January

Morali oa Jafeta o ile a tsoa ho ea khahlanyetsa ntate oa hae. O ne a thabetse ho mo bona a khutla a hlotse ntoeng. O ne a thabile hoo a ileng a bina a ba a tantša. Mohlomong o ile a makatsoa ke seo ntate oa hae a ileng a se etsa le ho se bua. Ntate o ile a tabola liaparo tsa hae ’me a re: “Oho, morali oa ka! Ka sebele u entse hore ke kokobele.” O ile a bolella morali hore o entse tšepiso ho Jehova ’me e tl’o ama morali oa hae bophelo bohle ba hae. Tšepiso eo e ne e tl’o etsa hore a se ke a nyaloa kapa a be le bana. Empa hang-hang morali o ile a mo khothalletsa hore a phethahatse tšepiso eo a e entseng ho Jehova. Karabo ea hae e ne e bontša hore o kholisehile hore eng kapa eng eo Jehova a batlang hore a e etse e tla ba molemo. (Baahl. 11:34-37) Ha ntate oa hae a bona hore o na le tumelo, o ile a thaba haholo kaha o ne a tseba hore boikemisetso ba hae bo tla thabisa Jehova. Jafeta le morali oa hae ba ne ba tšepa Jehova ka ho feletseng ba bile ba tšepa tsela eo a etsang lintho ka eona. Ba ile ba mo tšepa esita le maemong a thata. Ba ne ba batla ho amoheloa ke Jehova ’me ba ikemiselitse ho etsa eng kapa eng ho finyella seo. w16.04 1:1, 2

Ka linako tse ling, u ka ’na oa utloisoa bohloko ke seo motsoalle kapa mong ka uena a se buileng. Mohlomong oa kula kapa u shoetsoe ke motho eo u mo ratang. Ho sa tsotellehe hore na u boemong bofe, mohlala oa Jobo o ka u khothatsa. (Jobo 1:18, 19; 2:7, 9; 19:1-3) Jobo o ne a sa tsebe hore na ke hobane’ng ha a aparetsoe ke mathata, empa o ile a ’na a mamella. Ke’ng e ileng ea mo thusa ho mamella? Ntho e ka sehloohong ke hore o ne a rata Jehova ebile a sa batle ho mo siteloa. (Jobo 1:1) Jobo o ne a batla ho khahlisa Molimo ka linako tsohle. Ho phaella moo, Jehova o ile a thusa Jobo hore a lemohe matla a hae ka hore a mo bolelle lintho tse hlollang tseo a li bopileng. Sena se ile sa kholisa Jobo hore Jehova o tla tlosa liteko tsa hae ka nako e loketseng. (Jobo 42:1, 2) ’Me ho ile ha fela ha e-ba joalo. Bibele e re Jehova o ile a tlosa mathata a Jobo ’me a phaella sohle seo a neng a e-na le sona habeli. Jobo o ile “a shoa, a tsofetse ’me a khotsofetse.”—Jobo 42:10, 17. w16.04 2:11, 13

Haeba re le “seli,” re tla nahana esale pele ka maemo a thata ao re ka ’nang ra tobana le ’ona. E le hore re “hloke molato,” ha re na ho nka lehlakore ha re iphumana re le maemong ao. Re lokela ho ba hlokolosi ha batho ba qala ba bua ka litaba tsa lipolotiki. Ka mohlala, ha re buisana le motho ka ’Muso oa Molimo, ha rea lokela ho tlatsana kapa hona ho hanyetsana le eena ka tsela eo a ikutloang ka eona ka mokha o itseng kapa moeta-pele ea itseng. Ho e-na le ho mo bolella ka boiteko boo batho ba bo etsang ho rarolla mathata, u lokela ho mo bontša hore na Bibele e re ’Muso oa Molimo o tla a rarolla joang. Haeba batho ba ngangisana ka lintho tse kang ho nyalana ha batho ba bong bo tšoanang kapa ho ntšoa ha mpa, ba bolelle seo Lentsoe la Molimo le se buang le hore u leka ho latela seo bophelong ba hao. Haeba motho a nahana hore melao e itseng e lokela ho felisoa kapa ho fetoloa, ha re kenelle tabeng eo ebile ha re leke ho mo fetola maikutlo. w16.04 4:8, 9

Re lokela ho etsa batho barutuoa, re ba kolobetse le ho ba ruta. Empa re lokela ho ea ho bona pele. Setsebi se seng sa Bibele se re: “Molumeli e mong le e mong o lokela ‘ho ea’ ho batho, ebang ba hole kapa ba haufi.” (Mat. 10:7; Luka 10:3) Jesu o lebeletse hore barutuoa ba hae ba etse’ng? Na o batla hore e mong le e mong a bolele ka tsela ea hae, kapa o batla hore ba bolele e le sehlopha? Kaha motho a le mong a ke ke a khona ho pakela “batho ba lichaba tsohle,” barutuoa ba hae ba ne ba tla lokela ho paka e le sehlopha. Ke sona seo Jesu a neng a se bolela ha a re barutuoa ba hae e be “batšoasi ba batho.” (Mat. 4:18-22) Jesu o ne a sa re motšoasi ka mong a itšoasetse litlhapi ka tsela ea hae. Ho e-na le hoo, o ne a re ba li tšoase ka matlooa. E le hore ba atlehe ho li tšoasa, ba ne ba lokela ho sebetsa hammoho e le sehlopha, le hona ka thata ’me ba hlophisehe.—Luka 5:1-11. w16.05 2:3, 4

