” ke yona eo e leng mohlodi wa botle ba nnete bo hlahang ka hare, ho sa tsotellehe hore na re tsofetse kapa ha re a phela hantle. (Neh. 8:10) Ke lefatsheng le letjha feela moo re tla phela hantle re be re boele botjheng. (Jobo 33:25; Esa. 33:24) Ho fihlela nakong eo, re lokela ho bontsha bohlale le tumelo mme seo se tla re thusa hore re dule re ena le kamano e haufi le Jehova ha re ntse re thabela bophelo ho sa tsotellehe maemo ao re leng ho wona hona jwale.—1 Tim. 4:8.
LA 8-14 JANUARY
MATLOTLO A TSWANG BIBELENG | JOBO 34-35
Haeba re Tshwarwa ka ho Hloka Toka
Modimo o Jwang?
Ka mehla Modimo o etsa se nepahetseng. Ha e le hantle Bibele e re, “ho ke ho be hole le Modimo wa nnete hore a sebetse bokgopo, le hore ya Matla Ohle a sebetse ka mokgwa o hlokang toka!” (Jobo 34:10) Dikahlolo tsa hae di molemo, ke ka hoo mongodi e mong wa pesaleme a ileng a re ka yena: “O tla ahlola ditjhaba ka ho loka.” (Pesaleme ya 67:4) Ka ha “Jehova o bona seo pelo e leng sona,” a ke ke a thetswa ke batho ba iketsang seo ba seng sona, empa o kgona ho bona seo e leng nnete ebile o ahlola ka tsela e molemo. (1 Samuele 16:7) Ho feta moo, Modimo o kgona ho bona ntho e nngwe le e nngwe e sa lokang mona lefatsheng mme o tshepisa hore haufinyane “ba kgopo, ba tla fediswa lefatsheng.”—Diproverbia 2:22.
Mmuso wa Modimo o Tla Fedisang ha o Tla?
5 Jehova o tla etsang? Hona jwale Jehova o file batho ba kgopo monyetla wa ho fetoha. (Esa. 55:7) Ha ba eso fumane kahlolo ya ho qetela. Ke tsamaiso ena feela e seng e ahlotswe. Ho tla etsahalang ka batho ba hanang ho fetoha, ba tshehetsang tsamaiso ena ho fihlela matshwenyeho a maholo a qala? Jehova o tshepisitse hore o tla fedisa batho ba kgopo ka ho feletseng. (Bala Pesaleme ya 37:10.) Batho ba kgopo ba ka nna ba nahana hore ba tla pholoha kahlolo eo. Ka hoo ba bangata ba pata diketso tse mpe tseo ba di etsang mme lefatshe lena ha le ba fe kahlolo e ba lokelang. (Jobo 21:7,9) Le ha ho le jwalo, Bibele e re hopotsa sena ka Modimo: “Mahlo a hae a hodima ditsela tsa motho, O bona mehato yohle ya hae. Ha ho botsho kapa moriti o lefifi bakeng sa hore ba tlwaetseng ho etsa se kotsi ba ipate moo.” (Jobo 34:21, 22) Ha ho na letho le patehileng ho Jehova Modimo. Ha ho na motho ya ka ipatelang yena; ha ho na lefifi le ka mo sitisang ho bona ntho le ha e le efe. Ka mora Armagedone, re tla sheba moo batho ba kgopo ba neng ba dula teng mme re ke ke ra ba bona. Ba tla be ba le siyo ka ho sa feleng!—Pes. 37:12-15.
Na o Tla Kgoptjwa ka Lebaka la Jesu?
19 Ho jwang mehleng ee? Ho ntse ho tshwana. Batho ba bangata mehleng ena, ba kgopiswa ke taba ya hore ha re kenelle ditabeng tsa dipolotiki. Ba lebelletse hore le rona re kgethe dikgethong. Empa re a tseba hore ho ya ka Jehova haeba re kgetha ho buswa ke batho, re tla be re mo hlanohela. (1 Sam. 8:4-7) Batho ba ka boela ba bona ho loketse hore re hahe dikolo le dipetlele le ho thusa setjhaba. Ba kwatiswa ke hore re qeta nako le matla a rona re ruta batho ka Bibele ho ena le ho leka ho rarolla mathata a lefatshe lena.
20 Re ka etsang hore re se ke ra kgoptjwa? (Bala Matheu 7:21-23.) Morero wa rona o ka sehloohong e lokela ho ba ho etsa mosebetsi oo Jesu a re laetseng hore re o etse. (Mat. 28:19, 20) Ha re a lokela ho ferekanngwa ke dipolotiki le ho batla ho rarolla mathata a lefatshe lena. Re rata batho ebile re ameha ka mathata a bona empa re a tseba hore tsela e molemo ka ho fetisisa ya ho thusa baahelani ba rona, ke ka ho ba ruta ka Mmuso wa Modimo le ho ba thusa hore ba be le setswalle se haufi le Jehova.
Matlotlo a Patilweng
Rorisang Jehova ka ho Ithaopa!
