January

Ha re ntse re atamela bofelo, ba khopo ba tsoela pele ho “hlōmela joaloka limela.” (Pes. 92:7) Ha se ntho e makatsang hore ebe batho ba bang ha ba rate ho etsa lintho tseo Molimo a reng li nepahetse. Moapostola Pauluse o ile a re ho Bakreste: “Le be bana mabapi le bobe; leha ho le joalo le be ba hōlileng ka ho feletseng matleng a kutloisiso.” (1 Bakor. 14:20) Re ka etsa joalo joang? Karabo e fumanoa temaneng ea kajeno ea letsatsi. E re: “Ba batlang Jehova ba ka utloisisa ntho e ’ngoe le e ’ngoe.” Taba ena e bolela hore ba ka utloisisa ntho e ’ngoe le e ’ngoe e hlokehang bakeng sa hore ba etse thato ea Jehova. Liproverbia 2:7, 9 e re Jehova “o tla bolokela ba lokileng bohlale bo sebetsang.” Kahoo, re “tla utloisisa ho loka le kahlolo le bokhabane, tsela eohle ea se molemo.” Noe, Daniele le Jobo ba ile ba e-ba le bohlale boo. (Ezek. 14:14) ’Me ho joalo le ka batho ba Molimo mehleng ena. Ho thoe’ng ka uena? E le hore u ka “utloisisa ntho e ’ngoe le e ’ngoe” e hlokehang bakeng sa hore u khahlise Jehova, u lokela ho mo tseba. Ntho ea bohlokoa ke ho ba le tsebo e nepahetseng ka eena. w18.02 8 ¶1-3

Jehova ha a batle hore mang kapa mang a qobelloe ho kolobetsoa, ho sa tsotellehe hore na re ithuta Bibele le eena, re batsoali kapa re litho tsa phutheho. (1 Joh. 4:8) Ho e-na le ho etsa joalo, ha re ntse re ithuta le bona, re lokela ho ba bontša bohlokoa ba hore ba matlafatse kamano ea bona le Molimo. Haeba motho eo a rata lintho tseo a ithutileng tsona a bile a labalabela ho jara joko ea ho ba Mokreste, o tla kolobetsoa. (2 Bakor. 5:14, 15) Motho ha aa beheloa lilemo tsa ho kolobetsoa kaha batho ha ba tšoane. Letsatsi leo motho a kolobelitsoeng ka lona ke le thabisang ka ho fetisisa. Hape ke nako ea hore motho a nahane ka ho teba ka kolobetso le hore na e bolela’ng. Motho o lokela ho sebetsa ka thata hore a phelele boitlamo ba hae ba ho inehela ho Molimo. Ke kahoo Jesu a ileng a tšoantša boitlamo bona le joko. Balateli ba Jesu ha baa lokela ho “iphelela, empa ba phelele ea ileng a ba shoela ’me a tsosoa.”—2 Bakor. 5:15; Mat. 16:24. w18.03 6-7 ¶14-17

Na u kile oa ba lesisitheho ho amohela baeti? Haeba ho joalo, e ka ’na eaba u ile oa fetoa ke monyetla oa ho thaba le batho le ho ba le metsoalle ea sebele. Ha u amohela baeti u ke ke oa jeoa ke bolutu. Joale ke hobane’ng ha batho ba bang ba sa amohele baeti? Ho na le mabaka a ’maloa. Lebaka le leng ke hore bahlanka ba Jehova ba phathahane ebile ba na le boikarabelo bo bongata. Kahoo, ba bang ba re ha ba na nako le matla a lekaneng hore ba amohele baeti. Haeba ke tsela eo u ikutloang ka eona, e ka ’na eaba u lokela ho fetola tsela eo u sebelisang nako ea hao ka eona. Leka ho ipha nako e le hore u khone ho amohela baeti. Ho bohlokoa ho etsa joalo kaha Bibele e re re lokela ho amohela baeti. Kahoo, re lokela ho ipha nako ea ho amohela baeti. Re fokotse nako eo re e qetang re etsa lintho tseo e seng tsa bohlokoa. w18.03 16 ¶13-14

Har’a batho bohle ba kileng ba e-ba teng, Jesu Kreste ke mohlala o ka sehloohong oa motho ea nahanang lintho ka tsela eo Jehova a nahanang ka eona. Ha a le lefatšeng, o ile a bontša hore o batla ho etsisa ntate oa hae, Jehova. O ne a nahana le ho etsa lintho joaloka ntate oa hae, a bile a mamela melao ea Hae. (Joh. 8:29; 14:9; 15:10) Mohlala, bapisa tsela eo Esaia a ileng a hlalosa kamoo Jehova a utloelang batho bohloko kateng le tsela eo Mareka a hlalosang maikutlo a Jesu ka eona. (Esa. 63:9; Mar. 6:34) Na re etsisa Jesu ka hore re ikemisetse ho thusa batho ba hlokang thuso? Hape, na re etsisa Jesu ka hore re nke ho bolella batho ka ’Muso oa Molimo le ho ba ruta ka oona e le eona ntho ea bohlokoa bophelong ba rona? Ha re etsa joalo, re tla be re bontša hore re nahana ka tsela eo Jehova a nahanang ka eona le hore re na le kamano e ntle le eena. w18.02 21 ¶12