Re lokela ho bala le ho ithuta Bibele kamehla e le hore re tsebe hore na Jehova o ikutloa joang ka taba e itseng. Ha re ntse re etsa joalo, re ka ipotsa: ‘See se nthuta’ng ka Jehova? Ke hobane’ng ha a ile a etsa tjee?’ Joaloka Davida, re boetse re lokela ho kopa Jehova hore a re thuse ho mo tseba hamolemo. Davida o ile a re: “Ntsebise litsela tsa hao, Jehova; nthute litsela tsa hao. Ntsamaise ’neteng ea hao ’me u nthute, etsoe u Molimo oa ka oa poloko. Ke tšepile uena letsatsi lohle.” (Pes. 25:4, 5) Ha re ithuta ntho e itseng ka Jehova, re ka nahana ka maemo ao re ka sebelisang seo ho ’ona. Na re ka e sebelisa ka lapeng, mosebetsing, sekolong, kapa tšimong? Ha re nahana ka boemo bo itseng ka ho khetheha, re tla nolofalloa ho tseba hore na Jehova o batla hore re e sebelise hokae. w16.05 3:9, 11

Jehova o file balebeli lethathamo la litšoaneleho tseo baholo ba lokelang ho ba le tsona. O lebeletse ho hoholo ho banna ba etellang pele ka phuthehong. (1 Tim. 3:2-7) Sena se re ruta hore phutheho ke ea bohlokoa ho Jehova. Bibele e re o e rekile “ka mali a Mora oa hae.” (Lik. 20:28) Kahoo, Jehova o batla hore baholo e be mehlala e metle ’me ba tla ikarabella ka tsela eo ba tšoarang litho tsa phutheho ka eona. O batla hore re ikutloe re sireletsehile boliseng ba bona. (Esa. 32:1, 2) Ha re bala litšoaneleho tsena, rea ithuta hore ka sebele Jehova oa re tsotella. Empa Bakreste bohle ba ka ithuta ho hong litšoanelehong tsena. Ka mohlala, Jehova o batla hore kaofela re be le kahlolo e molemo ’me re hlaphoheloe kelellong. (Bafil. 4:5; 1 Pet. 4:7) Ha baholo “e-ba mehlala ho mohlape,” re ka ithuta ho bona ’me ra etsisa “tumelo ea bona.”—1 Pet. 5:3; Baheb. 13:7. w16.05 5:8-10

E le hore lipelo tsa rona li se ke tsa thatafala, re lokela ho qoba mekhoa e mebe joaloka boikhohomoso, ho itloaetsa ho etsa sebe le ho haelloa ke tumelo. Haeba re se hlokolosi, lintho tsena li ka etsa hore re se ke ra mamela. (Dan. 5:1, 20; Baheb. 3:13, 18, 19) Sena ke se ileng sa etsahalla Morena Uzia oa Juda. (2 Likron. 26:3-5, 16-21) Qalong, Uzia o ne a mamela a bile a e-na le kamano e ntle le Molimo, eaba Molimo o mo fa matla. Empa “hang ha a le matla, pelo ea hae ea ikhohomosa.” O ile a ikhohomosa haholo hoo a ileng a leka ho chesa libano ka tempeleng le hoja a ne a tseba hore oo ke mosebetsi oa baprista feela. Ha baprista ba mo bolella hore o fositse, o ile a ba halefela! Jehova o ile a kokobetsa morena eo ea ikhohomosang ’me ea e-ba molepera bophelo bohle ba hae. (Liprov. 16:18) Haeba re ikhohomosa, re ka qala ho inka re phahametse batho ba bang ’me ra hlokomoloha likeletso tse tsoang ka Bibeleng.—Bar. 12:3; Liprov. 29:1. w16.06 2:3, 4

U ikutloa joang ka bara le baralib’abo rona ba tsoang linaheng tse ling? E ka ’na eaba ha oa tloaela puo ea bona, moaparo oa bona, tsela eo ba itšoarang ka eona le lijo tseo ba li jang. Na oa ba koekoetla ebe u qeta nako e ngata le batho bao u ba tloaetseng? U ikutloa joang ka baholo ba bacha lilemong kapa ba morabe o mong? Haeba re se hlokolosi, re ka ’na ra lumella lintho tsena hore li ame bonngoe ba rona kapa li bo senye. Re ka etsa’ng ho qoba mathata a kang aa? Pauluse o ile a eletsa Bakreste ba lulang motseng o ruileng oa Efese, o neng o e-na le batho ba litso tse fapaneng. (Baef. 4:1-3) O ile a bua ka litšobotsi tse kang boikokobetso, bonolo, mamello le lerato. Litšobotsi tsena li tšoana le lipilara tse kholo tse tšehetsang ntlo. w16.06 3:17, 18

