KOSEPELE EA MATHEU

1 Buka ea histori* ea Jesu Kreste* mora oa Davida.+ Davida o tsoa lelapeng la Abrahama:+

17 Kahoo, meloko eohle e ne e eme tjena: Ho tloha ho Abrahama ho fihlela ho Davida e ne e le meloko e 14. Ho tloha ho Davida ho fihlela ha Bajuda ba isoa Babilona e le meloko e 14 ’me ho tloha ha Bajuda ba isoa Babilona ho fihlela ho Kreste e le meloko e 14.

18 Ha Jesu Kreste a tla hlaha, ho ile ha etsahala tjena: Nakong eo Josefa a neng a lebelelitse Maria, Maria o ile a ima ka moea o halalelang*+ pele ba nyalana. 19 Kaha Josefa monna oa Maria o ne a lokile ebile a sa batle ho mo hlabisa lihlong, a rera ho mo hlala ka lekunutu.+ 20 Ka mor’a hore a nahanisise ka lintho tsena, a bona lengeloi la Jehova* torong le re: “Josefa, mora oa Davida, u se ke oa tšaba ho isa Maria mosali oa hao lapeng hobane o imme ngoana eo ka moea o halalelang.+ 21 O tla tsoala mora ’me u tla mo reha Jesu*+ hobane o tla pholosa batho ba habo libeng tsa bona.”+ 22 Tsena tsohle li etsahetse ho phethahatsa mantsoe ao Jehova* a ileng a a bua ka moprofeta oa hae, ha a re: 23 “Moroetsana o tla ima ’me a tsoale mora, ba mo rehe Emanuele,”+ eo ha e fetoleloa e bolelang “Molimo o na le Rona.”+

24 Eaba Josefa oa tsoha ’me o etsa kamoo lengeloi la Jehova* le neng le mo laetse kateng, a isa mosali oa hae lapeng. 25 Empa ha aa ka a etsa thobalano le eena ho fihlela a tsoetse mora+ eaba o mo reha Jesu.+

2 Ka mor’a hore Jesu a hlahele Bethlehema+ e Judea mehleng ea puso ea Morena Heroda,*+ balepi ba linaleli* ba tsoang ka Bochabela ba tla Jerusalema 2 ba re: “O kae morena oa Bajuda ea sa tsoa hlaha?+ Re bone naleli e re tataisetsang ho eena ha re le ka Bochabela joale re tletse ho tla mo tlotla.”* 3 Ha Morena Heroda le batho bohle ba Jerusalema ba utloela ka taba ena ba halefa haholo. 4 Morena a bokella baprista bohle ba baholo le bangoli ba sechaba a ba botsisisa hore na Kreste* o lokela ho hlahela hokae. 5 Ba re ho eena: “Bethlehema+ e Judea hobane moprofeta o ile a bua ka taba ena ha a re: 6 ‘Uena Bethlehema oa naha ea Juda, ho hang ha u motse o monyenyane haholo mahlong a babusisi ba Juda kaha ho uena ho tla tsoa ea busang, ea tla lisa sechaba sa ka sa Iseraele.’”+

7 Heroda a bitsetsa balepi ba linaleli sephiring ’me a ba botsisisa hore na naleli eo e qalile ho bonahala neng. 8 A ba romela Bethlehema a re: “E-eang le e’o batlisisa hore na ngoana eo o hokae. Ha le mo fumane le khutle le ntsebise e le hore le ’na ke e’o mo khumamela.” 9 Ka mor’a hore morena a ba fe taelo eo, ba tsamaea eaba naleli eo ba e boneng ha ba le ka Bochabela+ e ba etella pele ho fihlela e ema holim’a sebaka seo ngoana eo a neng a le ho sona. 10 Ha ba bona naleli ba thaba haholo. 11 Ha ba kena ka tlung ba fumana ngoana le ’mè oa hae Maria. Ba khumama ba mo tlotla. Ba ne ba e-na le matlotlo ’me ba mo fa khauta, libano tse tšoeu le mira e le limpho. 12 Empa kaha Molimo o ile a ba laela torong+ hore ba se ke ba boela ho Heroda, ba khutlela naheng ea habo bona ka tsela e ’ngoe.

13 Ha ba qeta ho tloha, lengeloi la Jehova* la hlaha ho Josefa torong,+ la re: “Tsoha, u nke ngoana le ’mè oa hae u balehele Egepeta. U lule moo ho fihlela ke u laela hore u khutle hobane Heroda o tl’o batla ngoana eo e le hore a mo bolaee.” 14 Kahoo, Josefa a tsoha bosiu a nka ngoana le ’mè oa hae ’me a tloha ho ea Egepeta. 15 A lula moo ho fihlela Heroda a shoa. Ha phethahala mantsoe ao Jehova* a ileng a a bua ka moprofeta oa hae ha a re: “Ke bitsitse mora oa ka hore a tsoe Egepeta.”+

16 Eitse ha Heroda a hlokomela hore balepi ba linaleli ba mo tsoile tlase, a halefa haholo eaba o laela hore ho bolaoe bana bohle ba bashanyana Bethlehema le literekeng tsohle tsa eona, ho tloha ka ba lilemo li peli ho ea tlase, ho latela nako eo balepi ba linaleli ba neng ba e boletse.+ 17 Eaba ho phethahala mantsoe ao Molimo a a buileng ho moprofeta Jeremia ha a re: 18 “Lentsoe le utloahetse Rama, seboko le sello se bohloko. E ne e le Ragele+ a llela bana ba hae, a sa tšelisehe hobane bana ba hae ha ba sa le eo.”+

19 Ka mor’a hore Heroda a shoe, lengeloi la Jehova* la hlaha ho Josefa torong+ a le Egepeta. 20 La re: “Tsoha, u nke ngoana le ’mè oa hae u ee naheng ea Iseraele kaha ba neng ba batla ho bolaea ngoana ba shoele.” 21 Kahoo, a ema a nka ngoana le ’mè oa hae ’me a khutlela naheng ea Iseraele. 22 Empa ha a utloa hore Arkelause o busa Judea sebakeng sa ntate oa hae Heroda, a tšaba ho ea moo. Hape Molimo o ile a mo lemosa ka toro+ hore a se ke a ea moo. Kahoo, a tloha a ea Galilea.+ 23 Eaba o lula motseng o bitsoang Nazaretha+ e le hore ho ka phethahala mantsoe a baprofeta a reng: “O tla bitsoa Monazaretha.”*+

3 Hamorao Johanne+ Mokolobetsi a tla lefeelleng la Judea eaba oa ruta+ 2 o re: “Bakang hobane ’Muso oa maholimo o atametse.”+ 3 Ha e le hantle Johanne enoa ke eena eo moprofeta Esaia a neng a bua ka eena+ ha a re: “Ho na le motho ea hoeletsang lefeelleng a re: ‘Lokisang tsela ea Jehova,* otlollang litsela tsa hae.’”+ 4 Johanne o ne a apara liaparo tsa boea ba kamele, a itlama ka lebanta la letlalo thekeng.+ O ne a ja litsie le mahe a linotši tsa naheng.+ 5 Batho ba Jerusalema, Judea le libakeng tsohle tse potolohileng Jordane ba ne ba ea ho eena.+ 6 Ba ne ba ipolela libe phatlalatsa ebe o ba kolobetsa* Nokeng ea Jordane.+

7 Ha Johanne a bona Bafarisi le Basaduse+ ba bangata ba tla hore ba kolobetsoe, a re ho bona: “Malinyane a linoha tsa marabe,+ ke mang ea le hlokomelisitseng hore le balehe bohale bo tlang?+ 8 Qalang pele ka hore le bontše* hore le bakile. 9 Le se ke la ithetsa ka hore Abrahama ke ntate oa lona+ hobane Molimo a ka mo hlahisetsa bana le ka majoe ana. 10 Selepe se se se le metsong ea lifate. Sefate se seng le se seng se sa beheng litholoana tse ntle se tla rengoa ’me se lahleloe mollong.+ 11 ’Na ke le kolobetsa ka metsi hobane le bakile.+ Ea tlang ka mor’a ka eena o tla le kolobetsa ka moea o halalelang+ le ka mollo.+ O matla ho mpheta ’me ha ke tšoanelehe ho mo rolisa lieta.*+ 12 O tšoere kharafu ea hae e olosang. O tla hloekisa seotlo sa hae ka ho feletseng, a bokelle koro ea hae ka setorong empa o tla chesa ’moko ka mollo+ o ke keng oa tima.”

13 Jesu a tloha Galilea a ea Jordane hore Johanne a mo kolobetse.+ 14 Empa Johanne a leka ho mo thiba a re: “Ke uena ea tlamehang ho nkolobetsa. Joale ke hobane’ng ha u tla ho ’na hore ke u kolobetse?” 15 Jesu a mo araba a re: “Ha re etsa joalo re tla etsa ntho eo Molimo a e ratang. Kahoo, u se ke oa nthiba.” Eaba Johanne ha a sa mo thiba. 16 Hang ka mor’a hore Jesu a kolobetsoe, a nyoloha ka metsing eaba maholimo aa buleha.+ A bona moea oa Molimo o theoha joaloka leeba o tla holim’a hae.+ 17 Hape lentsoe le tsoang maholimong+ la re: “Enoa ke Mora oa ka+ eo ke mo ratang, ea nkhahlisang.”+

4 Moea o halalelang oa tataisetsa Jesu lefeelleng. Ha a le moo, Diabolose a mo leka.+ 2 E ne e le ka mor’a hore a itime lijo ka matsatsi a 40 le masiu a 40 ’me o ne a utloa a lapile. 3 Diabolose+ a atamela ’me a re ho eena: “Haeba u mora oa Molimo, bolella majoe ana hore a fetohe mahobe.” 4 Empa Jesu a araba a re: “Mangolo a re: ‘Motho a ke ke a phela ka bohobe feela empa o tla phela le ka lentsoe le leng le le leng le tsoang molomong oa Jehova.’”*+

5 Eaba Diabolose o mo isa motseng o halalelang+ eaba o mo emisa holim’a tora* ea tempele.+ 6 A re ho eena: “Haeba u mora oa Molimo, itihele fatše etsoe Mangolo a re: ‘O tla romela mangeloi a hae ho uena. A tla u jara ka matsoho e le hore leoto la hao le se ke la khoptjoa ke lejoe.’”+ 7 Jesu a re ho eena: “Mangolo a boetse a re: ‘U se ke oa leka Jehova* Molimo oa hao.’”+

8 Diabolose a boela a mo isa thabeng e phahameng haholo, a mo bontša mebuso eohle ea lefatše le maruo a eona.+ 9 A re ho eena: “Ke tla u fa lintho tsena kaofela ha u ka khumama oa nthapela.”* 10 Jesu a re ho eena: “Tloha Satane! Mangolo a re: ‘Ke Jehova* Molimo oa hao eo u lokelang ho mo rapela+ ebile ke eena feela eo u lokelang ho mo sebeletsa.’”+ 11 Diabolose a mo tlohela+ eaba mangeloi aa tla ho tla matlafatsa Jesu.+

12 Ha Jesu a utloa hore Johanne o tšoeroe,+ a khutlela Galilea.+ 13 Ka mor’a hore a tlohe Nazaretha, a lula Kapernauma+ ka thoko ho leoatle literekeng tsa Zabulone le Nefthali 14 e le hore ho ka phethahala mantsoe ao moprofeta Esaia a ileng a a bua ha a re: 15 “Lona baahi ba naha ea Zabulone le Nefthali, pel’a tsela ea leoatle, ka lehlakoreng le leng la Jordane, Galilea ea lichaba, 16 batho ba lutseng lefifing ba ile ba bona leseli le leholo. Ha e le ba lutseng sebakeng sa moriti oa lefu, leseli+ le ile la ba chabela.”+ 17 Ho tloha ka nako eo ho ea pele, Jesu a qala ho ruta a re: “Bakang hobane ’Muso oa maholimo o atametse.”+

18 Ha a tsamaea haufi le Leoatle la Galilea, a bona bana ba motho ba babeli ba akhela letlooa* la ho tšoasa litlhapi ka leoatleng kaha e ne e le batšoasi ba litlhapi.+ E mong e ne e le Simone ea bitsoang Petrose,+ e mong e le Andrease. 19 A re ho bona: “Ntšaleng morao, ke tla le etsa batšoasi ba batho.”+ 20 Hang-hang ba tlohela matlooa a bona eaba baa mo latela.+ 21 Ha a fetela pele, a bona ba bang ba babeli bao e neng e le bana ba motho e leng Jakobo le Johanne bara ba Zebedea.+ Ba ne ba le ka sekepeng ba e-na le ntate oa bona Zebedea, ba lokisa matlooa a bona eaba oa ba bitsa.+ 22 Hang-hang ba siea ntate oa bona hammoho le sekepe, ba latela Jesu.

23 A tsamaea Galilea+ eohle a ruta ka matlung a bona a thapelo,*+ a bua ka litaba tse monate tsa ’Muso a bile a phekola mafu a mefuta eohle.+ 24 Siria eohle e ile ea tseba ka eena ’me batho ba moo ba mo tlisetsa bohle ba kulang, ba opeloang,+ ba nang le bademona,+ ba tšoeroeng ke sethoathoa*+ le ba shoeleng litho eaba oa ba phekola. 25 Ka lebaka leo, letšoele le leholo le tsoang Galilea, Dekapolise,* Jerusalema, Judea le ka lehlakoreng le leng la Jordane la mo latela.

5 Ha Jesu a bona letšoele a nyolohela thabeng. Ka mor’a hore a lule fatše barutuoa ba hae ba tla ho eena. 2 A qala ho ruta a re:

3 “Ho thaba ba hlokomelang hore ba hloka Molimo+ kaha ’Muso oa maholimo ke oa bona.

4 Ho thaba ba utloileng bohloko kaha ba tla tšelisoa.+

5 Ho thaba ba bonolo+ kaha ba tla rua lefatše.+

6 Ho thaba ba lapelang le ho nyoreloa+ ho loka kaha ba tla khotsofatsoa.+

7 Ho thaba ba mohau+ kaha ba tla hauheloa.

8 Ho thaba ba lipelo li hloekileng+ kaha ba tla bona Molimo.

9 Ho thaba ba bopang khotso*+ kaha ba tla bitsoa bara ba Molimo.

10 Ho thaba ba hlorisitsoeng ka lebaka la ho loka+ kaha ’Muso oa maholimo ke oa bona.

11 Ho thaba lona ha batho ba le rohaka,+ ba le hlorisa+ le ho le etselletsa ka ntho e ’ngoe le e ’ngoe e mpe ka lebaka la ka.+ 12 Thabang, le tlola-tlole ke thabo+ hobane moputso oa lona+ o moholo maholimong kaha le nakong e fetileng ba ile ba hlorisa baprofeta ka tsela e tšoanang.+

13 Le letsoai+ la lefatše empa haeba letsoai le tapa, le ka etsoa’ng hore le be le tatso hape? Ha le sa na thuso haese hore feela le lahleloe ka ntle,+ le hatakeloe ke batho.

14 Le leseli la lefatše.+ Motse o ke ke oa pateha ha o lutse holim’a thaba. 15 Ha batho ba khantša lebone ha ba le behe tlas’a baskete empa ba le beha holim’a tafole ebe le khantšetsa bohle ka tlung.+ 16 Leseli la lona le ke le khanyetse batho+ joalo e le hore ba ka bona mesebetsi ea lona e metle+ ’me ba tlotlisa Ntate oa lona ea maholimong.+

17 Le se ke la nahana hore ke tletse ho felisa Molao kapa mantsoe a Baprofeta. Ha kea tlela ho li felisa empa ke tletse ho li phethahatsa.+ 18 Kannete ke re ho lona, le haeba leholimo le lefatše li ne li ka timela, ha ho tlhaku le e ’ngoe e nyenyane ka ho fetisisa kapa letšoao le le leng Molaong le tla timela ho fihlela lintho tsena tsohle li etsahetse.+ 19 Ka hona, mang kapa mang ea tlolang o mong oa melao ena e menyenyane ’me a ruta batho ho e tlola, a ke ke a tšoaneloa ke ho kena* ’Musong oa maholimo. Empa mang kapa mang ea e mamelang le ho e ruta, o tla tšoaneloa ke ho kena* ’Musong oa maholimo. 20 Kea le bolella, haeba le sa bontše hore le lokile* ho feta bangoli le Bafarisi,+ ho hang le ke ke la kena ’Musong oa maholimo.+

21 Le utloile hore ho itsoe ho batho ba mehleng ea khale: ‘U se ke oa bolaea.+ Mang kapa mang ea bolaeang o tla ikarabella lekhotleng la toka.’+ 22 Empa ke re ho lona, e mong le e mong ea lulang a halefetse+ ngoan’abo o tla ikarabella lekhotleng la boahloli. Mang kapa mang ea buang mantsoe a etsang hore ngoan’abo a ikutloe a se na thuso, o tla ikarabella Lekhotleng le Phahameng ka ho Fetisisa. Athe mang kapa mang ea reng ho e mong: ‘Sehole tooe!’ o tla lokeloa ke mollo oa Gehena.*+

23 Haeba u tlisa mpho ea hao aletareng+ ebe oa hopola hore ho na le ntho eo u khopisitseng ngoan’eno ka eona, 24 u siee mpho ea hao moo ka pel’a aletare u tsamaee. U bope khotso le ngoan’eno pele ebe ha u khutlile u nyehela mpho ea hao.+

25 Potlakela ho lokisa litaba le moqosi oa hao ha u sa ntse u e-na le eena tseleng e eang khotla e le hore moqosi a se ke a tloha a u isa ho moahloli, moahloli a u isa ho mohlanka oa lekhotla eaba u isoa teronkong.+ 26 Kannete kea u joetsa, u ke ke oa tsoa moo ho fihlela u patetse le sente ea ho qetela.*

27 Le utloile hore ho itsoe: ‘U se ke oa feba.’+ 28 Empa ke re ho lona, e mong le e mong ea ntseng a sheba mosali+ e le hore a be le takatso ea ho etsa thobalano le eena o se a febile le eena ka pelong ea hae.+ 29 Haeba leihlo la hao le letona le etsa hore u etse sebe,* u le honye ’me u le lahlele hole le uena.+ Ho molemo hore u lahleheloe ke setho se le seng ho e-na le hore ’mele oohle oa hao o lahleloe Gehena.*+ 30 Hape haeba letsoho la hao le letona le etsa hore u etse sebe,* u le khaole ’me u le lahlele hole le uena.+ Ho molemo hore u lahleheloe ke setho se le seng ho e-na le hore ’mele oohle oa hao o lahleloe Gehena.*+

31 Ho boetse ho itsoe: ‘Mang kapa mang ea hlalang mosali oa hae, a mo fe lengolo la tlhalo.’+ 32 Empa ke re ho lona, motho ea hlalang mosali oa hae empa mosali a sa etsa boitšoaro bo bobe bo amanang le thobalano,* o mo beha kotsing ea hore a etse bofebe. Hape mang kapa mang ea nyalang mosali ea hlaliloeng ka tsela eo oa feba.+

33 Hape le utloile hore ho itsoe ho batho ba mehleng ea khale: ‘U se ke oa hlapanya ebe ha u phethe+ empa u phethe boitlamo boo u bo etselitseng Jehova.’*+ 34 Empa ke re ho lona: Le se ke la hlapanya ho hang,+ leha e le ka leholimo hobane ke terone ea Molimo 35 kapa ka lefatše hobane ke setuloana sa maoto a hae+ kapa ka Jerusalema hobane ke motse oa Morena e moholo.*+ 36 Le se ke la hlapanya ka lihlooho tsa lona hobane le ke ke la fetola qoba leha e le ’ngoe ea moriri hore e be putsoa kapa e be ntšo. 37 Ha le re le tla etsa ntho, le fele le e etse. Ha le re le ke ke la etsa ntho, le se ke la e etsa*+ hobane ho fetang hoo ho tsoa ho Diabolose.*+

38 Le utloile hore ho itsoe: ‘Leihlo bakeng sa leihlo le leino bakeng sa leino.’+ 39 Empa ke re ho lona: U se ke oa hanyetsa motho ea khopo empa mang kapa mang ea u otlang lerameng le letona, u mo fe le leng.+ 40 Haeba motho a batla ho u isa khotla hobane a batla ho inkela seaparo sa hao, u mo tlohele a nke le seaparo sa hao se seng.+ 41 Haeba motho ea nang le bolaoli a u qobella hore u tsamaee le eena k’hilomithara* e le ’ngoe, u ee le eena lik’hilomithara tse peli. 42 U fe ea u kopang ’me u se ke oa furalla ea batlang hore u mo alime.*+

43 Le utloile hore ho itsoe: ‘U rate moahisani oa hao+ ’me u hloee sera sa hao.’ 44 Empa ke re ho lona: Le ’ne le rate lira tsa lona+ le ho rapella ba le hlorisang+ 45 e le hore le ka bontša hore le bana ba Ntate oa lona ea maholimong+ kaha o chabisetsa batho ba khopo le ba lokileng letsatsi la hae ’me o nesetsa batho ba lokileng le ba sa lokang pula ea hae.+ 46 Le lebeletse ho fumana moputso ofe haeba le rata batho ba le ratang feela?+ Na le babokelli ba lekhetho ha ba etse ntho e tšoanang? 47 Hape haeba le lumelisa bana ba bo lona feela, le etsa ntho efe e mohlolo? Na le batho ba lichaba ha ba etse ntho e tšoanang? 48 Kahoo, le phethahale joalokaha Ntate oa lona ea leholimong a phethahetse.+

6 Hlokomelang hore le se ke la etsa mesebetsi e lokileng ka pel’a batho hore feela ba le bone,+ ho seng joalo Ntate oa lona ea maholimong a ke ke a le fa moputso. 2 Kahoo, ha u fa bafutsana liphallelo,* u se ke oa ipolelisa* joalokaha baikaketsi ba etsa matlong a thapelo* le literateng e le hore ba rorisoe ke batho. Kannete ke re ho lona, ba se ba fumane moputso oa bona o feletse. 3 Empa uena ha u fa bafutsana liphallelo, u se ke oa lumella letsoho la hao le letšehali hore le tsebe seo le letona le se etsang 4 e le hore thuso ea hao e be lekunutu. Kaha Ntate oa hao ea maholimong o bona ntho e ’ngoe le e ’ngoe, o tla u hlohonolofatsa.+

5 Hape, ha le rapela, le se ke la ba joaloka baikaketsi+ hobane ba rata ho rapela ba eme ka matlung a thapelo le lik’honeng tsa literata tse kholo hore ba bonoe ke batho.+ Kannete ke re ho lona, ba se ba fumane moputso oa bona o feletse. 6 Empa ha u rapela, u kene ka kamoreng, u koale monyako ebe u rapela Ntate oa hao ea maholimong.*+ Kaha Ntate oa hao ea maholimong o bona ntho e ’ngoe le e ’ngoe, o tla u hlohonolofatsa. 7 Ha u rapela, u se ke oa pheta-pheta mantsoe a tšoanang joaloka batho ba lichaba hobane ba nahana hore Molimo o tla ba utloa ha ba sebelisa mantsoe a mangata. 8 Le se ke la ba etsisa hobane Ntate oa lona oa tseba+ hore na le hloka’ng le pele le mo kopa.

