December

Haeba re sa khone ho laola tsela eo re buang ka eona, re ka chesa hlaha. Ka mohlala, haeba u kopana le motho ea lulang naheng eo mosebetsi oa rona o thibetsoeng, na u tla mo kopa hore a u bolelle hore na lintho li etsoa joang moo? Ke ’nete hore u tla be u sa botse ka sepheo se sebe. Re rata bara le barali babo rona ’me re thahasella ho tseba hore na ho etsahala’ng ka bona. Re boetse re batla ho toba taba ha re ba rapella. Leha ho le joalo, boemong bona re lokela hore re se ke ra ba botsa letho. Haeba re qobella motho hore a re bolelle taba eo a sa lokelang hore bolella eona, re tla be re bontša hore ha re mo rate, ha re rate le batho ba lebeletseng hore a boloke taba eo e le lekunutu. Re kholisehile hore ha ho na mang kapa mang ea ka batlang ho ekeletsa bara le barali babo rona ba phelang moo mosebetsi oa rona o thibetsoeng mathata. Ka tsela e tšoanang, ha ho na mora kapa morali’abo rona ea ka batlang ho re bolella hore na Lipaki tse lulang libakeng tse joalo li tšoara liboka le tšimo joang. w20.03 21 ¶11-12

Molimo o ne a sa rera hore batho ba tle ba shoe. E le hore Adama le Eva ba tle ba phele ka ho sa feleng, ba ne ba lokela ho mamela taelo ena e reng: “Ha e le sefate sa tsebo ea botle le bobe u se ke oa ja tsa sona, etsoe ka letsatsi leo ka lona u jang tsa sona ka sebele u tla shoa.” (Gen. 2:​16, 17) Satane eena a ba susumeletsa hore ba se ke ba mamela taelo eo. O ile a sebelisa noha eaba o bua mantsoe a hlahang temaneng ea letsatsi ea kajeno. Ka bomali-mabe Eva o ile a kholoa leshano leo eaba o ja tholoana. Hamorao monna oa hae le eena o ile a ja tholoana eo. (Gen. 3:6) Sebe le lefu li bile teng ka tsela ena. (Bar. 5:​12) Adama le Eva ba ile ba shoa joalokaha Jehova a ne a boletse. Empa Satane o ile a ’na a tsoela pele ho bua mashano ka lefu. Ha nako e ntse e ea, o ile a qapa mashano a macha. A mang a ’ona ke hore ’mele oa motho oa shoa ebe moea oa hae oona o tsoela pele o phela. Satane o nyantšitse batho ba bangata phooko ho tla fihlela lena le holimo.​—1 Tim. 4:1. w19.04 14-15 ¶3-4

Kaha bana ba sa le banyenyane ha ba khone ho nahana lintho hantle kapa ho elelloa likotsi e le hore ba li qobe. Kahoo, ba khona ho thetseha le ho qhekelloa habonolo. Mohlala, ba thetsoa ka hore ke molato oa bona hore ebe ba hlekefelitsoe, ba lokela ho boloka taba eo e le lekunutu hobane ha ho na motho ea tla ba kholoa kapa ho ba thusa le hore ketso eo ke tsela ea ho ba bontša hore baa ratoa. Mashano ana a ka ’na a lula ka kelellong ea ngoana ka lilemo tse ngata pele a ka utloisisa hore ha se ’nete. Ngoana ea joalo a ka ’na a hola a e-na le maikutlo a hore ha a na thuso, ha aa hloeka le hore ha a tšoaneloe ke ho ratoa. Ha ho makatse hore ebe ho hlekefetsa bana ka motabo ho etsa hore ba utloe bohloko ka nako e telele. Re phela matsatsing a ho qetela e leng nakong eo batho “ba se nang lerato la tlhaho” le eo “batho ba khopo le baikhakanyi ba tla tsoela pele ho tloha bobeng ho ea bobeng bo fetisisang.”​—2 Tim. 3:​1-5, 13. w19.05 15 ¶7-8

Jesu o ne a ruta ka litsela life? Ea pele, o ne a ruta batho ka lintho tseo a li buang. Mantsoe a hae a ne a le matla hobane o ne a hlalosa seo e leng ’nete ka Molimo, a ruta batho hore na ba lokela ho phelela’ng, a bile a totobatsa ’Muso oa Molimo e le oona tharollo ea mathata ’ohle a batho. (Luka 24:​19) Ea bobeli, Jesu o ne a ruta ka mohlala oa hae. Tsela eo a neng a phela ka eona e ile ea bontša balateli ba hae hore na ba lokela ho phela joang. (Joh. 13:​15) Jesu o ne a ruta batho neng? O ile a ruta batho nakong eo a neng a le lefatšeng mona. (Mat. 4:​23) O ile a boela a ruta balateli ba hae nakoana ka mor’a hore a tsosoe bafung. Mohlala, o ile a itlhahisa ho balateli ba hae ba ka bang 500, eaba o ba fa taelo ea hore ba “etse batho ba lichaba tsohle barutuoa.” (Mat. 28:​19, 20; 1 Bakor. 15:6) Kaha Jesu ke eena hlooho ea phutheho, o ile a tsoela pele a ruta balateli ba hae le ha a se a khutletse leholimong. Mohlala, hoo e ka bang ka selemo sa 96, Jesu o ile a laela moapostola Johanne hore a il’o khothatsa le ho khalemela Bakreste ba tlotsitsoeng.​—Bakol. 1:​18; Tšen. 1:1. w19.05 3 ¶4-5