Satane o batla hore re be makhoba a Maruo, eseng a Jehova. (Mat. 6:24) Batho ba qetang nako e ngata ba sebeletsa ho ba le chelete e ngata ba phela bophelo bo se nang morero. Hape ha baa thaba ’me ha ba na kamano e ntle le Molimo. (1 Tim. 6:9, 10; Tšen. 3:17) Ba boemong bo tšoanang le boo Jesu a buileng ka bona papisong ea hae ea mojali. Ha peo ea Lentsoe la Molimo e jetsoe “har’a meutloa . . . , litakatso tsa lintho tse ling kaofela lia hlasela ’me li bipetsa lentsoe, ’me e ba le sa beheng.” (Mar. 4:14, 18, 19) Le rona ena ha se nako ea ho ipokella ka maruo, kaha re haufi le bofelo ba tsamaiso ena ea lintho. Ha rea lokela ho lebella hore re tla pholoha le thepa leha e le efe ea rona nakong ea matšoenyeho a maholo, ho sa tsotellehe hore na ke ea bohlokoa hakae.—Liprov. 11:4; Mat. 24:21, 22. w16.07 1:5, 6

Ka le leng, mong’a tšimo ea morara o ile a tsohella ’marakeng ho ea hira batho ba tla sebetsa tšimong ea hae. Batho bao a ileng a ba fumana ba ile ba lumela moputso oo a neng a re o tla ba fa oona eaba ba qala ho sebetsa. Mong’a tšimo o ne a hloka basebetsi ba bang, kahoo o ile a ’na a khutlela ’marakeng motšehare ho ea batla ba eketsehileng, a tšepisa ho fana ka moputso o loketseng le ho bao a ba hirileng motšehare oa mantsiboea. Ha e e-ba shoalane, o ile a bokella basebetsi hore a tl’o ba lefa, eaba kaofela o ba fa moputso o lekanang, ho sa tsotellehe hore na ba sebelitse lihora tse ngata kapa hora e le ’ngoe feela. Ha ba hiriloeng pele ba hlokomela sena, ba ile ba tletleba. Mong’a tšimo o ile a re: ‘Na ha rea ka ra lumellana ka moputso oo? Na ha ke na tokelo ea ho fa basebetsi ba ka moputso oo ke batlang ho ba fa oona? Le mona hobane ke le seatla se bulehileng?’ (Mat. 20:1-15) Papiso ena ea Jesu e re hopotsa a mang a makhabane a Jehova ao Bibele e atisang ho bua ka ’ona, e leng ‘mosa oa hae o sa tšoanelang.’—2 Bakor. 6:1. w16.07 3:1, 2

Hona joale ke habohlokoa le ho feta hore re bolele litaba tse molemo tsa ’Muso, kaha bofelo bo haufi. (Mar. 13:10) Ka sebele Jehova o bontša mosa o sa tšoanelang ka hore ho boleloe litaba tse molemo. Re lokela ho hopola sena ha re etsa mosebetsi oa boboleli. Morero oa rona ha re etsa mosebetsi ona ke ho tlotlisa Jehova. Re ka tlotlisa Jehova ka hore re bolelle batho hore lintho tsohle tseo a tla re etsetsa tsona lefatšeng le lecha, o tla li etsa ka lebaka la mosa oa hae. Ha re ntse re bolella batho litaba tse molemo, re ka ba hlalosetsa hore ’Musong oa Kreste, batho bohle ba tla rua molemo sehlabelong sa thekollo ’me butle-butle ba phethahale. Bibele e re: “Pōpo le eona e tla lokolloa bokhobeng ba ho bola ’me e be le tokoloho e khanyang ea bana ba Molimo.” (Bar. 8:21) Sena se tla etsahala ka lebaka la mosa o sa tšoanelang oa Jehova. w16.07 4:17-19

Bibele ha e bolele ka ho toba hore na banyalani ba lokela ho etsa’ng ha ba kopanela liphate, empa e bontša hore ba lokela ho bontšana lerato le mofuthu. (Sefela 1:2; 2:6) Banyalani ba Bakreste ba lokela ho tšoarana ka mosa. Haeba re rata Molimo le balekane ba rona e le kannete, ha re na ho lumella letho ho senya tlamo ea rona ea lenyalo. Manyalo a mang a na le mathata kapa aa qhalana hobane molekane e mong a lemaletse ho sheba litšoantšo tse tsosang takatso. Motho ea lenyalong o lokela ho loantša tšekamelo ena kapa takatso leha e le efe ea ho kopanela liphate le motho eo e seng molekane oa hae. O lokela ho qoba esita le ho fana ka maikutlo a hore o thahasella motho e mong, kaha seo ha se bontše hore o rata molekane oa hae. Re lokela ho hopola hore Molimo o bona menahano le liketso tsa rona, kaha seo se tla matlafatsa boikemisetso ba rona ba ho lula re hloekile.—Mat. 5:27, 28; Baheb. 4:13. w16.08 2:7-9