9 Lona le rapele tjena:+

‘Ntate oa rona ea maholimong, lebitso la hao+ le halaletsoe.+ 10 ’Muso+ oa hao o tle. Thato ea hao+ e etsoe lefatšeng joalokaha e etsoa leholimong.+ 11 U re fe bohobe ba letsatsi lena+ 12 hape u re tšoarele liphoso tsa rona joalokaha le rona re tšoaretse ba re etselitseng liphoso.+ 13 U se ke oa re lumella hore re hloloe ke moleko*+ empa u re lopolle ho ea khopo.’+

14 Haeba le tšoarela batho liphoso tsa bona, Ntate oa lona ea leholimong le eena o tla le tšoarela.+ 15 Empa haeba le sa tšoarele batho liphoso tsa bona, Ntate oa lona le eena a ke ke a le tšoarela.+

16 Ha le itima lijo,+ le khaotse ho bonahala eka le utloile bohloko joaloka baikaketsi hobane ba etsa joalo* hore batho ba ba bone hore ba itima lijo.+ Kannete ke re ho lona, ba se ba fumane moputso oa bona o feletse. 17 Empa ha u itima lijo, u tlotse hlooho ea hao ka oli u be u itlhatsoe sefahleho 18 e le hore e be Ntate oa hao ea maholimong ea bonang hore u itima lijo eseng hore u bonoe ke batho. Kaha Ntate oa hao ea maholimong o bona ntho e ’ngoe le e ’ngoe, o tla u hlohonolofatsa.

19 Khaotsang ho ipolokela matlotlo lefatšeng,+ moo tšoele* le mafome li jang le moo masholu a thuhang ’me a utsoe. 20 Empa le ipolokele matlotlo leholimong,+ moo tšoele* kapa mafome li sa jeng+ le moo masholu a sa thuheng ’me a utsoe. 21 Etsoe moo letlotlo la hao le leng teng, le pelo ea hao e tla ba hona teng.

22 Lebone la ’mele ke leihlo.+ Haeba leihlo la hao le sheba nģa e le ’ngoe, ’mele oohle oa hao o tla khanya. 23 Empa haeba leihlo la hao le sheba lintho tse fosahetseng,*+ ’mele oohle oa hao o tla ba lefifi. Ha e le hantle, haeba leseli le ka ho uena ke lefifi, lefifi leo ke le leholo haholo.

24 Ha ho na motho ea ka sebeletsang benghali ba babeli hobane o tla rata e mong ebe o hloea e mong+ kapa a hlomphe e mong ebe o tella e mong. Le ke ke la sebeletsa Molimo le Maruo.+

25 Ka lebaka lena ke re ho lona, tlohelang ho tšoenyeha+ ka bophelo ba lona hore na le tla ja’ng kapa le tla noa’ng kapa la tšoenyeha ka ’mele ea lona hore na le tla apara’ng.+ Na bophelo ha bo bohlokoa ho feta lijo le ’mele ha o bohlokoa ho feta liaparo?+ 26 Shebang linonyana,+ ha li jale peo leha e le ho kotula kapa ho boloka lijo ka setorong empa Ntate oa lona ea leholimong oa li fepa. Na ha le bohlokoa ho li feta? 27 Ke mang ho lona eo ha a tšoenyeha a ka lelefatsang bophelo ba hae leha e le hanyenyane feela?*+ 28 Hape ke hobane’ng ha le tšoenyeha ka liaparo? Ithuteng kamoo lipalesa* tsa naha li holang kateng. Ha li lohe liaparo ebile ha li sebetse ka thata 29 empa kea le bolella hore esita le Solomone+ le hoja a ne a apara hantle, o ne a sa apare joaloka tsona. 30 Joale haeba ena ke tsela eo Molimo a apesang limela tsa naha ka eona, tse leng teng kajeno ’me hosane li lahleloa ka ontong, na lona a ke ke a le apesa le ho feta, lona ba nang le tumelo e nyenyane? 31 Kahoo, le ka mohla le se ke la tšoenyeha+ ’me la re: ‘Re tla ja’ng?’ ‘Re tla noa’ng?’ kapa ‘Re tla apara’ng?’+ 32 Tsena tsohle ke lintho tseo batho ba lichaba ba phathahanang ka tsona. Ntate oa lona ea leholimong oa tseba hore le hloka lintho tsena tsohle.

33 Kahoo, etsang hore ’Muso oa Molimo le ho mamela Molimo e be lintho tse tlang pele bophelong ba lona* ’me o tla le ekeletsa lintho tse ling tsohle.+ 34 Le ka mohla le se ke la tšoenyeha ka letsatsi le hlahlamang+ hobane letsatsi le hlahlamang le tla ba le matšoenyeho a lona. Letsatsi ka leng le na le mathata a lona.

7 Khaotsang ho ahlola+ e le hore le se ke la ahloloa 2 hobane le tla ahloloa ka kahlolo eo le ahlolang ba bang ka eona+ ’me batho ba tla le tšoara ka tsela eo le ba tšoarang ka eona.*+ 3 Ke hobane’ng ha u sheba lehlokoana le ka leihlong la ngoan’eno empa uena u sa bone lepolanka* le ka leihlong la hao?+ 4 Kapa ke joang u ka reng ho ngoan’eno: ‘E-re ke ntše lehlokoana ka leihlong la hao’ empa uena u e-na le lepolanka ka leihlong? 5 Uena moikaketsi, ntša lepolanka le ka leihlong la hao pele, u tsebe ho bona hantle hore na u ka ntša lehlokoana le ka leihlong la ngoan’eno joang.

6 Le se ke la fa lintja lintho tse halalelang kapa la lahlela liperela tsa lona ka pel’a likolobe+ e le hore le ka mohla li se ke tsa hatakela liperela ka maoto eaba lia le hlasela.

7 Le ’ne le kope, le tla fuoa.+ Le ’ne le batle, le tla fumana. Hape le ’ne le kokote, le tla buleloa.+ 8 Mang kapa mang ea kopang oa fuoa,+ ea batlang oa fumana le ea kokotang oa buleloa. 9 Ke mang har’a lona eo e ka reng ha mora oa hae a mo kopa bohobe eaba o mo fa lejoe? 10 Kapa ha a mo kopa tlhapi ebe o mo fa noha? 11 Ka hona, haeba lona le hoja le le baetsalibe le tseba ho fa bana ba lona limpho, le tsebe hore joang kapa joang le Ntate oa lona ea maholimong o tla fana ka lintho tse molemo+ ho ba mo kopang.+

12 Ka hona, lintho tsohle tseo le batlang hore batho ba le etse tsona, le lona le ba etse tsona.+ Ha e le hantle, ena ke ntho e boleloang ke Molao le Baprofeta.+

13 Kenang ka keiti e nyenyane*+ hobane keiti e isang timelong e kholo le tsela e lebisang teng e sephara ’me ba kenang ka eona ba bangata. 14 Athe keiti e isang bophelong e nyenyane* le tsela e isang teng e patisane ’me ke ba seng bakae ba e fumanang.+

15 Hlokomelang baprofeta ba bohata+ ba tlang ho lona ba ikhakantse eka ke linku+ empa ka hare e le liphiri tse harolang.+ 16 Le tla ba tseba ka liketso* tsa bona. Na ho na le mohla batho ba khang morara meutloeng kapa lifeie* hlabahlabaneng?+ 17 Ho hlakile hore sefate se seng le se seng se setle se hlahisa litholoana tse ntle empa sefate se seng le se seng se bolileng se hlahisa litholoana tse se nang thuso.+ 18 Sefate se setle se ke ke sa beha litholoana tse se nang thuso kapa sefate se bolileng sa hlahisa litholoana tse ntle.+ 19 Sefate se seng le se seng se sa hlahiseng litholoana tse ntle sea rengoa ebe se lahleloa mollong.+ 20 Ka hona, le tla tseba batho bao ka liketso tsa bona.+

21 Ha se e mong le e mong ea reng ho ’na: ‘Morena, Morena,’ ea tla kena ’Musong oa maholimo empa ho tla kena feela ea etsang thato ea Ntate ea maholimong.+ 22 Ho na le mohla ba bangata ba tla re ho ’na: ‘Morena, Morena,+ na ha rea ka ra profeta ka lebitso la hao, ra leleka bademona ka lebitso la hao, ra ba ra etsa mehlolo e mengata ka lebitso la hao?’+ 23 Leha ho le joalo, ka nako eo ke tla re ho bona: ‘Ha kea ka ka le tseba le ka mohla. Tlohang ho ’na, lona ba tlolang molao.’+

24 Ka hona, e mong le e mong ea utloang mantsoe ana a ka ’me a a phetha, o tla tšoana le monna ea bohlale ea ileng a haha ntlo ea hae holim’a letlapa.+ 25 Pula ea tšoloha, meroallo ea tla le meea ea foka eaba e otla ntlo eo empa ha ea ka ea oa hobane e ne e thehiloe holim’a letlapa. 26 Ho feta moo, e mong le e mong ea utloang mantsoe ana a ka empa a sa a phethe, o tla tšoana le monna oa sethoto ea ileng a haha ntlo ea hae lehlabatheng.+ 27 Pula ea tšoloha, meroallo ea tla le meea ea foka eaba e otla ntlo eo ’me ea oa,+ ea putlama hampe.”

28 Ha Jesu a qeta ho bua mantsoe ana, batho ba ne ba tsota tsela eo a rutang ka eona+ 29 kaha ha a ba ruta, ho ne ho utloahala hore o fuoe matla a bolaoli ke Molimo.+ O ne a sa ba rute joaloka bangoli ba bona.

8 Ka mor’a hore Jesu a theohe thabeng, batho ba bangata ba mo latela. 2 Monna ea nang le lepera a tla ’me a mo khumamela a re: “Morena, haeba feela u batla, u ka ntlhoekisa.”+ 3 Jesu a otlolla letsoho a mo tšoara eaba o re: “Kea batla, hloeka.”+ Lepera la hae la fola hang-hang.+ 4 Jesu a re ho eena: “U etse bonnete ba hore ha u bolelle mang kapa mang+ empa u ee ho moprista a u bone.+ U nyehele mpho eo Molao oa Moshe o laetseng hore e nyeheloe+ hore e be bopaki ho baprista.”

5 Ha a kena Kapernauma, molaoli oa sesole a tla ho eena, a mo kopa+ 6 a re: “Mohlomphehi, mohlanka oa ka o robetse ka tlung ea ka, o shoele litho, o kula hampe.” 7 Jesu a re ho eena: “Ha ke fihla moo ke tla mo folisa.” 8 Molaoli oa sesole a re: “Mohlomphehi, ha ke tšoaneloe ke hore u kene ka tlung ea ka. Bua feela, mohlanka oa ka o tla fola. 9 Etsoe le ’na kea laoloa empa ke na le masole ao ke a laolang. Ha ke re ho lesole lena: ‘Tsamaea,’ lea tsamaea. Ha ke re ho le leng: ‘Tloo,’ lea tla. Leha ke re ho lekhoba la ka: ‘Etsa tjena,’ le etsa joalo.” 10 Ha Jesu a mo utloa, a makala ’me a re ho ba mo setseng morao: “Kannete kea le bolella, ha ho na motho eo ke fumaneng a e-na le tumelo e matla hakana Iseraele.+ 11 Empa kea le bolella hore ba bangata ba tsoang bochabela le bophirimela ba tla tla ’me ba lule tafoleng le Abrahama, Isaka le Jakobo ’Musong oa maholimo.+ 12 Athe bara ba ’Muso oa maholimo ba tla lahleloa lefifing ka ntle. Ke hona moo ba tla lla le ho tsikitlanya meno teng.”+ 13 Eaba Jesu o re ho molaoli eo oa sesole: “Tsamaea. Kaha u bontšitse hore u na le tumelo, ho ke ho etsahale feela joalokaha u kopile.”+ Mohlanka eo a fola ka eona nako eo.+

14 Ha Jesu a kena ka tlung ea Petrose, a fumana mohoehali oa Petrose*+ a robetse a tšoeroe ke feberu.+ 15 Kahoo, Jesu a tšoara letsoho la hae+ eaba oa fola. Mohoehali oa Petrose a ema eaba o ba etsetsa lijo. 16 Empa ha e e-ba mantsiboea, batho ba mo tlisetsa batho ba bangata ba nang le bademona. A leleka bademona bao ka ho ba laela feela ’me a phekola bohle ba neng ba kula 17 e le hore a phethahatse mantsoe a ileng a buuoa ka moprofeta Esaia ha a re: “O ile a jara maloetse a rona, a jara le mafu a rona.”+

18 Ha Jesu a bona letšoele le mo potolohile, a laela barutuoa ba hae hore ba tšelele ka lehlakoreng le leng la Leoatle la Galilea.+ 19 Mongoli e mong a tla ho Jesu eaba o re ho eena: “Mosuoe, ke tla u latela kae kapa kae moo u eang teng.”+ 20 Empa Jesu a re ho eena: “Liphokojoe li na le moo li lulang* le linonyana li na le lihlaha empa Mor’a motho eena ha a na ntlo.”*+ 21 Eaba e mong oa barutuoa o re ho eena: “Morena, ke kopa ho e’o pata Ntate pele.”+ 22 Jesu a re ho eena: “U ’ne u ntatele, u tlohele bafu ba pate bafu ba bona.”+

23 A palama sekepe eaba barutuoa ba hae baa mo latela.+ 24 Ha ba le leoatleng, ha tsoha sefefo se matla hoo sekepe se neng se koaheloa ke maqhubu. Empa Jesu eena o ne a robetse.+ 25 Eaba baa tla ’me baa mo tsosa ba re: “Morena, re thuse rea shoa!” 26 Empa a re ho bona: “Ke hobane’ng ha le tšohile* hakaale? Tumelo ea lona e fokola hakaakang!”+ Eaba oa ema o khalemela sefefo le leoatle ka matla ’me ha thola tu!+ 27 Kahoo, banna bao ba makala ba re: “Motho eo ke oa mofuta ofe? Esita le lifefo le leoatle lia mo mamela.”

28 Ha a fihla lehlakoreng le leng naheng ea Bagadara, banna ba babeli ba nang le bademona ba ea ho eena ba hlaha mabitleng.+ Ba ne ba le bohale bo tšosang. Kahoo, ho ne ho se na motho ea sebete sa ho feta ka tsela eo. 29 Ba hoeletsa ba re: “Hantle u re batla’ng Mor’a Molimo?+ Na u tlile moo ho tla re hlokofatsa+ e e-s’o be nako ea teng?”+ 30 Hojana le bona ho ne ho ntse ho fula likolobe tse ngata.+ 31 Kahoo, bademona ba mo kopa ba re: “Haeba u re leleka, u mpe u re romele likolobeng.”+ 32 A re ho bona: “Tsamaeang!” Ba tsoa eaba ba kena likolobeng. Likolobe tseo kaofela tsa mathela selomong tsa oela ka leoatleng eaba li shoella ka metsing. 33 Balisana ba balehela motseng, ba tlaleha ntho e ’ngoe le e ’ngoe, ho akareletsa le taba ea banna ba nang le bademona. 34 Eaba batho bohle ba motse baa tsoa ho tla kopana le Jesu, ha ba mo bona ba mo kopa hore a tsamaee.+

9 Jesu a palama sekepe a tšelela motseng oa habo.+ 2 Batho ba mo tlisetsa monna ea shoeleng litho a robetse holim’a lempara. Ha Jesu a bona kamoo ba nang le tumelo kateng, a re ho motho ea shoeleng litho: “Ngoan’eso,* u se ke oa tšoenyeha. U tšoaretsoe libe.”+ 3 Bangoli ba bang ba buela ka pelong ba re: “Motho enoa o rohaka Molimo.” 4 Kaha Jesu o ne a tseba hore na ba nahana’ng, a re ho bona: “Ke hobane’ng ha le nahana lintho tse fosahetseng joalo?+ 5 Ke hofe ho bonolo? Na ke ho re: ‘U tšoaretsoe libe’ kapa ho re: ‘Ema u tsamaee’?+ 6 Leha ho le joalo, e le hore le tsebe hore Mor’a motho o na le matla a ho tšoarela libe lefatšeng . . . ” A sheba ka ho motho ea shoeleng litho eaba o re: “Ema, u nke lempara la hao u ee hae.”+ 7 Eaba oa ema o ea hae. 8 Ha sechaba se bona ntho e etsahetseng sa tšoha haholo. Kahoo, sa tlotlisa Molimo ea fileng batho matla a makaalo.

9 Ka mor’a moo, ha Jesu a fetela pele a bona monna ea bitsoang Matheu a lutse ofising ea lekhetho. A re ho eena: “E-ba molateli oa ka.” A ema a mo latela.+ 10 Hamorao, ha a ntse a lutse tafoleng ka tlung, babokelli ba lekhetho le baetsalibe ba bangata ba tla ’me ba lula tafoleng le Jesu le barutuoa ba hae.+ 11 Ha Bafarisi ba mo bona ba re ho barutuoa ba hae: “Ke hobane’ng ha mosuoe oa lona a ja le babokelli ba lekhetho le baetsalibe?”+ 12 Ha a ba utloa a re: “Batho ba phetseng hantle ha ba hloke ngaka empa ba kulang baa e hloka.+ 13 Joale e-eang ’me le ithute hore na mantsoe ana a bolela’ng: ‘Ke batla mohau eseng sehlabelo.’+ Ke tletse ho bitsa baetsalibe eseng batho ba lokileng.”

14 Barutuoa ba Johanne ba tla ho eena ba re: “Ke hobane’ng ha barutuoa ba hao ba sa itime lijo empa rona le Bafarisi re tloaetse ho itima lijo?”+ 15 Jesu a re ho bona: “Na metsoalle ea monyali e na le lebaka la ho utloa bohloko ha monyali+ a ntse a e-na le eona? Empa ho na le nako eo monyali a tla tlosoa ho metsoalle ea hae,+ joale ke hona e tla itima lijo. 16 Ha ho motho ea ka rokellang lesela le lecha leseleng la khale hobane le lecha le tla rutla la khale ebe la khale le taboha le ho feta.+ 17 Ebile ha ho motho ea ka tšelang veine e ncha ka makukeng* a khale a veine. Haeba a etsa joalo, makuka a veine a tla phatloha, veine e qhalane ebe makuka ao aa senyeha. Empa motho o tšela veine e ncha ka makukeng a veine a macha ’me ka bobeli lia bolokeha.”

18 Ha Jesu a ntse a ba bolella litaba tsena, ha fihla ’musi e mong eaba oa mo khumamela o re: “E tlameha ebe morali oa ka o shoele empa ha u ka tla eaba u beha letsoho holim’a hae, o tla phela.”+

19 Jesu a ema, a tsamaea le barutuoa ba hae ’me ba sala ’musi eo morao. 20 Mosali e mong ea neng a e-na le bothata ba phallo ea mali ka lilemo tse 12+ a tla ka morao ’me a tšoara litjobo tsa seaparo sa Jesu+ 21 kaha o ne a ntse a re ka pelong: “Haeba feela nka tšoara seaparo sa hae ke tla fola.” 22 Jesu a hetla a mo bona eaba o re ho eena: “Ngoan’eso,* u se ke oa tšoenyeha. Tumelo ea hao e u folisitse.”+ Eaba mosali eo o fola hang-hang.+

23 Ha Jesu a fihla ntlong ea ’musi eo, a bona batho ba letsa makolilo le ba bang ba bangata ba ntse ba bokolla+ 24 eaba o re: “Tsamaeang hobane ngoanana enoa ha aa shoa empa o robetse.”+ Eaba baa mo tšeha. 25 Hang ha batho ba se ba le ka ntle, a kena a mo tšoara ka letsoho+ eaba ngoanana eo oa ema.+ 26 Taba eo ea tsebahala libakeng tsohle tse haufi le moo.

27 Eare ha Jesu a tloha moo, banna ba babeli ba sa boneng+ ba mo sala morao ba hoeletsa ba re: “Mora oa Davida, re hauhele.” 28 Ka mor’a hore a kene ka tlung, banna bao ba sa boneng ba tla ho eena eaba Jesu o re ho bona: “Na lea lumela hore nka le folisa?”+ Ba re: “E, Morena.” 29 Joale a thetsa mahlo a bona+ a re: “Mahlo a lona a tla bona hobane le na le tumelo.” 30 Eaba baa bona. Jesu a ba laela ka thata a re: “Etsang bonnete ba hore ho se ke ha e-ba le ea mong ea tsebang ka taba ena.”+ 31 Empa ka mor’a hore ba tsoele ka ntle, ba mo phatlalatsa libakeng tsohle tse haufi le moo.