3 Jehova ha a ka a kgalemela Elihu ha a botsa hore: “Haeba ka sebele o nepile, o mo fa eng [Modimo], kapa O amohela eng letsohong la hao?” (Jobo 35:7) Na Elihu o ne a bolela hore tshebeletso ya rona ho Modimo ke ya lefeela? Ha ho jwalo. O ne a bolela hore Jehova ha a phediswe ke tshebeletso eo re mo etsetsang yona. Jehova o na le ntho e nngwe le e nngwe. Ha ho tjhelete kapa leruo leo re ka mo fang lona. Le ha ho le jwalo, makgabane, ditalenta kapa bokgoni boo re nang le bona ke letlotlo le tswang ho Modimo mme o ela hloko tsela eo re le sebedisang ka yona.
LA 15-21 JANUARY
MATLOTLO A TSWANG BIBELENG | JOBO 36-37
Mabaka a ka Etsang Hore o Tshepe Tshepiso ya Modimo ya ho Fana ka Bophelo bo sa Feleng
w15 10/1 13 ¶1-2
Na Ruri re ka Tseba Modimo?
MODIMO O TENG KA HO SA FELENG: Bibele e re haesale Modimo a le teng “ho tloha nakong e sa lekanyetswang ho isa nakong e sa lekanyetswang.” (Pesaleme ya 90:2) Ka mantswe a mang, Modimo ha a na qalo ebile ha a na qetello. Ka hoo, ha ho na motho ya ka tsebang hore na dilemo tsa hae di kae.—Jobo 36:26.
Ka moo o ruang molemo ka teng: Modimo o tshepisa hore o tla phela ka ho sa feleng ha feela o mo tseba haholwanyane. (Johanne 17:3) Na re ne re ka dumela hore tshepiso eo ke nnete haeba Modimo a ne a sa phele ka ho sa feleng? Ke “Morena wa bosafeleng” feela ya ka phethahatsang tshepiso eo.—1 Timothea 1:17.
Na o Ananela Dimpho Tseo Modimo a o Fileng Tsona?
6 Ka ha polanete ya lefatshe e sebakeng se nepahetseng, seo se etsa hore re be le metsi. Haeba lefatshe le ne le ka atamela hanyane feela pela letsatsi, metsi a ne a tla tjha, ho tjhese haholo hape ho se ke ha ba le motho ya phelang. Ka lehlakoreng le leng, haeba lefatshe le ne le ka ya hole hanyane le letsatsi, metsi e ne e tla ba leqhwa mme lefatshe le ne le tla tlala ka lehlwa. Ka ha Jehova o behile lefatshe sebakeng se nepahetseng, potoloho ya metsi e kgona ho etsa hore batho ba phele. Letsatsi le futhumatsa metsi a mawatleng mme a fetoha mohodi o etsang hore ho be le maru. Selemo le selemo letsatsi le futhumatsa metsi a mawatleng a ka bang 500 000 cu km e le hore ebe mohodi. Metsi ana a dula sepakapakeng ka matsatsi a ka bang leshome, pele a ka fetoha pula kapa lehlwa. Ka tsela eo metsi a boela a kgutlela mawatleng mme potoloho ena e boela e ipheta hape. Jehova o entse hore ho be le potoloho ya metsi e le hore ho dule ho ena le metsi lefatsheng. Sena se bontsha hore Jehova o bohlale ebile o matla.—Jobo 36:27, 28; Moek. 1:7.
Dula o Ena le Tshepo e Tiileng
16 Tshepo ya rona ya bophelo bo sa feleng ke mpho e tswang ho Modimo. Re lebelletse bokamoso bo thabisang haholo boo re tsebang hantle hore bo a tla, ho bata kapa ho tjhesa. Tshepo ena e tshwana le ankora ka ha e re thusa hore re se ke ra tsukutlwa ke mathata, re mamelle ha re hloriswa esita le ha re tobane le lefu. E tshwana le helmete ka ha e sireletsa dikelello tsa rona e le hore re se ke ra ba le menahano e ka etsang hore re etse dintho tse fosahetseng. E boetse e re thusa hore re etse dintho tse nepahetseng. Tshepo eo Bibele e re fang yona e re atametsa ho Modimo ebile e re thusa ho bona hore na o re rata haholo hakae. Re fumana molemo o moholo haeba re dula re ena le tshepo e matla.
Matlotlo a Patilweng
it-1-E 492
Ho Fetiswa ha Ditaba
Mehleng ya ha ho ne ho ngolwa Bibele, ditaba di ne di fetisetswa ho batho ba bang ka ditsela tse fapaneng. Hangata ditaba tsa sebakeng se itseng kapa tsa dibakeng tse ding di ne di fetisetswa ho batho ba bang ka hore ba bue ka tsona difahleho di tadimane. (2Sa 3:17, 19; Job 37:20) Bahwebi ba tsamayang ba ne ba atisa ho bua ka ditaba tsa dibaka tse hole tsa moo ba tswang teng ha ba ne ba kgefutsa metseng e itseng e le hore ba ka fumana dijo, metsi kapa ka mabaka le ha e le afe. Bahwebi ba tsamayang ba ne ba feta metseng ya Palestina ebang ba ne ba ya Asia, Afrika kapa Europe. Ka hoo ho ne ho ka ba bonolo hore batho ba dulang Palestina ba tsebe ditaba tsa bohlokwa tse neng di etsahala dibakeng tse hole. Dimmarakeng ke hona moo batho ba neng ba fumana ditaba tsa sebakeng sa ha bo bona kapa tsa dibakeng tse hole.
