Rebeka o ne a Batla ho Thabisa Jehova

Rebeka o ne a rata Jehova. Lebitso la monna oa hae e ne e le Isaka. Isaka le eena o ne a rata Jehova. Rebeka le Isaka ba kopane joang? Rebeka o ile a bontša joang hore o batla ho thabisa Jehova? A re ke re ithute ka eena.

Batsoali ba Isaka e ne e le Abrahama le Sara. Ba ne ba lula naheng ea Kanana ’me batho ba moo ba ne ba sa rapele Jehova. Empa Abrahama o ne a batla hore mora oa hae a nyale mosali ea neng a rapela Jehova. Kahoo, o ile a roma mohlanka oa hae, mohlomong Eliezere hore a il’o batlela Isaka mosali sebakeng se bitsoang Harane, moo ba bang ba beng ka Abrahama ba neng ba lula teng.

Eliezere o ile a tsamaea le bahlanka ba bang ba Abrahama. Ba ile ba tsamaea sebaka se selelele. Ba ile ba tla le likamele tse leshome tse neng li palamisitse lijo le limpho. Eliezere o ne a tla tseba joang hore a khethele Isaka mosali ofe? Ha Eliezere le bahlanka bao ba fihla Harane, ba ile ba emisa selibeng hobane Eliezere o ne a tseba hore batho ba ne ba tl’o kha metsi. O ile a rapela Jehova a re: ‘Haeba ke kōpa moroetsana hore a nkhelle metsi ’me a khella ’na le likamele tsa ka metsi, ke tla tseba hore eo ke mosali eo u mo khethileng.’

Rebeka o ile a tla selibeng. Bibele e re o ne a le motle haholo. Eliezere o ile a mo kōpa hore a mo khelle metsi ’me o ile a re: ‘Ho lokile. Ke tla u khella metsi ke be ke khelle le likamele tsa hao.’ Nahana feela! Likamele li noa metsi a mangata ha li nyoriloe, kahoo Rebeka o ile a tlameha hore a ’ne a khutlele hangata selibeng. Na ua bona hore o sebetsa ka thata joang moo setšoantšong?— Eliezere o ne a hlolletsoe ke kamoo Jehova a ileng a arabela thapelo ea hae kateng.

Eliezere o ile a fa Rebeka limpho tse ngata tse ntle. Rebeka o ile a re Eliezere le batho bao a neng a tsamaea le bona ba tle le eena habo. Eliezere o ile a hlalosa hore na ke hobane’ng ha Abrahama a ile a mo romela moo le kamoo Jehova a ileng a araba thapelo ea hae kateng. Lelapa labo Rebeka le ile la thaba ’me la lumela hore Isaka a nyale Rebeka.

Empa na u nahana hore Rebeka o ne a batla ho nyaloa ke Isaka?— Rebeka o ne a tseba hore Jehova ke eena ea rometseng Eliezere. Kahoo, ha ba habo Rebeka ba mo botsa hore na o batla ho ea Kanana ’me a nyaloe ke Isaka, o ile a re: ‘E ke batla ho ea.’ O ile a tsamaea le Eliezere hang-hang. Ha ba fihla Kanana o ile a nyaloa ke Isaka.

Ka lebaka la hore Rebeka o ile a etsa ntho eo Jehova a neng a batla hore a e etse, Jehova o ile a mo hlohonolofatsa. Lilemo tse ngata hamorao, Jesu o ile a hlaha lelapeng la hae! Haeba u etsisa Rebeka ’me u thabisa Jehova, le uena O tla u hlohonolofatsa.