32 Ha banna bao ba tloha, batho ba mo tlisetsa monna ea sa khoneng ho bua ea nang le modemona.+ 33 Monna eo a qala ho bua ka mor’a hore Jesu a leleke modemona ea neng a le ho eena.+ Joale letšoele la makala la re: “Haesale ha re e-s’o bone ntho e tjena Iseraele.”+ 34 Empa Bafarisi ba ne ba re: “O leleka bademona ka ’musi oa bademona.”+

35 Jesu a qala ho etela metse le metsana eohle, a ruta ka matlung a thapelo,* a bolella batho litaba tse monate tsa ’Muso a bile a phekola mafu a mefuta eohle.+ 36 Ha a bona batho, a ba hauhela+ hobane ba ne ba sotlehile ebile ba qhalakane joaloka linku tse se nang molisa.+ 37 Eaba o re ho barutuoa ba hae: “Kannete kotulo e kholo empa basebetsi baa fokola.+ 38 Ka hona, le kope Mong’a kotulo hore a romele basebetsi kotulong ea hae.”+

10 Jesu a bitsa barutuoa ba hae ba 12 ’me a ba fa matla a ho leleka bademona+ le ho phekola mafu a mefuta eohle.

2 Mabitso a baapostola ba 12 ke+ Simone, ea bitsoang Petrose+ le Andrease+ ngoan’abo, Jakobo mora oa Zebedea le Johanne+ ngoan’abo, 3 Filipi, Bartholome,+ Thomase,+ Matheu+ ’mokelli oa lekhetho, Jakobo mora oa Alfiase, Thadiase, 4 Simone oa Mokanana* le Judase Iskariota, eo hamorao a ileng a rekisa* Jesu.+

5 Jesu o ile a roma baapostola bana ba 12, a ba fa litaelo tsena:+ “Le se ke la ea ho batho ba lichaba kapa la kena motseng ofe kapa ofe oa Basamaria+ 6 empa le ’ne le ee linkung tse lahlehileng tsa ntlo ea Iseraele.+ 7 Ha le ntse le tsamaea, le phatlalatse le re: ‘’Muso oa maholimo o atametse.’+ 8 Phekolang bakuli,+ le tsose bafu, le folise balepera, le leleke bademona. Le fuoe mahala, le lona fanang mahala. 9 Le se ke la nka khauta, silevera kapa koporo ka lipacheng tsa lona.+ 10 Le se ke la nka mokotla oa lijo, seaparo sa bobeli,* lieta* kapa lere+ bakeng sa leeto kaha motho ea sebetsang o tšoanela ho fuoa lijo.+

11 Ha le fihla motseng kapa motsaneng ofe kapa ofe, le batle hore na ke mang ho oona ea ka le amohelang, le lule moo ho fihlela le tloha.+ 12 Ha le kena ka tlung, le lumelise. 13 Haeba ba le amohela, khotso eo le ba lakaletsang eona e ke e be ho bona.+ Empa haeba ba sa le amohele, khotso e tsoang ho lona e ke e khutlele ho lona. 14 Haeba mang kapa mang a sa le amohele kapa a sa le mamele ntlong kapa motseng, ha le tsoa moo le hlohlore lerole maotong a lona.+ 15 Kannete ke re ho lona, ka Letsatsi la Kahlolo, kotlo ea Sodoma le Gomora+ e tla ba bobebe ho feta ea motse oo.

16 Ke le romela le le joaloka linku har’a liphiri. Ka hona le be seli joaloka linoha empa le hloke molato joaloka maeba.+ 17 Le be hlokolosi hobane batho ba tla le isa makhotleng a libaka+ ’me ba tla le shapela+ ka matlung a bona a thapelo.*+ 18 Hape le tla isoa ka pel’a babusisi le marena+ ka lebaka la ka e le hore le bolelle bona le lichaba ka tumelo ea lona.+ 19 Leha ho le joalo, ha ba le isa le se ke la tšoenyeha ka hore na le tla re’ng kapa le tla bua joang. Le tla tseba ka nako eo hore na le re’ng.+ 20 Le ke ke la bua ka bolona empa moea oa Ntate oa lona o tla le thusa ho bua.+ 21 Motho o tla fana ka ngoan’abo hore a bolaoe, le ntate a fane ka ngoana oa hae hore a bolaoe. Bana le bona ba tla tsohela batsoali matla ba be ba etse hore ba bolaoe.+ 22 Batho bohle ba tla le hloea ka lebaka la lebitso la ka+ empa ea mameletseng ho fihlela qetellong ke eena ea tla pholoha.+ 23 Ha ba le hlorisa motseng o mong, le balehele ho o mong+ hobane kannete kea le bolella, Mor’a motho o tla fihla pele le qeta mosebetsi oa ho bolela metseng le metsaneng ea Iseraele.

24 Moithuti ha a phahamela mosuoe oa hae le lekhoba ha lea phahamela mong’a lona.+ 25 Moithuti o tla tšoaroa ka tsela eo mosuoe oa hae a tšoaroang ka eona* le lekhoba le tla tšoaroa joaloka mong’a lona.+ Haeba batho ba bitsitse mong’a ntlo Beelzebube,*+ ba tla bitsa ba ntlo ea hae joalo. 26 Ka hona, le se ke la ba tšaba kaha lintho tsohle tse koahetsoeng li tla koaholloa, le liphiri tsohle li tla senoloa.+ 27 Lintho tseo ke le boleletseng tsona lefifing, le li bue leseling, tseo ke le sebetseng tsona le li bolele le le holim’a matlo.+ 28 Le se ke la tšaba ba ka le bolaeang empa ba ke ke ba le sitisa ho phela hape.*+ Ho e-na le hoo, le tšabe ea ka le felisang Gehena.*+ 29 Le hoja lirobele tse peli li rekisoa ka chelete ea tšepe,* ha ho le se le seng sa tsona se tla oela fatše Ntate oa lona a sa tsebe.+ 30 Ha e le lona, o tseba palo ea moriri o lihloohong tsa lona. 31 Ka hona, le se ke la tšoha, le bohlokoa ho feta lirobele tse ngata.+

32 E mong le e mong ea buang phatlalatsa hore ke morutuoa oa ka,+ le ’na ke tla bua ka pel’a Ntate ea maholimong hore ke morutuoa oa ka.+ 33 Empa mang kapa mang ea ntatolang ka pel’a batho, le ’na ke tla mo latola ka pel’a Ntate ea maholimong.+ 34 Le se ke be la nahana hore ke tlisitse khotso lefatšeng. Ha kea tlisa khotso empa ke tlisitse sabole.+ 35 Ke tletse ho baka karohano: Mora o tla loantša ntate, morali a loantše ’mè le ngoetsi e loantše matsale.+ 36 Motho o tla hlouoa ke ba lelapa la hae. 37 Mang kapa mang ea ratang ntate kapa ’mè ho mpheta le ea ratang mora kapa morali ho mpheta, ha a tšoaneloe ke ho ba morutuoa oa ka.+ 38 Mang kapa mang ea sa ikemisetsang ho mamella mahloriso* le ho ntšala morao ha a tšoaneloe ke ho ba morutuoa oa ka.+ 39 Mang kapa mang ea lekang ho sireletsa bophelo ba hae, o tla felloa ke bona. Empa mang kapa mang ea shoang hobane e le molateli oa ka, o tla phela hape.+

40 Mang kapa mang ea le amohelang oa nkamohela le ’na hape mang kapa mang ea nkamohelang o amohela le ea nthomileng.+ 41 Mang kapa mang ea amohelang moprofeta hobane e le moprofeta, o tla fumana moputso oa moprofeta.+ Mang kapa mang ea amohelang motho ea lokileng hobane e le motho ea lokileng, o tla fumana moputso oa motho ea lokileng. 42 Mang kapa mang ea fang e mong oa ba banyenyane bana kopi feela ea metsi a batang hore a noe hobane e le morutuoa, kannete kea le bolella, joang kapa joang o tla fumana moputso.”+

11 Ha Jesu a qeta ho fa barutuoa ba hae ba 12 litaelo, a tloha moo hore a e’o ruta le ho bolela metseng e meng.+

2 Empa kaha Johanne o ne a utloetse ka mesebetsi ea Kreste a le teronkong,+ a roma barutuoa ba hae ho eena+ 3 hore ba mo botse potso ena: “Na ke uena Ea Tlang kapa re lebelle e mong?”+ 4 Jesu a ba araba a re: “Tsamaeang le bolelle Johanne hore na le utloa’ng le hore na le bona’ng:+ 5 Hona joale ba foufetseng baa bona,+ ba holofetseng baa tsamaea, balepera+ ba ntse ba folisoa, ba sa utloeng litsebeng baa utloa le bafu ba ntse ba tsosoa, bafutsana bona ba bolelloa litaba tse monate.+ 6 Ho thaba motho ea ntšepang a sa belaele.”*+

7 Ha barutuoa ba Johanne ba ntse ba le tseleng, Jesu a re ho matšoele ka Johanne: “Monna eo le mo boneng lefeelleng ke mang?+ Na ke motho ea kang lehlaka le ntseng le tsukutloa ke moea?+ 8 Le bone mang? Na le bone monna ea apereng liaparo tse turu? Batho ba apereng liaparo tse turu ba matlong a marena. 9 Joale ha e le hantle, e ne e le mang? Na e ne e le moprofeta? E, e ne e le moprofeta a bile a le bohlokoa haholo ho feta baprofeta.+ 10 Enoa ke eo ho ngotsoeng tjena ka eena: ‘Ke romela moromuoa oa ka pele ho uena* ea tla lokisa tsela ea hao ka pel’a hao.’+ 11 Kannete ke re ho lona, har’a bohle ba kileng ba phela, ha ho e-s’o hlahe mang kapa mang e moholo ho Johanne Mokolobetsi empa motho e monyenyane ’Musong oa maholimo o moholo ho eena.+ 12 Ho tloha mehleng ea Johanne Mokolobetsi ho tla fihlela joale, batho ba sebeletsa ho kena ’Musong oa maholimo ’me ba sebetsang ka thata baa o fumana.+ 13 Etsoe bohle e leng Baprofeta le Molao, ba ile ba profeta ho fihlela Johanne a fihla.+ 14 Ebang lea kholoa kapa ha le kholoe, ke eena ‘Elia ea tlang.’+ 15 Ea nang le litsebe a ke a utloe.

16 Moloko oo ke tla o bapisa le mang?+ O joaloka bana ba banyenyane ba lutseng limmarakeng ba ntseng ba buisana le metsoalle ea bona 17 ba re: ‘Re ile ra le letsetsa lekolilo eaba ha le tantše, ra lla eaba ha le utloe bohloko.’ 18 Ka tsela e tšoanang, Johanne o tlile a sa je, a sa noe empa batho ba re: ‘O na le modemona.’ 19 Mor’a motho eena o tlile a ja, a noa+ empa batho ba re: ‘Bonang motho enoa ea jang ho feta tekano le ea ipolaisang veine. Ke motsoalle oa babokelli ba lekhetho le baetsalibe.’+ Leha ho le joalo, lintho tse lokileng tseo motho a li etsang li bontša hore o bohlale.”+

20 Jesu a qala ho khalemela baahi ba metse eo a entseng mehlolo* ho eona hobane ha baa ka ba baka. A re: 21 “Ho malimabe lona baahi ba Korazine le Bethsaida. Hoja mehlolo e etsahetseng metseng ea lona e etsahetse Tire le Sidone, e ka be e le khale baahi ba teng ba bakile, ba apere lesela le hoashang* le ho lula moloreng.+ 22 Empa ke re ho lona, ka Letsatsi la Kahlolo, kotlo ea baahi ba Tire le Sidone e tla ba bobebe ho feta ea lona.+ 23 Le lona baahi ba Kapernauma,+ na Molimo o tla le phahamisetsa leholimong? Ho hang. O tla le theolela Lebitleng*+ hobane hoja baahi ba Sodoma ba ile ba bona mehlolo* eo le e boneng motseng oa lona, motse oa bona o ka be o ntse o le teng ho fihlela letsatsing lona lena. 24 Empa ke re ho lona, ka Letsatsi la Kahlolo, kotlo ea baahi ba Sodoma e tla ba bobebe ho feta ea lona.”+

25 Ka nako eo, Jesu a re: “Ke u rorisa phatlalatsa, Ntate, Morena oa leholimo le lefatše hobane u patetse ba bohlale le ba nang le kelello lintho tsena empa u li senoletse bana ba banyenyane.+ 26 E, Ntate hobane ke thato ea hao hore ho be joalo. 27 Ntate ke eena ea mphileng lintho tsohle. Ha ho na motho ea ntsebang* hantle haese Ntate+ ebile ha ho na motho ea tsebang Ntate+ hantle haese ’na le mang kapa mang eo ke ratang ho mo ruta ka Ntate.+ 28 Tloong ho ’na, lona bohle ba sehlang le ba imetsoeng, ke tla le khatholla. 29 Jarang joko ea ka le ithute ho ’na hobane ke bonolo ebile ke ikokobelitse+ ’me le tla khatholoha. 30 Etsoe joko ea ka ha e boima le mojaro oa ka o bobebe.”

12 Ka letsatsi le leng ha Jesu a ntse a tsamaea har’a masimo a koro* ka Sabatha, barutuoa ba hae ba lapa eaba ba kha koro baa ja.+ 2 Ha Bafarisi ba ba bona ba re ho eena: “Bona, barutuoa ba hao ba etsa ntho eo ba sa lokelang ho e etsa ka Sabatha.”+ 3 Jesu a re ho bona: “Na ha lea ka la bala hore na Davida o ile a etsa’ng ha eena le banna ba neng ba e-na le eena ba lapile?+ 4 Hore o ile a kena ka tlung ea Molimo eaba ba ja bohobe bo halalelang*+ boo eena le banna ba neng ba e-na le eena ba neng ba sa lumelloa ho bo ja, bo jeoang ke baprista feela?+ 5 Kapa na ha lea bala Molaong hore ka Lisabatha, baprista baa sebetsa tempeleng empa ha ba molato oa ho tlola molao oa Sabatha?+ 6 Empa kea le bolella hore ea teng mona o bohlokoa ho feta tempele.+ 7 Joale hoja le ne le utloisisa hore na ho boleloa’ng ha ho thoe: ‘Ke batla mohau+ eseng sehlabelo,’+ le ka be le sa ahlola ba se nang molato. 8 Mor’a motho ke Morena oa Sabatha.”+

9 Ha Jesu a tloha moo, a kena ntlong ea bona ea thapelo.* 10 Ho ne ho e-na le monna ea omeletseng* letsoho moo.+ Kaha Bafarisi ba ne ba batla ho qosa Jesu, ba re ho eena: “Na molao o lumella motho ho folisa ka Sabatha?”+ 11 A re ho bona: “Haeba e mong oa lona a e-na le nku e le ’ngoe ebe e oela ka sekoting ka Sabatha, na a ka e tlohela ebe ha a e ntše?+ 12 Motho eena o bohlokoa haholo ho feta nku. Kahoo, molao o lumella motho ho etsa ntho e ntle ka Sabatha.” 13 Joale a re ho monna eo: “Otlolla letsoho la hao.” A le otlolla, la fola eaba le tšoana le le leng. 14 Empa Bafarisi ba tsoa ’me ba rera ho bolaea Jesu. 15 Ha Jesu a tseba ka taba ena a tloha moo. Batho ba bangata ba mo sala morao+ eaba o ba phekola kaofela. 16 Eaba o ba laela ka thata hore ba se ke ba bolella batho ka eena+ 17 e le hore ho ka phethahala mantsoe a ileng a buuoa ka moprofeta Esaia ea ileng a re:

18 “Bonang! Mohlanka oa ka+ eo ke mo khethileng, moratuoa oa ka, ea nthabisang.+ Ke tla mo fa moea oa ka+ ’me o tla bontša lichaba hore na toka ke eng. 19 A ke ke a pheha khang+ kapa a hoeletsa hape a ke ke a buela holimo literateng tse kholo. 20 A ke ke a roba lehlaka le tletleraneng kapa a tima khoele ea lebone le haufi le ho tima+ ho fihlela a tlisa toka. 21 Ruri lichaba li tla tšepela ho eena.”*+

22 Joale ba mo tlisetsa monna ea nang le modemona, a sa bone a bile a sa tsebe ho bua. Jesu a phekola monna eo eaba o khona ho bua le ho bona. 23 Batho bohle ba hlolloa ’me ba re: “Na ebe eo ha se eena Mora oa Davida?” 24 Ha Bafarisi ba utloa ba re: “Motho enoa o leleka bademona ka Beelzebube* ’musi oa bademona.”+ 25 Ka ho tseba menahano ea bona, a re ho bona: “’Muso o mong le o mong o arohaneng oa oa, le motse o mong le o mong kapa lelapa* le arohaneng le ke ke la tšoarella. 26 Ka tsela e tšoanang, haeba Satane a leleka Satane, oa itoantša. Joale ’muso oa hae o tla ema joang? 27 Hape, haeba ’na ke leleka bademona ka Beelzebube, bara ba lona ba ba leleka ka mang? Ke ka lebaka lena ba tla le ahlola. 28 Empa haeba ke leleka bademona ka moea oa Molimo, ’Muso oa Molimo o se o fihlile empa ha le e-s’o o bone.+ 29 Motho a ka futuhela ntlo ea monna ea matla a ba a nka thepa ea hae joang ntle le hore a mo fase pele? Ka mor’a moo, ke hona a ka utsoang thepa e ka tlung ea hae. 30 Mang kapa mang ea seng ka lehlakoreng la ka o khahlanong le ’na ’me mang kapa mang ea sa bokelleng le ’na oa hasanya.+

31 Ka lebaka lena ke re ho lona, batho ba tla tšoareloa sebe sa mofuta o mong le o mong le ho nyefola empa ea rohakang moea oa Molimo a ke ke a tšoareloa.+ 32 Mohlala, mang kapa mang ea nyefolang Mor’a motho, o tla tšoareloa.+ Empa mang kapa mang ea rohakang moea o halalelang, a ke ke a tšoareloa, eseng mehleng ena* kapa e tlang.+

33 Haeba u le sefate se setle, litholoana tsa hao li tla ba monate empa haeba u le sefate se sebe, litholoana tsa hao li tla ba mpe hobane sefate se tsejoa ka litholoana tsa sona.+ 34 Malinyane a marabe,+ le ka bua lintho tse lokileng joang empa le le khopo? Motho o bua ntho e tletseng ka pelong ea hae.*+ 35 Motho ea lokileng o bua lintho tse ntle hobane ho tletse tsona ka pelong ea hae empa motho ea khopo o bua lintho tse mpe hobane ho tletse tsona ka pelong ea hae.+ 36 Kea le bolella hore ka Letsatsi la Kahlolo batho ba tla ikarabella+ bakeng sa ntho e ’ngoe le e ’ngoe e se nang thuso eo ba e buang. 37 Haeba u bua lintho tse ntle, Molimo o tla u nka u lokile empa haeba u bua lintho tse mpe o tla u nka u le molato.”

38 Bangoli ba bang le Bafarisi ba mo araba ba re: “Mosuoe, etsa mohlolo re tsebe ho bona hore ehlile u ronngoe ke Molimo.”+ 39 A re ho bona: “Batho ba khopo le ba sa tšepahaleng* ba moloko ona ba ntse ba batla mohlolo empa ha ho mohlolo oo ba tla o bona haese mohlolo o etsahaletseng moprofeta Jonase.+ 40 Feela joalokaha Jonase a ile a ba ka mpeng ea tlhapi ea tonanahali ka matsatsi a mararo le masiu a mararo,+ Mor’a motho le eena o tla ba ka mpeng ea lefatše ka matsatsi a mararo le masiu a mararo.+ 41 Ka letsatsi la kahlolo, batho ba Ninive ba tla tsoha bafung le ba moloko ona ’me batho ba Ninive ba tla ba ahlola hobane ba ile ba baka ha ba utloa molaetsa oa Jonase.+ Empa ea teng mona o bohlokoa ho feta Jonase.+ 42 Mofumahali oa boroa o tla tsosoa bafung le batho ba moloko ona ka Letsatsi la Kahlolo ’me o tla ba ahlola hobane o ile a tla a tsoa sebakeng se hole haholo ho tla bona kamoo Solomone a leng bohlale kateng.+ Empa ea teng mona o bohlokoa ho feta Solomone.+

43 Ha modemona a tsoa ho motho, o feta libakeng tse omeletseng a ntse a batla sebaka sa phomolo. Ha a sa se fumane+ 44 o re: ‘Ke tla khutlela ntlong ea ka eo ke ileng ka tsoa ho eona.’ Ha a fihla o fumana ho se na motho ea lulang ntlong eo empa e fietsoe e bile e khabisitsoe. 45 Joale o lata bademona ba bang ba supileng ba khopo ho mo feta ebe o tsamaea le bona. Baa kena ebe ba lula moo ’me qetellong motho eo o ba mobe ho feta pele.+ Ho tla ba joalo le ka moloko ona o khopo.”