LA 22-28 JANUARY
MATLOTLO A TSWANG BIBELENG | JOBO 38-39
Na o Ipha Nako ya ho Sheba Popo?
Na o Ikemiseditse ho Letela Jehova?
7 Ha Bibele e hlalosa ka moo Jehova a ileng a bopa lefatshe ka teng e re o ile a beha “ditekanyo tsa lona,” “ditshehetso tsa lona tse sekoti” le “lejwe la lona la sekgutlo.” (Jobo 38:5, 6) O ile a ba a nka nako ho sheba mosebetsi wa hae. (Gen. 1:10, 12) O nahana hore mangeloi a ile a ikutlwa jwang ha a bona dintho tseo Jehova a ntseng a di bopa? E tlameha ebe a ne a thabile haholo. Ke ka hoo a ileng a qala ho “hlaba ditlatse.” (Jobo 38:7) Re ithutang? Ho ile ha nka dilemo tse ngata hore Jehova a etse lefatshe, dinaledi le dintho tsohle tse phelang empa e itse ha a sheba mosebetsi wa hae wohle, o ile a re o ne o le “molemo haholo.”—Gen. 1:31.
Tsoho e Bontsha Bohlale, Mamello le Lerato la Modimo
2 Jehova o qadile ka ho bopa Mora wa hae e leng Jesu. Ka mora moo Jehova le Mora wa hae ba ile ba bopa “dintho tse ding tsohle” ho akarelletsa le mangeloi. (Bakol. 1:16) Jesu o ne a thabela ho sebetsa le Ntate wa hae. (Diprov. 8:30) Hape mangeloi a ne a thabile ka ha a bone ha Jehova le Jesu e leng Mosebetsi wa Hae ya Hlwahlwa ba bopa lehodimo le lefatshe. Jwale mangeloi a ile a etsang ho bontsha hore a thabile? Ha Jehova a ne a bopa lefatshe mangeloi a ile a “qala ho hlaba ditlatse” mme a tswela pele ho mo rorisa ha a ntse a bopa dintho tse ding tsohle haholoholo batho. (Jobo 38:7; Diprov. 8:31) Dintho tseo Jehova a di bopileng di bontsha hore o lerato ebile o bohlale.—Pes. 104:24; Bar. 1:20.
Ithute ka Jehova Dinthong Tseo a di Bopileng
8 Re lokela ho tshepa Jehova. Jehova o ile a thusa Jobo hore a mo tshepe. (Jobo 32:2; 40:6-8) Ha Modimo a ntse a bua le Jobo, o ile a bua ka dintho tse ngata tseo a di bopileng ho akareletsa le dinaledi, maru le mahadima. Jehova o ile a bua le ka diphoofolo tse kang poho e hlaha le pere. (Jobo 38:32-35; 39:9, 19, 20) Dintho tsena kaofela di ne di bontsha hore Modimo o na le matla, o lerato ebile o bohlale. Puisano eo Jobo a ileng a ba le yona le Jehova e ile ya mo thusa hore a mo tshepe le ho feta. (Jobo 42:1-6) Le rona ha re ithuta ka dintho tse bopilweng, re a hopola hore Jehova o bohlale le hore o matla ho re feta. A ka kgona ho fedisa mathata ohle a rona ebile o tla a fedisa. Taba ena e ka re thusa hore re mo tshepe le ho feta.
Matlotlo a Patilweng
it-2-E 222
Mofani wa Molao
Jehova ke Mofani wa Molao. Jehova ke yena feela Mofani wa Molao popong yohle. Ke yena ya faneng ka melao ya tlhaho e laolang popo e sa pheleng (Job 38:4-38; Ps 104:5-19) le diphoofolo. (Job 39:1-30) Ka ha batho ba bopilwe ke Jehova, ba angwa ke melao ya hae ya tlhaho. Batho ba lokela ho mamela melao ya Modimo ya boitshwaro hobane ba bopilwe ba ena le bokgoni ba ho nahana, ba ho mamela melao ya Jehova ya boitshwaro le ba ho mo sebeletsa. (Bar 12:1; 1Ko 2:14-16) Ho ekeletsa moo, melao ya Jehova e boetse e laola dibopuwa tsa moya e leng mangeloi.—Ps 103:20; 2Pe 2:4, 11.
Melao ya Jehova ya tlhaho e tla dula e le teng. (Jer 33:20, 21) Popong ya Jehova eo re ka e bonang, melao ya hae e a tshepahala ebile ha e fetohe. Taba ena ke nnete hobane moo borasaense ba ithutileng ka melao ena, ho ya boholeng bo itseng ba ka kgona ho bona hore na kgwedi, dipolanete le popo e nngwe e lehodimong di tsamaya jwang. Batho ba iphapanyetsang melao ya Jehova ya tlhaho ba fumana ditlamorao tse bohloko hanghang. Ka ho tshwanang melao ya Jehova ya boitshwaro e ke ke ya fetoha, ya sitiswa kapa ya hlokomolohuwa ka boomo. Jwalo ka ha re lokela ho mamela melao ya Jehova ya tlhaho re boetse re lokela ho mamela le melao ya hae ya boitshwaro. Le hoja re ke ke ra fumana ditlamorao tsa diketso tsa rona hanghang haeba re tlola melao ya hae ya boitshwaro, nnete ke hore “ha ho na motho ya ka thetsang Modimo. Motho e mong le e mong o tla kotula seo a se jetseng.”—Gal 6:7; 1Ti 5:24.