Haeba Bakreste ba Kolose ba ne ba e-na le tsebo e nepahetseng, ba ne ba tla khona ‘ho tsamaea ka mokhoa o tšoanelang Jehova e le hore ba mo khahlise ka botlalo.’ Sena se ne se tla ba thusa ho tsoela pele ba “beha litholoana mosebetsing o mong le o mong o molemo,” haholo-holo oa ho bolela litaba tse molemo. (Bakol. 1:10) E le hore morapeli oa Jehova a atlehe tšebeletsong, o lokela ho ba le kemiso ea ho ithuta Bibele kamehla. Re lokela ho thusa liithuti tsa Bibele ho utloisisa ntlha ena. Re ka atleha ho thusa ba bang ho ba le kemiso ea ho ithuta Bibele haeba rona ka borona re kholisehile hore ke habohlokoa. Ha e le hantle, re lokela ho qala ka ho ba le eona ka borona. Kahoo, re ka ’na ra ipotsa: ‘Na ke khona ho fana ka likarabo tse thehiloeng Bibeleng ha mong’a ntlo a mpotsa lipotso tse thata kapa a e-na le maikutlo a fapaneng le a Mangolo? Hape, ha re bolella ba bang kamoo ho bala Bibele ho re thusitseng kateng, re ka ’na ra ba susumeletsa ho etsa se tšoanang ’me ea e-ba liithuti tse hloahloa tsa Mangolo. w16.08 4:3, 4

Re lokela ho hanela tšusumetso e mpe ea lefatše ea “lintho tse metseng ka matla.” Li akareletsa lithuto tsa bohata le lifilosofi, mekhoa e litšila e joaloka boitšoaro bo bobe ba ho kopanela liphate, ho tsuba, botahoa le ho sebelisa lithethefatsi. ’Me re lokela ho lula re loantša mefokolo ea rona le ho nyahama. (2 Bakor. 10:3-6; Bakol. 3:5-9) Na re ka atleha ho hlola lira tse matla joalo? E, re ka li hlola, empa re lokela ho loana. Pauluse o ile a etsa mohlala ka ralitebele oa mehleng ea boholo-holo ’me a re: “Tsela eo ke tobisang ho otla ha ka ka eona ke ka tsela ea hore ke se ke ka otla moea.” (1 Bakor. 9:26) Feela joalokaha ralitebele a loantša sera sa hae, le rona re lokela ho loantša lira tsa rona. Jehova oa re koetlisa ebile o re thusa hore re li loantše. Ka Lentsoeng la hae o fane ka litaelo tse ka re sireletsang. O boetse o re tataisa ka lingoliloeng tse thehiloeng Bibeleng, liboka le likopano. Na u sebelisa seo u ithutang sona? w16.09 2:2, 3

Jesu o ne a sa ichebe boeena. Ho e-na le hoo, o ne a amehile ka ho thusa batho kaha eo e ne e le eona thato ea Molimo. Kahoo, re lokela ho fetola moaparo oa rona haeba o ferekanya batho bao re ba pakelang. (Bar. 15:2) Batsoali ba Bakreste ba lokela ho ruta bana ba bona hore ba sebelise melao-motheo ea Bibele. Sena se akareletsa hore bona le bana ba bona ba apare ka tsela e hlomphehang e tla thabisa pelo ea Jehova. (Liprov. 22:6; 27:11) Batsoali ba ka behela bana mohlala o motle le ho ba ruta hore ba lokela ho hlompha Molimo ea halalelang eo re mo rapelang. E ka ba hantle hore batsoali ba bontše bana hore na ke hokae moo ba ka fumanang liaparo tse loketseng. Eseng feela tseo ba li ratang, empa tse tla ba nolofalletsa ho emela Jehova Molimo. w16.09 3:13, 14

Jesu o ne a finyella batho lipelo ha a ruta kaha o ne a rata Jehova a bile a rata Lentsoe la Molimo le batho. (Luka 24:32; Joh. 7:46) Batsoali le bona ba tla finyella bana lipelo haeba ba na le lerato le joalo. (Deut. 6:5-8; Luka 6:45) Kahoo batsoali, khothallang ho ithuta Bibele le lingoliloeng tsa rona. Thahasellang lintho tsa tlhaho ’me le bale lihlooho tse buang ka popo tse hlahang ka har’a lingoliloeng tsa rona. (Mat. 6:26, 28) Ha le etsa joalo, le tla eketsa tsebo ea lona ’me le tla ananela Jehova haholoanyane, e leng se tla le hlomella hore le rute bana ba lona. Ha ’nete ea Bibele e tebile pelong ea hao, u tla susumeletseha ho buisana le ba lelapa la hao ka eona. Buisanang ka eona ka linako tsohle, eseng feela ha le lokisetsa liboka kapa ha le tšoere borapeli ba lelapa. Ho feta moo, puisano ha ea lokela ho qobelloa, empa e lokela ho itlela feela e le karolo ea moqoqo oa letsatsi le letsatsi. w16.09 5:6, 7

