THUTO YA 2

Mokgwa wa ho Qoqa

2 Bakorinthe 2:17

KAKARETSO: Tsela eo o buang ka yona e lokela ho bontsha hore na o ikutlwa jwang ka sehlooho le ka bamamedi ba hao.

Rapela mme o lokisetse hantle. Kopa Jehova hore a o thuse ho fetisa molaetsa ka tsela e nepahetseng. Tseba hore na ke dintlha dife tseo o batlang ho bua ka tsona. Hlalosa dintlha ka mantswe a hao ho ena le hore o bale se ngotsweng.

Haeba o tlo bala Bibele kapa sengolwa se itseng, o lokela ho tseba hore na se bua kang, e le hore ha o bala o se ke wa peleta. Ha o bala mantswe ao motho a a buileng, ipehe boemong ba hae empa o se ke wa fetelletsa ditaba.
Bua ho tswa pelong. Ipotse hore na ke hobaneng ha bamamedi ba hloka ho utlwa molaetsa wa hao. Bontsha hore o amehile ka bona. Sena se tla etsa hore tsela eo o emeng ka yona, o tsamaisang matsoho ka yona le ponahalo ya sefahleho, di bontshe mofuthu le botswalle.

Ho bua ka tsela e tlwaelehileng ha ho bolele hore o lokela ho bua puo ya seterateng. Etsa hore molaetsa wa hao ebe o hlomphehang, ka hore o sebedise puo e hlakileng le mantswe a kgethilweng hantle.
Sheba bamamedi. Sheba bamamedi ka tsela e bontshang hore o a ba hlompha. Ha o fana ka puo sheba motho a le mong ka nako, ho ena le hore o shebe nqa e le nngwe kapa o leke hoba sheba kaofela ka nako e le nngwe.