46 Ha Jesu a ntse a bua le letšoele, ’mè oa hae le bana babo+ ba ne ba eme ka ntle ba batla ho bua le eena.+ 47 Motho e mong a re ho eena: “’Mè oa hao le bana beno ba eme ka ntle ba batla ho bua le uena.” 48 A re ho motho eo: “’Mè ke mang hona bana beso ke bo-mang?” 49 A otlollela letsoho ho barutuoa ba hae a re: “’Mè le bana beso ke bana.+ 50 Mang kapa mang ea etsang thato ea Ntate ea leholimong ke eena ngoan’eso, khaitseli ea ka le ’mè oa ka.”+

13 Letsatsing leo, Jesu a tsoa ka tlung a e’o lula pel’a leoatle. 2 Letšoele le leholo la mo bokanela eaba o palama sekepe, a lula ka ho sona ha batho bao kaofela ba eme lebopong.+ 3 A ba ruta lintho tse ngata ka ho ba etsetsa lipapiso.+ A re: “Mojali o ile a tsoa ho ea jala.+ 4 Ha a ntse a jala, peo e ’ngoe ea oela haufi le tsela eaba linonyana lia e ja.+ 5 E ’ngoe ea oela lipakeng tsa majoe moo ho se nang mobu o mongata. Ea mela hang-hang hobane mobu o ne o sa teba.+ 6 Ha letsatsi le chaba ea cha eaba ea omella hobane e ne e se na metso. 7 E ’ngoe ea oela har’a meutloa eaba meutloa ea hola ea e bipetsa.+ 8 E ’ngoe eona ea oela mobung o motle ’me ea qala ho beha litholoana. Peo e ’ngoe ea beha tse 100, e ’ngoe tse 60, e ’ngoe tse 30.+ 9 Ea nang le litsebe a ke a utloe.”+

10 Barutuoa ba tla ho eena ba re: “Ke hobane’ng ha u bua le bona u sebelisa lipapiso?”+ 11 Ha a araba a re: “Le lumeletsoe ho utloisisa liphiri tse halalelang+ tsa ’Muso oa maholimo empa bona ha baa lumelloa. 12 Etsoe mang kapa mang ea nang le letho, o tla ekeletsoa a be le ho hongata. Empa mang kapa mang ea se nang letho, o tla amohuoa le seo a nang le sona.+ 13 Ke ka lebaka lena ke buang le bona ke sebelisa lipapiso hobane baa sheba empa ha ba bone, baa mamela empa ha ba utloe hape ha ba utloisise.+ 14 Ba phethahatsa boprofeta ba Esaia bo reng: ‘Ho utloa le tla utloa empa ho hang le ke ke la utloisisa. Ho sheba le tla sheba empa ho hang le ke ke la bona.+ 15 Batho bana ba lihlooho* li thata. Ka litsebe ba utloile empa ba se ke ba araba. Ba koetse mahlo ebile ba ithibile litsebe e le hore le ka mohla ba se ke ba bona le ho utloa. Ke kahoo ba sa utloisiseng* hore na ba lokela ho etsa’ng ebile ba sa khutleleng ho ’na e le hore nka ba folisa.’+

16 Empa lea thaba hobane le bona lintho tsena ebile lea li utloa.+ 17 Kannete ke re ho lona, baprofeta le banna ba bangata ba lokileng ba ile ba lakatsa ho bona lintho tseo le li bonang le ho utloa lintho tseo le li utloang+ empa ha baa ka ba li bona kapa ba li utloa.

18 Joale mamelang tlhaloso ea papiso ea monna ea ileng a jala.+ 19 Peo e jetsoeng haufi le tsela ke motho ea utloang molaetsa oa ’Muso empa a sa o utloisise ebe Diabolose*+ oa tla ’me o fothola se jetsoeng pelong ea hae.+ 20 Peo e jetsoeng lipakeng tsa majoe, ke motho ea utloang molaetsa ebe hang-hang o o amohela ka thabo.+ 21 Empa kaha molaetsa ha oa mela ka metso ka pelong ea hae, o o lumela ka nakoana ebe ha ho hlaha matšoenyeho kapa mahloriso ka lebaka la molaetsa oa ’Muso, hang-hang o khaotsa ho lumela molaetsa oo. 22 Peo e jetsoeng har’a meutloa, ke motho ea utloang lentsoe empa mathata a lefatše lena*+ le tabatabelo ea ho rua* li bipetsa lentsoe ebe ha le behe litholoana.+ 23 Peo e jetsoeng mobung o motle ke batho ba utloang lentsoe ’me ba le utloisisa, ba hlileng ba behang litholoana, e mong a hlahisa tse 100, e mong tse 60, e mong tse 30.”+

24 A ba etsetsa papiso e ’ngoe a re: “’Muso oa maholimo o ka tšoantšoa le motho ea ileng a jala peo e ntle tšimong ea hae. 25 Ha batho ba ntse ba robetse, sera sa hae sa tla, sa jalella mofoka har’a koro eaba sea tsamaea. 26 Ha lekhasi le hlaha ’me le beha, mofoka le oona oa bonahala. 27 Kahoo, makhoba a mong’a ntlo a ea ho eena eaba a re: ‘Monghali, na ha oa ka oa jala peo e ntle tšimong ea hao? Joale ho tla joang hore ebe e na le mofoka?’ 28 A re ho ’ona: ‘Sera sa ka ke sona se entseng joalo.’+ Makhoba a re ho eena: ‘Joale ha u batle hore re ee re o fothole?’ 29 A re: ‘Che, ke tšaba hore ha le ntse le fothola mofoka le tla tloha le o fotholella le koro. 30 Li tloheleng li hole ’moho ho fihlela ha ho kotuloa. Ka nako ea kotulo ke tla re ho bakotuli: “Qalang pele ka ho bokella mofoka, le o tlame mangata hore o chesoe ebe le bokella koro ka setorong sa ka.”’”+

31 A ba etsetsa papiso e ’ngoe a re: “’Muso oa maholimo o tšoana le peo ea mosetareta eo motho e mong a ileng a e lema tšimong ea hae.+ 32 Ha e le hantle, ke peo e nyenyane ka ho fetisisa har’a lipeo tsohle empa ha e holile ke eona e kholo ka ho fetisisa har’a meroho ’me e ba joaloka sefate seo linonyana li fumanang bolulo har’a makala a sona.”

33 A ba etsetsa papiso e ’ngoe a re: “’Muso oa maholimo o tšoana le tomoso eo mosali a ileng a e nka a e tsoaka le lijeke tse tharo tse kholo* tsa phofo ho fihlela hlama eo kaofela e betse.”+

34 Jesu o ile a bolella letšoele lintho tsena tsohle ka ho etsa lipapiso. O ne a sa bue le bona a sa etse papiso+ 35 e le hore ho ka phethahala se ileng sa buuoa ka moprofeta ea ileng a re: “Ke tla bua lipapiso ka molomo oa ka, ke phatlalatse lintho tse ileng tsa patoa ho tloha qalong.”*+

36 Ka mor’a ho bolella letšoele hore le tsamaee, a ea ka tlung. Barutuoa ba hae ba ea ho eena ba re: “Re hlalosetse papiso ea mofoka o tšimong.” 37 A re ho bona: “Motho ea jalang peo e ntle ke Mor’a motho, 38 tšimo ke lefatše,+ peo e ntle ke bana ba ’Muso, mofoka oona ke bana ba Diabolose,*+ 39 sera se ileng sa jala mofoka ke Diabolose. Kotulo ke nako ea bofelo ba lefatše* ’me bakotuli ke mangeloi. 40 Ka hona, joalokaha mofoka o bokelloa ’me o chesoa ka mollo, ho tla ba joalo ha bofelo ba lefatše* bo le haufi.+ 41 Mor’a motho o tla romela mangeloi a hae ’me a tla bokella lintho tsohle tse lihelang batho sebeng* le batho ba tloaetseng ho etsa tlolo ea molao, a ba tlose ’Musong oa hae. 42 A tla ba lahlela seboping sa mollo.+ Ke hona moo ba tla lla le ho tsikitlanya meno teng. 43 Ka nako eo, ba lokileng ba tla khanya joaloka letsatsi+ ’Musong oa Ntate oa bona. Ea nang le litsebe a ke a utloe.

44 ’Muso oa maholimo o tšoana le letlotlo le patiloeng tšimong, leo motho a ileng a le fumana eaba o le pata hape hona tšimong eo. Ka lebaka la ho thaba, o rekisa lintho tsohle tseo a nang le tsona ebe o reka tšimo eo.+

45 Hape ’Muso oa maholimo o tšoana le rakhoebo ea tsamaeang ea batlang liperela tse ntle. 46 Ha a fumana perela e le ’ngoe ea boleng bo phahameng, a tloha a rekisa lintho tsohle tseo a neng a e-na le tsona kapele eaba oa e reka.+

47 Hape ’Muso oa maholimo o tšoana le letlooa* le leholo le akheloang leoatleng ’me le bokella litlhapi tsa mefuta eohle. 48 Ha le tletse, batho ba le hulela lebopong ebe ba lula fatše. Ba tšela tse ntle+ ka lijaneng, tse mpe+ baa li lahla. 49 Ho tla ba joalo nakong eo bofelo ba lefatše* bo leng haufi. Mangeloi a tla tla ebe a arola ba sa lokang ho ba lokileng 50 ’me a tla lahlela ba sa lokang seboping sa mollo. Ke hona moo ba tla lla le ho tsikitlanya meno teng.

51 Na le utloisisitse lintho tsee tsohle?” Ba re ho eena: “E.” 52 Eaba o re ho bona: “Ha ho le joalo, morupeli e mong le e mong oa sechaba ea rutiloeng ka ’Muso oa maholimo o tšoana le mong’a ntlo ea ntšang lintho tse ncha le tsa khale letlotlong la hae.”

53 Ha Jesu a qeta ho etsa lipapiso tsena a tloha moo. 54 Ka mor’a hore a kene motseng oa habo,+ a ba ruta a le ka tlung ea bona ea thapelo* eaba batho baa hlolloa ba re: “Monna eo o fumane bohlale boo le matla a ho etsa mehlolo ee hokae?+ 55 Na eo ha se mora oa ’metli oa mapolanka?+ Na ’mè oa hae ha se Maria? Na bana babo ha se Jakobo, Josefa, Simone le Judase?+ 56 Na likhaitseli tsa hae kaofela ha li har’a rona moo? Joale o fumane lintho tsee tsohle hokae?”+ 57 Kahoo, ba hana ho lumela ho eena.+ Empa Jesu a re ho bona: “Moprofeta o hlomphuoa hohle ntle le ha habo le ka tlung ea hae.”+ 58 Ha aa ka a etsa mehlolo e mengata moo hobane ba ne ba se na tumelo.

14 Heroda,* ’musi oa setereke, a utloela ka Jesu.+ 2 Eaba o re ho bahlanka ba hae: “Enoa ke Johanne Mokolobetsi. O tsositsoe bafung, ke ka lebaka leo a nang le matla a ho etsa mehlolo ena.”+ 3 Heroda o ne a ile a tšoara Johanne a mo tlama ’me a mo koalla teronkong ka lebaka la Herodiase. Qalong Herodiase e ne e le mohats’a Filipi moholoane oa Heroda.+ 4 Johanne o ne a ee a re ho Heroda: “Molao ha o u lumelle hore u nyale mosali eo.”+ 5 Heroda o ne a batla ho bolaea Johanne le hoja a ne a tšaba batho hobane ba ne ba mo nka e le moprofeta.+ 6 Mohla ho ketekoang letsatsi la tsoalo ea Heroda,+ morali oa Herodiase a tantša ka pel’a bona eaba Heroda o thaba haholo+ 7 hoo a ileng a ikana hore o tla mo fa eng kapa eng eo a e kopang. 8 ’Mè oa hae a mo susumeletsa hore a re: “Mphe hlooho ea Johanne Mokolobetsi e behiloe holim’a sejana.”+ 9 Le hoja morena a ile a sareloa, kaha o ne a hlompha likano tsa hae a bile a hlompha le batho ba jang le eena, a laela hore e fanoe. 10 Kahoo, a roma lesole ’me la khaola Johanne hlooho a le teronkong. 11 Hlooho ea hae ea tlisoa e le holim’a sejana ’me ea fuoa moroetsana, eena a e isa ho ’mè oa hae. 12 Hamorao barutuoa ba Johanne ba tla ’me ba tlosa setopo sa hae, ba mo pata eaba ba ea ho Jesu baa mo tlalehela. 13 Ha Jesu a utloa litaba tsena a tloha moo ka sekepe a ea moo a leng mong. Empa ha batho ba utloa hore o tsamaile ba mo sala morao ka maoto ba tloha metseng ea bona.+

14 Ha a fihla lebopong, a bona batho ba bangata, a ba hauhela+ ’me a phekola ba kulang.+ 15 Empa ha letsatsi le likela barutuoa ba hae ba tla ho eena ba re: “Sebaka sena se hole haholo hape e se e le mantsiboea. E-re batho bana ba tsamaee e le hore ba ka kena metsaneng ba ithekela lijo.”+ 16 Leha ho le joalo, Jesu a re ho bona: “Ha ho hlokahale hore ba tsamaee. Lona ba feng lijo.” 17 Ba re ho eena: “Ha re na letho mona haese mahobe a mahlano le litlhapi tse peli.” 18 A re: “Li tliseng.” 19 Ka mor’a moo, a re batho ba lule holim’a joang.* Eaba o nka mahobe ao a mahlano le litlhapi tse peli, a sheba leholimong a kopa tlhohonolofatso.+ A qhetsola mahobe, a a fa barutuoa, barutuoa bona ba a fa batho. 20 Kahoo, bohle ba ja ba khora. Barutuoa ba nka bohobe bo setseng eaba bo tlala libaskete tse 12.+ 21 Ho ile ha ja batho ba ka bang 5 000 ho sa balelloe basali le bana.+ 22 Ntle ho tšenyo ea nako, a re barutuoa ba hae ba palame sekepe ’me ba mo etelle pele ho ea ka lehlakoreng le leng la leoatle ho fihlela batho ba tsamaile.+

23 Ka mor’a hore a re batho ba tsamaee, a nyolohela thabeng a le mong ho ea rapela.+ O ne a ntse a le mong moo ho fihlela mantsiboea. 24 Ka nako ena, sekepe se ne se le hole le lebopo ka limithara tse makholo-kholo,* barutuoa ba sokolisoa ke maqhubu hobane moea o ne o le matla haholo. 25 Empa ka meso* a tla ho bona a tsamaea holim’a leoatle. 26 Ha barutuoa ba mo bona a tsamaea holim’a leoatle ba hoeletsa ba tšohile ba re: “Ke’ng ntho e tlang le moo?”* 27 Hang-hang Jesu a re ho bona: “Le se ke la tšoha, ke ’na.”+ 28 Petrose a re ho eena: “Morena, haeba ke uena, e-re ke tle ho uena ke tsamaea holim’a metsi.” 29 Jesu a re: “Tloo!” Eaba Petrose o theoha sekepe o ea ho Jesu a tsamaea holim’a metsi. 30 Empa ha a bona sefefo, a tšoha eaba oa teba. A hoeletsa a re: “Morena, mpholose!” 31 Kapele-pele Jesu a otlolla letsoho a mo tšoara ’me a re ho eena: “Tumelo ea hao e fokola hakaakang! Ke hobane’ng ha u ile oa belaela?”+ 32 Ka mor’a hore ba kene ka sekepeng, sefefo sa kokobela. 33 Joale ba ka sekepeng ba mo khumamela* ba re: “Kannete u Mor’a Molimo.” 34 Ba tšelela mose sebakeng se bitsoang Genesarete.+

35 Ha banna ba sebaka seo ba mo hlokomela ba bolella batho ba libakeng tsohle tse haufi le moo. Batho ba mo tlisetsa bohle ba neng ba kula. 36 Ba qala ho mo kopa hore ba mpe ba tšoare litjobo tsa seaparo sa hae+ ’me bohle ba ileng ba li tšoara ba fola.

15 Bafarisi le bangoli ba tsoang Jerusalema ba tla ho Jesu+ ba re: 2 “Ke hobane’ng ha barutuoa ba hao ba sa hlomphe moetlo oa baholo-holo ba rona? Ha ba hlape matsoho* pele ba ja.”+

3 Ha a araba a re ho bona: “Ke hobane’ng ha lona le tlola melao ea Molimo ka lebaka la moetlo oa lona?+ 4 Molimo o ile a re: ‘Hlompha ntate oa hao le ’mè oa hao,’+ a boela a re: ‘Mang kapa mang ea rohakang* ntate oa hae kapa ’mè oa hae o lokela ho bolaoa.’+ 5 Empa lona le re: ‘Mang kapa mang ea reng ho ntate oa hae kapa ’mè oa hae: “Ntho e ’ngoe le e ’ngoe eo ke neng nka u thusa ka eona ke se ke e file Molimo e le mpho,”+ 6 ha ho hlokahale hore a hlomphe ntate oa hae ho hang.’ Kahoo, le entse lentsoe la Molimo ntho e se nang thuso ka lebaka la moetlo oa lona.+ 7 Baikaketsi! Esaia o profetile hantle ka lona ha a re:+ 8 ‘Batho bana ba ntlhompha ka melomo feela empa lipelo tsa bona li suthetse hole le ’na. 9 Ha ho na thuso ea hore ebe ba ntse ba nthapela hobane ba ruta litaelo tsa batho joalokaha eka ke lithuto tsa Molimo.’”+ 10 Eaba o bitsetsa batho haufi le eena ’me o re ho bona: “Mamelang le utloisise:+ 11 Motho ha a silafatsoe ke ntho eo a e jang empa o silafatsoa ke e tsoang molomong oa hae.”+

12 Barutuoa ba tla ho eena ba re: “Na oa tseba hore Bafarisi ba ile ba khopisoa ke lintho tseo u li buileng?”+ 13 A re: “Semela se seng le se seng seo Ntate oa ka ea leholimong a sa kang a se lema se tla fotholoa. 14 Ba tloheleng, ke batataisi ba foufetseng. Haeba batho ba babeli ba sa boneng ba tataisana, ka bobeli ba tla oela ka sekoting.”+ 15 Petrose a re: “Re hlakisetse papiso ena.” 16 Eaba Jesu o re: “Na le lona le ntse le sa utloisise?+ 17 Na ha le tsebe hore ntho e ’ngoe le e ’ngoe e jeoang e feta ka maleng ebe e ntšetsoa ka sekoting sa likhoere-khoere? 18 Leha ho le joalo, lintho tse tsoang molomong li tsoa pelong ’me lintho tseo li silafatsa motho.+ 19 Mohlala, pelong ho tsoa menahano e fosahetseng+ e etsang hore ho be le lipolao, bofebe, boitšoaro bo bobe bo amanang le thobalano,* bosholu, bopaki ba bohata le lithohako. 20 Motho o silafatsoa ke lintho tsena eseng ho ja lijo ka matsoho a sa hlatsuoang.”*

21 Ha Jesu a tloha moo, a ea libakeng tse haufi le Tire le Sidone.+ 22 Mosali e mong oa Mofoenisia ea tsoang libakeng tseo a tla ho eena a hoeletsa haholo a re: “Nkhauhele, Morena, Mora oa Davida. Morali oa ka o kenoe ke modemona ea mo sotlang hampe.”+ 23 Empa Jesu ha aa ka a mo araba. Kahoo, barutuoa ba hae ba tla ho eena ba re: “E-re a tsamaee hobane o ntse a tla a hoeletsa ka mor’a rona.” 24 Jesu a re ho mosali eo: “Ha kea romeloa ho mang kapa mang haese linku tse lahlehileng tsa ntlo ea Iseraele.”+ 25 Empa mosali eo a tla a mo khumamela a re: “Morena, nthuse!” 26 Ha a araba a re: “Ha hoa nepahala ho nka bohobe ba bana ebe bo akhelloa malinyane a lintja.” 27 A re: “Ke ’nete Morena empa le ’ona malinyane a lintja a ja makumane a oang tafoleng ea beng ba ’ona.”+ 28 Jesu a re ho eena: “Tumelo ea hao e matla. Ho ke ho etsahale joalokaha u lakatsa.” Morali oa hae a fola ka eona nako eo.

29 Jesu a tloha moo a ea haufi le Leoatle la Galilea.+ A nyolohela thabeng, a lula teng. 30 Batho ba bangata ba mo atamela ba tlile le batho ba holofetseng, ba sa boneng, ba sa khoneng ho bua le ba bang ba bangata. Ba ba tlisa ho Jesu eaba oa ba phekola.+ 31 Kahoo, ha letšoele le bona batho ba sa khoneng ho bua ba bua, ba holofetseng ba tsamaea le ba sa boneng ba bona, la makala eaba le tlotlisa Molimo oa Iseraele.+

32 Empa Jesu a bitsa barutuoa ba hae a re: “Ke hauhela batho bana+ hobane ba se ba qetile matsatsi a mararo ba lutse le ’na ’me ha ba na lijo. Ha ke batle hore ba tsamaee ba lapile hobane ba ka ’na ba felloa ke matla tseleng.”+ 33 Leha ho le joalo, barutuoa ba re ho eena: “Re tla fumana mahobe a tla fepa batho ba bangata hakaale hokae re le hole tjee?”+ 34 Eaba Jesu o re ho bona: “Le na le mahobe a makae?” Ba re: “A supileng le litlhapi tse nyenyane tse seng kae.” 35 Kahoo, ha a qeta ho bolella batho hore ba lule fatše, 36 a nka mahobe ao a supileng le litlhapi ’me ka mor’a ho leboha, a li arola, a li fa barutuoa, barutuoa bona ba li fa batho.+ 37 Bohle ba ja ba khora eaba barutuoa ba nka libaskete* tse supileng tse kholo tse tletseng bohobe bo setseng.+ 38 Ho ile ha ja batho ba 4 000 ho sa balelloe basali le bana. 39 Qetellong, ka mor’a hore a re batho ba tsamaee, a kena sekepeng a ea Magadane.+

16 Bafarisi le Basaduse ba tla ho eena ba mo kopa hore a ba etsetse mohlolo o tsoang leholimong e le ho mo leka.+ 2 A re ho bona: “Ha letsatsi le likela le tloaetse ho re: ‘Boemo ba leholimo bo tla ba botle hobane leholimo le bofubelu bo hlakileng.’ 3 Hoseng teng le re: ‘Kajeno ho tla bata le pula e tla na kaha leholimo le bofubelu bo hlakileng ebile ho maru.’ Le tseba ho hlalosa ponahalo ea leholimo empa ha le utloisise hore na lintho tse etsahalang hona joale li bolela’ng. 4 Batho ba khopo le ba sa tšepahaleng* ba moloko ona ba ntse ba batla mohlolo empa ha ho mohlolo oo ba tla o bona+ haese mohlolo o etsahaletseng Jonase.”+ Eaba oa tsamaea oa ba siea.