Ho thata ho holisa bana, haholo-holo mehleng ena. (2 Tim. 3:1-5) Ha bana ba hlaha, ha ba tsebe phapang pakeng ntho e nepahetseng le e fosahetseng. Le hoja ba e-na le matsoalo, a hloka ho koetlisoa. (Bar. 2:14, 15) Setsebi se seng sa Bibele se re lentsoe la Segerike le fetoletsoeng e le “taeo” le ka boela la bolela ho holisa ngoana hore e be motho e moholo ea nang le boikarabelo. Ha batsoali ba khalemela bana ka lerato, bana ba ikutloa ba sireletsehile. Baa hlokomela hore ho ba le bolokolohi ho na le meeli le hore ba tla khola litholoana tsa lintho tsohle tseo ba li etsang. Ho bohlokoa hore batsoali ba Bakreste ba kope Jehova hore a ba fe bohlale ba ho holisa bana. U se ke oa lebala hore mekhoa ea ho holisa bana e fapana ho latela moo ba holelang teng le hore e lula e fetoha. Leha ho le joalo, haeba batsoali ba mamela Jehova, ba ke ke ba lula ba ipotsa hore na ba holise bana joang. Hape ba ke ke ba itšetleha ka boiphihlelo kapa bohlale ba bona. w18.03 30 ¶8-9

Haeba u mocha oa Mokreste ea kolobelitsoeng,u se u ikarabella bakeng sa poloko ea hao le haeba u ntse u lula le batsoali ba hao. U lokela ho lula u hopola taba ena hobane ho tloha ha u kena lilemong tsa bocha u tla feta har’a mathata ao u sa a tloaelang. Morali’abo rona e mong ea lilemo li 18 o ile a re: “Ho bonolo hore ngoana a lule a tšepahalla Jehova leha a khesoa sekolong hobane feela a sa keteke matsatsi a tsoalo. Empa ha a se a le lilemong tsa bocha ’me litakatso tsa bocha li se li le matla, o lokela ho kholiseha hantle hore ho mamela melao ea Jehova ho tla mo thusa haholo.” Le batho ba kolobelitsoeng ba se ba ntse ba le baholo ba hlaheloa ke mathata ao ba sa a lebellang. Ke mathata a kang ho kula, ho sokola mosebetsi kapa mathata a lenyalo. Hore na re bacha kapa re baholo, kaofela ha rona re tla hlaheloa ke mathata a ka etsang hore ho be thata ho lula re tšepahalla Jehova.​—Jak. 1:12-14. w17.12 24 ¶4-5

Ke batho ba seng bakae ba kileng ba tšoaroa hampe joaloka Davida. Leha ho le joalo, ha ho mohla a kileng a hloea lira tsa hae. Ho e-na le hoo, o ile a re: “Tlohela bohale ’me u lese khalefo. U se ke ua iponahatsa u halefile hore feela u etse bobe.” (Pes. 37:8) Lebaka le ka sehloohong le etsang hore re ‘tlohele’ khalefo ke hore re batla ho etsisa Jehova hobane “ha aa re etsa ho ea ka libe tsa rōna.” (Pes. 103:10) Empa ho boetse ho na le melemo e meng ea ho “tlohela” khalefo. Khalefo e ka baka mathata a kang khatello e phahameng ea mali le bothata ba ho hema. E ka boela ea baka mathata a sebete, a manyeme le a tšilo ea lijo. Ha re halefile, ha se kamehla re khonang ho nahana hantle. Ka linako tse ling, ha re lula re halefile, re ka ba le bothata ba ho tetebela maikutlo. Ka lehlakoreng le leng, Bibele e re: “Pelo e nang le khutso ke bophelo ba sebōpuoa sa nama.” (Liprov. 14:30) Kahoo re ka etsa’ng hore qetellong re bope khotso le Bakreste-’moho le rona? Re lokela ho mamela keletso ea Bibele. w18.01 10 ¶14-15

Davida o ne a sa bolele hore a ke ke a shoa. Bibele e re Davida o ile a tsofala. Ka mor’a hore a shoe, o ile “a robala le baholo-holo ba hae ’me a patoa Motseng oa Davida.” (1 Mar. 2:1, 10) Joale mantsoe a ho Pesaleme ea 16:10 a bolela’ng? Libeke tse seng kae ka mor’a hore Jesu a tsosoe bafung, Petrose o ile a bua le Bajuda le batho bao e neng e sa tsoa ba Bakreste ka Pesaleme ea 16:10. (Lik. 2:29-32.) A re Davida o ile a shoa a ba a patoa. Batho ba neng ba mo mametse ba ne ba tseba taba eo hantle. Hape, ha ho moo Bibele e reng ba ile ba hana ha Petrose a re Davida “o ile a bona esale pele ’me a bolela malebana le tsoho” ea Mesia eo ba neng ba mo letetse. Petrose o ile a hatisa taba ka hore a qotse mantsoe a Davida a hlahang ho Pesaleme ea 110:1. (Lik. 2:33-36) Tsela eo Petrose a ileng a hlalosa Mangolo ka eona e ile ea thusa batho ba mo mametseng hore ba kholisehe hore Jesu e ne e le “Morena le Kreste.” Ha e le hantle, ba ile ba hlokomela hore Pesaleme ea 16:10 e phethahetse ha Jesu a tsosoa bafung. w17.12 10 ¶10-12

