Thuto ea 3
Rahaba o ne a Lumela ho Jehova
A re nke hore re motseng oa Jeriko. Jeriko e naheng ea Kanana ’me batho ba moo ha ba lumele ho Jehova. Mosali ea bitsoang Rahaba o lula moo.
Ha Rahaba e sa le ngoanana o ile a utloa lipale tsa kamoo Moshe a ileng a ntša Baiseraele Egepeta kateng ’me a arola Leoatle le Lefubelu. O ile a boela a utloa kamoo Jehova a ileng a ba thusa ho hlōla lintoa tseo ba neng ba li loana le lira tsa bona. Joale, o se a utloa hore Baiseraele ba hlomme liahelo tsa bona pel’a Jeriko!
Rahaba o ile a sireletsa lihloela hobane o ne a lumela ho Jehova
Mantsiboeeng a mang, Baiseraele ba babeli ba ile ba kena Jeriko ho tla hloela motse. Ba ile ba fihla ntlong ea Rahaba ’me a ba amohela. Bosiung boo, morena oa Jeriko o ile a utloa hore lihloela li teng motseng ’me li ntlong ea Rahaba. Eaba morena o romela banna ba hae ho ea li tšoara. Rahaba o ile a pata lihloela tseo tse peli marulelong a ntlo ea hae ’me o ile a re ho banna ba morena: ‘Lihloela li ne li le teng mona, empa li se li tsamaile. Haeba le ka tsamaea hona joale le ka ’na la li tšoara!’ Na ua tseba hore na ke hobane’ng ha Rahaba a ile a sireletsa lihloela tseo?— Hobane o ne a lumela ho Jehova ’me o ne a tseba hore Jehova o tla fa Baiseraele naha ea Kanana.
Pele lihloela li tsamaea ha Rahaba, li ile tsa mo tšepisa hore eena le ba lelapa labo ba tla sireletsoa ha Jeriko e felisoa. Na ua tseba hore ba ile ba re a etse eng?— Ba ile ba re: ‘Nka thapo ena e khubelu ’me u e leketlise fensetereng ea hao. Haeba u ka etsa joalo, bohle ba ka ntlong ea hao ba tla sireletseha.’ Rahaba o ile a etsa hantle seo lihloela li ileng tsa re a se etse. Na ua tseba hore na ho ile ha etsahala eng?—
Jehova o ile a sireletsa Rahaba le ba lelapa labo
Matsatsi a ’maloa ka mor’a moo, Baiseraele ba ile ba pota motse ba thōtse tu! Ba ile ba pota motse ka matsatsi a tšeletseng, hanngoe ka letsatsi. Empa ka letsatsi la bosupa, ba ile ba o pota ka makhetlo a supileng. Eaba baa hoeletsa. Jehova o ile a etsa hore mabota a motse a oe pu! fatše. Empa ho ile ha sala feela ntlo e nang le thapo e khubelu! Na ua e bona setšoantšong moo?— Rahaba le lelapa labo ba ile ba sireletsoa!
U ka ithuta eng ho Rahaba?— Rahaba o ne a lumela ho Jehova ka lebaka la lintho tse hlollang tseo a ileng a ithuta tsona ka eena. Le uena u ithuta lintho tse ngata tse hlollang ka Jehova. Na u lumela ho Jehova joaloka Rahaba?— Rea tseba hore u lumela ho eena!