Bibele e ka o Thusa Hore o se ke wa Hlora

Ka 2023, ditsebi tsa bophelo botle di ile tsa hlokomela hore ho hlora ke bothata bo boholo bo hlokang ho emelwa ka maoto. Na ho na le tharollo?

• Dr. Vivek Murthy o re: “Ho hlora le ho ikarola ho batho bang ho ka re kudisa.” O boetse o re: “Na ho na le seo re ka se etsang? Re ka sebetsa ka thata letsatsi le leng le le leng hore re matlafatse setswalle le batho ba haufi le rona.”a

Ka dinako tse ding motho a ka hlora a ntse a ena le batho ba bang. Le ha ho le jwalo, Bibele e ka re thusa ho sa tsotellehe hore na keng e etsang hore re hlore. E na le dikeletso tse molemo tse ka re thusang hore re matlafatse setswalle sa rona le ba haufi le rona le ho hlola ho hlora.

Melaomotheo ya Bibele e ka re thusang

Buisana le batho ba bang. Bolella batho ba bang hore na o ikutlwa jwang empa le wena o ba mamele ha ba hloka ho ntsha maikutlo a bona. Ha o ipha nako ya ho mamela batho ba bang o tla ba le metswalle ya nnete.

• Molaomotheo wa Bibele: “Le se ke la ameha feela ka dintho tse le tswelang molemo empa le amehe le ka dintho tse tla tswela batho ba bang molemo.”​—Bafilipi 2:4.

Etsa setswalle le batho ba fapaneng. Leka ho etsa metswalle le batho ba baholo, ba banyenyane ho wena le ba tswang merabeng e meng.

• Molaomotheo wa Bibele: “Le eketse lerato leo le re ratang ka lona.”​—2 Bakorinthe 6:​13.

Ho fumana dintlha tse eketsehileng tsa hore na o ka etsang ha o hlorile, bala sehlooho se reng “Ho Ikhotsofatsa Tabeng ea ho Batla Botsoalle.”