Ho se khone ho utloisisa hantle seo Lentsoe la Molimo le se rutang ka puo e ’ngoe ho ka thefula kamano ea rona le Molimo. Lilemong tsa bo-401 ho ea ho 500 pele ho mehla ea Kreste, Nehemia o ile a tšoenyeha ha a hlokomela hore bana ba bang ba Bajuda ba neng ba khutletse Jerusalema ho tsoa Babylona ba ne ba sa tsebe ho bua Seheberu. Bana bao ba ne ba sa khone ho latela litaelo tsa Molimo ka ho feletseng kaha ba ne ba sa utloisise hantle melao ea hae. (Neh. 8:2, 8) Batsoali ba bang ba Bakreste ba sebeletsang naheng e ’ngoe ba hlokometse hore thahasello ea bana ba bona lithutong tsa Molimo e thefulehile. Hobane’ng? Ha re bala ka puo e ’ngoe, seo re ithutang sona se ka ’na sa se thopothele lipelong tsa rona hantle joalokaha re bala ka puo ea rona. Ho feta moo, ho se khone ho itlhalosa hantle ka puo e ’ngoe ho ka re khathatsa kelellong le maikutlong. Kahoo, ha re ntse re ikitlaetsa ho sebeletsa Jehova naheng e ’ngoe, re lokela ho sireletsa kamano ea rona le Molimo.—Mat. 4:4. w16.10 2:4-6

Tumelo ea Bokreste ke tšobotsi ea bohlokoa haholo. Ha se batho bohle ba nang le eona. (2 Bathes. 3:2) Leha ho le joalo, Jehova o file morapeli e mong le e mong oa hae “tumelo.” (Bar. 12:3; Bagal. 5:22) Batho bohle ba nang le eona ba lokela ho e ananela. Jesu Kreste o ile a re Ntate oa hae ea leholimong o sebelisa Mora oa hae ho hulela batho ho eena. (Joh. 6:44, 65) Ho ba le tumelo ho Jesu ho thusa motho hore a tšoareloe libe. Seo se boetse se bula monyetla oa ho thabela ho ba le kamano e ntle le Jehova ka ho sa feleng. (Bar. 6:23) Re entse’ng e le hore re be le tlhohonolofatso e babatsehang hakaale? Kaha re baetsalibe, ntho feela e re tšoanelang ke lefu. (Pes. 103:10) Empa Jehova o ile a bona hore re ka khona ho ba ba lokileng. Ka lebaka la mosa oa hae o sa re tšoaneleng, o ile a bula lipelo tsa rona e le hore re amohele litaba tse molemo. Kahoo, re ile ra qala ho ba le tumelo ho Jesu ’me ra ba le tšepo ea bophelo bo sa feleng.—1 Joh. 4:9, 10. w16.10 4:1, 2

Ha Pauluse a ngolla Bakreste-’moho le eena, o ne a ba babatsa. O ne a qetile lilemo a tsamaea le ba bang ba bona ’me a tseba mefokolo ea bona, empa o ile a bua ka makhabane a bona. Ka mohlala, Pauluse o ile a re Timothea ke “ngoana oa [hae] ea ratoang le ea tšepahalang Moreneng,” ea tla thusa Bakreste-’moho le eena. (1 Bakor. 4:17; Bafil. 2:19, 20) ’Me a bolella phutheho ea Korinthe hore Tite ‘ke mosebetsi-’moho le eena bakeng sa lithahasello tsa bona.’ (2 Bakor. 8:23) Ruri e tlameha ebe Timothea le Tite ba ile ba khothala haholo ha ba lemoha hore na Pauluse o ikutloa joang ka bona. Pauluse le Barnabase ba ile ba ipeha kotsing ka hore ba khutlele libakeng tseo ba neng ba ile ba hlaseloa ka mabifi ho tsona. Ka mohlala, le hoja ba ile ba hanyetsoa Lystra, ba ile ba khutlela teng ho ea khothatsa barutuoa ba bacha hore ba lule ba le matla tumelong. (Lik. 14:19-22) Ka mor’a hore Pauluse a tobane le letšoele le halefileng ha a le Efese, o ile a khothatsa barutuoa ba moo.—Lik. 20:1. w16.11 1:10, 11