Kaha Sehlopha se Busang sea tšepahala ebile se masene, se sebelisa menehelo ka hloko. (Mat. 24:45) Barab’abo rona ba Sehlopha se Busang ba kopa Jehova hore a ba thuse ho etsa liqeto tse nepahetseng, ebe ba etsa meralo ea hore na chelete eo e ka sebelisoa hamolemo joang. (Luka 14:28) Lilemo hamorao, moapostola Pauluse o ile a amohela chelete e neng e tl’o thusa Bakreste ba futsanehileng ba Judea. O ile a etsa bonnete ba hore ba neng ba isa chelete eo baa tšepahala, “eseng feela mahlong a Jehova, empa hape le mahlong a batho.” (2 Bakor. 8:18-21) Mehleng ena mokhatlo o etsisa Esdrase le Pauluse ka ho sebelisa monehelo ka hloko. (Esdr. 8:24-33) Morao tjena, ho bile le lintho tse ngata tseo mokhatlo o ileng oa sebelisa chelete ho tsona. Mokhatlo o sheba litsela tseo ka tsona o ka bolokang chelete le ho nolofatsa maemo e le hore ka menehelo e teng, o ka finyella lintho tse ngata. w18.01 19-20 ¶12-13

Haeba re ratana re bile re le mosa, ho tla ba bonolo hore re tšoarelane. Ka mohlala, haeba Mokreste-’moho le rona a etsa kapa a bua lintho tse re utloisang bohloko, re ka leka ho hopola makhetlo ao rona re ileng ra utloisa ba bang bohloko ka ’ona. Rea thaba hore ebe Bakreste-’moho le rona bao re ileng ra ba utloisa bohloko ba ile ba re tšoarela. (Moek. 7:21, 22) Hape, re thaba haholo hore ebe Kreste o ile a ba mosa ho rona ’me a etsa hore re momahane. Kaofela ha rona re sebeletsa Molimo a le mong, re bolella batho molaetsa o tšoanang ebile re hlaheloa ke mathata a mangata a tšoanang. Ha re le mosa re bile re tšoarelana, re tla lula re momahane le ho lula re letetse moputso ka tjantjello. Ka Bibeleng ho na le mehlala e re hopotsang hore ho ba mona ho ka re sitisa ho fumana moputso. Ka mohlala, Kaine o ile a monela moen’ae Abele eaba oa mo bolaea. Kora, Dathane le Abirame le bona ba ile ba monela Moshe eaba ba qetella ba se ba mo hanyetsa. Morena Saule o ile a monela Davida a ba a leka ho mo bolaea. w17.11 27 ¶9-10

Baholo ba teng komiting ea boahloli ba lokela ho hlahloba litaba ka hloko e le hore ba tsebe hore na motho ea entseng sebe se tebileng o bakile kapa che. Ha ho bonolo ho tseba hore na motho o bakile kapa che. Ho baka ho akarelletsa hore na mofosi o ikutloa joang ka sebe seo a se entseng, e leng se hlileng se leng ka pelong ea hae. (Tšen. 3:3) Mofosi o tla hauheloa hafeela a bakile. Jehova le Jesu ba tseba hantle seo motho a ntseng a se nahana le hore na o ikutloa joang hobane ba khona ho bala lipelo. Empa baholo ba ke ke ba khona ho bona se ka pelong ea motho. Kahoo, haeba u moholo, u ka tseba joang hore na motho o fela a bakile kapa che? U lokela ho qala pele ka ho kopa Jehova hore a u fe bohlale. (1 Mar. 3:9) Hape, u lokela ho bala Lentsoe la Molimo le lingoliloeng tse tsoang ho lekhoba le tšepahalang e le hore u bone phapang pakeng tsa “ho hlomoha ha lefatše” le ho “hlomoha ka tsela ea bomolimo,” e leng ho baka e le kannete. (2 Bakor. 7:10, 11) Hlokomela hore na Mangolo a hlalosa joang batho ba ileng ba baka le ba sa kang ba baka. Hore na ba ne ba ikutloa joang, ba nahana joang le hore na ba ne ba itšoara joang. w17.11 17 ¶16-17