LA 29 JANUARY–LA 4 FEBRUARY
MATLOTLO A TSWANG BIBELENG | JOBO 40-42
Seo re Ithutang Sona Mohlaleng wa Jobo
w10 10/15 3-4 ¶4-6
“Ke Mang ya Tsebang Kelello ya Jehova?”
4 Ha re ntse re nahanisisa ka mesebetsi ya Jehova, re lokela ho qoba mokgwa wa ho ahlola Modimo re itshetlehile ka melao ya batho. Mokgwa ona ho buuwa ka wona ka tsela e sa tobang mantsweng a Jehova a tlalehilweng Pesalemeng ya 50:21, e reng: “O ile wa nahana hore ka sebele ke tla ba jwalo ka wena.” Ho jwalo ka ha setsebi se seng sa Bibele se ile sa bua dilemong tse fetang 175 tse fetileng, ha se ne se re: “Batho ba tlwaetse ho ahlola Modimo ba itshetlehile ka melao ya bona ba bile ba nahana hore Modimo o laolwa ke melao e tshwanang le eo ba nahanang hore batho ba lokela ho e boloka.”
5 Re lokela ho ba hlokolosi hore re se ke ra dumella hore tsela eo re nkang Jehova ka yona e laolwe ke melao ya rona le dintho tse batlwang ke rona. Ke hobaneng ha see e le sa bohlokwa? Ha e le hantle, ka ha tsela eo re shebang dintho ka yona e a haella ebile ha e a phethahala, ha re ntse re ithuta Mangolo, re ka nna ra bona eka diketso tse ding tsa Jehova ha di a loka. Baiseraele ba boholoholo ba ile ba nahana ka tsela eo ba ba ba etsa qeto e fosahetseng mabapi le tsela eo Jehova a neng a sebedisana le bona ka yona. Hlokomela hore na Jehova o ile a reng ho bona: “Ka sebele le tla re: ‘Tsela ya Jehova ha e a loka.’ Ka kopo, utlwang, Lona ba ntlo ya Iseraele. Na tsela ya ka ha e a loka? Na ditsela tsa lona hase tsona tse sa lokang?”—Ezek. 18:25.
6 Ntho e ka re thusang hore re qobe ho ahlola Jehova re itshetlehile ka melao ya rona, ke ho hlokomela hore tsela eo re shebang dintho ka yona e a haella mme ka dinako tse ding e ba le diphoso tse tebileng. Ho ne ho hlokahala hore Jobo a ithute sena. Ha Jobo a ne a le mahlomoleng, o ile a nyahama mme ka tsela e itseng a itjheba boyena feela. O ile a lebala dintlha tsa bohlokwa. Empa ka lerato Jehova o ile a mo thusa hore a shebe dintho ka tsela e pharaletseng. Ka ho botsa Jobo dipotso tse fapaneng tse fetang 70, tseo Jobo a neng a ke ke a di araba, Jehova o ile a hatisa ka moo kutlwisiso ya Jobo e neng e haella ka teng. Jobo o ile a ikokobetsa mme a fetola tsela eo a neng a sheba dintho ka yona.—Bala Jobo 42:1-6.
Dula o Hopola se Lokelang ho Tla Pele!
12 Ka ha Jobo o ne a sa tswa mamella mathata a boima, na Jehova o ne a bontsha ho se nahanele ha a mo kgalemela ka tsela eo e tobileng? Ha ho jwalo, ebile le Jobo ha a ka a nahana jwalo. Ho sa tsotellehe mathata a hae, Jobo o ile a qala ho bua ka mokgwa o bontshang kananelo. O ile a ba a re: ‘Ke hula mantswe a ka, ke baka ke le leroleng le moloreng.’ Ka sebele kgalemelo ya Jehova e ne e mo thusitse. (Jobo 42:1-6) Pejana, Elihu le yena o ne a ile a kgalemela Jobo. (Jobo 32:5-10) Ka mora hore Jobo a mamele ha Modimo a mo kgalemela mme a lokise pono ya hae, Jehova o ile a bolella ba bang ka moo a mo ratang ka teng le ka moo a ananelang botshepehi boo a bo bontshitseng ha a ne a lekwa.—Jobo 42:7, 8.