Jehova o sebelisa “lekhoba le tšepahalang le le masene” le eteletsoeng pele ke Kreste, e leng “hlooho ea phutheho,” ho tataisa karolo e lefatšeng ea mokhatlo oa hae. (Mat. 24:45-47; Baef. 5:23) Ho tšoana le sehlopha se busang sa lekholong la pele la lilemo, lekhoba lena le latela tataiso e ka Lentsoeng le bululetsoeng la Molimo ’me le ea e hlompha. (1 Bathes. 2:13) Bibele e re laela hore re be teng libokeng kamehla. (Baheb. 10:24, 25) E re khothalletsa hore re be bonngoeng tumelong. Lentsoe la Molimo le re re lokela ho etelletsa ’Muso pele bophelong ba rona. (Mat. 6:33) Mangolo a boetse a totobatsa hore re na le boikarabelo le tokelo ea ho paka ka ntlo le ntlo, literateng, esita le ka tsela e sa reroang. (Mat. 28:19, 20; Lik. 5:42; 17:17; 20:20) Lentsoe la Molimo le laela baholo hore ba boloke phutheho e hloekile. (1 Bakor. 5:1-5, 13; 1 Tim. 5:19-21) Jehova o boetse o laela bohle ba ka mokhatlong oa hae hore ba hloeke nameng le moeeng.—2 Bakor. 7:1. w16.11 3:7, 8

Lilemo tse mashome pele Ntoa ea I ea Lefatše e qhoma, Charles Taze Russell le bo-mphato ba hae ba ile ba hlokomela hore likereke tsa Bokreste-’motoana ha li rute ’nete ea Bibele. Kahoo, ba ile ba etsa qeto ea ho se ikamahanye ka letho le bolumeli ba bohata. Ka November, 1879, Zion’s Watch Tower e ile ea totobatsa boemo ba bona, ha e re: “Kereke e ’ngoe le e ’ngoe e ipolelang hore ke moroetsana ea hloekileng ea tl’o nyaloa ke Kreste, empa bonneteng e tšehetsa lefatše (kapa sebata), ka mangolo re e bitsa seotsoa,” kapa Babylona e Moholo. (Tšen. 17:1, 2) Batho ba hlomphang Molimo ba ne ba tseba seo ba lokelang ho se etsa. Ba ne ba ke ke ba lebella hore Molimo a ba hlohonolofatse haeba ba tsoela pele ho tšehetsa bolumeli ba bohata. Ka lebaka leo, ba bangata ba ile ba ngola mangolo a ho itokolla likerekeng. w16.11 5:2, 3

Na u kile oa bala Baroma 8:15-17 e le ho ikhopotsa lefu la Jesu selemo le selemo? Mohlomong ho joalo. Ntlha e ka sehloohong litemaneng tsena ke hore Bakreste baa tseba hore ba tlotsitsoe hobane moea o halalelang o paka le moea oa bona. Bakreste ba tlotsitsoeng ke bona bao ka ho khetheha ho buuoang le bona khaolong ena. Ba amohela “moea” o halalelang joaloka ba ‘letetseng ho nkeloa ka lapeng e le bara, tokollo ’meleng ea bona.’ (Bar. 8:23) E tla ba bara ba Molimo leholimong. Ka mor’a hore ba kolobetsoe, Molimo o ile a sebelisa thekollo molemong oa bona, a ba tšoarela libe ’me a ba nka e le bara ba hae ba moea ba lokileng. (Bar. 3:23-26; 4:25; 8:30) Leha ho le joalo, Baroma khaolo ea 8 e boetse e sebetsa le ho ba nang le tšepo ea ho phela lefatšeng hobane ka tsela e itseng Molimo o ba nka ba lokile. w16.12 2:1-3

Jesu o ne a bolela’ng ha a re: “Le ka mohla le se ke la tšoenyeha”? O ne a sa bolele hore bahlanka ba Molimo ba ke ke ba tšoenyeha. Empa Jesu o ne a hlokomelisa barutuoa ba hae hore ho tšoenyeha ho feteletseng ha ho rarolle mathata. Letsatsi ka leng le na le matšoenyeho a lona. Kahoo, ha rea lokela ho tšoenyeha ka lintho tse ileng tsa etsahala nakong e fetileng kapa ka bokamoso. Haeba Mokreste a nahana ho feta tekano ka mathata a ka ’nang a mo hlahela, a ka tšoenyeha ho sa hlokahale. Leha ho le joalo, ha oa lokela ho tšoenyeha ka lintho tseo u se nang bonnete ba tsona. Hobane’ng? Hobane ka linako tse ling boemo bo ka ’na ba se ke ba e-ba bobe joalokaha re ne re nahanne. Hape, ha ho boemo bo ka hlolang Molimo eo re lahlelang matšoenyeho a rona ho eena. U ka kholiseha hore Molimo o tla putsa bahlanka ba hae le hore a ka ba thusa ho sebetsana le matšoenyeho a bona a nakong e fetileng, a hona joale esita le a nakong e tlang. w16.12 3:13, 16