5 Barutuoa ba tšelela ka lehlakoreng le leng la leoatle eaba ba lebala ho nka bohobe.+ 6 Jesu a re ho bona: “Lulang le butse mahlo ’me le hlokomele tomoso ea Bafarisi le Basaduse.”+ 7 Kahoo, ba buisana ba re: “Ha rea ka ra nka bohobe.” 8 Ha Jesu a ba utloa a re: “Ke hobane’ng ha le ntse le re ha le na bohobe? Tumelo ea lona ea fokola. 9 Na le ntse le e-s’o hlakeloe kapa ha le hopole hore na le ile la nka libaskete tse kae ka mor’a hore ke fepe batho ba 5 000 ka mahobe a mahlano?+ 10 Kapa le se le lebetse hore na le ile la nka libaskete* tse kae ka mor’a hore ke fepe batho ba 4 000 ka mahobe a supileng?+ 11 Ho tla joang hore ebe ha le lemohe hore ke ne ke sa bue le lona ka bohobe? Ke ne ke bolela hore le hlokomele tomoso ea Bafarisi le Basaduse.”+ 12 Kahoo, ba utloisisa hore o ne a sa bue ka tomoso ea bohobe empa o ne a re ba hlokomele thuto ea Bafarisi le Basaduse.

13 Ha Jesu a le motseng oa Sesarea Filipi a re ho barutuoa ba hae: “Batho ba re Mor’a motho ke mang?”+ 14 Ba re: “Ba bang ba re ke Johanne mokolobetsi,+ ba bang ba re ke Elia,+ ba bang bona ba re ke Jeremia kapa e mong oa baprofeta.” 15 A re ho bona: “Lona le re ke mang?” 16 Simone Petrose a re: “U Kreste,+ Mora oa Molimo ea phelang.”+ 17 Jesu a re ho eena: “U hlohonolofetse uena Simone mora oa Jona hobane ha se motho* ea u senoletseng taba ena empa u e senoletsoe ke Ntate ea maholimong.+ 18 Hape ke re ho uena: U Petrose.+ Ke tla haha phutheho ea ka holim’a lefika lena+ ’me lefu* le ke ke la e hlola ka matla. 19 Ke tla u fa linotlolo tsa ’Muso oa maholimo. Eng kapa eng e tlanngoeng maholimong, u tla e tlama lefatšeng. Hape eng kapa eng e lokolotsoeng maholimong, u tla e lokolla lefatšeng.” 20 Jesu a laela barutuoa ka thata-thata hore ba se ke ba bolella mang kapa mang hore ke eena Kreste.+

21 Ho tloha ka nako eo ho ea pele Jesu a hlalosetsa barutuoa ba hae hore o tla ea Jerusalema, a hlorisoe hampe ke baholo, baprista ba baholo le bangoli, a be a bolaoe ebe o tsosoa ka letsatsi la boraro.+ 22 Eaba Petrose o mo nkela ka thoko ’me o qala ho mo khalemela o re: “Ikhauhele, Morena. Ho hang u ke ke oa etsahalloa ke ntho e tjena.”+ 23 Empa Jesu a mo furalla, a re ho eena: “Tloha* Satane! U tšitiso ho ’na hobane u nahana menahano ea batho eseng ea Molimo.”+

24 Jesu a re ho barutuoa ba hae: “Haeba mang kapa mang a batla ho ntšala morao, a se ke a hlola a iphelela. A ikemisetse ho mamella mahloriso* ’me a ’ne a ntatele.+ 25 Mang kapa mang ea batlang ho sireletsa bophelo ba hae, o tla felloa ke bona. Empa mang kapa mang ea shoang hobane e le molateli oa ka, o tla phela hape.+ 26 Ha e le hantle motho o tla fumana molemo ofe ha a rua lefatše lohle empa a feletsoe ke bophelo ba hae?+ Kapa a ka reka bophelo ba hae ka eng?+ 27 Mor’a motho o tla tla ka khanya ea Ntate oa hae a e-na le mangeloi a hae ebe o ahlola e mong le e mong ho ea ka mesebetsi ea hae.+ 28 Kannete ke re ho lona, ho na le ba bang ba emeng mona bao ho hang ba ke keng ba shoa pele ba bona Mor’a motho a tla ka ’Muso oa hae.”+

17 Matsatsi a tšeletseng hamorao, Jesu a tsamaea le Petrose, Jakobo le Johanne ngoan’abo ’me a nyolohela le bona thabeng e phahameng ba le bang.+ 2 Chebahalo ea hae ea fetoha ba ntse ba mo shebile. Sefahleho sa hae sa khanya joaloka letsatsi, le liaparo tsa hae tsa phatsima* haholo.+ 3 Ho sa le joalo, ba bona Moshe le Elia ba hlaha ba buisana le Jesu. 4 Eaba Petrose o re ho Jesu: “Morena, ke hantle hore ebe re mona. Haeba u batla, ke tla hloma litente tse tharo mona, e ’ngoe e be ea hao, e ’ngoe e be ea Moshe, e ’ngoe e be ea Elia.” 5 Ha a sa ntse a bua, leru le khanyang la ba koahela. Lentsoe la hlaha lerung leo la re: “Enoa ke Mora oa ka eo ke mo ratang, ea nkhahlisang.+ Mo mameleng.”+ 6 Ha barutuoa ba utloa litaba tsena ba tšoha haholo eaba ba khumama lifahleho li shebile fatše. 7 Jesu a ba atamela eaba oa ba tšoara o re: “Emang. Le se ke la tšoha.” 8 Ha ba sheba holimo, ba bona Jesu a setse a le mong feela. 9 Ha ba ntse ba theoha thabeng, Jesu a ba laela a re: “Le se ke la bolella mang kapa mang pono ena ho fihlela Mor’a motho a tsosoa bafung.”+

10 Leha ho le joalo, barutuoa ba re: “Ke hobane’ng ha bangoli ba re Elia o tla tla pele?”+ 11 Ha a araba a re: “Ehlile Elia oa tla ’me o tla busetsa lintho tsohle malulong.+ 12 Leha ho le joalo, ke re ho lona Elia o se a tlile empa ha baa ka ba mo tseba. Ba ile ba mo etsa lintho tseo ba li batlang.+ Ka tsela e tšoanang, le Mor’a motho o tl’o hlokofatsoa ke bona.”+ 13 Barutuoa ba hlokomela hore o ne a bua ka Johanne Mokolobetsi.

14 Ha ba tla ba lebile letšoele,+ monna e mong a mo atamela, a mo khumamela eaba o re: 15 “Morena, hauhela mora oa ka hobane oa kula o tšoeroe ke sethoathoa.* O atisa ho oela mollong le ka metsing.+ 16 Ke ile ka mo tlisa ho barutuoa ba hao empa ba sitiloe ho mo phekola.” 17 Ha Jesu a araba a re: “Lona moloko o se nang tumelo o bileng o leng khopo,+ ke tla lula le lona ho fihlela neng? Ke tla le mamella ho fihlela neng? Mo tliseng koano.” 18 Joale Jesu a khalemela modemona ’me a tsoa ho eena. Moshanyana eo a fola hang-hang.+ 19 Ka mor’a moo, barutuoa ba tla ho Jesu moo ba leng bang ba re: “Ke hobane’ng ha re ile ra sitoa ho leleka modemona eo?” 20 A re ho bona: “Ke hobane tumelo ea lona ea fokola. Kannete kea le bolella hore haeba tumelo ea lona e lekana le peo ea mosetareta, le tla re ho thaba ena: ‘Tloha mona u ee mane,’ ebe ea tloha ’me ha ho letho leo le ke keng la khona ho le etsa.”+ 21* ——

22 Ha ba ntse ba bokane Galilea Jesu a re ho bona: “Mor’a motho o tl’o rekisoa* ebe ho fanoa ka eena matsohong a batho.+ 23 Ba tla mo bolaea ebe o tsosoa ka letsatsi la boraro.”+ Eaba barutuoa ba sareloa haholo.

24 Ka mor’a hore ba fihle Kapernauma, banna ba bokellang lekhetho la tempele* ba tla ho Petrose ba re: “Na mosuoe oa lona o ntša lekhetho la tempele?”+ 25 A re: “E.” Eare ha a kena ka tlung Jesu a re ho eena: “Simone, u nahana joang? Marena a lefatše a fumana lekhetho ho bo-mang? Ho bana ba ’ona kapa ho batho ba bang?” 26 Petrose a re: “Ho batho ba bang.” Eaba Jesu o re: “E leng hore bana ba ’ona ha ba ntše lekhetho. 27 Empa e le hore re se ke ra ba khopisa,+ e-ea leoatleng u lahlele huku e tšoasang litlhapi* ebe u nka tlhapi ea pele eo u tla e tšoasa. Ha u e ahlamisa u tla fumana chelete ea silevera.* U e nke u re patalle re le babeli.”

18 Ka nako eo, barutuoa ba tla ho Jesu ba re: “Ha e le hantle ke mang e moholo ’Musong oa maholimo?”+ 2 A bitsa ngoana e monyenyane, a mo emisa ka pel’a bona 3 ’me a re: “Kannete kea le bolella hore ha le sa fetohe la tšoana le bana ba banyenyane,+ ho hang le ke ke la kena ’Musong oa maholimo.+ 4 Ka hona, mang kapa mang ea tla ikokobetsa joaloka ngoana enoa, ke eena e moholo ’Musong oa maholimo.+ 5 Hape mang kapa mang ea amohelang ngoana e monyenyane joaloka enoa ka lebaka la lebitso la ka, le ’na oa nkamohela. 6 Haeba motho a etsa hore e mong oa ba banyenyane bana ba lumelang ho ’na a lahle tumelo ea hae,* ho ka ba molemo haholo hore leloala le leholo* le tlamelloe molaleng oa hae ebe o lahleloa ka leoatleng.+

7 Ho malimabe lefatše hobane le etsisa batho sebe. Ke ’nete hore lintho tse lihelang batho sebeng li tla lula li le teng empa ho malimabe motho eo li tlang ka eena. 8 Joale, haeba letsoho kapa leoto la hao le etsa hore u etse sebe,* u le khaole u le lahlele hole le uena.+ Ho molemo hore u fumane bophelo u qhoalile kapa u holofetse ho e-na le ho lahleloa mollong o sa feleng* u e-na le matsoho kapa maoto a mabeli.+ 9 Hape, haeba leihlo la hao le etsa hore u etse sebe,* le honye u le lahlele hole le uena. Ho molemo hore u fumane bophelo u e-na le leihlo le le leng ho e-na le ho lahleloa mollong oa Gehena* u e-na le mahlo a mabeli.+ 10 Itlhokomeleng hore le se ke la nyefola e mong oa ba banyenyane bana hobane kea le bolella hore mangeloi a bona a lula a le ka pel’a Ntate ea leholimong.+ 11* ——

12 Le nahana joang? Haeba motho a e-na le linku tse 100 ebe e ’ngoe ea lahleha,+ na a ke ke a siea tse 99 lithabeng ebe oa tsamaea o e’o batla e lahlehileng?+ 13 Haeba a e fumane, kannete kea le bolella, o e thabela haholo ho feta tse 99 tse sa kang tsa lahleha. 14 Ka tsela e tšoanang, Ntate* ea leholimong ha a rate hore ho timele le ea mong oa ba banyenyane bana.+

15 Hape haeba ngoan’eno a etsa sebe, e-ea u mo bontše phoso ea hae* moo le leng bang.+ Haeba a u mamela, u tla be u thusitse ngoan’eno ho etsa ntho e nepahetseng.+ 16 Empa haeba a sa mamele, u ee le paki e le ’ngoe kapa tse peli e le hore taba e ’ngoe le e ’ngoe e ka tiisoa ka bopaki* ba lipaki tse peli kapa tse tharo.+ 17 Haeba a sa ba mamele, u bue le phutheho. Haeba a sa mamele le phutheho, ho uena a be feela joaloka molichaba+ kapa ’mokelli oa lekhetho.+

18 Kannete ke re ho lona, eng kapa eng e tlanngoeng maholimong, le tla e tlama lefatšeng. Hape eng kapa eng e lokolotsoeng maholimong, le tla e lokolla lefatšeng. 19 Kannete ke boetse ke re ho lona, haeba ba babeli ba lona lefatšeng ba lumellana ho kopa ntho efe kapa efe ea bohlokoa, Ntate ea leholimong o tla ba etsetsa eona.+ 20 Etsoe moo ho nang le ba babeli kapa ba bararo ba bokaneng ka lebitso la ka,+ ke teng moo har’a bona.”

21 Joale Petrose a tla ’me a re ho eena: “Morena, ke lokela ho tšoarela ngoan’eso ka makhetlo a makae ha a ntšitetsoe? A supileng?” 22 Jesu a re: “Eseng ka makhetlo a supileng empa ka makhetlo a 77.+

23 Ke ka lebaka leo ’Muso oa maholimo o ka bapisoang le morena ea neng a batla hore makhoba a hae a mo patale chelete eo a mo kolotang eona. 24 Ha a qala ho bokella chelete eo a e kolotoang, bahlanka ba hae ba mo tlisetsa motho ea neng a mo kolota litalenta tse 10 000.* 25 Empa kaha o ne a se na mokhoa oa ho patala, mong’a hae a laela hore eena, mosali oa hae, bana ba hae le lintho tsohle tseo a nang le tsona li rekisoe e le hore ho pataloe sekoloto.+ 26 Ka hona, lekhoba leo la itihela fatše la mo khumamela eaba le re: ‘U se ke oa mphella pelo hle mong’a ka. Ke tla patala sekoloto sa ka kaofela.’ 27 Mong’a lekhoba a le hauhela, a le tlohela hore le tsamaee eaba o hlakola sekoloto sa lona.+ 28 Empa lekhoba leo la tsoa ’me la fumana lekhoba-’moho le lona le neng le le kolota lidenari tse 100.* La le tšoara, la le khama eaba le re: ‘Mpatale ntho e ’ngoe le e ’ngoe eo u nkolotang eona.’ 29 Lekhoba-’moho le lona la itihela fatše eaba lea le kopa le re: ‘U se ke oa mphella pelo hle ngoan’eso, ke tla u patala.’ 30 Empa la hana ho le mamela. La tloha eaba lea le tšoarisa e le hore le lule teronkong ho fihlela le ka patala sekoloto sa lona. 31 Ha batho bao e leng makhoba-’moho le lona ba bona hore na ho etsahetse’ng, ba utloa bohloko haholo. Ba tsamaea ba tlalehela mong’a bona lintho tsohle tse etsahetseng. 32 Joale mong’a lekhoba leo a le bitsa a re ho lona: ‘Uena lekhoba le khopo, ke u hlakoletse sekoloto sa hao kaofela ha u ne u nkopa. 33 Na le uena u ne u sa tšoanela hore ebe u hauhetse lekhoba-’moho le uena joalokaha le ’na ke u hauhetse?’+ 34 Mong’a lona a halefa haholo, a le kenya teronkong* ho fihlela le ka patala sekoloto sa lona kaofela. 35 Ntate oa ka oa leholimo le eena o tla le etsa joalo+ haeba le lona le sa tšoarele bana ba bo lona ka lipelo tsohle tsa lona.”+

19 Ha Jesu a qetile ho bua litaba tsena, a tloha Galilea a ea meeling ea Judea ka mose ho Jordane.+ 2 Letšoele le leholo la mo sala morao ’me a le phekolela moo.

3 Bafarisi ba tla ho eena ba ikemiselitse ho mo leka ba re: “Na molao o lumella monna ho hlala mosali oa hae ka lebaka leha e le lefe?”+ 4 Ha a araba a re: “Na ha le e-s’o bale hore qalong Molimo o bopile monna le mosali+ 5 eaba o re: ‘Ka lebaka leo, monna o tla siea ntate oa hae le ’mè oa hae a khomarele mosali oa hae ’me bobeli ba bona e tla ba nama e le ’ngoe’?+ 6 E leng hore ha ba sa le babeli empa e se e le nama e le ’ngoe. Ka hona, ho se ke ha e-ba le motho ea arolang batho bao Molimo a ba kopantseng.”*+ 7 Ba re ho eena: “Joale ke hobane’ng ha Moshe a laetse hore monna a fe mosali lengolo la tlhalo, a mo hlale?”+ 8 A re ho bona: “Moshe o ile a le lumella ho hlala basali ba lona hobane le le manganga.+ Empa qalong ho ne ho se joalo.+ 9 Ke re ho lona, mang kapa mang ea hlalang mosali oa hae haese ka lebaka la boitšoaro bo bobe bo amanang le thobalano* ebe o nyala e mong oa feba.”+

10 Barutuoa ba re ho eena: “Haeba lenyalo le joalo, ha se bohlale ho nyala.” 11 A re ho bona: “Ha se bohle ba ka khonang ho phela joalo empa ke feela ba nang le mpho eo+ 12 hobane ho na le batho ba hlahileng e le maqhalaha* le ba entsoeng maqhalaha ke batho. Hape ho na le ba sa nyaleng* ka lebaka la ’Muso oa maholimo. Ea ka khonang ho phela joalo a ke a phele joalo.”+

13 Batho ba tlisa bana ba banyenyane ho eena e le hore a ba hlohonolofatse* le ho ba rapella empa barutuoa ba ba khalemela.+ 14 Leha ho le joalo, Jesu a re: “Tlohelang bana ba banyenyane ba tle ho ’na. Le se ke la leka ho ba thiba hobane ’Muso oa maholimo ke oa ba tšoanang le bona.”+ 15 A ba hlohonolofatsa* eaba oa tsamaea.

16 Mohlankana e mong a tla ho eena a re: “Mosuoe, ke etse’ng e molemo hore ke be le bophelo bo sa feleng?”+ 17 Jesu a re ho eena: “Ke hobane’ng ha u mpotsa hore na u etse’ng e molemo?+ Ke Molimo feela ea molemo. Empa haeba u batla ho ba le bophelo bo sa feleng, u mamele litaelo u sa khaotse.”+ 18 A re ho eena: “Life?” Jesu a re: “U se ke oa bolaea,+ u se ke oa feba,+ u se ke oa utsoa+ kapa oa fana ka bopaki ba bohata.+ 19 U hlomphe ntate oa hao le ’mè oa hao.+ U rate moahisani oa hao joalokaha u ithata.”+ 20 Mohlankana eo a re ho eena: “Ke phetha litaelo tseo tsohle. Ho sa setse’ng?” 21 Jesu a re ho eena: “Haeba u batla ho phethahala, tsamaea u rekise lintho tsa hao ebe u fa bafutsana chelete eo, joale u tla ba le letlotlo leholimong.+ Ka mor’a moo u tle, u be molateli oa ka.”+ 22 Ha mohlankana eo a utloa mantsoe ao, a tloha a saretsoe hobane o ne a ruile haholo.+ 23 Eaba Jesu o re ho barutuoa ba hae: “Kannete ke re ho lona, e tla ba ntho e thata hore morui a kene ’Musong oa maholimo.+ 24 Hape ke re ho lona, ho bonolo hore kamele e tsoe lesobeng la nale ho e-na le hore morui a kene ’Musong oa Molimo.”+

25 Ha barutuoa ba utloa a cho joalo, ba makala haholo ba re: “Ke mang ea ka pholohang?”+ 26 Jesu a ba sheba eaba o re ho bona: “Ho batho ho ke ke ha khoneha empa lintho tsohle lia khoneha ho Molimo.”+

27 Petrose a re: “Bona, re siile lintho tsohle ’me ra u latela. Joale re tla fumana eng?”+ 28 Jesu a re ho bona: “Kannete ke re ho lona, ha lintho tsohle li nchafatsoa, Mor’a motho a lula teroneng ea hae e khanyang, lona ba ntatetseng le tla lula literoneng tse 12, le ahlole meloko e 12 ea Iseraele.+ 29 E mong le e mong ea siileng matlo, bana babo, ntate kapa ’mè, bana kapa masimo ka lebaka la lebitso la ka o tla fumana lintho tsena halekholo a be a fumane bophelo bo sa feleng.+

30 Empa ba bangata ba pele e tla ba ba ho qetela ’me ba ho qetela e be ba pele.+

20 ’Muso oa maholimo o joaloka mong’a ntlo, ea ileng a tsoa hoseng haholo ho ea hira basebetsi bakeng sa tšimo ea hae ea morara.+ 2 Ka mor’a hore a lumellane le basebetsi hore o tla ba patala denari* ka letsatsi, a ba romela tšimong ea hae ea morara. 3 Ha a tsoa hape hoo e ka bang ka hora ea borobong hoseng,* a bona ba bang ba eme ’marakeng ba hloka mosebetsi. 4 Le ho bao a re: ‘Le lona e-eang tšimong ea morara ’me ke tla le fa eng kapa eng e loketseng.’ 5 Kahoo ba ea. A boela a tsoa hoo e ka bang ka 12 motšehare* le ka hora ea boraro motšehare oa mantsiboea* ’me a hira basebetsi ba bang. 6 Qetellong, hoo e ka bang ka hora ea bohlano mantsiboea* a tsoa ’me a fumana ba bang ba eme eaba o re ho bona: ‘Ke hobane’ng ha le eme moo letsatsi lohle le hloka mosebetsi?’ 7 Ba re ho eena: ‘Hobane ha ho na motho ea re hirileng.’ A re ho bona: ‘Le lona e-eang tšimong ea ka ea morara.’

