Samuele o Ile a Lula a Etsa Lintho Tse Lokileng

Ho tloha ha Samuele e sa le moshanyana, o ile a lula tabernakeleng ’me a sebeletsa moo, e leng moo batho ba neng ba rapela Jehova teng. Na ua tseba hore ho tlile joang hore Samuele a lule tabernakeleng? Pele, a re ke re ithute ka ’mè oa hae, Anna.

Le hoja Anna a ne a batla ho ba le ngoana, o ile a lula nako e telele a sa mo fumane. O ile a rapela Jehova ’me a kōpa hore a mo thuse. O ile a tšepisa Jehova hore haeba a ne a ka fumana mora, mora eo oa hae o ne a tla lula tabernakeleng ’me a sebeletse moo. Jehova o ile a arabela thapelo ea hae ’me o ile a ba le mora. O ile a mo reha Samuele. Joalokaha Anna a ile a tšepisa, ha Samuele a le lilemo li tharo kapa li ’nè, o ile a mo isa tabernakeleng e le hore a sebeletse Molimo moo.

Eli e ne e le moprista ea phahameng tabernakeleng. Bara ba hae ba babeli le bona ba ne ba sebeletsa moo. U hopole hore tabernakele e ne e le ntlo ea Molimo moo batho ba neng ba mo rapela teng ’me batho ba ne ba sa lokela ho etsa lintho tse mpe moo. Empa bara ba Eli ba ne ba etsa lintho tse mpe haholo. Samuele o ile a bona seo ba neng ba se etsa. Na Samuele le eena o ile a etsa lintho tse mpe joaloka bara ba Eli?— Che, o ile a tsoela pele a etsa lintho tse lokileng, feela kamoo batsoali ba hae ba neng ba mo rutile kateng.

U nahana hore Eli a ka be a entse eng ka bara ba hae ba babeli?— A ka be a ile a ba khalemela. A ka be a sa ba lumella hore ba ’ne ba sebeletse ntlong ea Molimo. Empa Eli ha aa ka a etsa seo ’me Jehova o ile a halefela Eli le bara ba hae ba babeli. Jehova o ile a ba fa kotlo.

Bosiung bo bong ha Samuele a ntse a robetse, o ile a utloa ho na le motho ea mo bitsang, a re: ‘Samuele!’ O ile a ea a matha ho Eli, empa Eli a re: ‘Ha kea u bitsa.’ Sena se ile sa etsahala ka makhetlo a mang a mabeli. Ka mor’a lekhetlo la boraro, Eli o ile a bolella Samuele hore ha a ka utloa lentsoe hape, a re: ‘Ke kōpa u bue Jehova, ke mametse.’ Samuele o ile a etsa joalo. Eaba Jehova o re ho Samuele: ‘Bolella Eli hore ke tla fa ba lelapa la hae kotlo ka lebaka la lintho tse mpe tseo ba li entseng.’ Na u nahana hore ho ne ho le bonolo hore Samuele a bolelle Eli molaetsa oo?— Che, ho ne ho se bonolo. Empa le hoja Samuele a ne a tšohile, o ile a etsa seo Jehova a neng a mo boleletse sona. Seo Jehova a ileng a se bua se ile sa etsahala. Bara ba babeli ba Eli ba ile ba bolaoa ’me Eli le eena o ile a shoa.

Samuele ke mohlala o motle ho rōna. O ile a etsa lintho tse lokileng le hoja a ne a bona batho ba bang ba etsa lintho tse mpe. Uena? Na u tla tšoana le Samuele ’me u lule u etsa lintho tse lokileng? Haeba u etsa joalo, u tla thabisa Jehova le batsoali ba hao.