Mehleng ena, batho ba bangata ba lokela ho sebetsa ka thata e le hore ba be le chelete e lekaneng ho koahela litlhoko tsa bona. Barab’abo rona ba bangata ba sebetsa lihora tse ngata e le hore ba be le chelete e ba thusang ho hlokomela malapa a bona ka lijo, liaparo le bolulo. Ho boetse ho na le ba bang ba bangata ba qetang lihora tse ngata ba le tseleng letsatsi le leng le le leng ha ba e-ea mosebetsing le ha ba khutlela hae. Athe ba bang bona, ba lokela ho sebetsa mosebetsi o boima e le hore ba be le chelete ea ho hlokomela ba malapa a bona. Qetellong ea letsatsi, bara le barali babo rona bana ba sebetsang ka thata, ba khathala hoo ba sa batleng le pompong. Ba khathala hoo ba sa batleng le ho bala feela. Bonneteng, re lokela ho leka ka matla hore re be le nako ea ho ithuta Bibele le lingoliloeng tseo Jehova a re fang tsona. Ho bala ho bohlokoa haeba feela re batla ho ba le kamano e ntle le Jehova le ho fumana bophelo bo sa feleng. (1 Tim. 4:​15) Batho ba bang ba rata ho bala hoseng moo ho khutsitseng ha likelello tsa bona li ntse li hlaphohetsoe. Ba bang bona ba nka metsotso e seng mekae mantsiboea e le hore ba bale Bibele le lingoliloeng tsa rona le ho nahanisisa ka tsona. w19.05 26 ¶1-2

Liphetoho tsena ha li itlele feela ka ho panya ha leihlo. Re ka ’na ra lokela ho sebetsa ka thata ka nako e telele. (2 Pet. 1:5) Re lokela ho loana ea khumamela e le hore re fetole likelello tsa rona. Thapelo ke ntho ea pele e ka re thusang. Re lokela ho rapela joaloka mopesaleme ea ileng a re: “Molimo, bopa ka ho ’na pelo e hloekileng, u kenye ka hare ho ’na moea o mocha, o tiileng.” (Pes. 51:​10) Re lokela ho qala pele ka ho lumela hore re hloka ho fetola likelello tsa rona, ebe re kopa Jehova hore a re thuse. Ho thuisa ke ntho ea bobeli eo re ka e etsang. Ha re ntse re bala Lentsoe la Molimo letsatsi le letsatsi, re lokela ho ipha nako ea ho thuisa, kapa ea ho nahanisisa ka botebo ka lintho tseo re ntseng re li bala e le hore re ka bona hore na ke hokae moo re ka etsang liphetoho teng. (Pes. 119:​59; Baheb. 4:​12; Jak. 1:​25) Re lokela ho itlhahloba hore na ke hokae moo e ka ’nang eaba re se re nahana le ho etsa lintho ka tsela ea lefatše lena. Re lokela ho lumela ha re bona moo re fokolang teng ’me re sebetse ka thata ho lokisa bothata boo. w19.06 8 ¶1; 10 ¶10; 12 ¶11-12

Ha u etsa liqeto, behella ka thoko nako eo u batlang ho etsa lintho tseo u rerileng ho li etsa ’me u se ke oa e fetola. U se ke oa ipehela mabaka a hore u tla qala ho phetha lintho tseo u li rerileng ha maemo a loketse, hobane ho ka etsahala hore ebe ha ho mohla maemo a tla u lumella ka botlalo. (Moek. 11:4) U se ke oa lumella lintho tse se nang thuso ho u jella nako le ho u qeta matla a ho etsa lintho tsa bohlokoa. (Bafil. 1:​10) Haeba u khona, nako eo u e behellang ka thoko e be nako eo u ke keng oa khathatsoa hangata. Bolella batho ba bang e le hore ba se ke ba u sitisa. Koala fono ea hao ’me u bale melaetsa ea hao ha u qetile. Litholoana tsa qeto eo u e entseng li ka tšoantšoa le moo leeto la hao le fellang teng. Haeba u fela u batla ho fihla moo u eang teng, u tla tsoela pele ka leeto leo le haeba tsela e koetsoe ’me u tlameha ho nka mothinya o mong hore u fihle moo u eang. Ka tsela e tšoanang, haeba re nahana ka litholoana tsa liqeto tseo re li entseng, re ke ke ra tela ha re thulana le mathata.​—Bagal. 6:9. w19.11 30 ¶17-18

Ke lebaka lefe le ka etsang hore u batle ho kolobetsoa? Ka mor’a hore u ithute Bibele ka hloko, u ile oa ithuta lintho tse ngata ka Jehova, hore na o rata’ng le mabaka ao a etsang lintho ka ’ona. Lintho tseo u ithutileng tsona li ile tsa u ama pelo ’me tsa u susumetsa hore u mo rate le ho feta. Ntho e ka sehloohong e ka etsang hore u batle ho kolobetsoa ke hobane u rata Jehova. Lebaka le leng le ka etsang hore u batle ho kolobetsoa ke hobane u lumela lintho tseo u ithutileng tsona ka Bibeleng. Hlokomela hore na Jesu o ile a re’ng ha a fana ka taelo ea hore ho etsoe batho barutuoa. (Mat. 28:​19, 20) Jesu o ile a re ba batlang ho kolobetsoa, ba lokela ho kolobetsoa “ka lebitso la ntate, la Mora le la moea o halalelang.” Taba ee e bolela’ng? Ka pelo ea hao eohle, u lokela ho lumela seo Bibele e se buang ka Jehova, ka Jesu le ka moea o halalelang. Lithuto tsena ke tsa bohlokoa ’me li ka ama pelo ea hao. w20.03 9 ¶8-9