8 Ha letsatsi le likela, mong’a tšimo ea morara a re ho motho ea ikarabellang: ‘Bitsa basebetsi ’me u ba lefe meputso ea bona,+ ho qala ka oa ho qetela ho isa ho oa pele.’ 9 Ha banna ba hiriloeng ka hora ea bohlano mantsiboea* ba tla, e mong le e mong a pataloa denari.* 10 Kahoo, ha ba pele ba tla, ba nahana hore ba ne ba tla pataloa haholoanyane empa le bona ba pataloa denari.* 11 Ba e amohela ba ntse ba korotlela mong’a tšimo 12 ba re: ‘Banna ba ho qetela ba sebelitse hora e le ’ngoe feela empa u ba patetse moputso o lekanang le oa rona ba sebelitseng ka thata letšehare lohle har’a mocheso o bataolang.’ 13 Empa ha a araba e mong oa bona a re: ‘Monn’a heso, ha ke u qhekelle. Na ha rea lumellana ka hore ke tla u patala denari?*+ 14 Nka moputso oa hao u tsamaee. Ke batla ho fa enoa oa ho qetela moputso o lekanang le oo ke u fileng oona. 15 Na ha ke na tokelo ea ho etsa ntho eo ke e batlang ka lintho tsa ka? Kapa u mona ha ke ba entse hantle?’*+ 16 Ka tsela ena ba ho qetela e tla ba ba pele, ba pele e be ba ho qetela.”+

17 Ha Jesu a le tseleng e nyolohelang Jerusalema, a nkela barutuoa ba 12 lekunutung eaba o re ho bona:+ 18 “Re nyolohela Jerusalema ’me ba tla nehelana ka Mor’a motho ho baprista ba baholo le bangoli. Ba tla mo ahlolela lefu,+ 19 ba nehelane ka eena ho balichaba hore ba mo some, ba mo shape ba be ba mo bolaele palong.+ O tla tsosoa ka letsatsi la boraro.”+

20 Mohats’a Zebedea+ a ea ho eena a e-na le bara ba hae. A mo khumamela eaba o mo kopa ho hong.+ 21 Jesu a re ho eena: “U batla’ng?” ’Mè eo a re: “Ke kopa hore bara bana ba ka ba babeli ba lule le uena ’Musong oa hao, e mong ka letsohong la hao le letona ’me e mong ka ho le letšehali.”+ 22 Jesu a re: “Ha le tsebe hore na le kopa’ng. Na le ka noa ntho eo ke leng haufi le ho e noa?”+ Ba re ho eena: “Re ka e noa.” 23 A re ho bona: “E, ho e noa le tla e noa+ empa ha se ’na ea khethang hore na ke mang ea tla lula ka letsohong la ka le letona kapa le letšehali. Ke Ntate ea khethang.”+

24 Ha barutuoa ba bang ba leshome ba utloa taba ena, ba halefela Jakobo le Johanne.+ 25 Empa Jesu a ba bitsetsa ho eena a re: “Lea tseba hore babusi ba lichaba ba li tšoara ka thata le banna ba baholo baa li hatella.+ 26 Lona ha lea lokela ho etsa joalo+ empa ea batlang ho ba moholo har’a lona e lokela ho ba mosebeletsi oa lona.+ 27 Ea batlang ho ba oa pele har’a lona, e lokela ho ba mohlanka oa lona.+ 28 Etsoe le Mor’a motho ha aa ka a tlela lefatšeng ho sebeletsoa empa o tletse ho sebeletsa+ le ho fana ka bophelo ba hae e le tefo bakeng sa ho lopolla batho ba bangata.”+

29 Ha ba tsoa Jeriko, letšoelehali la mo latela. 30 Ho ne ho e-na le banna ba babeli ba sa boneng ba lutseng pel’a tsela. Ba utloa hore Jesu o feta moo eaba baa hoeletsa ba re: “Morena, Mora oa Davida, re hauhele!”+ 31 Letšoele la ba khalemela la re ba thole empa ba hoeletsa le ho feta ba re: “Morena, Mora oa Davida, re hauhele!” 32 Kahoo, Jesu a ema, a ba bitsa a re: “Ke le etsetse’ng?” 33 Ba re ho eena: “Morena, re kopa u re bule mahlo.” 34 Jesu a ba hauhela eaba o thetsa mahlo a bona.+ Hang-hang ba bona ’me ba mo sala morao.

21 Ha ba le haufi le Jerusalema, ba fihla Bethefage Thabeng ea Mehloaare, joale Jesu a roma barutuoa ba babeli+ 2 a re ho bona: “Tsamaeang le kene motsaneng oane o ka pel’a lona. Ha le fihla le tla fumana tonki e tlanngoeng e e-na le petsana ea eona. Le li tlamolle ’me le li tlise koano. 3 Ea tla le botsa le mo joetse hore Morena oa li hloka. Hang-hang o tla le tlohela hore le tsamaee le tsona.”

4 Tsena tsohle li etsahetse hore ho phethahale mantsoe a ileng a buuoa ke moprofeta a reng: 5 “E-reng ho morali oa Sione: ‘Morena oa hao o tla ho uena+ a ikokobelitse+ a palame petsana ea tonki.’”+

6 Kahoo, barutuoa ba tsamaea ’me ba etsa feela joalokaha Jesu a ne a ba laetse.+ 7 Ba tlisa tonki le petsana ea eona, ba beha liaparo tsa bona holim’a tsona eaba o palama petsana.+ 8 Boholo ba batho ba ala liaparo tsa bona ka tseleng,+ ba bang bona ba poma makala lifateng ba a ala ka tseleng. 9 Hape batho ba mo eteletseng pele le ba mo setseng morao ba ’na ba hoeletsa ba re: “Re rapella hore u pholose Mora oa Davida!+ Ho hlohonolofetse ea tlang ka lebitso la Jehova.*+ Rea rapela, mo pholose uena ea holimo!”+

10 Joale ha a fihla Jerusalema, batho bohle ba motseng ba etsa moferefere o moholo ba re: “Ke mang enoa?” 11 Batho ba neng ba e-na le eena ba ’na ba re: “Ke Jesu, moprofeta+ ea tsoang Nazaretha e seterekeng sa Galilea.”

12 Jesu a kena ka tempeleng, a tebela bohle ba rekisang le ba rekang ka tempeleng. A phethola le litafole tsa ba chenchang chelete* le libenche tsa ba rekisang maeba.+ 13 A re ho bona: “Mangolo a re: ‘Ntlo ea ka e tla bitsoa ntlo ea thapelo’+ empa lona le e etsa lehaha la masholu.”+ 14 Hape, batho ba sa boneng le ba qhoalileng ba tla ho eena ka tempeleng ’me a ba phekola.

15 Baprista ba baholo le bangoli ba halefa+ ha ba bona lintho tse makatsang tseo a li entseng le ha ba utloa bashanyana ba neng ba hoeletsa ka tempeleng ba re: “Re rapella hore u pholose Mora oa Davida!”+ 16 Ba re ho eena: “Na oa utloa hore na bana baa ba re’ng?” Jesu a re ho bona: “E. Na ha le e-s’o bale moo ho thoeng: ‘U etsa hore masea le bana ba banyenyane ba u rorise’?”+ 17 A tloha motseng oo a ea Bethani ’me a qeta bosiu moo.+

18 Hoseng ha letsatsi le hlahlamang ha a khutlela Jerusalema, a utloa a lapile.+ 19 A bona sefate sa feie* ka thoko ho tsela eaba o ea ho sona empa a fumana se sa beha, e le makhasi feela+ eaba o re ho sona: “U se ke oa hlola u beha litholoana le ka mohla.”+ Sefate seo sa omella hang-hang. 20 Taba ena ea makatsa barutuoa eaba ba re: “Ho tla joang hore ebe sefate sa feie se ile sa omella hang-hang?”+ 21 Jesu a ba araba a re: “Kannete ke re ho lona, haeba feela le e-na le tumelo ’me le sa belaele, le tla etsa seo ke se entseng ka sefate sa feie. Hape haeba le re ho thaba ena: ‘Phahama u e’o oela ka leoatleng,’ ho tla etsahala.+ 22 Le tla fumana lintho tsohle tseo le li rapellang haeba le e-na le tumelo.”+

23 Ka mor’a hore a kene ka tempeleng, baprista ba baholo le baholo ba sechaba ba tla ho eena ha a ntse a ruta ’me ba re: “Lintho tsee u li etsa ka matla afe? Hona ke mang ea u fileng ’ona?”+ 24 Jesu a re ho bona: “Ke tla le botsa potso e le ’ngoe. Haeba le ka nkaraba le ’na ke tla le bolella hore na ke etsa lintho tsena ka matla afe. 25 Ke mang ea fileng Johanne matla a ho kolobetsa? Ke Molimo* kapa ke batho?” Eaba baa buisana ba re: “Haeba re re: ‘Ke Molimo,’ o tla re ho rona: ‘Joale, ke hobane’ng ha le sa ka la lumela ho eena?’+ 26 Empa haeba re re: ‘O a filoe ke batho,’ letšoele lee le tla re etsa’ng hobane kaofela le nka Johanne e le moprofeta?” 27 Kahoo, ba araba Jesu ba re: “Ha re tsebe.” Le eena a re ho bona: “Le ’na nke ke ka le bolella hore na ke nka matla a ho etsa lintho tsena hokae.

28 Le ka re’ng ka taba ee? Monna e mong o ne a e-na le bana ba babeli. A re ho oa pele: ‘Ngoan’a ka, tsamaea u e’o sebetsa tšimong ea morara kajeno.’ 29 A araba a re: ‘Ha ke batle.’ Empa hamorao a soaba eaba oa ea. 30 A ea ho oa bobeli, a bua ntho e tšoanang. Eo a re: ‘Ke tla ea Ntate.’* Empa a se ke a ea. 31 Ke ofe ho ba babeli baa ea ileng a etsa thato ea ntate oa hae?” Ba re: “Oa pele.” Jesu a re ho bona: “Kannete ke re ho lona, babokelli ba lekhetho le lihlola ba tla kena pele ho lona ’Musong oa Molimo. 32 Hobane Johanne o ile a tla ho tla le bontša tsela e lokileng eaba ha le lumele ho eena. Babokelli ba lekhetho le lihlola ba ile ba lumela ho eena+ empa le ka mor’a moo, ha lea ka la ikutloa le soabile eaba le lumela ho eena.

33 Papiso e ’ngoe ke ena: Motho e mong o ne a e-na le tšimo ea morara.+ O ile a e lema, a e kampela eaba o etsa sebaka seo a ka tlhotlelang morara ho sona, a haha le tora.+ A hirisetsa balemi tšimo eo eaba o etela hole.+ 34 Ha nako ea ho kotula morara e fihla, a roma makhoba a hae ho balemi ho ea lata morara. 35 Balemi bao ba tšoara makhoba a hae. Ba khakhatha le leng, ba bolaea le leng ’me ba tlepetsa le leng ka majoe.+ 36 A boela a roma makhoba a mang, a mangata ho feta a pele empa le ’ona ba a etsa joalo.+ 37 A qetella a romme mora oa hae ho bona, a nahana hore ba tla hlompha mora oa hae. 38 Ha balemi ba bona mora ba buisana ba re: ‘Enoa ke eena mojalefa.+ A re mo bolaeeng re tle re je lefa la hae.’ 39 Kahoo, ba mo tšoara ba mo lahlela ka ntle ho tšimo eo eaba baa mo bolaea.+ 40 Joale ha mong’a tšimo a tla, o tla ba etsa’ng balemi bao?” 41 Ba re ho eena: “Kaha ba khopo, o tla ba bolaea ebe o hirisetsa balemi ba bang tšimo eo ea morara, ba tla mo fa karolo ea hae ka nako ea kotulo.”

42 Jesu a re ho bona: “Na ha le e-s’o bale moo Mangolo a reng: ‘Lejoe leo lihahi li le lahlileng le fetohile lejoe la sekhutlo la sehlooho.*+ Lejoe lena le tsoa ho Jehova* ’me le letle haholo ho rona’?+ 43 Ke ka lebaka lena ke reng ho lona, le tla tsekisoa ’Muso oa Molimo ebe o fuoa sechaba se hlahisang litholoana tse lebeletsoeng. 44 Hape, motho ea oelang holim’a lejoe lena o tla hlaha kotsi e mpe.+ Eo le tla mo oela holimo eena le tla mo silakanya.”+

45 Ha baprista ba baholo le Bafarisi ba utloile lipapiso tsa hae, ba tseba hore o ne a bua ka bona.+ 46 Ba ne ba batla ho mo tšoara empa ba tšaba letšoele hobane le ne le mo nka e le moprofeta.+

22 Jesu a boela a ba etsetsa lipapiso a re: 2 “’Muso oa maholimo o ka tšoantšoa le morena ea ileng a etsetsa mora oa hae mokete oa lenyalo.+ 3 A roma makhoba a hae ho e’a bitsa ba memetsoeng moketeng empa ba hana ho tla.+ 4 A boela a roma makhoba a mang a re: ‘Bolellang bamemuoa hore ke ba etselitse lijo tsa motšehare. Ke hlabile lipoho le liphoofolo tse ling tse nontšitsoeng, lintho tsohle li lokile, ba tle moketeng.’ 5 Empa bamemuoa ba se ke ba a tsotella, ba itsamaela. E mong a ea tšimong ea hae, e mong a ea khoebong ea hae.+ 6 Ba bang kaofela ba tšoara makhoba a hae, ba a rohaka ’me ba a bolaea.

7 Morena a halefa eaba o roma masole a hae ho bolaea babolai bao, a ba a chesa motse oa bona.+ 8 A re ho makhoba a hae: ‘Lintho tsohle li lokile bakeng sa mokete empa batho ba menngoeng ba ne ba sa tšoanelehe.+ 9 Ka hona, e-eang litseleng tse kholo ebe le mema motho e mong le e mong eo le tla mo fumana hore a tle moketeng.’+ 10 Ka lebaka leo, makhoba ao a tsamaea eaba a bokella bohle bao a ba fumaneng, ba lokileng le ba khopo ’me ba lula litafoleng, holo ea lechato ea tlala.

11 Ha morena a kena ho tla bona baeti, a bona monna e mong ea sa aparelang ho tla moketeng. 12 Kahoo, a re ho eena: ‘Monn’a heso, u kene joang ka moo u sa aparela ho tla moketeng?’ A sitoa ho araba. 13 Eaba morena o re ho bahlanka ba hae: ‘Mo tlameng maoto le matsoho le mo lahlele ka ntle lefifing. Ke hona moo a tla lla le ho tsikitlanya meno teng.’

14 Ba menngoeng ba bangata empa ho khethiloe ba seng bakae.”

15 Joale Bafarisi ba tsamaea ’me ba rerisana hore ba mo tšoare ka lipuo tsa hae.+ 16 Kahoo, ba romela barutuoa ba bona ho eena hammoho le balateli ba Heroda+ ba re: “Mosuoe, rea tseba hore u na le ’nete le hore u ruta tsela ea Molimo ka ’nete le hore ha u reke sefahleho sa mang kapa mang hobane ha u shebe ponahalo ea batho. 17 Re bolelle, u re’ng ka taba ee? Na ka molao* motho o lokela ho patala lekhetho ho Sesare kapa che?” 18 Empa kaha Jesu o ne a tseba merero ea bona e fosahetseng, a re: “Baikaketsi, le ntekela’ng? 19 Mpontšeng chelete ea tšepe e patalang lekhetho.” Ba mo fa denari.* 20 A re ho bona: “Setšoantšo le mongolo oo ke tsa mang?” 21 Ba re: “Ke tsa Sesare.” Eaba o re ho bona: “Ka hona, le fe Sesare lintho tsa hae le Molimo le mo fe tsa hae.”+ 22 Ha ba utloa a cho joalo, ba hlolloa eaba baa tsamaea.

23 Letsatsing leo Basaduse, ba reng ha ho na tsoho ea bafu,+ ba tla ho eena ba re:+ 24 “Mosuoe, Moshe o ile a re: ‘Haeba monna a shoa a se na bana, ngoan’abo o tla nyala mosali oa hae e le hore a tle a mo etsetse bana.’+ 25 Joale ho ne ho e-na le bana ba motho ba supileng. Oa pele a nyala empa a shoa a se na bana eaba ngoan’abo o nyala mohlolohali eo. 26 Ntho e tšoanang ea hlahela oa bobeli le oa boraro, ho fihlela ho oa bosupa. 27 Qetellong le eena mosali eo a shoa. 28 Ha ba se ba tsositsoe, mosali eo e tla ba oa mang ho bao ba supileng hobane kaofela ba ile ba mo nyala?”

29 Jesu a re ho bona: “Le fositse hobane ha le tsebe Mangolo le hore na Molimo o matla hakae.+ 30 Ha batho ba se ba tsositsoe, ba ke ke ba nyala kapa ba nyaloa empa ba tla tšoana le mangeloi leholimong.+ 31 Le balile ka tsoho ea bafu. Na ha lea ka la bala moo Molimo a neng a re ho lona: 32 ‘Ke ’na Molimo oa Abrahama, Isaka le Jakobo’?+ Eena ke Molimo oa ba phelang eseng oa bafu.”+ 33 Batho ba ne ba hloletsoe ha ba utloa lintho tseo a li rutang.+

34 Ha Bafarisi ba utloa hore Basaduse ba ne ba sa khone ho mo araba, ba tla ho eena. 35 E mong oa bona, eo e leng setsebi sa Molao, a mo leka ka ho re: 36 “Mosuoe, taelo e kholo ke efe Molaong?”+ 37 A re ho eena: “‘U rate Jehova* Molimo oa hao ka pelo ea hao eohle, ka moea* oa hao oohle le ka kelello ea hao eohle.’+ 38 Ena ke eona taelo e kholo, ea pele. 39 Ea bobeli e tšoanang le eona ke ena: ‘U rate moahisani oa hao joalokaha u ithata.’+ 40 Molao oohle le mantsoe a Baprofeta a tsoa litaelong tsena tse peli.”+

41 Ha Bafarisi ba ntse ba bokane, Jesu a re ho bona:+ 42 “Le nahana joang ka Kreste? Ke mora oa mang?” Ba re ho eena: “Oa Davida.”+ 43 A re ho bona: “Joale ke hobane’ng ha moea o halalelang o ile oa susumelletsa Davida+ hore a mo bitse Morena, a re: 44 ‘Jehova* o itse ho Moren’a ka: “Lula ka letsohong la ka le letona ho fihlela ke beha lira tsa hao tlas’a maoto a hao”’?+ 45 Joale haeba Davida a mo bitsa Morena, ke mora oa hae joang?”+ 46 Ha ho ea ileng a khona ho mo araba. Ho tloha letsatsing leo ho ea pele, ha ho le ea mong ea ileng a iteta sefuba ho mo botsa hape.

23 Jesu a bua le letšoele le barutuoa ba hae a re: 2 “Bangoli le Bafarisi ba lutse setulong sa Moshe. 3 Ka hona, le etse lintho tsohle tseo ba le bolellang tsona. Empa le se ke la ba etsisa hobane ba bua feela ebe ha ba etse lintho tseo ba li rutang.+ 4 Ba beha mejaro e boima mahetleng a batho+ empa bona ha ba batle le ho e sisinya ka monoana.+ 5 Ntho e ’ngoe le e ’ngoe eo ba e etsang ba e etsa hore ba bonoe ke batho+ kaha ba atolosa mabokosana a tšetseng mangolo ao ba a roalang liphatleng le matsohong e le litšireletso+ le ho lelefatsa litjobo tsa liaparo tsa bona.+ 6 Ba rata litulo tse ka pele ka matlung a thapelo* le ho lula litulong tsa bahlomphehi meketeng.+ 7 Ba rata ho lumelisoa limmarakeng le ho bitsoa Rabi.* 8 Empa lona le se ke la bitsoa Rabi kaha Mosuoe oa lona o mong+ ebile lona kaofela le bana ba motho. 9 Ho feta moo, ho se ke ha e-ba le motho eo le mo bitsang ntate oa lona lefatšeng mona hobane Ntate oa lona o mong,+ ke Ea leholimong. 10 Hape le se ke la bitsoa baeta-pele kaha Moeta-pele oa lona o mong, ke Kreste. 11 E moholo har’a lona e lokela ho ba mosebeletsi oa lona.+ 12 Mang kapa mang ea iphahamisang o tla kokobetsoa+ empa mang kapa mang ea ikokobetsang o tla phahamisoa.+

13 Le malimabe lona bangoli le Bafarisi, baikaketsi! hobane le koalla batho ’Muso oa maholimo. Ha le kene ebile le sitisa ba batlang ho kena.+ 14* ——

15 Le malimabe lona bangoli le Bafarisi, baikaketsi!+ hobane le tsamaea hohle hore le sokolle motho a le mong ebe ha a sokoloha le etsa hore a tšoaneloe ke Gehena* ho le feta.

16 Le malimabe lona batataisi ba foufetseng+ hobane le re: ‘Haeba motho a ikana ka tempele, ha ho na taba empa haeba a ikana ka khauta ea tempele, o tlameha ho phetha kano ea hae.’+ 17 Lona maoatla a sa boneng! Hantle ke hofe ho bohlokoa, khauta kapa tempele e entseng hore khauta e halalele? 18 Hape le re: ‘Haeba motho a ikana ka aletare, ha ho na taba empa haeba a ikana ka mpho e holim’a eona, o tlameha ho phetha kano ea hae.’ 19 Lona lifofu! Hantle ke hofe ho bohlokoa, mpho kapa aletare e etsang hore mpho e halalele? 20 Ea ikanang ka aletare o ikana ka eona le ka lintho tsohle tse holim’a eona 21 le ea ikanang ka tempele o ikana ka eona le ka ea ahileng ho eona.+ 22 Hape ea ikanang ka leholimo o ikana ka terone ea Molimo le ka ea lutseng ho eona.