Mehleng ena, libuka, lifilimi le mananeo a thelevishene a etsa eka ke ntho e tloaelehileng le e amohelehang hore bana ba se ke ba hlompha batsoali ba bona. Empa ha e le hantle, ha bana ba sa hlomphe, lelapa ha le thabe. Batho ba bangata ba tseba taba ena hantle. Mohlala, mehleng ea Bagerike ba khale, ha motho a ne a otla batsoali ba hae, o ne a lokela ho tlosoa har’a batho ba bang. Ho latela molao oa Roma, motho ea otlang ntat’ae o ne a nkoa a le molato joaloka ea bolaileng. Mangolo a Seheberu le a Segerike a Bakreste a laela bana hore ba hlomphe batsoali ba bona. (Ex. 20:12; Baef. 6:1-3) Ke’ng e ka thusang bana hore ba lule ba hlompha batsoali ba bona esita leha batho ba haufi le bona ba sa hlomphe batsoali ba bona? Ha bana ba nahana ka lintho tse ntle tseo batsoali ba bona ba ba etselitseng tsona, ba tla li ananela ebe baa ba hlompha. Bana ba boetse ba lokela ho tseba hore Jehova, Ntate oa rona, o batla hore bana ba hlomphe batsoali. Ha bana ba bua hantle ka batsoali ba bona, ba etsa hore bana ba bang le bona ba hlomphe batsoali ba bona. w18.01 29 ¶8-9

Mokreste ea entseng sebe se tebileng o lokela ho kopa thuso ho baholo e le hore a lokise kamano ea hae le Jehova. Ke hobane’ng ha ho le bohlokoa hore a etse joalo? Ntlha ea pele, ke hore Jehova ke eena ea entseng tlhophiso ea hore baholo ba thuse motho ea entseng sebe se tebileng. (Jak. 5:14-16) Ntlha ea bobeli, baholo ba thusa motho ho lokisa kamano ea hae le Jehova le ho bakela libe tsa hae. (Bagal. 6:1; Baheb. 12:11) Ntlha ea boraro, ke mosebetsi oa baholo ho thusa motho ea entseng sebe ho lebala phoso ea hae le ho etsa hore a se ke a ikutloa a le molato. Jehova o re baholo ke “sebaka sa ho ipatela pula e nang ka sefefo.” (Esa. 32:2) Jehova o sebelisa baholo hobane oa re hauhela. Bahlanka ba bangata ba Jehova ba ile ba bua le baholo ’me ba fumana thuso. w17.11 10 ¶8-9

Ho sa tsotellehe hore na ho utloisa bohloko hakae, re lokela ho qoba ho buisana le mong ka rona ea khaotsoeng ntle ho lebaka. Ebang ke ka ho mo letsetsa, ho etsa molaetsa ka fono, ho mo romella lengolo ka poso kapa ka e-mail kapa ho sebelisa mecha e meng ea puisano Inthaneteng. Lula u e-na le tšepo. Lerato “le tšepa lintho tsohle,” kahoo re na le tšepo ea hore baratuoa ba rona ba tla khutlela ho Jehova. (1 Bakor. 13:7) Haeba u bona phetoho e e-ba teng ho mong ka uena ea haufi ea khaotsoeng, u ka mo rapella hore a be le matla a ho amohela keletso ea Bibele a be a amohele le memo ea Jehova e reng: “U khutlele ho ’na.” (Esa. 44:22) Jesu o ile a re ha rea lokela ho rata batho ho mo feta. O ne a kholisehile hore barutuoa hae ba ne ba tla ba le sebete sa ho lula ba tšepahala ho eena leha ba malapa a bona ba ne ba ka ba hanyetsa. Joale haeba beng ka uena ba u hanyetsa hobane u le molateli oa Jesu, u lokela ho tšepa Jehova. Mo kope hore a u thuse ho mamella. (Esa. 41:10, 13) E se eka u ka lula u hopola hore Jehova le Jesu baa thaba ha u tšepahala le hore botšepehi ba hao ha se ba lefeela. w17.10 16 ¶19-21

Ha re bona batho ba kulang le ba holileng, ka tlhaho re ba utloela bohloko. Re labalabela ho bona batho ba se ba sa kule ba bile ba sa tsofale. Ke kahoo re lulang re rapella hore ’Muso oa Molimo o tle. Empa pele o fihla, re etsa sohle seo re ka se khonang hore re thuse batho ba hlokang thuso. Nahana ka mantsoe ao mongoli e mong a ileng a a bua ka ’mè oa hae ea seng a holile ea nang le lefu le amang kelello le bitsoang Alzheimer. Ka letsatsi le leng ’mè oa hae o ile a itšenya. Ha a ntse a leka ho itlhoekisetsa liaparo tsa hae, batho ba ile ba kokota monyako. Batho bao e ne e le Lipaki tse peli tse neng li atisa ho mo chakela. Ba ile ba mo botsa hore na ba ka mo thusa ka eng. Nkhono o ile a re: “Ke utloa ke soabile, empa le ka nthusa.” Lipaki tseo li ile tsa mo thusa ho hlatsoa liaparo tsa hae. Ka mor’a moo, ba ile ba etsa tee eaba ba qoqa le eena. Mora oa nkhono o ne a maketse. O ile a re: “Ke rolela Lipaki tsena khaebana. Liketso tsa bona li lumellana le seo ba se rutang.” Kaha re qenehela batho ba kulang le ba holileng, re lokela ho etsa sohle seo re ka se khonang hore re ba thuse.​—Bafil. 2:3, 4. w17.09 9 ¶5; 12 ¶14