Jehova ha aa ka a romela mangeloi ho ea lemosa Lota feela empa le ho mo thusa hore a qobe koluoa e neng e tl’o oela motse oa Sodoma. (Gen. 19:​12-14, 17) Ka tsela e tšoanang, ha re bona Mokreste-’moho le rona a nka mothinya o fosahetseng, re ka mo lemosa ka kotsi e ka ’nang ea mo hlahela. Re lokela ho mo mamella le haeba a lieha ho nka keletso eo re mo fang eona e thehiloeng Bibeleng. Re lokela ho tšoana le mangeloi ane a mabeli. Ho e-na le hore re lahle Mokreste-’moho le rona kherehloa, re lokela ho batla litsela tsa hore na re ka mo thusa joang. (1 Joh. 3:​18) Ka tsela e itseng, re ka mo tšoara ka letsoho ebe re mo thusa hore a amohele keletso eo a e fuoeng. Jehova a ka be a ile a ameha haholo ka liphoso tsa Lota. Ho e-na le hoo, o ile a bululela moapostola Petrose hore a bue ka Lota e le monna ea lokileng. (Pes. 130:3) Na re ka khona ho etsisa Jehova tseleng eo a ileng a sebelisana le Lota ka eona? Haeba re ameha haholo ka makhabane a bara le barali babo rona, re tla khona ho ba mamella. Ha re etsa joalo, ho ka ba bonolo hore ba amohele keletso eo re tla ba fa eona. w19.06 21 ¶6-7

Haeba ’muso oa naheng ea heno o thibela mosebetsi oa rona, u ka ’na oa ipotsa hore na u lokela ho fallela naheng e ’ngoe moo u ka khonang ho sebeletsa Jehova ka bolokolohi. Eo ke qeto eo u lokelang ho iketsetsa eona. Pele u etsa qeto e ka ba hantle hore u ke u shebe mohlala oa Bakreste ba mehleng ea baapostola hore na ba ile ba etsa’ng ha ba hlorisoa. Barutuoa ba neng ba le Jerusalema ba ile ba balehela Judea le Samaria le libakeng tse ling tse kang Foenisia, Cyprase le Antioke. (Mat. 10:​23; Lik. 8:1; 11:​19) Leha ho le joalo, ka mor’a hore Bakreste ba boele ba hlorisoe hape, moapostola Pauluse o ile a etsa qeto ea hore a se ke a tloha libakeng tseo mosebetsi oa bona o neng o thibetsoe. (Lik. 14:​19-23) Re ithuta’ng mehlaleng ee? Hore hlooho e ’ngoe le ’ngoe ea lelapa e lokela ho etsa qeto ea hore na ba tla falla kapa che. Pele a etsa qeto, o lokela ho rapela le ho nahana ka ho teba ka hore na ho falla ho tla ama lelapa la hae joang. Ha rea lokela ho ahlola batho ba bang ka liqeto tseo ba li entseng. w19.07 10 ¶8-9

Jesu o ile a laela balateli ba hae a re: “E-eang . . . le etse batho ba lichaba tsohle barutuoa.” Ho phaella tabeng ea ho ba ruta lintho tseo Jesu a laetseng balateli ba hae hore ba li etse, re boetse re lokela ho ba thusa hore na ba ka ikobela melao eo joang bophelong ba bona. Ka mamello re lokela ho ba thusa ha ba ntse ba leka ho latela melao-motheo ea Bibele eo ba ntseng ba ithuta eona. Baithuti ba bang ba khona ho fetola tsela eo ba nahanang ka eona le eo ba etsang lintho ka eona ka mor’a likhoeli tse seng kae feela, ha ba bang bona ho ba hloka nako e telele. Mor’abo rona e mong oa moromuoa Peru, o ile a rua molemo haholo ka ho ba le mamello. O re: “Ke ne ke ithuta le Ntate Raúl, ’me re ile ra qeta libuka tse peli. Empa o ne a ntse a e-na le mathata bophelong ba hae. O ne a e-na le mathata a lenyalo, a le tala ka hanong le bana ba hae ba sa mo hlomphe. Kaha o ne a e-tla libokeng kamehla, ke ile ka tsoela pele ke mo etela le ho mo thusa le lelapa la hae. Ka mor’a ho qeta lilemo tse tharo ke ntse ke mo etela o ile a tšoaneleha hore a kolobetsoe.” w19.07 15 ¶3; 19 ¶15-17

Ak’u nahane ka maemo ao Pauluse a neng a le ho ’ona ha a ne a ngolla Bafilipi. O ne a tšoeroe ’me a koalletsoe ntlong eo a neng a lula ho eona Roma. O ne a sa khone ho tsoa a il’o bolella batho litaba tse molemo. Empa o ile a iphathahanya ka ho pakela batho ba neng ba mo etela le ho ngolla liphutheho tse hole mangolo. Pauluse o ne a tseba hore feela joaloka Jesu le eena o lokela ho ikitlaetsa bophelo bohle ba hae. Ke kahoo a ileng a tšoantša bophelo ba rona le ho ba peisong. (1 Bakor. 9:​24-27) Semathi se peisong se lula se nahana ka ho fihla kholeng, ’me ha se lumelle letho ho se sitisa. Mohlala, limathi li ka ’na tsa matha sebakeng se haufi le mabenkele, le moo ho nang le lintho tse ling tse ka ’nang tsa li ferekanya. Na u nahana hore ho na le semathi se seng se ka emang eaba se sheba lintho tse ka mabenkeleng? Ha ho na se ka etsang joalo haeba se batla ho hlola! Kaha le rona re peisong ea bophelo, re lokela ho qoba lintho tse ka re sitisang. Haeba re lula re nahana ka se larileng ka pele, ’me re sebeletsa Jehova ka cheseho joaloka Pauluse, re tla fumana moputso! w19.08 3 ¶4; 4 ¶7