23 Le malimabe lona bangoli le Bafarisi, baikaketsi! hobane le fana ka karolo ea leshome ea koena, dille le kumine+ empa le tlohetse litaba tsa bohlokoa haholo tsa Molao e leng toka,+ mohau+ le botšepehi. Le ne le tlameha ho etsa lintho tsena empa eseng hore le iphapanyetse lintho tse ling.+ 24 Le batataisi ba foufetseng,+ ba sefang monoang+ empa ba koenya kamele.+

25 Le malimabe lona bangoli le Bafarisi, baikaketsi! hobane le hloekisa bokantle ba kopi le ba sejana+ empa ka hare li tletse meharo*+ le ho hloka boitšoaro.+ 26 Sefofu sa Mofarisi! Hloekisa bokahare ba lebekere le ba sejana pele ebe u hloekisa le bokantle ba tsona.

27 Le malimabe lona bangoli le Bafarisi, baikaketsi!+ hobane le tšoana le mabitla a pentiloeng,+ a bonahalang a le matle ka ntle empa ka hare a tletse masapo a bafu le libolu tsa mefuta eohle. 28 Le lona le bonahala le lokile ho batho empa ka hare le tletse boikaketsi le tlolo ea molao.+

29 Le malimabe lona bangoli le Bafarisi, baikaketsi!+ hobane le haha mabitla a baprofeta ’me le khabisa mabitla a ba lokileng+ 30 ebile le re: ‘Hoja re phetse mehleng ea baholo-holo ba rona, re ka be re sa ba thusa ho bolaea baprofeta.’ 31 Ka hona, lea ipaka hore le bara ba batho ba bolaileng baprofeta.+ 32 Joale he, qetelang mesebetsi eo baholo-holo ba lona ba e qalileng.

33 Lona linoha, malinyane a marabe,+ le tla phonyoha kahlolo ea Gehena* joang?+ 34 Ke kahoo ke romang baprofeta ho lona,+ banna ba bohlale le barupeli ba sechaba.+ Ba bang ba bona le tla ba bolaea,+ le ba fanyehe lipalong ’me ba bang le tla ba shapela+ ka matlung a lona a thapelo,* le ba hlorise+ ho tloha motseng o mong ho ea ho o mong 35 e le hore le ka ba molato oa mali a batho bohle ba lokileng ba bolaetsoeng lefatšeng, ho tloha ka mali a Abele+ ea lokileng ho ea ka a Zakaria mora oa Barakia, eo le mo bolaetseng lipakeng tsa sehalalelo le aletare.+ 36 Kannete kea le bolella hore moloko ona o tla ikarabella ka lintho tsena tsohle.

37 Jerusalema, Jerusalema, ’molai oa baprofeta le ea tlepetsang ka majoe ba rometsoeng ho eena,+ ke hakae ke neng ke batla ho bokella bana ba hao joalokaha khoho e bokella litsuonyana tsa eona tlas’a mapheo a eona empa la ’na la hana?+ 38 Molimo o tla tlohela ntlo ea lona a le siee le eona.*+ 39 Kea le bolella hore ho tloha joale le ke ke la hlola le mpona ho fihlela le re: ‘Ho hlohonolofetse ea tlang ka lebitso la Jehova.’”*+

24 Ha Jesu a tsamaea a tloha tempeleng, barutuoa ba hae ba atamela ba mo supisa mehaho ea eona. 2 A re ho bona: “Na lea e bona mehaho ee kaofela? Kannete ke re ho lona, majoe ’ohle a teng mona a tla heletsoa. Ha ho lejoe le tla sala holim’a le leng.”+

3 Ha Jesu a ntse a lutse Thabeng ea Mehloaare, barutuoa ba tla ho eena moo ba leng bang ba re: “Re bolelle, lintho tsee li tla etsahala neng? Hona re tla bona ka’ng hore u teng*+ le hore lefatše lee* lea fela?”+

4 Jesu a re ho bona: “Itlhokomeleng hore ho se ke ha e-ba le motho ea le khelosang+ 5 kaha ba bangata ba tla tla ka lebitso la ka ba re: ‘Ke ’na Kreste’ ebe ba khelosa ba bangata.+ 6 Le tla utloela ka lintoa le litlaleho tsa lintoa, leha ho le joalo, le se ke la tšoha. Lintho tsena li tla etsahala empa ha e e-s’o be bofelo.+

7 Lichaba li tla loantšana le mebuso e hlaselane.+ Ho tla ba le tlala+ le litšisinyeho tsa lefatše sebakeng se seng ka mor’a se seng.+ 8 Lintho tsena tsohle ke qalo feela ea tlokotsi.

9 Ka nako eo, batho ba tla fana ka lona hore le hlorisoe+ ebile ba tla le bolaea.+ Lichaba tsohle li tla le hloea ka lebaka la lebitso la ka.+ 10 Hape ba bangata ba tla suthela hole le Molimo ’me ba tla fetohelana le ho hloeana. 11 Ho tla hlaha baprofeta ba bangata ba bohata ebe ba khelosa batho ba bangata.+ 12 Batho ba bangata ha ba sa tla ratana ka lebaka la ho ata ha tlolo ea molao. 13 Empa ea mameletseng ho fihlela qetellong ke eena ea tla pholoha.+ 14 Litaba tse monate tsa ’Muso li tla boleloa lefatšeng lohle hore batho ba lichaba tsohle+ ba li utloe* ebe ke hona bofelo bo tlang.

15 Ka hona, ha le bona ntho e nyonyehang le e senyang e le sebakeng se halalelang joalokaha moprofeta Daniele a boletse,+ (ea balang boprofeta boo a bo utloisise hantle) 16 ba leng Judea ba balehele lithabeng.+ 17 Monna ea ka holim’a ntlo a se ke a theoha ebe o kena ka tlung ea hae ho ea nka ntho leha e le efe 18 le ea tšimong a se ke a khutla ho ea nka seaparo sa hae. 19 Matsatsing ao, baimana le batsoetse ba tla ba malimabe. 20 Le ’ne le rapelle hore le se ke la tlameha ho baleha e le mariha kapa ka Sabatha 21 kaha nakong eo, ho tla ba le mahlomola a maholo.+ A kang ’ona ha a e-s’o be teng ho tloha ha lefatše le thehoa ho fihlela joale ebile ha a sa tla ba teng.+ 22 Ha e le hantle, ho ne ho se motho ea ka pholohang hoja matsatsi ao a se ke a fokotsoa. Empa a tla fokotsoa ka lebaka la bakhethoa.+

23 Haeba mang kapa mang a re ho lona: ‘Bonang, Kreste ke enoa!’+ kapa, ‘Ke eane!’ le se ke la mo kholoa.+ 24 Etsoe ho tla hlaha bo-Kreste le baprofeta ba bohata+ ’me ba tla etsa mehlolo e mengata e meholo hore haeba ho khoneha ba khelose+ esita le bakhethoa. 25 Le tle le hopole hore ke ile ka le lemosa. 26 Kahoo, haeba batho ba re ho lona: ‘O lefeelleng!’ le se ke la ea, kapa ba re: ‘O ka likamoreng!’ le se ke la ba kholoa.+ 27 Ha lehalima le benya ka bochabela le bonahala le ka bophirimela. Le ha Mor’a motho a e-ba teng* ho tla ba joalo.+ 28 Hohle moo ho nang le setopo, lintsu li tla bokana teng.+

29 Hang-hang ka mor’a mahlomola a matsatsi ao, letsatsi le tla fifala,+ khoeli e ke ke ea khanya, linaleli li tla oa leholimong le lintho tse maholimong li tla sisinyeha.+ 30 Pontšo ea Mor’a motho e tla bonahala leholimong. Lichaba tsohle* tsa lefatše li tla lla+ ’me li tla bona Mor’a motho+ a tla ka maru,* matla le khanya e kholo.+ 31 Terompeta e tla llela holimo ebe Mor’a motho o romela mangeloi a hae. A tla bokella bakhethoa ba hae ho tsoa likhutlong tse ’nè tsa lefatše,* ho tloha pheletsong e ’ngoe ea maholimo ho ea ho e ’ngoe.+

32 Ithuteng ka mohlala oa sefate sa feie.* Hang feela ha lekala la sona le lenyenyane le nolofala ’me le hlahisa makhasi, lea tseba hore lehlabula le haufi.+ 33 Ka tsela e tšoanang le lona ha le bona lintho tsena tsohle, le tsebe hore o haufi, o eme menyako.+ 34 Kannete kea le bolella hore lintho tsena tsohle li tla etsahala pele moloko ona o fela. 35 Leholimo le lefatše li tla nyamela empa mantsoe a ka ’ona a tla ba teng ho ea ho ile.+

36 Ha ho ea tsebang letsatsi leo kapa hora.+ Mangeloi a maholimong ha a le tsebe le Mora ha a le tsebe, ke Ntate feela ea le tsebang.+ 37 Ha Mor’a motho a e-ba teng,* ho tla tšoana le mehleng ea Noe.+ 38 Etsoe mehleng eo pele ho Moroallo, batho ba ne ba ja, ba noa, banna ba nyala le basali ba nyalisoa, ho fihlela letsatsing leo Noe a ileng a kena ka arekeng ka lona.+ 39 Ha baa ka ba elelloa ho fihlela Moroallo o fihla, o ba hohola kaofela.+ Ho tla ba joalo ha Mor’a motho a e-ba teng. 40 Mohlang oo banna ba babeli ba tla be ba le tšimong, e mong o tla nkoa, e mong a siuoe. 41 Basali ba babeli ba tla be ba sila leloaleng, e mong o tla nkoa, e mong a siuoe.+ 42 Kahoo, le lule le falimehile hobane ha le tsebe hore na Morena oa lona o tla ka letsatsi lefe.+

43 Empa hopolang hore haeba mong’a ntlo a ne a tsebile hore na lesholu le tla fihla ka nako efe bosiu,*+ a ka be a ile a lula a falimehile, a se ke a lumella hore ntlo ea hae e thuhuoe.+ 44 Kahoo, le lona le itokise+ hobane Mor’a motho o tla tla mohla le sa mo lebellang.

45 Hantle ke mang mohlanka ea tšepahalang le ea bohlale eo mong’a hae a mo khethileng hore a hlokomele bahlanka ba ntlo ea hae, a ba fe lijo tsa bona ka nako e tšoanetseng?+ 46 Mohlanka eo o tla thaba haeba mong’a hae a mo fumana a etsa joalo.+ 47 Kannete kea le bolella hore o tla mo khetha hore a hlokomele lintho tsohle tsa hae.

48 Empa haeba mohlanka eo a le khopo, o tla re ka pelong: ‘Mong’a ka oa lieha,’+ 49 ebe o otla bahlanka-’moho le eena, a je a be a noe le ba tsebahalang e le matahoa. 50 Mong’a hae o tla tla ka letsatsi leo a sa le lebellang le ka hora eo a sa e lebellang.+ 51 O tla mo fa kotlo e boima ho feta tsohle ebe o mo beha har’a baikaketsi. Ke hona moo a tla lla le ho tsikitlanya meno teng.+

25 ’Muso oa maholimo o ka tšoantšoa le baroetsana ba leshome ba ileng ba nka mabone a bona+ ’me ba tsoa ho ea khahlanyetsa monyali.+ 2 Ba bahlano e ne e le maoatla, ba bang ba bahlano ba le bohlale.+ 3 Ba maoatla ba ile ba nka mabone empa ba siea oli. 4 Ba bohlale bona ba nka oli ka libotlolo tsa bona hammoho le mabone a bona. 5 Ha monyali a lieha, ba otsela kaofela eaba baa robala. 6 Har’a bosiu batho ba hoeletsa ba re: ‘Monyali ke eo! Tsoang le mo khahlanyetse.’ 7 Eaba baroetsana bao kaofela baa tsoha ba lokisa mabone a bona.+ 8 Maoatla a re ho ba bohlale: ‘Re qhatsetseng oli ea lona hobane mabone a rona a tl’o tima.’ 9 Ba bohlale ba re: ‘E ka ’na ea se ke ea re lekana kaofela. Empa le ka ea ho ba e rekisang la ithekela eona.’ 10 Ha ba tloha ba e’o e reka, monyali a fihla. Baroetsana ba neng ba itokisitse ba kena le eena moketeng oa lenyalo+ ’me monyako oa koaloa. 11 Ka mor’a moo, baroetsana bane ba bang le bona ba tla ba re: ‘Mohlomphehi, Mohlomphehi, re bulele!’+ 12 A re ho bona: ‘Kannete ha ke le tsebe.’

13 Ka hona, le lule le falimehile+ hobane ha le tsebe letsatsi kapa eona hora.+

14 ’Muso oa maholimo o ka boela oa tšoantšoa le motho ea tl’o etela hole ebe o bitsa makhoba a hae o a siea le thepa ea hae.+ 15 O ile a fa makhoba a hae litalenta* ho ea ka bokhoni ba ’ona, a fa lekhoba le leng litalenta tse hlano, le leng tse peli, le leng e le ’ngoe eaba oa tsamaea. 16 Le ileng la fuoa litalenta tse hlano la tsamaea hang-hang ho ea hoeba ka tsona eaba le fumana tse ling tse hlano. 17 Le ileng la fuoa tse peli le lona la etsa tse ling tse peli. 18 Empa le ileng la fuoa e le ’ngoe feela la tloha ’me la cheka fatše la tsetela chelete* eo ea mong’a lona.

19 Ka mor’a nako e telele, mong’a makhoba ao a fihla ho tla lata chelete ea hae.+ 20 Eaba le fuoeng litalenta tse hlano le tlisa tse ling tse hlano le re: ‘Mong’a ka, u ile oa ntšiea le litalenta tse hlano. Bona, ke fumane tse ling tse hlano.’+ 21 Mong’a lona a re ho lona: ‘U entse hantle, uena lekhoba le molemo le le tšepahalang. U ile oa tšepahala linthong tse seng kae. Ke tla beha lintho tse ling tse ngata taolong ea hao.+ Thaba le mong’a hao.’+ 22 Ka mor’a moo, lekhoba le fuoeng litalenta tse peli la re: ‘Mong’a ka, u ile oa ntšiea le litalenta tse peli. Bona, ke fumane tse ling tse peli.’+ 23 Mong’a lona a re ho lona: ‘U entse hantle, uena lekhoba le molemo le le tšepahalang. U ile oa tšepahala linthong tse seng kae. Ke tla beha lintho tse ling tse ngata taolong ea hao. Thaba le mong’a hao.’

24 Qetellong lekhoba le fuoeng talenta e le ’ngoe la re: ‘Mong’a ka, kea tseba hore u motho ea thata, ea kotulang moo a sa jalang, ea bokellang moo a sa olosang.+ 25 Kahoo, ke ile ka tšoha eaba ke tsetela talenta ea hao. Ke ena kea e khutlisa.’ 26 Mong’a lona a re ho lona: ‘Uena lekhoba le se nang thuso,* le botsoa, akere u tsebile hore ke kotula moo ke sa jalang ebile ke bokella moo ke sa olosang? 27 Joale he, u ka be u ile oa isa chelete* ea ka bankeng ebe ha ke khutla ke e fumana e e-na le tsoala.’

28 Eaba o re: ‘Mo amoheng talenta eo le e fe ea nang le tse leshome+ 29 kaha e mong le e mong ea nang le lintho tse itseng o tla fuoa tse ling e le hore a be le tse ngata. Empa ea se nang letho o tla amohuoa le lintho tseo a nang le tsona.+ 30 Lahlelang lekhoba lena le se nang thuso ka ntle lefifing. Ke hona moo le tla lla le ho tsikitlanya meno teng.’

31 Ha Mor’a motho+ a fihla ka khanya ea hae a e-na le mangeloi ’ohle,+ o tla lula teroneng ea hae e hlomphehang. 32 Lichaba tsohle li tla bokelloa ka pel’a hae ’me o tla arola batho lihlopha tse peli, feela joalokaha molisa a arola linku ho lipoli. 33 O tla beha linku+ ka letsohong la hae le letona, lipoli ka ho le letšehali.+

34 Morena o tla re ho ba ka letsohong le letona: ‘Tloong, lona ba hlohonolofalitsoeng ke Ntate, le je lefa la ’Muso oo le o lokiselitsoeng ho tloha ha lefatše le thehoa. 35 Ke ile ka lapa, la mpha lijo, ka nyoroa la mpha metsi. Ke ne ke le moeti eaba lea nkamohela.+ 36 Ha ke ne ke hlobotse* la mpha liaparo,+ ha ke kula la ntlhokomela, ha ke le teronkong la tl’o mpona.’+ 37 Ba lokileng ba tla re ho eena: ‘Morena, ke neng re ileng ra u bona u lapile, ra u fepa, kapa u nyoriloe ra u fa metsi?+ 38 Ke neng u neng u le moeti eaba rea u amohela kapa u hlobotse eaba re u fa liaparo? 39 U kutse neng kapa u ne u le teronkong neng ’me ra ea re il’o u bona?’ 40 Morena o tla re ho bona: ‘Kannete ke re ho lona, ha le etselitse e mong oa ba banyenyane bana bao e leng bana beso lintho tsena, le ’na le nketselitse tsona.’+

41 O tla re ho ba ka letsohong le letšehali: ‘Tlohang pel’a ka+ lona ba rohakiloeng, le kene mollong o sa feleng*+ o lokiselitsoeng Diabolose le mangeloi a hae+ 42 hobane ke ile ka lapa eaba ha le mphe lijo, ka nyoroa eaba ha le mphe metsi. 43 Ha ke ne ke le moeti ha lea ka la nkamohela, ha ke hlobotse ha lea ka la mpha liaparo, ha ke kula ebile ke le teronkong, ha lea ka la ntlhokomela.’ 44 Le bona ba tla re: ‘Morena, ke neng re ileng ra u bona u lapile kapa u nyoriloe, u le moeti kapa u hlobotse, u kula kapa u le teronkong ’me ra se ke ra u sebeletsa?’ 45 O tla re ho bona: ‘Kannete ke re ho lona, ha le sa etsetsa e mong oa ba banyenyane bana lintho tsena, ha lea nketsetsa tsona.’+ 46 Batho bana ba tla felisetsoa ruri+ empa ba lokileng ba tla phela ka ho sa feleng.”+

26 Ha Jesu a qetile ho bua lintho tsena tsohle, a re ho barutuoa ba hae: 2 “Lea tseba hore matsatsi a mabeli ho tloha joale ho tla ba le Paseka+ ’me ho tla nehelanoa ka Mor’a motho hore a bolaeloe palong.”+

3 Joale baholo ba sechaba le baprista ba baholo ba bokana lebaleng la moprista ea phahameng ea neng a bitsoa Kaifase.+ 4 Ba rera+ ho tšoara Jesu ka bolotsana ebe baa mo bolaea. 5 Leha ho le joalo, ba re: “Re se ke ra mo tšoarela moketeng e le hore batho ba se ke ba etsa moferefere.”

6 Ha Jesu a le Bethani ka tlung ea Simone ea neng a kile a tšoaroa ke lepera,+ 7 mosali e mong ea nkileng botlolo ea alabastera e tšetseng oli e turu e nkhang hamonate a tla ho Jesu ’me a e tšela hloohong ea hae ha a ntse a lutse tafoleng. 8 Ha barutuoa ba bona taba ena ba halefa haholo ’me ba re: “Tšenyo e kaale ke ea eng? 9 Oli ena e ka be e rekisitsoe ka chelete e ngata ebe chelete eo e fuoa bafutsana.” 10 Jesu a hlokomela hore na ba bua ka’ng eaba o re: “Ke hobane’ng ha le nyahamisa mosali eo? O nketselitse ntho e ntle. 11 Le tla lula le e-na le bafutsana+ empa le ke ke la lula le e-na le ’na.+ 12 Ha mosali enoa a tšela oli ena e nkhang hamonate ’meleng oa ka, o ne a ntokisetsa lepato.+ 13 Kannete ke re ho lona, kae kapa kae moo litaba tsena tse monate tsa ’Muso li boleloang teng lefatšeng lohle, ketso ea mosali enoa le eona e tla boleloa e le hore a hopoloe ka eona.”+

14 E mong oa baapostola ba 12 ea bitsoang Judase Iskariota+ a ea ho baprista ba baholo a re:+ 15 “Le tla mpha eng ha nka le fa eena* hore le mo tšoare?”+ Ba mo tšepisa likotoana tsa silevera tse 30.+ 16 Kahoo, ho tloha ka nako eo a ’na a batla monyetla o motle oa ho ba fa eena.*

17 Ka letsatsi la pele la Mokete oa Mahobe a se Nang Tomoso,+ barutuoa ba tla ho Jesu ba re: “U batla hore re u lokisetse ho jella Paseka hokae?”+ 18 A re: “Kenang motseng le ee ho ’Nyeo le re ho eena: ‘Mosuoe o re: “Nako ea hore ke shoe e haufi. ’Na le barutuoa ba ka re tla ketekela Paseka ha hao.”’” 19 Barutuoa ba etsa kamoo Jesu a ba laetseng kateng ’me ba lokisetsa Paseka.