“Tshepa Jehova”
17 Ha se Jobo feela ya ileng a dula a le sebete a bile a tshepahala ha a kopana le mathata a boima. Ho na le bahlanka ba Jehova ba bangata ba ileng ba etsa seo. Lengolong leo moapostola Pauluse a ileng a le ngolla Baheberu, o ile a ba bitsa “leru le leholo . . . la dipaki.” (Baheb. 12:1) Kaofela ha bona ba ile ba kopana le mathata a mangata empa ba ile ba dula ba tshepahalla Jehova. (Baheb. 11:36-40) Na e ile ya eba ha lefeela hore ebe ba ile ba mamella le ho sebetsa ka thata? Tjhe! Le hoja ditshepiso tsa Modimo di sa ka tsa phethahala kaofela nakong eo ba ntseng ba phela, ba ile ba dula ba ntse ba tshepa Jehova. Ka ha ba ne ba kgodisehile hore Jehova o a ba rata, ba ile ba eba le tumelo ya hore ba tla bona ha ditshepiso tsa hae di phethahala. (Baheb. 11:4, 5) Mohlala wa bona o ka re thusa hore re tswele pele ho tshepa Jehova.
18 Mehleng ena dintho di ntse di tloha bobeng ho ya bobeng bo fetisisang. (2 Tim. 3:13) Satane o ntse a bakela batho ba Modimo mathata. Ke nnete hore re tla kopana le mathata a mangata empa re lokela ho dula re ikemiseditse ho sebetsa ka thata bakeng sa Jehova. Hape re lokela ho ba sebete ka ha “re behile tshepo ya rona ho Modimo ya phelang.” (1 Tim. 4:10) Ditlhohonolofatso tseo Modimo a ileng a di fa Jobo, di paka hore “Jehova o na le lerato le mofuthu haholo mme o mohau.” (Jak. 5:11) Le rona a re duleng re tshepahalla Jehova mme re kgodisehe hore o tla putsa “ba mo batlang ka tiyo.”—Bala Baheberu 11:6.
Matlotlo a Patilweng
it-2-E 808
Ho Songwa
Jobo o ne a tshepahala le ha a ne a songwa haholo, feela o ile a etsa phoso ka lebaka la maikutlo a fosahetseng ao a ileng a ba le ona. Ka lebaka leo, Elihu o ile a mo thusa ho ba le maikutlo a matle ha a re: “Ke mang ya tshwanang le Jobo, ya mamellang ho songwa ha bonolo jwalo ka ha eka o nwa metsi?” (Job 34:7) Nakong eo Jobo a neng a songwa, o ile a ikemela le ho itokafatsa ho ena le hore a amehe haholo ka ho rorisa Modimo. (Job 35:2; 36:24) Ha “metswalle” ya hae e meraro e ne e mo soma, o ile a nka e soma yena le hoja e ne e soma Modimo. Ka tsela ena e ne eka o thabela ho songwa le ho tshehwa jwalo ka ha motho a thabela ho nwa metsi. Ha morao Modimo o ile a bolella Jobo hore basomi bao ba ne ba sa bua nnete ka yena [Modimo]. (Job 42:7) Jehova o ile a bua mantswe a batlang a tshwana ho moprofeta Samuele ha setjhaba sa Baiseraele se ne se batla ho buswa ke morena. O ile a re: “Ha se a lahla wena empa se lahlile nna hore ke se ke ka ba morena wa sona.” (1Sa 8:7) Le Jesu o ile a re ho barutuwa ba hae: “Ditjhaba tsohle di tla le hloya [eseng ka lebaka la diketso tsa lona empa] ka lebaka la lebitso la ka.” (Mat 24:9) Ho ba le maikutlo a tshwanang le a Modimo le Jesu ho ka thusa Mokreste hore a mamelle ha a songwa hape ho ka etsa hore a fumane moputso ka lebaka la mamello ya hae.—Lu 6:22, 23.
LA 5-11 FEBRUARY
MATLOTLO A TSWANG BIBELENG | PESALEME YA 1-4
Tshehetsa Mmuso wa Modimo
“Ke Tla Sisinya Ditjhaba Tsohle”
8 Batho ba ile ba etsang ha ba utlwa molaetsa oo? Ba bangata ha ba a ka ba o amohela. (Bala Pesaleme ya 2:1-3.) Ditjhaba di ile tsa halefa. Di ile tsa hana ho amohela Morena eo Jehova a mo kgethileng. Ha di nke molaetsa wa Mmuso oo re o bolelang e le ditaba tse monate ebile mebuso e meng e thibetse mosebetsi wa boboledi. Le hoja bongata ba babusi ba ditjhaba tseo ba re ba sebeletsa Modimo ha ba batle ho tlohela bolaodi le matla a bona. Ka hoo, jwalo ka babusi ba mehleng ya Jesu le mehleng ena babusi ba hanyetsa Mokgethwa wa Jehova ka hore ba hlasele balatedi ba hae ba tshepahalang.—Dik. 4:25-28.
w16.04 24 ¶11
Dula o sa Nke Lehlakore Lefatsheng Lena le Arohaneng
11 Ho rata maruo. Haeba re nkela tjhelete le maruo hodimo, re ka nna ra thatafallwa ho dula re sa nke lehlakore. Ka mora 1970, bara ba bo rona ba bangata ba Malawi ba ile ba tlameha ho tela thepa yohle ya bona, ka ha ba ne ba hana ho kena mokgeng wa dipolotiki. Empa ka maswabi ba bang ba ne ba sa batle ho arohana le maruo a bona. Moradi wa bo rona e mong ya bitswang Ruth o re, “Ba bang ba ile ba ya palehong le rona, empa ha morao ba ingodisa mokgeng wa dipolotiki, mme ba kgutlela malapeng a bona hobane ba sa batle ho phela ka thata dikampong tsa baphaphathehi.” Le ha ho le jwalo, bahlanka ba bangata ba Modimo ha ba etse seo. Ba dula ba sa nke lehlakore, esita le haeba seo se etsa hore ba hloke tjhelete kapa ba lahlehelwe ke thepa ya bona.—Baheb. 10:34.