Ha re ne re etsa qeto ea ho sebeletsa Jehova, re ile ra etsa liphetoho bophelong ba rona ’me ho ka ’na ha ba thata hore beng ka rona ba amohele liphetoho tseo. Hangata ntho ea pele eo ba e hlokomelang ke hore, ha re sa kopanela le bona meketeng ea bolumeli le hore ha re sa kenella lipolotiking. Qalong, beng ka rona ba bang ba ka ’na ba re halefela. (Mat. 10:​35, 36) Empa ha rea lokela ho nahana hore ba ke ke ba fetoha. Haeba re khaotsa ho ba hlalosetsa hore na re lumela’ng, ho tla tšoana leha eka re se re ba ahlotse hore ha ba tšoaneloe ke ho fumana bophelo bo sa feleng. Jehova ha a re fa mosebetsi oa ho ahlola batho ba bang empa o o file Jesu. (Joh. 5:​22) Haeba re e-na le mamello, qetellong beng ka rona ba ka ’na ba lumela ho ithuta Bibele. Re lokela ho ba mosa hape re be sebete le haeba re tlameha ho mamella mathata. (1 Bakor. 4:​12b) Ho ka ’na ha nka nako hore beng ka rona ba utloisise bohlokoa ba hore ebe re sebeletsa Jehova. w19.08 17 ¶10, 13; 18 ¶14

Ka linako tse ling ha u nahana ka mathata ao u fetileng ho ’ona, oa bona hore ha oa a hlola ka matla a hao. Bongata ba rona re kile ra ikutloa ka tsela eo. Mohlomong e bile ka mor’a hore u kule haholo kapa ka mor’a ho hlokahalloa ke motho eo u mo ratang. Ha u hetla morao, oa hlokomela hore moea o halalelang o ile oa u fa “matla a fetang se tloaelehileng” hore u khone ho mamella letsatsi le letsatsi. (2 Bakor. 4:​7-9) Re boetse re hloka moea o halalelang hore o re thuse ho hana ho susumetsoa ke batho ba khopo ba lefatše lena. (1 Joh. 5:​19) Hape re hloka matla a ho loantša “makhotla a moea a khopo.” (Baef. 6:​12) Moea o halalelang oa Jehova o re fa matla a hore re phethe boikarabelo ba rona ho sa tsotellehe mathata ao re kopanang le ’ona. Moapostola Pauluse o re o ile a tsoela pele a sebeletsa Jehova le ho qeta mosebetsi oa hae oa boboleli ho sa tsotellehe mathata ao a neng a e-na le ’ona hobane o ne a tšepile “matla a Kreste.”​—2 Bakor. 12:9. w19.11 8 ¶1-3

Bibele ke eona feela buka e nepahetseng e hlalosang hore na Jesu o u etselitse’ng. Ithute ho rata Jesu ’me u tla rata Jehova le ho feta. Hobane’ng? Hobane Jesu o khona ho etsisa makhabane a Ntate oa hae hantle. Kahoo, ha u ntse u ithuta ka Jesu haholoanyane, u tla utloisisa Jehova u be u mo rate haholo. Nahana kamoo Jesu a neng a le mosa kateng ho batho bao batho ba bang ba neng ba ba khella fatše hobane ba futsanehile, ba kula hape ba sena mang oe! Hape, ak’u nahane ka keletso eo a u fileng eona le hore na bophelo ba hao bo tla ntlafala joang haeba u e mamela. (Mat. 5:​1-11; 7:​24-27) U tla rata Jesu le ho feta ha u nahana ka sehlabelo seo a ileng a fana ka sona e le hore libe tsa rona li ka tšoareloa. (Mat. 20:​28) Ha u utloisisa hore Jesu o ne a ikemiselitse ho u shoela, u tla susumeletseha hore u bake ebe u kopa Jehova hore a u tšoarele. (Lik. 3:​19, 20; 1 Joh. 1:9) Hape ha u ntse u tsoela pele ho ithuta ka Jehova le Jesu, u tla batla ho ba le batho ba ba ratang. w20.03 5-6 ¶10-12

Mor’abo rona a ka nka hore ke eena ea tšoanelehang haholo hore a etse mesebetsi e itseng ka phuthehong. Kapa morali’abo rona a ka ’na a re: ‘Monna oa ka a ka etsa mosebetsi ona betere ho feta mor’abo rona Semanyamanyane.’ Empa haeba re ikokobelitse, re ke ke ra nahana joalo. Re ka ithuta ho hong tseleng eo Moshe a ileng a itšoara ka eona ha batho ba bang ba ne ba fuoa likabelo. Moshe o ne a rata mosebetsi oa ho etella Baiseraele pele. Empa o ile a itšoara joang ha Jehova a khetha batho ba bang hore ba sebetse le eena? Ha a ka ba shoela mona. (Num. 11:​24-29) Kaha o ne a ikokobelitse, o ile a lumela ho tšoarisana mosebetsi oa ho ahlola le batho ba bang. (Ex. 18:​13-24) Ka tsela ena, Baiseraele ba ne ba se ba e-na le baahloli ba bangata ’me ba ne ba ke ke ba hlola ba ema nako e telele pele ba sebeletsoa. Tabeng ena, re ithuta hore Moshe ha a ka a etelletsa litokelo tsa hae pele ho feta litlhoko tsa ba bang. Kannete Moshe ke mohlala o motle oo re ka o etsisang. E le hore Jehova a re sebelise, re lokela ho hopola hore re lokela ho ikokobetsa eseng hore re be le bokhoni bo itseng. w19.09 5-6 ¶13-14