Re lokela ho bontša hore re rata batho ka hore ha ho khoneha re ba etsetse lintho “sephiring” eseng pontšeng. (Mat. 6:1-4) Hape re lokela ho hlomphana. (Bar. 12:10) Jesu o ile a re ruta bohlokoa ba ho hlompha batho ha a ne a hlatsoa baapostola ba hae maoto. (Joh. 13:3-5, 12-15) Re lokela ho sebetsa ka thata hore re etse lintho joaloka Jesu ka ho ikokobetsa le ho sebeletsa ba bang. Esita le baapostola ba Jesu ha baa ka ba utloisisa tsela eo Jesu a neng a etsa lintho ka eona ho fihlela ba fuoa moea o halalelang. (Joh. 13:7) Re bontša hore re hlompha batho ebile re ikokobelitse ka ho se iphahamise ka lebaka la thuto, maruo kapa mesebetsi eo re e etsang ka phuthehong. (Bar. 12:3) Ha rea lokela ho ba mona ha ba bang ba rorisoa, empa re lokela ho thaba le bona le hoja mohlomong re ka ikutloa eka thoriso eo e ka be e tlile ho rona. w17.10 9 ¶9-10

Ba bangata ba hlokometse hore ho sebelisa Bibele ha re le tšimong ho ba le litholoana tse molemo ho bao re ba pakelang. Mohlala, mor’abo rona e mong o ile a khutlela ho ntate-moholo ea ’nileng a bala limakasine tsa rona ka nako e telele. Ho e-na le ho mo fa Molula-Qhooa oa morao-rao, mor’abo rona o ile a khetha ho bala Lengolo le hlahang ka har’a makasine oo. O ile a bala 2 Bakorinthe 1:3, 4 e reng: “Ntate oa mehauhelo e bonolo le Molimo oa matšeliso ’ohle . . . ea re tšelisang matšoenyehong ’ohle a rōna.” Ntate-moholo eo o ile a angoa ke temana eo hoo a ileng a kopa mor’abo rona ho e bala hape. O ile a bontša kamoo eena le mohats’a hae ba neng ba hloka ho tšelisoa kateng, ’me hona joale o thahasella molaetsa oa Bibele. Na ha u lumele hore Lentsoe la Molimo le fana ka matla tšebeletsong ea tšimo?​—Lik. 19:20. w17.09 26 ¶9-10

Borabele bona ba Satane bo ile ba halefisa mangeloi a Jehova a tšepahalang. Leha ho le joalo, Jehova ha aa ka a potlakela ho nka bohato ka hore a halefe. Ho e-na le hoo, o ile a sebetsana le eena ka toka. (Ex. 34:6; Jobo 2:2-6) Hobane’ng? Jehova o lumeletse hore ho fete nako pele a ka timetsa batho hobane ha a batle ha ba timela empa “o lakatsa hore bohle ba fihle pakong.” (2 Pet. 3:9) Tsela eo Jehova a etsang lintho ka eona e re ruta hore re lokela ho nahana ka hloko pele re bua. Hape ha rea lokela ho potlakela ho etsa liqeto. Ha u lokela ho etsa qeto ea bohlokoa, iphe nako e le hore u etse qeto e nepahetseng. U ka boela oa rapela Jehova hore a u thuse ho etsa qeto e nepahetseng. (Pes. 141:3) Haeba re thabile haholo kapa re halefile, ho ka ba bonolo hore re etse lintho tseo hamorao re ka ikoahlaelang tsona. Boholo ba rona re ’nile ra ikoahlaela mantsoe ao re a buileng kapa ho etsa liqeto ka lepotlapotla.—Liprov. 14:29; 15:28; 19:2. w17.09 4 ¶6-7

Na ha Moprista ea Phahameng Joshua a roesoa moqhaka oo ho ne ho bolela hore ke Morena? Che. Kaha e ne e se setloholo sa Davida, o ne a sa tšoanelehe hore e be morena. Ha a roesoa moqhaka oo, e ne e le pontšo ea hore na ho tla etsahala’ng ka morena le moprista ea tla busa ka ho sa feleng. Moprista eo ea phahameng o bitsoa Lehlomela. Mangolo a re Lehlomela leo ke Jesu Kreste. (Esa. 11:1; Mat. 2:23) Jesu ke Morena ebile ke Moprista ea Phahameng. O etella pele lebotho la mangeloi ’me o sebetsa ka thata ho sireletsa batho ba Jehova lefatšeng lena le khopo. (Jer. 23:5, 6) Haufinyane Jesu o tla hlola lichaba ha a tšehetsa puso ea Jehova ’me a sireletsa batho ba Hae. (Tšen. 17:12-14; 19:11, 14, 15) Empa Lehlomela e leng Jesu, o sa na le mosebetsi o mongata oo a lokelang ho o etsa pele nako eo e fihla. w17.10 29 ¶12-14