20 Ha letsatsi le likela,+ a lula tafoleng le barutuoa ba hae ba 12.+ 21 Ha ba ntse ba ja a re: “Kannete kea le joetsa, e mong oa lona o tl’o nthekisa.”*+ 22 Kaofela ba sareloa haholo ke taba ena eaba e mong le e mong o re: “Morena, na ke ’na?” 23 A re ho bona: “Ea kenyang letsoho la hae le ’na ka sekotlolong ke eena ea tla nthekisa.+ 24 Ke ’nete Mor’a motho o tla shoa feela joalokaha Mangolo a bolela+ empa ho malimabe motho ea mo rekisang.+ Ho ka be ho bile molemo ha motho eo a ne a sa tsoaloa.”+ 25 Judase ea neng a tl’o mo rekisa a re: “Rabi, na ke ’na?” Jesu a re ho eena: “E, ke uena.”*

26 Ha ba ntse ba ja, Jesu a nka bohobe, a rapela, a bo qhetsola,+ a bo fa barutuoa eaba o re: “Nkang, le je. Bohobe bona bo emela ’mele oa ka.”+ 27 Hape, a nka senoelo se tšetseng veine, a leboha Molimo, a ba fa sona a re: “Nkang le noe kaofela ha lona+ 28 kaha veine ena e emela mali+ a ka e leng ‘mali a selekane,’+ a tlang ho tšolloa molemong oa ba bangata+ hore ba tšoareloe libe.+ 29 Empa kea le bolella, nke ke ka hlola ke noa veine ena hape ho fihlela letsatsing leo ka lona ke e noang le lona e le ncha ’Musong oa Ntate.”+ 30 Qetellong, ka mor’a ho binela Molimo lithoriso,* ba tsoa ba ea Thabeng ea Mehloaare.+

31 Joale Jesu a re ho bona: “Kaofela ha lona le tla ntahla* ka lebaka la ntho e tla nketsahalla bosiung bona hobane Mangolo a re: ‘Ke tla otla molisa, linku li qhalane.’+ 32 Empa ka mor’a hore ke tsosoe, ke tla le etella pele ho kena Galilea.”+ 33 Eaba Petrose o re: “Le haeba ba bang kaofela ba u lahla* ka lebaka la ntho e tla u etsahalla, le ka mohla nke ke ka u lahla.”+ 34 Jesu a re ho eena: “Kannete ke re ho uena, bosiung bona, pele mokoko o lla u tla be u ntatotse hararo.”+ 35 Petrose a re ho eena: “Le haeba nka tlameha ho shoa le uena, ho hang nke ke ka u latola.”+ Barutuoa ba bang kaofela le bona ba bua ntho e tšoanang.

36 Joale Jesu a tla le barutuoa sebakeng se bitsoang Gethesemane+ ’me a re ho bona: “Lulang mona, ke ea mane ke e’o rapela.”+ 37 A tsamaea le Petrose le bara ba babeli ba Zebedea eaba o qala ho sareloa le ho khathatseha habohloko.+ 38 A re ho bona: “Ke saretsoe haholo hoo nka ’nang ka shoa. Lulang mona le falimehe le ’na.”+ 39 A ea pejana, a khumama sefahleho se shebile fatše, a rapela a re:+ “Ntate, haeba ho khoneha, senoelo sena+ se ke se mphete. Empa ho ke ho etsahale thato ea hao eseng ea ka.”+

40 A khutlela ho barutuoa eaba o ba fumana ba robetse. A re ho Petrose: “Le sitiloe ho falimeha le ’na hora e le ’ngoe?+ 41 Falimehang+ ’me le rapele le sa khaotse+ e le hore le se ke la oela molekong.+ Ho hlakile hore pelo e na le tabatabelo empa nama ea fokola.”+ 42 A tloha hape lekhetlo la bobeli eaba oa rapela o re: “Ntate, haeba ho ke ke ha khoneha hore senoelo sena se fete ntle le hore ke se noe, ho ke ho etsahale thato ea hao.”+ 43 A boela a tla eaba o ba fumana ba robetse hobane ba ne ba tšoeroe ke boroko. 44 Kahoo, a tsamaea a ba siea eaba o e’o rapela ka lekhetlo la boraro. A ’na a bua ntho e tšoanang. 45 Eaba o khutlela ho barutuoa o re ho bona: “Ka nako ee le robetse ebile le phomotse? Nako ea hore Mor’a motho a nehelloe baetsalibe e atametse. 46 Emang re tsamaee. Motho ea nthekisitseng o se a le haufi.” 47 Ha a sa ntse a bua, Judase, e mong oa baapostola ba 12, a fihla le letšoele le leholo la batho ba nkileng lisabole le melangoana ba tsoa ho baholo ba sechaba le baprista ba baholo.+

48 Joale Judase* o ne a itse ho bona: “Eo ke tla mo suna ke eena. Le mo tšoare.” 49 A ea a tobile ho Jesu a re: “Lumela, Rabi!” Eaba oa mo suna. 50 Empa Jesu a re ho eena: “Monn’a heso, u batla’ng moo?”+ Joale ba atamela eaba ba tšoara Jesu. 51 E mong oa ba neng ba e-na le Jesu a tsomula sabole ea hae eaba o khaola tsebe ea lekhoba la moprista ea phahameng.+ 52 Jesu a re ho eena: “Khutlisetsa sabole ea hao sebakeng sa eona+ kaha bohle ba loanang ka sabole ba tla bolaoa ka sabole.+ 53 Kapa u nahana hore nka sitoa ho kopa Ntate hore a mphe mangeloi a likete* hona joale?+ 54 Empa ha nka etsa joalo, Mangolo a reng ho tla etsahala ka tsela ee a ne a tla phethahala joang?” 55 Eaba Jesu o re ho letšoele: “Na ke lesholu ha e le moo le tla le nkile lisabole le melangoana ho tla ntšoara? Ke ne ke lula ke ruta ka tempeleng letsatsi le letsatsi+ empa ha lea ka la ntšoara.+ 56 Empa tsena tsohle li etsahetse hore mangolo a baprofeta a phethahale.”+ Barutuoa kaofela ba mo siea ba baleha.+

57 Batho ba ileng ba tšoara Jesu ba mo isa ho Kaifase+ moprista ea phahameng, moo bangoli le baholo ba neng ba bokane.+ 58 Empa Petrose a ’na a mo latela a le sebakana, ho ea fihla lebaleng la moprista ea phahameng. Ha a fihla a lula le bahlanka ba ntlo hore a bone hore na ho tla qetella ho etsahetse’ng.+

59 Baprista ba baholo le litho tsohle tsa Lekhotla le Phahameng la Bajuda* ba ne ba batla bopaki ba bohata boo ba ka qosang Jesu ka bona e le hore ba mo bolaee.+ 60 Empa ha baa ka ba bo fumana le hoja lipaki tsa bohata li ile tsa tla ka bongata.+ Hamorao ha tla tse peli tsa re: 61 “Monna enoa o itse a ka khona ho heletsa tempele ea Molimo a ba a e haha ka matsatsi a mararo.”+ 62 Moprista ea phahameng a ema a re ho eena: “U ikarabella ka ho re’ng? Na oa utloa hore na banna baa ba u qosa ka eng?”+ 63 Empa Jesu a thola.+ Moprista ea phahameng a re ho eena: “Ke u laela hore u ikane ka Molimo ea phelang u re bolelle hore na u Kreste Mora oa Molimo.”+ 64 Jesu a re ho eena: “E, ke eena.* Empa ke re ho lona: Ho tloha hona joale le tla bona Mor’a motho+ a lutse ka letsohong le letona la Molimo ea matla+ ’me a tla ka maru.”*+ 65 Joale moprista ea phahameng a tabola liaparo tsa hae a re: “O rohakile Molimo! Le ikutloetse ha a rohaka Molimo. Re sa hlokela’ng lipaki tse ling? 66 Lona le re’ng?” Ba re: “Ha a bolaoe!”+ 67 Eaba ba mo tšoela ka mathe sefahlehong+ ’me ba mo otla ka litebele.+ Ba bang ba mo otla lerameng+ ba re: 68 “Re profetele, uena Kreste. Ke mang ea u otlileng?”

69 Petrose o ne a lutse ka ntle lebaleng ha ngoanana* e mong a tla ho eena a re: “Le uena u ne u tsamaea le Jesu oa Mogalilea.”+ 70 Empa a hana ka pel’a bona kaofela a re: “Ha ke tsebe hore na u bua ka’ng.” 71 Ha a ea ntlong e keiting, ngoanana e mong a mo bona eaba o re ho ba teng moo: “Monna enoa o ne a e-na le Jesu oa Monazaretha.”+ 72 A hlapanya a ba a hana a re: “Monna eo ha ke mo tsebe!” 73 Ka mor’a nakoana ba emeng moo ba tla ho Petrose ba re: “Kannete le uena u e mong oa bona hobane le tsela eo u buang ka eona ea u paka.” 74 A hlapanya* a re: “Motho eo ha ke mo tsebe!” Hang-hang mokoko oa lla. 75 Petrose a hopola hore Jesu o ile a re: “Pele mokoko o lla, u tla be u ntatotse hararo.”+ Eaba o tsoela ka ntle o lla habohloko.

27 Hoseng, baprista bohle ba baholo le baholo ba sechaba ba rerisana hore ba bolaee Jesu.+ 2 Ba mo fasa, ba mo khanna eaba ba mo isa ho ’musisi Pilato.+

3 Joale ha Judase ea mo rekisitseng* a bona hore Jesu o ne a ahlotsoe, a itšoabela eaba o khutlisetsa likotoana tsa silevera tse 30 ho baholo le baprista ba baholo a re:+ 4 “Ke entse sebe ka ho rekisa* motho ea se nang molato.” Ba re: “Joale rona re kena kae? Ke taba ea hao.” 5 Eaba o akhela likotoana tsa silevera ka tempeleng, a tsamaea ’me a iphanyeha.+ 6 Empa baprista ba baholo ba nka likotoana tseo tsa silevera ba re: “Molao ha o lumelle hore li tšeloe ka polokelong ea matlotlo e halalelang hobane li khenathetse* mali a motho.” 7 Ka mor’a hore ba buisane, ba sebelisa chelete eo ho reka tšimo ea motho ea bopang ka letsopa, hore e be moo ba patelang balichaba teng. 8 Ka hona, tšimo eo ea bitsoa Tšimo ea Mali+ ho fihlela letsatsing lena. 9 Joale ha phethahala mantsoe a ileng a buuoa ke moprofeta Jeremia a reng: “Ba nka likotoana tsa silevera tse 30 e leng theko eo Baiseraele ba lumellaneng ho e patala bakeng sa hae, 10 ba fana ka tsona hore ba reke tšimo ea sebopi, ho ea kamoo Jehova* a neng a ntaetse kateng.”+

11 Jesu a ema ka pel’a ’musisi. ’Musisi a re ho eena: “Na u Morena oa Bajuda?” Jesu a re: “E, ke eena.”*+ 12 Empa ha aa ka a araba ha a ntse a qosoa ke baprista ba baholo le baholo.+ 13 Pilato a re ho eena: “Na oa utloa hore na ba u qosa ka lintho tse ngata hakae?” 14 Empa ha aa ka a mo araba leha e le ka lentsoe le le leng, hoo ’musisi a ileng a makala haholo.

15 Ha e le Paseka, ’musisi o ne a tloaetse ho lokollela sechaba motšoaruoa eo se mo batlang.+ 16 Ka eona nako eo, ba ne ba tšoere monna e mong oa senokoane ea tsebahalang. Lebitso la hae e ne e le Barabase. 17 Kahoo, ha ba bokane Pilato a re ho bona: “Le batla ke le lokollele mang, Barabase kapa Jesu eo ho thoeng ke Kreste?” 18 Pilato o ne a bona hore ba tlisitse Jesu ho eena hobane ba le mona. 19 Ha a ntse a lutse setulong sa kahlolo, mosali oa hae a mo romela molaetsa a re: “U se ke oa itšunya-tšunya litabeng tsa monna eo ea lokileng hobane ke lorile ka eena ’me toro eo e ne e le bohloko haholo.” 20 Empa baholo le baprista ba baholo ba susumeletsa sechaba ho kopa hore Barabase+ a lokolloe empa Jesu a bolaoe.+ 21 ’Musisi a boela a re ho sechaba seo: “Le batla ke le lokollele ofe ho baa ba babeli?” Sa re: “Barabase.” 22 Pilato a re ho bona: “Joale ke etse’ng ka Jesu eo ho thoeng ke Kreste?” Sechaba sohle sa re: “Ha a khokhotheloe palong!”*+ 23 A re: “Hobane’ng? O entse’ng e mpe?” Empa sa hoeletsa le ho feta sa re: “Ha a khokhotheloe palong!”*+

24 Ha Pilato a bona hore ha ho na letho leo a ka le etsang ebile ho tsoha moferefere, a nka metsi a hlapa matsoho ka pel’a sechaba eaba o re: “Ha ke na molato maling a motho enoa. Ke taba ea lona.” 25 Eaba batho kaofela ba re: “Mali a hae a be holim’a rona le bana ba rona.”+ 26 A ba lokollela Barabase empa a laela hore Jesu a shapuoe ka sephali+ ’me a fana ka eena ho masole hore a mo khokhothele palong.+

27 Joale masole a ’musisi a isa Jesu ha ’musisi ’me a bokella sehlopha sohle sa masole ho mo pota-pota.+ 28 Masole ao a mo hlobolisa seaparo se selelele, a mo apesa se sefubelu+ 29 eaba a loha korone ka meutloa a mo roesa eona ’me a mo fa lehlaka ka letsohong la hae le letona. A khumama ka pel’a hae, a mo soma a re: “Lumela, uena Morena oa Bajuda!” 30 Eaba a mo tšoela ka mathe,+ a nka lehlaka a mo otla ka lona hloohong. 31 Ha a qeta ho mo soma, a mo hlobolisa seaparo se sekareleta, a mo apesa liaparo tsa hae ’me a mo etella pele hore a e’o khokhotheloa palong.+

32 Eare ha masole a tsoa a fumana monna e mong oa Saerene ea bitsoang Simone. A qobella monna eo hore a jare palo eo Jesu a neng a tl’o khokhotheloa ho eona.*+ 33 Ha masole a fihla Golgotha, e bolelang Sebaka sa Lehata,+ 34 a mo fa veine e tsoakiloeng le nyooko* hore a e noe.+ Empa ka mor’a ho e latsoa, a hana ho e noa. 35 A mo khokhothela palong eaba a aba liaparo tsa hae ka ho lahla lotho+ 36 ’me a lula moo a mo kata. 37 Ka holim’a hlooho ea hae a beha boto e ngotsoeng hore na o qoselitsoe’ng. E ne e re: “Enoa ke Jesu Morena oa Bajuda.”+

38 Joale masholu a mabeli a ne a khokhothetsoe lipalong pel’a hae, le leng ka ho le letona, le leng ka ho le letšehali.+ 39 Batho ba fetang ka tsela ba mo nyefola,+ ba sisinya lihlooho ba re:+ 40 “U itse u tla heletsa tempele u be u e hahe ka matsatsi a mararo.+ Ipholose he! Haeba u mora oa Molimo, theoha palong eo u khokhothetsoeng ho eona!”*+ 41 Baprista ba baholo, bangoli le baholo le bona ba qala ho mo soma ba re:+ 42 “O pholositse ba bang, eena o sitoa ho ipholosa. Haeba ke Morena oa Iseraele,+ ha a theohe palong eo a khokhothetsoeng ho eona* ’me re tla lumela ho eena. 43 O tšepile Molimo, joale haeba Molimo oa mo rata, ha a mo pholose+ kaha o ile a re: ‘Ke Mor’a Molimo.’”+ 44 Esita le masholu a neng a khokhothetsoe lipalong tse pel’a hae a ile a mo rohaka joalo.+

45 Ka 12 motšehare* lefifi la aparela naha eohle ka lihora tse tharo.*+ 46 Hoo e ka bang ka hora ea boraro mantsiboea,* Jesu a hoeletsa a re: “Eli, Eli, lama sabakthani?” e bolelang: “Molimo oa ka, Molimo oa ka, u ntahletse’ng?”+ 47 Ha batho ba emeng moo ba utloa a cho joalo ba re: “Monna enoa o bitsa Elia.”+ 48 E mong oa bona a matha hang-hang eaba o nka seponche o se kenya ka har’a veine e bolila, a se hloma lehlakeng eaba oa mo fa hore a noe.+ 49 Empa ba bang kaofela ba re: “Mo tlohele re bone hore na Elia o tla tla a mo pholose.” 50 Jesu a boela a hoeletsa eaba oa shoa.*+

51 Kharetene ea sehalalelo+ ea taboha ka lehare+ ho tloha holimo ho ea tlase,+ lefatše la sisinyeha, mafika a petsoha. 52 Mabitla a buleha eaba litopo tse ngata tsa bahalaleli ba neng ba shoele* lia tsoa 53 ’me batho ba bangata ba li bona (Ka mor’a hore Jesu a tsosoe, batho ba neng ba le mabitleng ba kena motseng o halalelang). 54 Empa ha molaoli oa sesole le ba neng ba katile Jesu le eena ba bona tšisinyeho ea lefatše le lintho tse etsahalang, ba tšoha haholo ba re: “Kannete monna enoa e ne e le Mor’a Molimo.”+

55 Hape basali ba bangata ba neng ba felehelitse Jesu ha a tloha Galilea e le hore ba mo sebeletse, ba ne ba shebeletse ba le hojana.+ 56 Har’a bona ho ne ho e-na le Maria Magdalena, Maria ’mè oa Jakobo le Jose hammoho le ’mè oa Jakobo le Johanne.*+

57 Motšehare oa mantsiboea ha fihla monna e mong ea ruileng oa Arimathea, ea bitsoang Josefa, ea neng a fetohile morutuoa oa Jesu.+ 58 A ea ho Pilato a kopa setopo sa Jesu+ eaba Pilato o laela hore a se fuoe.+ 59 Josefa a nka setopo seo, a se phuthela ka lesela la line e hloekileng ea boleng bo botle+ 60 eaba o se beha ka lebitleng leo+ a neng a sa tsoa le cheka lefikeng. A beha lejoe le leholo monyako oa lebitla, a tsamaea. 61 Maria Magdalena le Maria e mong ba sala ba lutse moo ka pel’a lebitla.+

62 Letsatsing le hlahlamang e leng la Sabatha,*+ baprista ba baholo le Bafarisi ba bokana ka pel’a Pilato ba re: 63 “Mohlomphehi, re hopotse hore raleshano eane ha a sa ntse a phela o ile a re: ‘Ke tla tsosoa ka mor’a matsatsi a mararo.’+ 64 Laela hore lebitla la hae le katoe ho fihlela letsatsing la boraro e le hore barutuoa ba hae ba se ke ba mo utsoa+ eaba ba re ho batho: ‘O tsositsoe bafung!’ Joale leshano lena la ho qetela le tla ba lebe ho feta la pele.” 65 Pilato a re ho bona: “Nkang balebeli, le kate lebitla leo kahohle kamoo le ka khonang.” 66 Kahoo, ba ea ’me ba sireletsa lebitla ka ho tiisa lejoe le ho beha balebeli.

28 Mesong ea letsatsi la pele la beke ka mor’a Sabatha, Maria Magdalena le Maria e mong ba tla ho tla bona lebitla.+

2 Ka tšohanyetso ha e-ba le tšisinyeho e kholo ea lefatše hobane lengeloi la Jehova* le ne le theohile leholimong. La suthisetsa lejoe thoko eaba le lula holim’a lona.+ 3 Le ne le shebahala joaloka lehalima ’me liaparo tsa lona li le tšoeu joaloka lehloa.+ 4 Kaha balebeli ba ne ba tšaba lengeloi leo, ba thothomela ’me ba akheha.

5 Empa lengeloi la re ho basali bao: “Le se ke la tšoha, kea tseba hore le batla Jesu ea ileng a khokhotheloa palong.+ 6 Ha a eo mona. O tsositsoe bafung feela joalokaha a chulo.+ Tloong, le bone moo a neng a robetse teng. 7 Tsamaeang kapele le e’o bolella barutuoa ba hae hore o tsositsoe bafung. O se a ntse a le tseleng e eang Galilea.+ Le tla mo fumana moo. Le hopole litaba tseo ke le boleletseng tsona.”+

8 Kahoo, ba tloha lebitleng kapele ba thabile haholo empa ba tšohile, ba matha ho ea tlalehela barutuoa ba hae.+ 9 Jesu a kopana le bona eaba o re: “Lumelang!” Ba ea ho eena ’me ba mo khumamela, ba mo tšoara maoto. 10 Joale Jesu a re ho bona: “Le se ke la tšoha. Tsamaeang le tlalehele bana beso* e le hore ba ee Galilea, ba tla mphumana moo.”

11 Ha ba ntse ba le tseleng, ba bang ba balebeli+ ba ea motseng ’me ba tlalehela baprista ba baholo lintho tsohle tse neng li etsahetse. 12 Baprista ba baholo ba kopana le baholo ’me ba buisana eaba ba fa masole ao likotoana tsa silevera tse ngata ’me ba re: 13 “Le tle le re barutuoa ba hae ba ile ba tla bosiu ba mo utsoa le robetse.+ 14 Haeba ’musisi a ka utloa litaba tsena, re tla mo hlalosetsa hore na ho etsahetse’ng,* le se ke la tšoenyeha.” 15 Kahoo, masole a nka likotoana tsa silevera ’me a etsa joalokaha a ile a laeloa. Taba ena e hasitsoe hohle har’a Bajuda ho fihlela letsatsing lona lena.

16 Leha ho le joalo, barutuoa ba 11 ba ea Galilea+ thabeng moo Jesu a neng a itse ba kopane le eena teng.+ 17 Ha ba mo bona ba mo khumamela empa ba bang ba belaela hore na ehlile ke eena. 18 Jesu a atamela a bua le bona a re: “Ke filoe matla holim’a ntho e ’ngoe le e ’ngoe e leholimong le lefatšeng.+ 19 Ka hona, e-eang le etse batho ba lichaba tsohle barutuoa,+ le ba kolobetse+ ka lebitso la Ntate le la Mora le la moea o halalelang. 20 Le ba rute ho mamela lintho tsohle tseo ke le laetseng tsona.+ Ke na le lona ka matsatsi ’ohle ho fihlela lefatše* le fela.”+