Ha re tsebe hore na baeta-pele ba lefatše ba tla ipehela mabaka afe ha ba hlasela Babylona e Moholo. Ba ka ’na ba re Babylona e Moholo o sitisa hore ho be le khotso lefatšeng hape o kena-kenana le lipolotiki. Kapa, ba ka ’na ba re mekhatlo ea bolumeli e ipokeletse ka matlotlo le thepa e ngata. (Tšen. 18:​3, 7) Ha mebuso ea lefatše e felisa bolumeli ba bohata, e ke ke ea felisa motho e mong le e mong eo e leng setho sa bolumeli ba bohata. Empa ho bonahala eka mebuso e tla felisa mekhatlo ea bolumeli ba bohata. Hang ha mekhatlo eo e se e felisitsoe, batho bao e neng e le litho tsa eona ba tla bona hore baruti ba bona ba hlolehile ho phethahatsa lintho tseo ba neng ba li tšepisitse ebe litho tseo lia itokolla. Ho timetsoa ha Babylona e Moholo ho ke ke ha nka ka nako e telele. (Tšen. 18:​10, 21) Jehova o tšepisitse hore o tla “khutsufatsa matsatsi ao” e le hore “bakhethoa” le barapeli ba hae ba pholohe.​—Mar. 13:​19, 20. w19.10 15 ¶4-5

Bo-’mè, ho ka etsahala hore ebe le holisitsoe ke batsoali ba bohale le ba neng ba le hlaba ka mantsoe. Joale taba eo e entse hore le nahane hore ke mokhoa oo bana ba holisoang ka oona. Le ka mor’a hore le ithute hore na Jehova o batla le tšoare bana ba lona joang, ho ka ’na ha e-ba thata hore le khobe matšoafo le ho ba le mamello, haholo haeba le khathetse joale bana ba sa mamele. (Baef. 4:​31) Ka nako eo, ho bohlokoa haholo hore le kope Jehova hore a le thuse. (Pes. 37:5) Bo-’mè ba bang ba thatafalloa ke ho bontša bana ba bona hore baa ba rata kapa hona ho ba joetsa. E ka ’na eaba ba hotse ba se na kamano e haufi le batsoali ba bona. Haeba le holisitsoe joalo, le se ke la pheta phoso e tšoanang. ’Mè ea batlang ho etsa thato ea Jehova o tla ithuta ho bolella le ho bontša bana ba hae hore oa ba rata. Ho ka ’na ha e-ba thata hore a fetole tsela eo a etsang lintho ka eona. Empa a ka khona ho etsa joalo ’me eena le lelapa la hae ba tla thaba. w19.09 18-19 ¶19-20

Motho ea sebeletsang Jehova a boetse a qeta nako e ngata a leka ho batla maruo a lefatše lena ho tšoana leha eka o sebeletsa benghali ba babeli. O tla be a sa sebeletse Jehova a le mong feela. Pele ho selemo sa 100, phutheho ea Laodisia e ile ea ithorisa ea re: “Ke ruile ’me ke fumane maruo ’me ho hang ha ke hloke letho.” Empa mahlong a Jehova le Jesu, phutheho eo e ne e le ‘soto ’me e haula ebile e futsanehile, e foufetse ebile e hlobotse.’ Jesu ha a ka a ba khalemela hobane ba ruile empa hobane ba ne ba rata chelete haholo hoo kamano ea bona le Jehova e neng e senyeha. (Tšen. 3:​14-17) Haeba re hlokomela hore re se re qala ho rata chelete re lokela hore kapele kamoo re ka khonang re fetole tsela eo re nahanang ka eona. (1 Tim. 6:​7, 8) Haeba re sa etse joalo, re ke ke ra rata Jehova a le mong feela ’me Jehova a ke ke a amohela borapeli ba rona. Jehova ke Molimo ea “batlang boinehelo bo khethehileng.”​—Deut. 4:​24. w19.10 27 ¶5-6

Lentsoe la Segerike le fetoletsoeng e le “khannoa” le bolela “ho tsamaisoa” kapa “ho tataisoa.” Lentsoe le tšoanang la Segerike le ile la sebelisoa ke mongoli oa buka ea Liketso e leng Luka ha a ne a bua ka sekepe se ‘khannoang’ ke moea. (Lik. 27:​15) Setsebi se seng sa Bibele se ile sa re ha moapostola Petrose a ne a ngola hore bangoli ba Bibele ba ile ba “tataisoa” ke moea o halalelang, o ile a sebelisa puo ea likepeng. Petrose o ile a re joalokaha moea o tsamaisa sekepe hore se fihle moo se eang, ka tsela e tšoanang le bangoli ba Bibele ba ile ba tataisoa ke moea o halalelang ho phetha mosebetsi oa bona. Setsebi seo sa Bibele se ile sa re: “Ho ne ho tšoana leha eka bangoli ba Bibele ba ne ba phahamisitse liseile tsa likepe tsa bona.” Jehova o ile a bapala karolo ea hae. O ile a etsa hore moea o foke kapa a fana ka moea o halalelang. Kahoo, bangoli ba Bibele ba ile ba khona ho etsa mosebetsi oo ba o filoeng. Ba ile ba latela tataiso ea moea o halalelang. Joalokaha moea o thusa likepe hore li fihle moo li eang li bolokehile, moea o halalelang o re thusa hore re lule re sebeletsa Jehova le har’a mathata ho fihlela re il’o kena lefatšeng le lecha. w19.11 9 ¶7-9