U ne u tla etsa’ng haeba liphahlo tsa hao li ne li ka ba litšila li bile li nkha hampe? U ne u tla li hlobola hang-hang. Kahoo, re lokela ho mamela Molimo ka hore hang-hang re khaotse ho etsa lintho tseo a sa li rateng. Re lokela ho mamela mantsoe ana ao Pauluse a ileng a a bolella Bakreste-’moho le eena mehleng ea hae: “Li tloseng kaofela ho lōna.” A re hlahlobeng mekhoa e ’meli e mebe eo Pauluse a ileng a bua ka eona, e leng bohlola le ho se hloeke. (Bakolose 3:5-9) Ho ea ka Bibele, ha batho ba babeli ba sa nyalanang ka molao ba etsa thobalano, ba etsa “bohlola.” Hape, ho ratana kapa ho etsa thobalano ha batho ba bong bo tšoanang, ke bohlola. Pauluse o ile a bolella Bakreste-’moho le eena hore ba “bolaee litho tsa ’mele” ea bona, e leng hore ba leleke litakatso leha e le life tseo ba neng ba ka ba le tsona, “mabapi le bohlola.” Mantsoe ana a bontša ka ho hlaka hore re lokela ho sebetsa ka thata ho leleka litakatso tsena tse fosahetseng. Le hoja re lokela ho sebetsa ka thata ho leleka litakatso tse fosahetseng, re ka atleha ho li leleka. w17.08 18 ¶5-6

Lintho tse re etsahallang li tšoana le tse neng li etsahalla moprofeta Mikea. O phetse mehleng ea Morena Akaze ea khopo. Batho ba bangata ba ne ba tletse bobolu. Ha e le hantle Bibele e re ba ne ba ithutile ho etsa bokhopo hoo ba neng ba se ba tloaetse ho bo etsa. (Mikea 7:1-3) Mikea o ne a tseba hore a ke ke a khona ho fetola maemo ao. Haeba re na le tumelo joaloka Mikea, re tla ikemisetsa ho letela Jehova. Ha re tšoane le motho ea emetseng kahlolo ea lefu. Le hoja a tlameha ho leta, ha a batle hore letsatsi leo a le letetseng le fihle. Re ikemiselitse ho letela Jehova hobane rea tseba hore o tla fela a re fe bophelo bo sa feleng ka nako e loketseng. Kahoo re ‘mamella ka botlalo ’me re tiisetsa ka thabo.’ (Bakol. 1:11, 12) Empa haeba re letela Jehova re ntse re korotla ka hore o lieha ho etsa lintho, re tla be re mo halefisa.​—Bakol. 3:12. w17.08 4 ¶6-7

Re lokela ho etsa’ng hore Jehova a re thuse? Re lokela ho ba le kamano e ntle le eena. Re ka ba le kamano e ntle le eena haeba re le “bonolo” kapa re ikokobelitse. (Sof. 2:3) Batho ba bonolo ba emela hore Jehova e be eena ea ba lokisetsang lintho ha ba foselitsoe. Jehova o rata batho ba joalo haholo. Empa Jehova “o kokobetsa ba khopo.” (Pes. 147:6b) Ha ho le ea mong oa rona ea batlang ho kokobetsoa joalo. Kaha ha re batle ho halefisa Jehova, re lokela ho hloea lintho tseo a li hloileng. (Pes. 97:10) Mohlala, re lokela ho hloea bohlola, e leng hore re lokela ho qoba lintho tse ka etsang hore re bo etse, tse kang ho sheba litšoantšo tse litšila. (Pes. 119:37; Mat. 5:28) Le hoja ho ka ba thata ho loanela ho qoba lintho tse joalo, re ikemiselitse ho sebetsa ka thata ho li qoba hobane re batla hore Jehova a re hlohonolofatse. Ha re ntse re loana joalo, re lokela ho itšetleha ka Jehova, eseng matla a rona. Re lokela ho mo kopa hore a re thuse. w17.07 19-20 ¶11-13

Ha re sebelisa maruo a rona ho sebeletsa Jehova, re tla tseba ho thusa batho ba bang ha maemo a rona a lumela. Le hoja ka linako tse ling batho ba nang le bohona ba sa khone ho ba bo-pula-maliboho kapa ho fallela libakeng tse ling, ba thabisoa ke ho tseba hore menehelo ea bona e tšehetsa mosebetsi oa boboleli oo ba bang ba o etsang. Ha re fana ka menehelo, re kenya letsoho hore ho be le lingoliloeng ’me re tšehetsa mosebetsi oa boboleli libakeng tseo batho ba bangata e bang bahoeletsi empa boholo ba bona ba futsanehile. Linaheng tse kang Congo, Madagascar le Rwanda, Libibele li turu. Ka linako tse ling chelete ea ho reka Bibele e ka lekana le mokholo oa beke kapa oa khoeli. Kahoo, ka lilemo tse ngata bara le barali babo rona ba ile ba lokela ho khetha hore na ba tla reka lijo kapa ba reke Bibele. Empa hona joale ka lebaka la menehelo ea batho ba bangata, mokhatlo oa Jehova o nolofalloa ho fetolela le ho isa Libibele ho bahoeletsi bohle ba li hlokang hammoho le ho batho ba leqemeng la ho rutoa ka Jehova.​—2 Bakor. 8:13-15. w17.07 9 ¶11