Matlotlo a Patilweng
it-1-E 425
Mmoko
Ke ditlhoka tse tswang ha motho a ntse a pola kapa a olosa dijothollo tse kang koro kapa harese. Hangata Bibele e bua ka mmoko ho tshwantshetsa ntho e nngwa e itseng. Le ha ho le jwalo, e ntse e re thusa ho hlokomela ka moo dintho di neng di etswa ka teng mehleng ya kgale ha ho ne ho polwa. Ka mora hore ho kotulwe, mmoko o ne o se na thuso hobane o ne o sa jehe. Ke ka hoo o tshwantshetsang ntho e bofefo, e se nang thuso le e sa rateheng hobane o tloswa hara dintho tse lokileng ebe o a lahlwa.
Ha ho polwa, dijothollo di arohana le mmoko. Ha ho se ho oloswa, mmoko o fefolwa ke moya. (Sheba WINNOWING.) Sena se bontsha hantle ntho eo Jehova Modimo a tlo e etsa ha a tlosa bakwenehi hara batho ba hae a bile a fedisa batho ba kgopo le ditjhaba tse lwantshang batho ba hae. (Job 21:18; Ps 1:4; 35:5; Esa 17:13; 29:5; 41:15; Hos 13:3) Mmuso wa Modimo o tla silakanya dira tsa Modimo hore di be jwalo ka mmoko o fefolwang ke moya.—Dan 2:35.
Ka ha mmoko ha o na thuso, o ne o bokellwa ebe o a tjheswa e le hore o se ke wa hlola o kopana le dijothollo. Johanne Mokolobetsi o ile a bolela esale pele hore batho ba kgopo ba bodumedi ba bohata ba tla fediswa jwalo ka mmoko o tjheswang. O ile a boela a re ho tla ba jwalo ka ha eka Jesu Kreste o a pola le ho bokella koro “empa o tla tjhesa mmoko ka mollo o ke keng wa tima.”—Mat 3:7-12; Lu 3:17; sheba THRESHING.
LA 12-18 FEBRUARY
MATLOTLO A TSWANG BIBELENG | PESALEME YA 5-7
Dula o Tshepahala ho sa Tsotellehe Diketso Tsa ba Bang
Ho Bala Bibele ho ka o Thusa Jwang Hore o Mamelle Mathata?
7 Na e mong wa lelapa kapa motswalle wa hao o kile a o utlwisa bohloko? Haeba ho jwalo o ka thuswa ke ho bala ka seo Morena Davida a ileng a se etsa ha mora wa hae Absalome a mo utlwisa bohloko mme a leka ho ba morena.—2 Sam. 15:5-14, 31; 18:6-14.
8 (1) Rapela. O ntse o nahanne ka tlaleho eo o e badileng, bolella Jehova hore o ikutlwa jwang ka tsela eo o ileng wa tshwarwa hampe ka yona. (Pes. 6:6-9) Toba taba ebe o kopa Jehova hore a o thuse ho bona melaomotheo e ka o thusang ha o ntse o leka ho sebetsana le bothata boo.
Kgodiseha Hore Seo o se Dumelang ke Nnete
3 Ha re a lokela ho theha tumelo ya rona feela leratong leo bahlanka ba Modimo ba le bontshang. Hobaneng? A re re moholo kapa pulamadiboho o etsa sebe se tebileng kapa Mokrestemmoho o o utlwisa bohloko ka tsela e itseng. Kapa mohlomong Mokreste e mong e ba mokwenehi mme o re seo re se dumelang ha se nnete. Haeba dintho tse jwalo di etsahala na di tla o kgopisa mme o tlohele ho sebeletsa Jehova? Ka hoo ke eng seo re ithutang sona? Tumelo ya rona ha e na ba matla haeba e thehilwe dinthong tseo batho ba bang ba di etsang eseng kamanong ya rona le Jehova. Tsela eo o ikutlwang ka yona ka Jehova le bahlanka ba hae e tla o thusa hore o be le tumelo e matla ho ya boholeng bo itseng. Empa ke ha bohlokwa hore o ithute Bibele, o utlwisise seo o ithutang sona mme o etse dipatlisiso tse tla o kgodisa hore seo o ithutang sona ka yena ke nnete.—Bar. 12:2.