Ho ka etsahala hore ka linako tse ling re ikutloe re nyahame. Empa ha rea lokela ho lula re nahana ka mathata a rona nako eohle. Haeba re lula re nahana ka ’ona, re ka lebala lintho tse ntle tseo Jehova a re tšepisitseng tsona. (Tšen. 21:​3, 4) Re ka nyahama hoo re ka felloang ke matla ra ba ra khaotsa ho sebeletsa Jehova. Nahana ka mohlala oa morali’abo rona e mong oa United States ea loanang ka thata hore a be le tumelo e matla, le hoja a ntse a hlokometse molekane oa hae ea kulang haholo. O ile a ngola a re: “Boemo ba rona boa hlobaetsa hape boa nyahamisa ka linako tse ling, empa tumelo ea rona e matla. Ke leboha Jehova ka lintho tsohle tseo a re fang tsona ho matlafatsa tumelo ea rona le ho re khothatsa. Kannete re hloka ho eletsoa le ho khothatsoa ka tsela ena. Ho etsa hore re tsoele pele re sebeletsa Jehova le ho mamella liteko.” Rea ithuta ho morali enoa oabo rona hore re ka hlola bothata ba ho nyahama. Joang? Lula u hopola hore mathata a hao ke liteko tse tsoang ho Satane. Kholiseha hore Jehova o tla u tšelisa. Hape u ananele lijo tseo Jehova a re fang tsona ka mokhatlo oa hae. w19.11 16 ¶9-10

Ka ho khetheha baholo ba lokela ho mamela molao-motheo ona. Moholo oa tseba hore ha a lokela ho bolella mosali oa hae litaba tsa batho ba bang ka phuthehong. Haeba a etsa joalo, o tla etsa hore batho ba se ke ba mo tšepa hape o tla senya le lebitso la hae le letle. Batho ba nang le boikarabelo ka phuthehong ha baa lokela ho ba “teme-peli” kapa ebe batho ba leshano. (1 Tim. 3:8) Taba ena e bolela hore ha baa lokela ho thetsa batho ba bang kapa ba rate ho seba. Haeba moholo a rata mosali oa hae, a ke ke a mo bolella litaba tseo a sa lokelang ho li tseba. Mosali oa moholo o lokela ho thusa monna oa hae hore a be le lebitso le letle ka hore a se ke a mo qobella ho mo bolella lintho tseo a sa tlamehang ho li tseba. Ha a etsa joalo, o tšehetsa monna oa hae ebile o bontša hore o hlompha batho ba boleletseng monna oa hae makunutu a bona. Ntho ea bohlokoa le ho feta ke hore o thabisa Jehova hobane o etsa hore ho be le bonngoe le khotso ka phuthehong.​—Bar. 14:​19. w20.03 22 ¶13-14

Ka selemo sa 1512 mehleng ea Moshe ha tabernakele e ne e hlongoa thabeng ea Sinai, Moshe o ile a tšoara mokete oa ho hlomamisa Arone le bara ba hae hore ebe baprista. (Ex. 40:​17; Lev. 9:​1-5) Jehova o ile a etsa’ng ho bontša hore o amohela baprista ba sa tsoa khethoa? Ha Arone le Moshe ba ntse ba hlohonolofatsa sechaba, Jehova o ile a etsa hore mollo o chese sehlabelo se neng se le holim’a aletare. (Lev. 9:​23, 24) Mollo o tsoang leholimong o ne o bontša’ng? O ne bontša hore Jehova o tšehetsa ka botlalo taba ea hore ebe Arone le bara ba hae ba khethiloe e le baprista. Ha Baiseraele ba bona hore Jehova o tšehetsa baprista, ba ile ba utloisisa hore le bona ba lokela ho ba tšehetsa. Na rea ameha tabeng ee? E! Baprista ba mehleng ea Baiseraele e ne e mpa e le seriti feela sa boprista bo bong bo molemo ho feta ba bona, e leng ba ba 144 000 ba tla busa le Kreste leholimong. (Baheb. 4:​14; 8:​3-5; 10:1) Re bona ka ho hlaka hore Jehova o tataisa mokhatlo oa hae le ho etsa hore o atlehe. w19.11 23 ¶13; 24 ¶14, 16

