“Phuthehang”

JEREMIA o buile mantsoe ana a ka holimo ha tlokotsi e ne e sokela Jerusalema le Juda tsa boholo-holo. Ho ne ho potlakile hore barapeli ba ’nete ba bakileng ba Jehova ba phuthoe bakeng sa poloko. Ka ho tšoanang kajeno, Bokreste-’mōtoana bo koenehileng bo tla tloha bo felisoa ‘kotsing e kholo,’ hammoho le ’muso ’ohle oa lefatše oa bolumeli ba bohata. Le hoja lilemo li bile telele ho tloha ka 1914, ha baruti ba Bokreste-’mōtoana ba tšehetsa ka ho feletseng khaphatseho ea mali Ntoeng ea I ea Lefatše, ‘bohale bo chesang ba Jehova ha boa khutla’ joalokaha bo sa ka ba etsa joalo nakong e tšoanang le ena pusong ea morena oa Juda ea molato oa mali Manasse le morena oa Juda ea se nang tumelo Tsedekia. Ba bonolo ba lefatše hona joale ba tlameha ho batla Jehova e le hore ba ka pholoha.—Jeremia 4:5-8; 2 Marena 24:3, 4; Sofonia 2:2, 3.

Temoso ea kajeno e fanoe joang? Makasine oo u o balang hona joale e bile kofuto e ’ngoe e molemo. Koranta ena, joaloka molula-qhooa qhooeng ea oona, ha ea ka ea khaotsa ho tloha ka 1879, e ’nile ea hlokomelisa hore haufinyane bolumeli ba bohato bo tla oa, joalokaha bo tšoantšelitsoe ke Babilona, le ka Puso ea khotso ea Kreste ea Lilemo tse Sekete e tlang ho latela. (Esaia 21:6-12; Tšenolo 20:2, 3; 21:1-4) Ho tloha ha e qala ho hatisa likopi tsa eona tsa pele tse 6 000 ka Senyesemane, e hotse ha fihlela ha Molula-Qhooa—O Tsebahatsa ’Muso oa Jehova kajeno o thabela ho tsamaisoa lefatšeng ka bophara ka likopi tse 12 315 000 ka lipuo tse 103. Ho feta moo, mokhoa oo o hatisoang ka oona o ’nile oa hōlisoa ho theosa le lilemo. Hona joale o hatisoa ka mebala e menè ka lipuo tse 21, empa litokollo tse ling le tsona li hlaha ka mokhoa o bohehang, joalokaha ho lokela makasine o nang le thōmo ea bohlokoa.

Ha khatiso ea oona e ntse e hōla, ho ile ha hlokahala hore khatiso ea oona e qhalanngoe le libaka, hoo hona joale e etsoang ke likhatiso tse tsamaisoang ke Mokhatlo makaleng a 35 ntle ho United States. Ho feta moo, ho tloha ka Pherekhong 1987, likhatiso tsa makasine oa rōna o tlatsanang le ona Tsoha! o hatisoang United States, Brazil, Brithani, Canada, Denmark, Finland, Jeremane, Italy le Japane o tla hatisoa ka mebala e mene. United States hona ho se ho etsahetse ka hore ho kenngoe mechine e meraro e hatisang limakasine ea MAN-Roland e hatisang ka lebelo le leholo khatisong e Mapolasing a Watchtower Wallkill, New York.

Lekala la Mokhatlo le Japane le boetse le sebelisa likhatiso tse lebelo le leholo ho hatisa Libibele, libuka le limakasine ka lipuo tse ’maloa tsa Asia. Ho feta moo, lekala lena ka mosa le fepetse makala a Australia, Korea le Afrika Boroa ka ho a hlomella ka mechine e hatisang ka mebala e menè, e le hore makala ana a mararo hona joale a kena khatisong ea limakasine ka mebala e menè.

Ka lilemo tsena tsohle, makala a Mokhatlo a ’nile a abelana lichelete, ka ntlo-khōlō e le eona e etelletseng pele. Kahoo a mangata a ’nile a thusoa ho latela seo a se hlokang, e-bang e bile tabeng ea ho haha kapa ho atolosa mehaho ea makala, ho e hlomella ka thepa, kapa ho fana ka lichelete tsa bohlokoa haholo mosebetsing oa ho bolela tšimong. Mokhoa ona oa ho ‘lekanya,’ o nolofalitsoeng ke meneelo ea liatla tse bulehileng ea Lipaki tsa Jehova lefatšeng lohle, o hlohonolofalitsoe haholo ke Jehova.—2 Ba-Korinthe 8:12-15.

U ka sheba leqepheng la 2 la makasine ona bakeng sa boitsebiso ba ho beeletsa.