Ha Morena Saule oa Iseraele a qala ho busa, o ne a ikokobelitse a bile a hlompheha. (1 Sam. 9:1, 2, 21; 10:20-24) Empa ka mor’a nakoana a qalile ho busa, o ile a etsa lintho tse ngata tse bontšang hore o ne a se a ikhohomosa. Ha moprofeta oa Molimo Samuele a lieha ho fihla Gilgale, Saule o ile a fela pelo. Bafilista ba ne ba itokisetsa ntoa ’me Baiseraele ba fetohela Saule. E tlameha ebe o ile a nahana a re: ‘Ke tlameha ho etsa ho hong ka potlako.’ Kahoo o ile a etsetsa Molimo sehlabelo, e leng ntho eo a neng a sa lumelloa ho e etsa. Jehova ha aa ka a thabela seo. (1 Sam. 13:5-9) Ha Samuele a fihla Gilgale, o ile a khalemela Saule. Ho fapana le hore Saule a amohele khalemelo, o ile a ipehela mabaka, a ba a nyenyefatsa phoso eo a e entseng. (1 Sam. 13:10-14) Ka mor’a moo, ho ile ha etsahala lintho tse ngata tse mpe hoo qetellong Saule a ileng a tlosoa boreneng ’me Jehova a mo lahla. (1 Sam. 15:22, 23) Le hoja Saule a qalile lintho hantle, o ile a ba le qetello e bohloko.—1 Sam. 31:1-6. w17.01 3:1, 2

Davida e ne e le monna ea tšepahalang. Leha ho le joalo, o ile a etsa sebe se tebileng. O ile a etsa bofebe le Bathe-sheba. (2 Sam. 11:1-21) Davida o ne a ke ke a fetola seo a se entseng. Hape o ne a ke ke a qoba liphello tsa sebe sa hae. O ne a tla tobana le tse ling tsa liphello tseo bophelo bohle ba hae. (2 Sam. 12:10-12, 14) Kahoo, o ne a lokela ho ba le tumelo le ho tšepa hore ha a ka baka e le kannete, Jehova o ne a tla mo tšoarela a be a mo thuse ho mamella liphello tseo tse bohloko. Kaofela ha rona re baetsalibe ’me re etsa liphoso. Liphoso tse ling li mpe haholo hoo ka linako tse ling re ke keng ra khona ho li lokisa. Re tla tlameha ho phela le liphello tsa tsona. (Bagal. 6:7) Empa re kholisehile hore haeba re baka e le kannete, Jehova o tla re thusa ho sebetsana le mathata esita le a bakiloeng ke liphoso tsa rona.—Esa. 1:18, 19; Lik. 3:19. w17.01 1:10-12

Boinyenyefatso bo re thusa hore re etse liqeto ka bohlale le hoja re ke ke ra khona ho laola maemo a mang kapa ho tseba hore na lintho li tla fella joang. Ka mohlala, haeba re kenela tšebeletso ea nako e tletseng, ho tla etsahala’ng ka rona ha re ka kula? Re tla etsa joang ha batsoali ba rona ba hloka thuso? Re tla hlokomeloa ke mang ha re se re holile? Re ka se fumane likarabo tsa lipotso tsena, leha re ka rapela kapa ra etsa lipatlisiso. Ho tšepa Jehova ho tla re thusa hore re tlohelle lintho matsohong a hae. Ka mor’a ho etsa lipatlisiso, ho fumana likeletso ho ba bang le ho rapela, re tla latela tataiso eo Molimo a fanang ka eona. (Moek. 11:4-6) Ha re entse joalo, Jehova o tla hlohonolofatsa liqeto tsa rona kapa a re tataise ka tsela e ’ngoe.—Liprov. 16:3, 9. w17.01 4:14

Adama le Eva ba ne ba lokela ho etsa qeto. Na ba ne ba tla mamela Jehova, kapa ba ne ba tla mamela noha? Ba ile ba khetha ho se mamele Molimo. Ka ho etsa joalo, ba ile ba kopanela bofetoheling le Satane. Ba hana hore Jehova e be Ntate oa bona ’me ba lahla puso ea hae e neng e ba sirelelitse. (Gen. 3:6-13) Kaha ba ne ba fetohetse Jehova, Adama le Eva ba ile ba lahleheloa ke bophelo bo phethahetseng. Ho feta moo, bofetoheli bona bo ile ba baka karohano pakeng tsa bona le Jehova hobane ‘mahlo a hae a hloekile haholo hore a ka talima se sebe.’ Kahoo, ‘ha a khone ho talima khathatso.’ (Hab. 1:13) Haeba a ne a ile a bo lumella, bokamoso ba libopuoa tsohle tse leholimong le tse lefatšeng, bo ne bo tla ba kotsing. Ka holimo ho tsohle, haeba Molimo a ne a sa etsa letho ka sebe se etsahetseng Edene, ho ne ho tla tsoha lipelaelo ka bobusi ba hae. Empa Jehova o khomarela litekanyetso tsa hae. Ha ho mohla a li fetohelang. (Pes. 119:142) Kahoo, ho ba le bolokolohi ba ho ikhethela ho ne ho sa fe Adama le Eva lebaka la ho se mamele molao oa Molimo. Ka lebaka la bofetoheli ba bona, ba ile ba shoa ’me ba khutlela leroleng leo ba neng ba ntšitsoe ho lona.—Gen. 3:19. w17.02 1:8, 10, 11

