GEORGIA
Ke ne ke Batla ho Fetola Bophelo ba ka
Davit Samkharadze
O HLAHILE KA 1967
O KOLOBEDITSWE KA 1989
PALE YA BOPHELO BA HAE O sebeleditse e le molebedi wa potoloho. O qadile ho ruta dikolong tsa Bibele ka 2013.
KA 1985, ha ke le dilemo tse 18, mmuso wa Soviet o ile wa nqobella ho kena lebothong la sesole. Ke ne ke sa rate kamoo masole a neng a le kgopo ka teng, kahoo ke ne ke sa batle ho tshwana le wona. Le hoja ho ne ho se bonolo, ke ne ke batla ho fetola bophelo ba ka.
Kamora hore ke tswe sesoleng, ke ile ka kgutlela hae. Bosuing bo bong kamora hore ke kgutle phathing, ke ile ka rapela mme ka kopa hore Modimo a nthuse ho phela ka tsela e molemo. Letsatsing le hlahlamang ha ke ya mosebetsing, ke ile ka kena ha rakgadi eo e neng e le Paki ya Jehova. Ha ke fihla moo, ke ile ka fumana rakgadi le Dipaki tse ding ba tshwere seboka. Ba ile ba nkamohela, yaba ke kgetha ho mamela ho se hokae.
Hamorao ke ile ka dumela ho kgannelwa thuto ya Bibele mme ka kolobetswa kamora dikgwedi tse tsheletseng. Jehova o ile a nthusa hore ke etse diphetoho.