Buka ea Jobo e ka re tšelisa hobane ea re bontša hore ha re hlaheloa ke mathata, ha se hore Jehova o re koatetse. Ho e-na le hoo, mathata a re fa monyetla oa ho bontša hore re tšehetsa bobusi ba Jehova. Ha re mamella mathata, re tla ba le “boemo bo amohelehang” ’me tšepo ea rona e tla tiea. (Bar. 5:3-5) Buka ea Jobo e re Jehova “o na le lerato le mofuthu haholo ’me o mohau.” (Jak. 5:11) Kahoo re ka kholiseha hore bohle ba tšehetsang bobusi ba hae ba tla putsoa. Ho tseba taba ena ho tla re thusa hore re ‘mamelle ka botlalo ’me re tiisetse ka thabo.’ (Bakol. 1:11.) Ke ’nete hore ho ka ba thata ho lula re bontša hore re tšehetsa bobusi ba Jehova Kahoo re lokela ho lula re ikhopotsa hore ho bohlokoa ho lula re tšehetsa bobusi ba Jehova leha re hlaheloa ke mathata. w17.06 26 ¶15-16

Batho ba bangata ba hlanyetsa lisebelisoa tsa elektronike tsa morao-rao, liphahlo tsa feshene tsa morao-rao le lintho tse ling. Kahoo, kaofela ha rona re lokela ho lula re ipotsa: ‘Na ke qeta nako e ngata ke batla maruo ke bile ke nahana ka ’ona hoo ke qetellang ke se na nako ea ho lokisetsa liboka? Na ke phathahane ka mesebetsi ea ka ea letsatsi le letsatsi hoo ke qetang nako e nyenyane ke rapela le ho ithuta Bibele?’ Haeba re hlokomela hore re se re rata maruo ho feta ho rata Kreste, re lokela ho hopola mantsoe ana a Jesu a hlahang temaneng ea letsatsi ea kajeno. Jesu o ile a re: “Ha ho eo e ka bang lekhoba la benghali ba babeli.” A boela a re: “Le ke ke la ba makhoba a Molimo le a Maruo.” (Mat. 6:24) Kaha ha rea phethahala, re lokela ho lula re loanela ho hlola “litakatso tsa nama ea rōna,” ho akarelletsa le maruo.​—Baef. 2:3. w17.05 25-26 ¶15-16

Molaetsa oo re o bolelang o ka thusa batho ba o mamelang hore ba fumane bophelo bo sa feleng. Pauluse o ne a batla ho etsa sohle seo a ka se khonang hore a bolelle batho ba bangata litaba tse molemo hobane e ne e le mosebetsi oo a o ratang. (Bar. 1:14, 15; 2 Tim. 4:2) Kahoo, esita leha a ne a hlorisoa, o ile a mamella. (1 Bathes. 2:2) Re ka mo etsisa joang? Pauluse o ne a boela a batla menyetla ea ho buisana le batho ka Bibele ho bontša hore o rata mosebetsi oa boboleli. Re ka etsisa moapostola Pauluse ka hore re buisane le batho ka Bibele ka ntlo le ntlo le hohle moo re ka ba fumanang teng. (Lik 5:42; 20:20) Re ka ba ra sebeletsa re le bo-pula-maliboho ba thusang kapa ba kamehla ha ho khoneha. Re ka boela ra ithuta puo e ’ngoe kapa ra fallela sebakeng se seng.​—Lik 16:9, 10. w17.06 10-11 ¶8-9

Boholo ba lintho tse mpe tse etsahalang lefatšeng ha li etsoe ke motho a le mong empa li etsoa ke mekhatlo. Nahana ka mekhatlo ea likereke e sa bolelleng batho ’nete ka Molimo ’me e ba susumeletsa hore ba se ke ba tšepa Bibele. Mekhatlo eo e boetse e thetsa batho ka hore na ho tla etsahala’ng ka lefatše. Nahana hape ka mebuso e khothalletsang ntoa ea merabe, e ratang tjotjo, e khethollang batho, e hatellang mafutsana le batho ba sa khoneng ho itšireletsa. Ho na le lifeme tse silafatsang tikoloho ka boomo. Ho boetse ho na le batho ba ruileng haholo ka botsotsi, ha limilione tsa batho li sotleha ke bofutsana. Bibele e re mebuso ea lefatše hammoho le mekhatlo ea lona e tla felisoa le batho ba khahlanong le ’Muso oa Molimo.​—Jer. 25:31-33. w17.04 11 ¶7-8