4 Jesu o itse batho ba bang ba ka amohela nnete “ka thabo” empa ha ba na le mathata tumelo ya bona e ka fokola. (Bala Matheu 13:3-6, 20, 21.) Mohlomong ba ne ba sa utlwisise hore balatedi ba Jesu ba ne ba tla ba le mathata. (Mat. 16:24) Kapa mohlomong ba ne ba nahana hore ho ba Mokreste ho bolela hore ha ho mohla ba tla ba le mathata. Empa lefatshe lena leo re phelang ho lona, ho tla ba le mathata hobane maemo a ka fetoha e leng se ka fokotsang thabo ya rona.—Pes. 6:6; Moek. 9:11.
Matlotlo a Patilweng
it-1-E 995
Lebitla
Ho Baroma 3:13 Moapostola Pauluse o qotsa mantswe a Pesaleme ya 5:9 moo batho ba kgopo le ba qhekellang ba bang ba tshwantshwang le “lebitla le ahlameng.” Feela jwalo ka ha lebitla le tletse batho ba shweleng kapa ditopo tse bodileng, melomong ya batho ba kgopo ho tswa dipuo tse bodileng le tse etsang hore ho be le dipolao.—Bapisa le Mat 15:18-20.
LA 19-25 FEBRUARY
MATLOTLO A TSWANG BIBELENG | PESALEME YA 8-10
“Ke Tla o Rorisa . . . Jehova”!
Ananela ho ba Setho sa Lelapa la Jehova
6 Jehova o re etseditse lehae le letle. Pele a bopa motho wa pele, Jehova o ile a lokisa lefatshe hore batho ba kgone ho phela ho lona. (Jobo 38:4-6; Jer. 10:12) Ka ha Jehova o a fana ebile o a re nahanela, o ile a etsa dintho tse ngata tseo re ka di thabelang. (Pes. 104:14, 15, 24) Ka dinako tse ding, o ne a ipha nako ya ho nahana ka dintho tseo a di bopileng mme “a bona hore ho molemo.” (Gen. 1:10, 12, 31) O ile a bontsha hore o nka batho e le ba bohlokwa ka hore a re ba “laole” dintho tsohle tse ntle tseo a di bopileng lefatsheng. (Pes. 8:6) Morero wa Modimo ke hore batho ba phethahetseng ba thabele ho hlokomela dintho tsena tse ntle tseo a di bopileng ka ho sa feleng. Na o dula o leboha Jehova ka dintho tse ntle tseo a re tshepisitseng tsona?
Na o Ananela Dimpho Tseo Modimo a o Fileng Tsona?
10 Tsela e nngwe eo re ka bontshang ka yona hore re ananela mpho ena, ke ka hore re bolelle batho ba dumelang hore dintho di iphetotse hore na ke hobaneng ha re dumela hore Modimo o bopile dintho tsohle. (Pes. 9:1; 1 Pet. 3:15) Batho bao ba dumela hore lefatshe le dintho tsohle tse phelang ho lona ha di a bopuwa. Ka hoo, haeba re sebedisa Bibele le dintlha tse ding tseo ho buuweng ka tsona sehloohong sena, re ka emela Ntate wa rona ya lehodimong. Hape re ka hlalosetsa batho ba batlang ho mamela hore na ke hobaneng ha re kgodisehile hore Jehova ke Mmopi wa lehodimo le lefatshe.—Pes. 102:25; Esa. 40:25, 26.
Na o Bua ka Tsela e Behelang ba Bang Mohlala o Motle?
13 Bina ka pelo yohle. Lebaka le ka sehloohong leo ka lona re binang dipina tsa Mmuso dibokeng ke ho rorisa Jehova. Moradi wa bo rona Sara ha a inke e le motho ya tsebang ho bina. Le ha ho le jwalo, o batla ho rorisa Jehova ka ho mo binela. Ka hoo, ha a lokisetsa diboka o lokisetsa le dipina. O bina dipina tseo ebe o leka ho bona hore na mantswe a tsona a amana jwang le dintlha tse tla tshohlwa dibokeng. O re: “Sena se nthusa hore ke amehe haholo ka mantswe a pina ho ena le ho tshwenyeha ka hore na ke tseba ho bina kapa tjhe.”
Matlotlo a Patilweng
it-1-E 832
Monwana
Ha Bibele e bua ka dintho tseo Modimo a di entseng, e sebedisa puo ya tshwantshetso e reng o di entse ka “menwana” ya hae. Mohlala ke ha a ne a ngola Melao e Leshome matlapeng (Ex 31:18; De 9:10), ha a ne a etsa mehlolo (Ex 8:18, 19, nal.) le ha a ne a bopa mahodimo (Ps 8:3, nal.). “Menwana” eo ho thweng Modimo o ile a e sebedisa ha a bopa dintho, ke moya o halalelang kapa matla ao a a sebedisang. Taba ena e tshehetswa ke tlaleho ya Genese e buang ka popo, moo e reng matla a Modimo a sebetsang (ruʹach, “moya”) a ne a ya kwana le kwana hodima metsi. (Ge 1:2, nal.) Ka hare ho Mangolo a Segerike a Bakreste, re fumana tlaleho e re thusang ho utlwisisa hore moya wa Modimo o tshwantshwa le monwana. Ha Matheu le Luka ba bua ka tlaleho e tshwanang ya moo Jesu a ileng a leleka bademona, Matheu o ile a re Jesu o ne a sebedisa “moya wa Modimo,” ha Luka yena a ile a re o ne a sebedisa “monwana wa Modimo.”—Mat 12:28; Lu 11:20, nal.