Ha Moapostola Pauluse a le Korinthe, o ne a lula le Akuila le Prisilla ’me ba sebetsa ’moho “kaha e ne e le baetsi ba litente ka mosebetsi.” Ha Pauluse a ne a re o ne a sebetsa “bosiu le motšehare,” o ne a sa bolele hore o ne a se na phomolo ho hang. Ka linako tse ling o ne a sa etse mosebetsi oa litente. Ka mohlala, ka Sabatha o ne a phomola. O ne a sebelisa letsatsi leo e le monyetla oa hore a ka bolella Bajuda litaba tse molemo kaha le bona ba ne ba sa sebetse ka Sabatha. (Lik. 13:​14-16, 42-44; 16:​13; 18:​1-4) Pauluse le hoja a ne a lokela ho sebetsa, o ne a etsa bonnete ba hore kamehla o nka karolo “mosebetsing o halalelang oa litaba tse molemo tsa Molimo.” (Bar. 15:​16; 2 Bakor. 11:​23) O ile a khothaletsa batho ba bang hore ba etse se tšoanang. Akuila le Prisilla e ne e le “basebetsi-’moho le [eena] ho Kreste Jesu.” (Bar. 12:​11; 16:3) Pauluse o ile a khothaletsa Bakorinthe hore ba be le ‘ho hongata hoo ba ka ho etsang mosebetsing oa Morena.’ (1 Bakor. 15:​58; 2 Bakor. 9:8) Jehova o ile a boela a bululela moapostola Pauluse hore a re: “Haeba mang kapa mang a sa batle ho sebetsa, le ho ja a se ke a ja.”​—2 Bathes. 3:​10. w19.12 5 ¶12-13

Jehova o ile a bopa Adama le Eva ba e-na le takatso ea ho ba le bana. Empa ke mang ea lokelang ho etsetsa banyalani qeto ea hore na ba ba le bana le hore na ba ba le bona neng? Litsong tse ling, hang ha batho ba qeta ho nyalana, ho lebeletsoe hore ba be le bana. Ka linako tse ling, beng ka bona kapa batho ba bang ba ka ’na ba ba hatella hore ba be le bana kapele. Mor’abo rona Jethro ea lulang Asia o re: “Batho ba bang ba nang le bana ka phuthehong, ba hatella ba se nang bana hore ba be le bana.” Mor’abo rona Jeffrey eo le eena a tsoang Asia o re: “Batho ba bang ba bolella banyalani ba se nang bana hore ha ho na motho ea tla ba hlokomela ha ba se ba tsofetse.” Leha ho le joalo, banyalani ke bona ba lokelang ho iketsetsa qeto ea hore na ba tla ba le bana kapa che. Ke qeto ea bona kaha ke bona ba tla jara boikarabelo. (Bagal. 6:5) Ke ’nete hore beng ka banyalani le metsoalle ba batla hore ba thabe empa ba lokela ho utloisisa hore banyalani ke bona ba lokelang ho etsa qeto.​—1 Bathes. 4:​11. w19.12 22 ¶1-3

Na u thatafalloa ke ho nka Jehova e le Ntate oa hao? Batho ba bang ba ka ’na ba nka Jehova a phahame haholo hoo re seng bohlokoa ho eena. Ha ba lumele hore Molimo ea matla ’ohle oa ba tsotella e le batho ka bomong. Empa Ntate oa rona ea lerato ha a batle ho re re ikutloe ka tsela eo. O re file bophelo ’me o re thusa hore re atamele haufi le eena le hore mo tsebe. Ka mor’a ho tiisa taba ena, moapostola Pauluse o ile a hlalosetsa batho ba neng ba mo mametse ha a le Athene hore Jehova ha a “hole le e mong le e mong oa rona.” (Lik. 17:​24-29) Molimo o batla hore e mong le e mong oa rona a bue le eena feela joalokaha ngoana a ka bua le motsoali oa hae ea lerato le ea mo tsotellang. Batho ba bang ba ka ’na ba thatafalloa ke ho nka Jehova e le ntate oa bona hobane bo-ntate ba bona ba sa ka ba ba bontša hore baa ba rata. Morali’abo rona e mong o re: “Ntate oa ka o ne a ntlhekefetsa ka mantsoe. Kahoo, ha ke qala ho ithuta Bibele, ke ne ke utloa ke thatafalloa ke ho atamela haufi le Jehova.” Na le uena u ikutloa ka tsela e tšoanang? Haeba ho joalo, u se ke oa nyahama, ha nako e ntse e-ea u tla bona hore Jehova ke Ntate ea molemo ka ho fetisisa. w20.02 3 ¶4-5

Jesu o ile a bontša hore ho sa tsotellehe hore na re bona ha re tsofala lintho tseo re li etsetsang Jehova li se na thuso hakae, o ananela ntho e ’ngoe le e ’ngoe eo re mo etsetsang eona tšebeletsong ea hae. (Pes. 92:​12-15; Luka 21:​2-4) Kahoo, etsa sohle seo u ka khonang ho se etsa. Mohlala, u ka bua le batho ka Jehova, oa rapella Bakreste-’moho le uena oa ba oa khothatsa batho ba bang hore ba lule ba tšepahala. Jehova o u nka u le mosebetsi-’moho le eena e seng hobane ho na le lintho tseo u khonang ho li etsa empa hobane u ithaopela ho mo sebeletsa. (1 Bakor. 3:​5-9) Kannete re ananela taba ea hore ebe re sebeletsa Jehova Molimo ea nkang batho ba mo sebeletsang e le ba bohlokoa ka ho fetisisa! O re bopetse hore re etse thato ea hae ’me borapeli bo hloekileng ke bona bo khonang ho re thusa hore re ikutloe re thabela bophelo. (Tšen. 4:​11) Le hoja batho ba lefatše lena ba ka re nka re se na thuso Jehova eena o motlotlo ka rona. (Baheb. 11:​16, 38) Ha re nyahame ka lebaka la ho kula, mathata a lichelete kapa botsofali, re lule re hopola hore ha ho letho le ka re arohanyang le lerato la ntate oa rona Jehova.​—Bar. 8:​38, 39. w20.01 18 ¶16; 19 ¶18-19