Jehova “ea hlahlobang lipelo,” o ile a hauhela Morena Akabe. (Liprov. 17:3) Batho ba neng ba tseba hore na Akabe o entse’ng ba ile ba ikutloa joang ka kahlolo ee? E ka ’na eaba e ile ea leka tumelo ea ba lelapa la Nabothe le metsoalle ea hae. Haeba ho joalo, ba ne ba tla tšepahalla Jehova ka hore ka boikokobetso ba tšepe hore kamehla o etsa lintho ka toka. (Deut. 32:3, 4) Nabothe le ba lelapa la hae ba tla bona hore Jehova ke Molimo oa toka ha a ba tsosa. (Jobo 14:14, 15; Joh 5:28, 29) Motho ea ikokobelitseng ha a lebale hore “Molimo oa ’nete o tla tlisa mosebetsi oa mofuta o mong le o mong kahlolong kamanong le ntho e ’ngoe le e ’ngoe e patiloeng, ebang e ntle kapa e mpe.” (Moek. 12:14) Ha Jehova a ahlola, o sheba le lintho tse ling tseo rona re sa li tsebeng. Kahoo, boikokobetso bo ka thusa batho ba se nang molato hore ba lule ba na le tumelo ho Jehova. w17.04 24 ¶8-9

Ka lebaka la maemo a lefatše, Lipaki tse ngata li fetohile baphaphathehi. Ho fallela sebakeng se seng ho ka ba boima. Nahana feela u se u lokela ho ithuta puo e ncha le mekhoa ea moo, ho boloka nako, ho itloaetsa ho patala lekhetho le rente, hammoho le ho isa bana sekolong le ho ba khalemela. Ana ke a mang a mathata ao batho ba fallelang linaheng tse ling ba kopanang le ’ona. Na u ka khona ho ba mamella le ho ba hlompha ha u ba thusa? (Bafil. 2:3, 4) Ka linako tse ling mebuso e etsa hore ho be thata ho bara le barali babo rona ba hlahang linaheng tse ling hore ba ee libokeng. Mekhatlo e meng e thusang baphaphathehi e ba bolella hore e ke ke ea ba thusa haeba ba hana ho amohela mesebetsi e tla ba sitisa ho ea libokeng. Barab’abo rona ba bang baa tšoha ebe ba qetella ba amohetse mesebetsi e joalo. Kahoo, ha ba qeta ho fihla, ho bohlokoa hore re kopane le bona kapele kamoo ho ka khonehang. Re lokela ho bontša hore rea ba rata. Tumelo ea bona e tla ba matla ha ba bona hore re ba utloela bohloko ebile re ikemiselitse ho ba thusa.—Liprov. 12:25. w17.05 5 ¶9-10

Jesu o ile a re e ’ngoe ea lipontšo tsa “qetello ea tsamaiso ea lintho” ke hore “lerato la ba bangata le tla fola.” (Mat. 24:3) Mantsoe ao a ile a phethahala lilemong tse ka bang 2 000 tse fetileng ha lerato leo Bajuda ba neng ba e-na le lona le fokotseha le hoja ba ne ba re ke batho ba Molimo. Leha ho le joalo, Bakreste ba bangata ba mehleng eo ba ne ba phathahane ka ho “bolela litaba tse molemo mabapi le Kreste” ’me ba bontša hore ba rata Molimo, Bakreste-’moho le bona hammoho le bao e seng Bakreste. (Lik 2:44-47; 5:42) Empa lerato la Bakreste ba bang le ile la fokotseha. Jesu o ile a re ho Bakreste ba neng ba lula Efese: ‘Ke na le hona khahlanong le lona, hore le tlohetse lerato leo le neng le e-na le lona pele.’ (Tšen. 2:4) Ke hobane’ng ha lerato la bona le ile la fokotseha? E ka ’na eaba ba ile ba susumetsoa ke batho bao ba neng ba phela har’a bona.​—Baef. 2:2, 3. w17.05 17 ¶1-3

Jafeta e ne e le moeta-pele ea sebete. Anna e ne e le mosali ea mamelang, a bile a ikokobelitse. Ke’ng eo Moahloli Jafeta le mosali oa Elkana ba neng ba tšoana ka eona ntle le ho rapela Molimo a le mong? Bobeli ba bona ba ne ba itlamme hore ba tla etsetsa Molimo ho hong ’me ba ile ba phetha seo ba neng ba mo tšepisitse sona. Batho ba batlang ho phetha litšepiso tseo ba li etselitseng Jehova ba ka ba etsisa. Joalokaha Bibele e bontša, boitlamo ke tšepiso e tiileng eo motho a e etsetsang Molimo. A ka mo tšepisa ho mo fa ntho itseng, ho etsa tšebeletso e itseng, kapa ho qoba ho etsa lintho tse itseng. Boitlamo ke ntho eo motho a e etsang ka ho rata. Leha ho le joalo, boitlamo boa halalela mahlong a Molimo hobane ke kano eo motho a e etsang, eo ho eona a etsang tšepiso ea hore na o tla etsa ntho e itseng kapa che.​—Gen. 14:22, 23; Baheb. 6:16, 17. w17.04 3 ¶1-2