LA 26 FEBRUARY–LA 3 MARCH
MATLOTLO A TSWANG BIBELENG | PESALEME YA 11-15
Ipone o se o le Lefatsheng le Letjha le Nang le Kgotso
w06 5/15 18 ¶3
Dintlhakgolo Tsa Buka ya Pele ya Dipesaleme
11:3—Ke metheo efe e qhaqhwang? Ena ke metheo eo batho ba itshetlehileng ka yona—e leng molao, taolo le toka. Ha e ka ferekana, ho ba le pherekano feela setjhabeng mme toka e ba siyo. Maemong ao, “mang kapa mang ya lokileng” o lokela ho tshepa Modimo ka botlalo.—Pesaleme ya 11:4-7.
wp16.4 11
Na Bokgopo bo Tla ke bo Fele
Bibele e re haufinyane Modimo o tla fedisa bokgopo lefatsheng. Lefatshe lena le tletseng dintwa le letetswe ke ‘letsatsi la kahlolo le la timetso ya batho ba se nang bomodimo.’ (2 Petrose 3:5-7) Batho ba kgopo ha ba sa tla hlola ba utlwisa ba bang bohloko. Ke eng e re kgodisang hore Modimo o batla ho nka kgato mme a fedise bokgopo lefatsheng?
Bibele e re Modimo “o hloile mang kapa mang ya ratang pefo.” (Pesaleme ya 11:5) Mmopi wa rona o rata kgotso le toka. (Pesaleme ya 33:5; 37:28) Ke ka hoo a ke keng a dumella hore batho ba kgopo ba dule ba le teng.
Na o Ikemiseditse ho Leta ka Mamello?
15 Ke hobaneng ha Davida a ne a ikemiseditse ho leta ka mamello jwalo? O re fa karabo ho e nngwe ya dipina tsa hae. O re: “Ha e le nna, ke tshepile mosa wa hao o lerato; pelo ya ka e ke e thabele poloko ya hao. Ke tla binela Jehova, etswe o sebetsane le nna ka mokgwa o putsang.” (Pes. 13:5, 6) Davida o ne a kgodisehile hore Modimo o a mo rata. O ile a tshepa hore Jehova o tla mo lopolla mme a nahanisisa ka tsela eo Jehova a neng a mo thusitse ka yona nakong e fetileng. Ka sebele Davida ha a ka a itshola ka hore ebe o ile a leta.
Mmuso o Etsa Thato ya Modimo Lefatsheng
16 Tshireletseho. Qetellong, ditshepiso tse thabisang tse tlalehilweng ho Esaia 11:6-9, di tla phethahala ka ho felletseng ka tsela ya sebele. Banna, basadi le bana ba tla sireletseha hohle moo ba yang teng lefatsheng. Ha ho motho ya tla ntsha e mong kotsi mme le diphoofolo di ke ke tsa ntshana kotsi. Nahana feela lefatshe lena lohle e se e le lehae la hao, o sesa dinokeng, matsheng le mawatleng, o haola le dithaba o bile o solla makgulong o sireletsehile kahohle. O ke ke wa tshwenyeha le ha o phirimellwa o le moo. Mantswe a ho Ezekiele 34:25 a tla phethahala mme batho ba Modimo ba tla ‘dula lefeelleng ba sireletsehile ba robale morung.’
Matlotlo a Patilweng
w13 9/15 19 ¶12
Na o Fetohile?
12 Ka maswabi, lefatsheng lena re phela hara batho ba tshwanang le ba hlalositsweng ke Pauluse. Ho ka etsahala hore ebe ba nahana hore ho mamela melao le melaomotheo, ke ntho e siilweng ke nako ebile ha ho na motho ya lokelang ho qobella ba bang hore ba e mamele. Mesuwe le batswadi ba bangata ba dumella bana ho iketsetsa borata. Ba bile ba ba ruta hore motho e mong le e mong o na le bolokolohi ba ho iketsetsa qeto ya hore na ke sefe se nepahetseng kapa se fosahetseng. Batho ba mofuta oo ba dumela hore ha e le hantle ha ho ka moo batho ba ka tsebang hore na ke sefe se nepahetseng kapa se fosahetseng. Esita le batho ba bangata ba ipolelang hore ke badumedi, ba nka hore ba na le bolokolohi ba ho etsa seo ba dumelang hore se nepahetse mme ha ho letho le ba tlamang hore ba mamele Modimo ha mmoho le melao ya hae. (Pes. 14:1) Ho ba le maikutlo ana ho ka beha Bakreste ba nnete kotsing e kgolo. Batho ba sa fadimehang ba ka nna ba tadima ditokisetso tsa puso ya Modimo ka tsela eo. Ba ka nna ba se ke ba ikemisetsa ho latela tsamaiso ya phutheho mme ba tletleba ka ntho e nngwe le e nngwe eo ba sa e rateng. Kapa ba ka nna ba se ke ba dumellana ka botlalo le keletso e thehilweng Bibeleng e mabapi le boithabiso, tshebediso ya Inthanete le ho phehella thuto e phahameng.