Re ka hlola mona ka hore re ikokobetse hape re khotsofale. Ha re e-na le makhabane ana, re ke ke ra ba mona. Boikokobetso bo tla re thusa hore re se ke ra inahana borona feela. Motho ea ikokobelitseng ha a nahane hore ke eena feela ea lokelang ho ba le lintho. (Bagal. 6:​3, 4) Motho ea khotsofalang o ananela le ho khotsofalla lintho tseo a nang le tsona ’me ha a ipapise le batho ba bang. (1 Tim. 6:​7, 8) Motho ea ikokobelitseng le ea khotsofalang oa thaba ha batho ba bang ba fuoa lintho. Re hloka moea o halalelang ho re thusa ho ikokobetsa le ho khotsofala le ho loantša ho ba mona. (Bagal. 5:​16; Bafil. 2:​3, 4.) Moea o halalelang o ka re thusa hore re itlhahlobe ka ho teba re be re hlahlobe le mabaka ao re etsang lintho ka ’ona. Moea o halalelang o ka re thusa ho tlosa menahano le maikutlo a fosahetseng ebe re ba le a nepahetseng.​—Pes. 26:2. w20.02 15 ¶8-9

Boinehelo ke kano eo u e entseng ’me Jehova o lebeletse hore u e phethe. Kahoo, momahana le Bakreste-’moho le uena. Bara le barali beno ke lelapa la hao le lecha. Ha u ea libokeng kamehla, u tla matlafatsa setsoalle sa hao le bona. Bala Bibele ’me u nahanisise ka eona letsatsi le letsatsi. (Pes. 1:​1, 2) Ema hanyane ebe u nahana ka ho teba ka lintho tseo u qetang ho li bala. Lintho tseo li tla u ama pelo. “Rapela u sa khaotse.” (Mat. 26:​41) Thapelo ea hao e tsoang pelong e tla etsa hore u be haufi le Jehova. Lula u batla “ ’muso pele.” (Mat. 6:​33) U ka etsa joalo ka hore u nke mosebetsi oa ho bolela e le oona o tlang pele bophelong ba hao. Ha u bolella batho Bibele hangata, tumelo ea hao e tla matlafala. Mathata ao u tla tobana le ’ona hona joale ke a “motsotsoana ebile a bobebe.” (2 Bakor. 4:​17) Empa boinehelo ba hao le kolobetso li u fa monyetla oa hore u thabe hona joale le nakong e tlang. Empa na ho na le thuso? Kannete e teng!​—1 Tim. 6:​19. w20.03 13 ¶19-21

Haeba thuto ea hao e sa etse liphetoho, u lokela ho ipotsa potso ena, ‘Na ke lokela ho khaotsa thuto?’ Pele u etsa qeto eo, ipotse: ‘Na seithuti sa ka se etsa liphetoho ho latela bokhoni ba sona?’ ‘Na se etsa lintho tseo se ithutileng tsona le ho li “boloka”?’ (Mat. 28:​20) Ka bomalimabe, ho na le liithuti tse ling tse tšoanang le Baiseraele ba mehleng ea Ezekiele. Hlokomela hore na Jehova o ile a reng ka bona ho Ezekiele ha a re: “Bona! Ho bona u joaloka pina e tsosang maikutlo a lerato, joaloka motho ea nang le lentsoe le letle ’me a letsa seletsa se likhoele hantle. Ka sebele ba tla utloa mantsoe a hao, empa ha ho le ea mong ea a phethang.” (Ezek. 33:​32) Re ka ’na ra thatafalloa ho bolella motho hore re khaotsa thuto. Leha ho le joalo, “nako e setseng e fokotsehile.” Ho e-na le ho senya nako re ithuta le motho ea sa etseng liphetoho, re lokela ho leka ho fumana batho ba bontšang hore ba na le “tšekamelo e nepahetseng bakeng sa bophelo bo sa feleng.”​—Lik. 13:​48. w20.01 6 ¶17; 7 ¶20

Ka kakaretso, bolumeli ba bohata ha bo rute thuto ea Mangolo ea hore batho ba mamelang Molimo ba tla phela ka ho sa feleng mona lefatšeng. (2 Bakor. 4:​3, 4) Mehleng ena, malumeli a bohata a ruta hore ha batho ba e-shoa ba ea leholimong. Empa batho ba seng bakae, e leng Liithuti Tsa Bibele tse qalileng ho hatisa Molula-Qhooa ka 1879, ba ne ba sa lumele thuto eo. Ba ne ba lumela hore Molimo o tl’o etsa lefatše Paradeise ’me batho ba limilione ba mo mamelang ba ne ba tla phela hona mona lefatšeng eseng leholimong. Leha ho le joalo, ho ile ha ba nka nako pele ba ka utloisisa hantle hore na batho bao ba mamelang e ne e tla ba bafe. Ke ’nete hore Liithuti Tsa Bibele li ile tsa lemoha hore Mangolo a re ho na le sehlopha se seng sa batho, se neng se ‘rekiloe lefatšeng’ hore se il’o busa le Jesu leholimong. (Tšen. 14:3) Sehlopha seo se ne se tla etsoa ka batho ba 144 000 ba chesehang, ba inehetseng ho Molimo le ba mo sebeletsang ka botšepehi ha ba ntse ba le lefatšeng. w19.09 27 ¶4-5