Ho tloha ha Jesu a qala tšebeletso ea hae, o ile a lumella Mangolo hore a mo tataise. Le mantsoeng a hae a ho qetela pele a shoa, o ile a qotsa mantsoe a boprofeta bo mabapi le Mesia. (Mat. 27:46; Luka 23:46) Ho fapana le hoo, baeta-pele ba bolumeli ba mehleng eo ba ne ba sa mamele Lentsoe la Molimo moo le sa lumellaneng le meetlo ea bona. Ha a bua ka bona Jesu o ile a qotsa mantsoe a Bibele a boletsoeng ke moprofeta Esaia ’me a re: “Sechaba sena se ntlhompha ka melomo, empa leha ho le joalo lipelo tsa sona li suthetse hōle le ’na. Ke ha lefeela hore ebe se ntse se nthapela, hobane se ruta litaelo tsa batho e le lithuto.” (Mat. 15:7-9) Jesu o ile a sebelisa Lentsoe la Molimo ha a ruta le ha a etsa lintho tse ling. Ha baeta-pele ba bolumeli ba mo hanyetsa, ha aa ka sebelisa bohlale ba hae kapa boiphihlelo ba hae ho ba araba, empa o ile a sebelisa Mangolo.—Mat. 22:33-40. w17.02 3:18, 19

Lipaki Tsa Jehova li fa basebeletsi ba sechaba tlhompho e ba lokelang ho ea ka molao oa sebaka seo ba lulang ho sona. Re etsa lintho tseo ba reng re li etse. Leha ho le joalo, Bibele ke eona e re thusang ho tseba hore na re ba mamela ho fihlela boholeng bofe. Re ke ke ra ba mamela haeba ba re re etse lintho tse etsang hore re tlole melao ea Molimo, joaloka ho nka karolo lipolotiking. (1 Pet. 2:13-16) Bahlanka ba Jehova ba nakong e fetileng ba ile ba re behela mohlala tabeng ea ho hlompha balaoli. Ha ’Muso oa Roma o ntša taelo ea hore ho baloe batho, Josefa le Maria ba ile ba mamela taelo eo. Ba ile ba ea Bethlehema le hoja Maria a ne a se a le haufi le ho ba le ngoana oa hae oa pele. (Luka 2:1-5) Hamorao, ha ho ne ho thoe Pauluse o entse tlolo ea molao, o ile a ipuella ka tlhompho ho Morena Heroda Agripa le ho Festase e leng ’musi oa profinse ea Roma ea Judea.—Lik. 25:1-12; 26:1-3. w17.03 1:9, 10

Kaha Baiseraele ba ile ba itloaetsa mekhoa e fosahetseng ea Bakanana, Jehova ha aa ka a ba sireletsa lireng tsa bona. (Baahl. 2:1-3, 11-15; Pes. 106:40-43) E tlameha ebe ho ne ho le thata hore malapa a ratang Jehova a lule a tšepahala ho eena lilemong tseo tse boima. Leha ho le joalo, ho na le batho ba ileng ba lula ba tšepahala ba tlalehiloeng ka Bibeleng, ba kang Jafeta, Elkana, Anna le Samuele. Ba ne ba ikemiselitse ho khahlisa Jehova. (1 Sam. 1:20-28; 2:26) Batho ba mehleng ena ba nahana joaloka Bakanana le ho etsa lintho joaloka bona. Ba rata boitšoaro bo bobe, ntoa le chelete. Ke kahoo Jehova a re lemosang ka ho hlaka. O batla ho re sireletsa feela joalokaha a ne a batla ho sireletsa Baiseraele tšusumetsong e mpe ea Bakanana. Na re ka ithuta liphosong tsa bona? (1 Bakor. 10:6-10) A re etseng sohle seo re ka se khonang ho qoba tšusumetso e mpe ea batho ba re potolohileng. (Bar. 12:2) Na re tla fela re etse joalo? w16.04 1:4-6

Ha re tobana le mathata, ke habohlokoa ho batla keletso ka Bibeleng ’me re batle thuso ho Jehova ka thapelo. Jehova a ka re fa makhabane a ka re thusang hore re etse liqeto tse tumellanong le thato ea hae. Ipotse: ‘Na see se tla fana ka bopaki ba hore ke fela ke rata Jehova? Na lelapa la ka le tla thaba? Hona na ho tla bontša hore ke na le mamello le mosa?’ Jehova ha a re qobelle hore re mo sebeletse kapa re mo rate. O hlompha boikarabello ba rona le tokelo eo a re fileng eona ea hore re “ikhethele” hore na re tla mo sebeletsa kapa che. (Josh. 24:15; Moek. 5:4) Empa o batla hore re phelele liqeto tseo re li entseng tse tumellanong le tataiso ea hae. Ha re tšepa tsela eo Jehova a etsang lintho ka eona le melao eo a re fang eona, re tla khona ho etsa liqeto ka bohlale ’me re tla tsitsa litseleng tsa rona.—Jak. 1:5-8; 4:8. w17.03 2:17, 18